Dwíə́ batwa tə nə jə̀ə́ Zʋrədɛn mʋnaa tə yɩɩ yɩpɩan con yoo
32
1 Ribɛn dwíí tə də Gadə dwíí tə yà jə vàná, tə nə dáá zənzən, tə wàrɩ̀ tə gàlɩ̀. Ba nɩ də Yazɛrə də Galadə lʋʋ nii tə yà mɛ də kʋ̀nà. 2 Gadə dwíí tə də Ribɛn dwíí tə, dàń twi ba swɩ̀n Moyizə, də Yɩɩ joŋwanʋ Eleyazarə, də lalʋʋ tə yáá tɩ̀án tə con, ba wʋ́: 3 «Atarɔtə, də Dibon, də Yazɛrə, də Niməra, də Ɛswəbon, də Eleyale, də Sebamə, də Nebo, də Bewon 4 yɩ bwálá tə nə wulə lʋʋ nii tə wa, Ba-Yígúrə́-Jə-Tiu nə ta ʋ jon, Yɩzərayɛlə lɩ̀à yáá con, tə ga yɩ bwálá tə nə mɛ də kʋ̀nà, yá nə mʋ̀ n tʋ̀tʋ̀nà tə kʋ̀nɩ̀ vàná.» 5 Ba swɩ̀n ba súrí là, ba wʋ́: «N nə wá sɛ̀ n fwa pubwanʋ nə yɩra, sə n pa kʋ lʋʋ nii tə ya nə mʋ̀ n tʋ̀tʋ̀nà tə tori, dàn ká ja nəba n bɩn Zʋrədɛn mʋnaa tə.»6 Moyizə le Gadə dwíí tə də Ribɛn dwíí tə, ʋ wʋ́: «Á wʋ́ bɛ̀ɛ̀? Á nubɩa tə wá va kʋ̀ʋ̀, yá á mʋ̀ ga mɛn yəbə naaa? 7 Bɛ̀ nə pɩn, á pɩ̀à sə á gwàrɩ̀ Yɩzərayɛlə lɩ̀à tə jɩɩn, sə ba dàn ká bɩn, ba va lʋʋ nii tə wa, Ba-Yígúrə́-Jə-Tiu nə pɩn ba? 8 Mə nətʋ nə á nyɩna-ba tʋn máŋá tə wa, à nə zɩgɩ Kadɛswə-Barəneya nə, à tʋn ba sə ba va ba mɩ̀àn lʋʋ nii tə. 9 Ba vəli ba yí Ɛswəkɔlə vara tə, ba ga mɩ̀àn lʋʋ nii tə ba zwɛ̀. Kʋ kwa nə, ba gwàrɩ̀ Yɩzərayɛlə lɩ̀à tə jɩɩn, sə ba dàn ká va lʋʋ nii tə wa, Ba-Yígúrə́-Jə-Tiu nə pɩn ba. 10 Ba-Yígúrə́-Jə-Tiu lɩŋa zàn Yɩzərayɛlə lɩ̀à tə yuu wa kʋ dɩɩn tə nə, ʋ ga dù, ʋ wʋ́: 11 “Bara tə mama ba nə nan Ezwipətə wa, kʋ nə zɩgɩ ba tə nə jə bɩna sapʋa, də ba tə nə dwə nətʋ, bá na lʋʋ nii tə à nə kàn nii, sə à pa Abərahamə, də Yɩzakə, də Zwakɔbə nə. Cɩ́gá, ba wà à nii zìlí yoo mama wa. 12 Kʋ yɩ Yefune bìú Kalɛbə, ʋ nə nan yàrá dwíí tə wa, də Nun bìú Zozuwe cɩcɩ nə zìlí Ba-Yígúrə́-Jə-Tiu nii”. 13 Ba-Yígúrə́-Jə-Tiu lɩŋa zàn Yɩzərayɛlə lɩ̀à tə yuu wa, yá ʋ pɩn ba ywan kasɔɔ lanworu tə wa bɩna sapwɩlə, kʋ va kʋ yí máŋá tə, ba mʋ̀ dwíí təntə mama nə tʋn kʋ tə nə lwara Ba-Yígúrə́-Jə-Tiu yáá con, nə tɩga ba zwɛ̀. 14 Yá sɩ́ʋ́n nə, á mʋ̀ cʋna lɩ̀à bɩ̀á-ba, á də zàn á wulə á nyɩna-ba nabwɩɩ tə wa, sə kʋ pa Ba-Yígúrə́-Jə-Tiu lɩŋa kʋ́ʋ̀ zàn Yɩzərayɛlə lɩ̀à tə yuu wa! 15 Cɩ́gá, də á nə vɩga ʋ nii, ʋ kʋ́ʋ̀ wá pa Yɩzərayɛlə lɩ̀à tə dán kasɔɔ lanworu tə wa, yá kʋ dàń wá ya á mʋ̀ nə gʋa lalʋʋ kʋ tə.»
