Galʋ 31

Yɩzərayɛlə lɩ̀à ta kʋ̀ʋ̀ də Madɩan dwíí tə

1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Vəli n ta Madɩan dwíí tə, n ma fwi Yɩzərayɛlə lɩ̀à tə lɩŋa, yolwan tə yɩrɩ Madɩan dwíí tə nə tʋn. Kʋ kwa nə, n dàń wá tɩ n va n nyɩna-ba con.» 3 Moyizə swɩ̀n Yɩzərayɛlə lalʋʋ tə con, ʋ wʋ́: «Á wa lɩ̀à duən tíə́ kwatarɩ zɩla, ba va ba ta Madɩan dwíí tə, sə ba fwi Ba-Yígúrə́-Jə-Tiu lɩŋa Madɩan dwíí tə yuu wa. 4 Á dwíí mama wá pa bara mʋ̀rʋ̀ Yɩzərayɛlə dwíə́ tə mama wa, sə ba va ba ta kʋ̀ʋ̀ tə.» 5 Ba kúrí bara mʋ̀rʋ̀ Yɩzərayɛlə dwíí mama wa, kʋ pa bara mʋ̀rʋ̀ fugə də bələ tanɩ, sə ba ta kʋ̀ʋ̀ tə. 6 Moyizə tʋn kwatara mʋ̀rʋ̀ tə, ba nə kúrí dwíí mama wa, sə ba va ba ta kʋ̀ʋ̀ tə, ba mʋ̀ də Yɩɩ joŋwanʋ Eleyazarə bìú Fineyasə, ʋ nə zɩŋa wiən tə nə yɩ Yɩɩ nyiən, də nabwanan tə ba nə wúrí, sə ba ma pa mɩmɩnʋ kʋ̀ʋ̀ tə wa.

7 Ba ta kʋ̀ʋ̀ tə də Madɩan dwíí tə, ndə Ba-Yígúrə́-Jə-Tiu nə pɩn nii Moyizə nə, sə ba tʋn nətʋ, ba ga gʋ Madɩan dwíí bara tə mama. 8 Ba gʋa Madɩan dwíí pɛ̀gá bonu tə də, kʋ̀ʋ̀ təntə wa. Ba mʋ̀ nə yɩ Evi, də Rekɛmə, də Swurə, də Urə, də Reba. Ba tə gʋa Bewɔrə bìú Balamə də, də kwatara sɩ̀ʋ́. 9 Yɩzərayɛlə lɩ̀à tə jɩn Madɩan dwíí tə kana, də ba bɩ̀á, ba ja vìí, ba ga vɩrɩ ba nɩan mama, də ba vanmɩnɩ mama, də ba jɩjə mama. 10 Ba ken mən ba tɩan tə mama nə, ba yà nə wulə tə wa, də ba dəkuu bwálá tə mama nə. 11 Ba pɛ̀ wiən tə mama, ba nə ta ba jon kʋ̀ʋ̀ tə wa, də tə tə mama ba nə vɩrɩ, də ləzoni tə, də vàná tə. 12 Ba ja ləzoni tə, də wiən tə mama ba nə ta ba jon kʋ̀ʋ̀ tə wa, ba bà Moyizə də Yɩɩ joŋwanʋ Eleyazarə, də Yɩzərayɛlə lalʋʋ tə mama yáá con, ba yà nə jə̀ə́ Mʋabə tɩ̀án digə tə wa, ka nə bwə́lə́ Zʋrədɛn mʋnaa tə, Zweriko tɩʋ tə yáá con.