16 Ba twən ba yí Moyizə yɩra, ba swɩ̀n ʋ con, ba wʋ́: «Nə wá lwà patun yəbə nə kə nə vanmɩnɩ tə lá, nə ga lwà tɩan nə pa nə dìə̀ lɩ̀à tə nə. 17 Yá nə tətə dàń wá tì nə kwatarɩ zɩla lala, nə ya Yɩzərayɛlə lɩ̀à tə yáá, nə ja va nə yí bwálɩ́ tə ba nə wá ya là. Nə dìə̀ lɩ̀à nə wá ya tɩan tə wa, nə nə lwə̀ nə kɩkarɩ də biritaŋʋ, sə tə cɩ̀ ba nə, lʋʋ nii tə lɩ̀à tə yɩrɩ. 18 Nə bá pìí nə va nə sànɩ́ wa, də Yɩzərayɛlə lɩ̀à tə lìù mama nə wà ʋ tori nɩ. 19 Nə bá jon tori ba tɩa tə tarʋ wa, Zʋrədɛn mʋnaa tə kwa con. Cɩ́gá, nə wá na nə tori Zʋrədɛn mʋnaa tə vàn kʋ tə nə, yɩɩ yipɩan con.»
20 Moyizə swɩ̀n ba con, ʋ wʋ́: «Kʋ ziən, á tʋŋa kʋ nətʋ tə! Á tíə́ á kwatarɩ zɩla, á va á ta kʋ̀ʋ̀ tə Ba-Yígúrə́-Jə-Tiu yáá con. 21 Á mama tíə́ kwatarɩ zɩla, á ja bɩn Zʋrədɛn mʋnaa tə vàn tə don nə, Ba-Yígúrə́-Jə-Tiu yáá con, kʋ va kʋ yí máŋá tə ʋ nə wá dɩŋa ʋ dʋŋa tə mama ʋ lɩ ʋ yáá con. 22 Yá máŋá tə Ba-Yígúrə́-Jə-Tiu nə dí dɩ̀àn lʋʋ nii tə yuu wa ʋ zwɛ̀, á dàń wá pìí á bà, yá á wá tɩnɩ á tɩ̀àn Ba-Yígúrə́-Jə-Tiu də Yɩzərayɛlə lɩ̀à tə yáá con. Yá lʋʋ nii kʋ tə nə wulə Zʋrdɛn mʋnaa tə yɩɩ yipɩan con dàń wá ya á mʋ̀ nyiən, Ba-Yígúrə́-Jə-Tiu yáá con. 23 Yá á nə wà kʋ nətʋ tə tʋn, kʋ yɩ cʋna á tʋn á zɩgɩ Ba-Yígúrə́-Jə-Tiu nə, á ga mɛ sə á lwarɩ də, á cʋna tə wá pìí tə ja á tətə. 24 Á lwie tɩan á pa á dìə̀ lɩ̀à tə nə, də patun á kə á vanmɩnɩ tə lá, á ga tʋn kʋ tə nə nan á nii wa, á pa kʋ sú.»
25 Gadə dwíí tə də Ribɛn dwíí tə swɩ̀n Moyizə con, ba wʋ́: «Nə mʋ̀ n tʋ́tʋ́ná tə wá tʋn kʋ tə mama, n mʋ̀ nə yuu-tiu nə pɩn nii, sə nə tʋn. 26 Nə bɩ̀á tə, də kana tə, də nə vanmɩnɩ tə, də nə vanfaran tə mama wá mɛn Galadə tɩan tə wa. 27 Yá nə mama wá tì kwatarɩ zɩla, nə va nə ta kʋ̀ʋ̀ tə Ba-Yígúrə́-Jə-Tiu yáá con, ndə n nə swɩ̀n nətʋ.»
28 Moyizə pɩn nii Yɩɩ joŋwanʋ Eleyazarə, də Nun bìú Zozuwe, də Yɩzərayɛlə dwíə́ tə wa dìì tɩ̀án tə nə, Ribɛn dwíí tə də Gadə dwíí tə yuu wa. 29 Moyizə swɩ̀n ba con, ʋ wʋ́: «Gadə dwíí tə də Ribɛn dwíí tə nə bɩn Zʋrədɛn mʋnaa tə də aba, ba mama nə tì kwatarɩ zɩla, sə ba ta kʋ̀ʋ̀ tə Ba-Yígúrə́-Jə-Tiu yáá con, máŋá tə á nə ta lʋʋ nii tə á də́, á wá pa ba Galadə lʋʋ nii tə, sə kʋ ya ba tori. 30 Yá ba nə wà kwatarɩ zɩla tì, sə ba bɩn Zʋrədɛn mʋnaa tə də aba, kʋ yɩ Kanaan lʋʋ nii tə wa nə ba wá na ba tori, á titəŋi wa.» 31 Gadə dwíí tə də Ribɛn dwíí tə le, ba wʋ́: «Nə wá tʋn kʋ tə mama Ba-Yígúrə́-Jə-Tiu nə swɩ̀n nə mʋ̀ n tʋ̀tʋ̀nà tə con. 32 Nə wá tì kwatarɩ zɩla, nə va Kanaan lʋʋ nii tə wa, Ba-Yígúrə́-Jə-Tiu yáá con, yá lʋʋ nii tə nə wá ya nə mʋ̀ tori yɩ kʋ wulə yəbə, Zʋrədɛn mʋnaa tə yɩɩ yipɩan con.»
33 Moyizə pɩn Amɔrə dwíí pɩ̀ʋ́ Sihon payuu tə, də Baswan pɩ̀ʋ́ Ogə payuu tə, də lʋʋ nii tə də kʋ wa tɩan tə mama, də nagwanɛɛ tə mama nə kɩkarɩ kʋ, Gadə dwíí tə, də Ribɛn dwíí tə, də Zʋzɛfə bìú Manase dwíí faan tə nə.
34 Gadə dwíí tə lwə̀ Dibon, də Atarɔtə, də Arɔwɛrə, 35 də Atərɔtə-Swofan, də Yazɛrə, də Yogəboha, 36 də Bɛtə-Niməra, də Bɛtə-Haran tɩan tə. Tə yɩ tɩan ba nə lwə̀ ba kɩkarɩ də biritaŋʋ, kʋ súrí vanmɩnɩ patun nə.
37 Ribɛn dwíí tə lwə̀ Ɛswəbon, də Eleyale, də Kiriyatayimə, 38 də Nebo, də Baalə-Meyon, də Sibəma tɩan tə. Ba lwàń tɩan təntə ba nə lwə̀ duən yɩra.
39 Manase bìú Makirə dwíí tə vəli ba ta Galadə nagwanaa tə ba də́, ba ga dɩŋa Amɔrə dwíí tə yà nə wulə lá, ba lɩ. 40 Moyizə pɩn Galadə nagwanaa tə Manase bìú Makirə nə, ʋ jə̀ń lá. 41 Manase bìú Yayirə vəli ʋ ta Amɔrə dwíí tə tɩan tə ʋ də́, ʋ ga dɩ tə yɩrɩ Yayirə tɩan. 42 Noba vəli ʋ ta Kənatə də kʋ nii tɩbii tə ʋ də́, ʋ ga dɩ ʋ tətə yɩrɩ Noba tə, tə nə.