13 Moyizə, də Yɩɩ joŋwanʋ Eleyazarə, də Yɩzərayɛlə dwíə́ yáá tɩ̀án tə mama nan ba yijaa bwálɩ́ tə wa, ba va ba jəri ba, kwa con. 14 Moyizə lɩŋa zàn kwatara mʋ̀rʋ̀ yáá tɩ̀án tə, də kwatara bíí yáá tɩ̀án tə yuu wa, ba nə pìí ba nan kʋ̀ʋ̀ tə ba bɩ̀àn. 15 Moyizə swɩ̀n ba con, ʋ wʋ́: «Bɛ̀ɛ̀ nə pɩn á yá kana tə mama, á wà ba gwɩ? 16 Mə ba mʋ̀ nə Balamə pɩn ba gɩgarɩ Yɩzərayɛlə lɩ̀à tə, kʋ pa ba wà Yɩzərayɛlə lɩ̀à tə wà Ba-Yígúrə́-Jə-Tiu nii zìlí, ndə kʋ nə mɛ nətʋ, woŋwanʋ Pewɔrə yoo tə wa, kʋ ga pa tɩan yayɩpwarʋ tʋ Ba-Yígúrə́-Jə-Tiu lɩ̀à tə wa. 17 Sɩ́ʋ́n nə, á dàń gwɩa bisɩmabarɩ tə mama, də kana tə mama, ba nə yə̀ə́ bɛɛ. 18 Á yaga bwɩ̀ɩ́ tə mʋ̀ mama, ba tə nə yəri bɛɛ, sə ba ya á mʋ̀ nyiən. 19 Á mʋ̀ dàń wá ya yəbə, á fwa dɩan barpɛ kwa con, á yá yijaa bwálɩ́ tə nə. Á wa lɩ̀à tə mama ba nə gʋa lìù, də ba tə mama ba nə dwen tɩgɩ yɩra, də á lɩ̀à tə mama á nə jɩn kʋ̀ʋ̀ tə wa, dàń wá kwɛn ba tɩ̀àn ba lɩ durən yìə̀n wa, batwa nii dɩɩn tə, də barpɛ nii dɩɩn tə nə. 20 Á wá sɩ̀n á gànàn tə də, á lɩ durən wa, də zɩlɩ tə mama nə yɩ tànʋ̀ won, də won tə mama ba nə fwa də bʋ̀nɩ̀ kʋran, də tʋtʋnzɩlɩ tə mama nə yɩ dàʋ̀.»

21 Yɩɩ joŋwanʋ Eleyazarə swɩ̀n kwatara tə con, ba yà nə vəli kʋ̀ʋ̀ tə, ʋ wʋ́: «Á nəŋə nii tə Ba-Yígúrə́-Jə-Tiu nə pɩn Moyizə nə. 22 Sɩ́án tə, də wárʋ́ tə, də cɩnɩan tə, də lugu tə, də kwamɔɔ tə, də lugu yiri don mama, 23 də zɩla tə mama mən nə ba də́, á wá kə tə mən wa, yá tə wá ya parɩ. Á tə wá li tə nɩ́á tə wa, tə nə sɩ̀n durən. Á wá li wiən tə mama mən nə wàá tə də́ nɩ́á tə wa, tə nə sɩ̀n durən. 24 Á wá sɩ̀n á gànàn barpɛ nii dɩɩn tə nə, yá á wá ya parɩ. Kʋ kwa nə, á dàń wàá yijaa bwálɩ́ tə wa á zwɩ.»

Wiən tə ba nə ta ba jon tàrʋ̀ yoo

25 Ba-Yígúrə́-Jə-Tiu swɩ̀n Moyizə con, ʋ wʋ́: 26 «N mʋ̀ də Yɩɩ joŋwanʋ Eleyazarə də lalʋʋ tə dìì tɩ̀án tə gàlà kʋ tə ba nə ta ba jon kʋ̀ʋ̀ tə wa, də ləzoni tə də vàná tə ba nə jɩn. 27 N wá tara wiən tə ba nə ta ba jon kʋ̀ʋ̀ tə wa, n tún púlə́ bələ, tə mɛ duən. N wá pa púlí don kwatara tə nə, ba nə vəli kʋ̀ʋ̀ tə, n ga pa púlí tə don tə lalʋʋ tə mama nə. 28 N wá lɩ Ba-Yígúrə́-Jə-Tiu tori kwatara tə ba nə ta kʋ̀ʋ̀ tə tori tə wa. N wá lɩ lìù nədʋ ləzoni biənu yuu wa, də vànɩ́ nədʋ vanfaran biənu yuu wa, də bɩnɛ biənu yuu wa, də vanmɩnɩ biənu yuu wa. 29 Á wá lɩ kʋ kwatara tə tori tə yuu wa, n pa Yɩɩ joŋwanʋ Eleyazarə nə, ndə Ba-Yígúrə́-Jə-Tiu tori nə. 30 Yɩzərayɛlə lalʋʋ tə tori tə yuu wa, n wá lɩ lìù nədʋ ləzoni finu mama yuu wa, də vànɩ́ nədʋ vanfaran finu mama yuu wa, də bɩnɛ finu mama yuu wa, də vanmɩnɩ finu mama yuu wa, də vàná yiri don mama yuu wa, n pa Levi dwíí tə nə, ba nə tʋŋa Ba-Yígúrə́-Jə-Tiu wúlú gansili tə wa tʋ̀tʋ̀nán tə.»

31 Moyizə də Yɩɩ joŋwanʋ Eleyazarə tʋn ndə Ba-Yígúrə́-Jə-Tiu nə pɩn nii Moyizə nə, sə ʋ tʋn nətʋ. 32 Wiən tə nə ga wiən tə wa kwatara tə nə ta ba jon kʋ̀ʋ̀ tə wa yà yɩ vanmɩnɩ 675 000, 33 də vanfaran 72 000, 34 də bɩnɛ 61 000, 35 də bisɩmakanɩ 32 000, ba yà tə nə yəri bɛɛ.

36 Ba pɩn tə faan lɩ̀à tə nə ta kʋ̀ʋ̀ tə nə, tə nə yɩ vanmɩnɩ 337 500, 37 ba ga lɩ tə wa 675, tə nə yɩ Ba-Yígúrə́-Jə-Tiu tori, 38 də vanfaran 36 000, ba nə lɩ tə 72, tə nə yɩ Ba-Yígúrə́-Jə-Tiu tori, 39 də bɩnɛ 30 500, ba nə lɩ tə 61, tə nə yɩ Ba-Yígúrə́-Jə-Tiu tori, 40 də Ləzoni 16 000, ba nə lɩ ba 32, ba nə yɩ Ba-Yígúrə́-Jə-Tiu tori. 41 Moyizə pɩn tori tə, ba nə pɩn Ba-Yígúrə́-Jə-Tiu nə, Yɩɩ joŋwanʋ Eleyazarə nə, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.

42 Faan tə don tə Moyizə nə pwɛ̀ də kwatara tə tori tə, yɩn Yɩzərayɛlə lɩ̀à tə tori. 43 Lalʋʋ tə tori təntə yɩn vanmɩnɩ 337 500, 44 də vanfaran 36 000, 45 də bɩnɛ 30 500, 46 də ləzoni 16 000. 47 Moyizə lɩ lìù lɩ̀à finu mama yuu wa, də vànɩ́ vàná finu mama yuu wa, kʋ faan təntə wa, kʋ nə yɩ Yɩzərayɛlə lɩ̀à tə tori, ʋ pa Levi dwíí tə nə, ba nə tʋŋa Ba-Yígúrə́-Jə-Tiu wúlú gansili tə wa tʋ̀tʋ̀nán tə, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.

Zìlə́ won tə ba nə pɩn Yɩɩ nə yoo

48 Kwatara yáá tɩ̀án, də kwatara mʋ̀rʋ̀ yáá tɩ̀án, də kwatara bíí yáá tɩ̀án twi ba yí Moyizə, 49 ba swɩ̀n ʋ con, ba wʋ́: «Nə mʋ̀ n tʋ̀tʋ̀nà tə gàlɩ̀ kwatara tə, ba yà nə wulə nə jɩɩn wa, ladʋa tətə wà mùrì ba nii nə. 50 Kʋ mʋ̀ nə pɩn, nə lìù mama ja zìlə́ wiən ʋ bà, sə ʋ pa Ba-Yígúrə́-Jə-Tiu nə. Tə yɩ sɩ́án wiən, tə nə yɩ zànán, də jɩvala, də jɩfɩla, də zɩnkwana, də bɩan zànán, sə nə ma fwa cʋna kwɩan joŋi, Ba-Yígúrə́-Jə-Tiu yáá con.» 51 Moyizə də Yɩɩ joŋwanʋ Eleyazarə jon zɩla tə mama ba con, tə nə yɩ sɩ́án ba ma fwa tə. 52 Sɩ́án tə mama kwatara mʋ̀rʋ̀ yáá tɩ̀án tə, də kwatara bíí yáá tɩ̀án tə nə ja bà ba pa Ba-Yígúrə́-Jə-Tiu nə yà yɩ kilo 170. 53 Kwatara tə lìù mama yà vɩrɩ wiən kʋ̀ʋ̀ tə wa, ʋ ma fwa ʋ tətə nyiən. 54 Moyizə də Yɩɩ joŋwanʋ Eleyazarə dàń jon sɩ́án tə kwatara mʋ̀rʋ̀ yáá tɩ̀án tə, də kwatara bíí yáá tɩ̀án tə con, ba ja zʋ Yɩɩ jə́rə́ gansili tə wa, sə kʋ pa Ba-Yígúrə́-Jə-Tiu lìí Yɩzərayɛlə lɩ̀à tə yoo.