Galʋ 33

Bwálá tə Yɩzərayɛlə lɩ̀à tə nə twá lá ba lɛ, ba nə nan Ezwipətə kwa nə

1 Nə̀ń bwálá tə Moyizə də Aron nə ja Yɩzərayɛlə lɩ̀à tə ba twá lá ba lɛ, ba pú duən kwa ndə kwatara púlə́ nə, ba nə nan Ezwipətə kwa nə. 2 Moyizə pʋ́pʋ́nɩ́ bwálá tə də bwálá tə ba nə jə̀ń lá, kʋ twá nii tə nə Ba-Yígúrə́-Jə-Tiu nə pɩn. Nə̀ń bwálá tə, ba nə jə̀ń là ba ga zàn.

3 Ba zàn Raməsɛsə nə, təntən cànà tə dɩan fugə də bonu dɩɩn nə, ba vìí. Pakə* cànà tə tɩpʋrɩ nə nə Yɩzərayɛlə lɩ̀à tə nan Ezwipətə tɩ̀án tə mama yɩ́á wa, ba vìí. 4 Yá Ezwipətə tɩ̀án tə yà wulə ba gùrì ba təntən bibara tə, Ba-Yígúrə́-Jə-Tiu nə gʋa ba titəŋi wa, sə ʋ ma bʋ̀rɩ̀ ba woŋwanan tə bʋra.

5 Yɩzərayɛlə lɩ̀à tə nə zàn Raməsɛsə nə, ba vəli ba kə ba yijaa bwálɩ́ Sukotə nə. 6 Ba nə zàn Sukotə nə, ba vəli ba kə ba yijaa bwálɩ́ Etamə nə, kʋ nə wulə kasɔɔ lanworu tə nii nə. 7 Ba nə zàn Etamə nə, ba pìí ba bà Pi-Hahirɔtə con, kʋ nə wulə Baalə-Sefon yáá con, ba kə ba yijaa bwálɩ́ Migədolə yáá nə. 8 Ba nə zàn Pi-Hahirɔtə nə, ba bɩn mʋʋ tə, ba nan ba va kasɔɔ lanworu tə con. Ba vəli dɩan batwa Etamə kasɔɔ lanworu tə wa, ba va ba kə ba yijaa bwálɩ́ Mara nə. 9 Ba nə zàn Mara nə, ba vəli ba yí Elimə, nabuliyia fugə də bələ, də kʋra dəkurən sapwɩtwa də fugə nə wulə lá. Mə lá nə, ba ken ba yijaa bwálɩ́. 10 Ba nə zàn Elimə nə, ba vəli ba kə ba yijaa bwálɩ́ Mɩncanɩ mʋʋ tə nii nə. 11 Ba nə zàn Mɩncanɩ mʋʋ tə nii nə, ba vəli ba kə ba yijaa bwálɩ́ Sin kasɔɔ lanworu tə wa. 12 Ba nə zàn Sin kasɔɔ lanworu tə wa, ba vəli ba kə ba yijaa bwálɩ́ Dɔfəka nə. 13 Ba nə zàn Dɔfəka nə, ba vəli ba kə ba yijaa bwálɩ́ Alusə nə. 14 Ba nə zàn Alusə nə, ba vəli ba kə ba yijaa bwálɩ́ Refidimə nə, yá lalʋʋ tə wà nɩ́á lá nɩ, sə ba nyʋn. 15 Ba zàn Refidimə nə, ba va ba kə ba yijaa bwálɩ́ Sinayi kasɔɔ lanworu tə wa.

16 Ba nə zàn Sinayi kasɔɔ lanworu tə wa, ba vəli ba kə ba yijaa bwálɩ́ Kibərɔtə-Tava nə. 17 Ba nə zàn Kibərɔtə-Tava nə, ba vəli ba kə ba yijaa bwálɩ́ Haserɔtə nə. 18 Ba nə zàn Haserɔtə nə, ba vəli ba kə ba yijaa bwálɩ́ Ritəma nə. 19 Ba nə zàn Ritəma nə, ba vəli ba kə ba yijaa bwálɩ́ Rimɔn-Perɛsə nə. 20 Ba nə zàn Rimɔn-Perɛsə nə, ba vəli ba kə ba yijaa bwálɩ́ Libəna nə. 21 Ba nə zàn Libəna nə, ba vəli ba kə ba yijaa bwálɩ́ Risa nə. 22 Ba nə zàn Risa nə, ba vəli ba kə ba yijaa bwálɩ́ Kehelata nə. 23 Ba nə zàn Kehelata nə, ba vəli ba kə ba yijaa bwálɩ́ Swefɛrə paan tə yuu wa. 24 Ba nə zàn Swefɛrə paan tə yuu wa, ba vəli ba kə ba yijaa bwálɩ́ Harada nə. 25 Ba nə zàn Harada nə, ba vəli ba kə ba yijaa bwálɩ́ Makelɔtə nə. 26 Ba nə zàn Makelɔtə nə, ba vəli ba kə ba yijaa bwálɩ́ Tahatə nə. 27 Ba nə zàn Tahatə nə, ba vəli ba kə ba yijaa bwálɩ́ Tera nə. 28 Ba nə zàn Tera nə, ba vəli ba kə ba yijaa bwálɩ́ Mitəka nə. 29 Ba nə zàn Mitəka nə, ba vəli ba kə ba yijaa bwálɩ́ Hasəmona nə. 30 Ba nə zàn Hasəmona nə, ba vəli ba kə ba yijaa bwálɩ́ Moserɔtə nə. 31 Ba nə zàn Moserɔtə nə, ba vəli ba kə ba yijaa bwálɩ́ Bene-Yakan nə. 32 Ba nə zàn Bene-Yakan nə, ba vəli ba kə ba yijaa bwálɩ́ Hɔrə-Gidəgadə nə. 33 Ba nə zàn Hɔrə-Gidəgadə nə, ba vəli ba kə ba yijaa bwálɩ́ Yɔtəbata nə. 34 Ba nə zàn Yɔtəbata nə, ba vəli ba kə ba yijaa bwálɩ́ Abərona nə. 35 Ba nə zàn Abərona nə, ba vəli ba kə ba yijaa bwálɩ́ Esion-Gebɛrə nə. 36 Ba nə zàn Esion-Gebɛrə nə, ba vəli ba kə ba yijaa bwálɩ́ Sin kasɔɔ lanworu tə wa, Kadɛswə nə. 37 Ba nə zàn Kadɛswə nə, ba vəli ba kə ba yijaa bwálɩ́ Hɔrə paan tə yuu wa, Edomə lʋʋ nii tə sɩswɩan wa.

38 Yɩɩ joŋwanʋ Aron dɩ̀gà Hɔrə paan tə yuu wa, ndə Ba-Yígúrə́-Jə-Tiu nə pɩn nii nətʋ, yá mə là nə ʋ tɩga, bonu nii cànà tə təntən dɩɩn nə. Kʋ yɩn Yɩzərayɛelə lɩ̀à tə nə nan Ezwipətə, bɩna sapwɩlə kwa nə. 39 Aron yà jə bɩna bíí də sapʋa də batwa, máŋá tə wa ʋ nə tɩga Hɔrə paan tə yuu wa.

40 Kanaan tɩ̀án pɩ̀ʋ́ Aradə, ʋ nə wulə Negɛbə nə, Kanaan lʋʋ nii tə wa, nì də Yɩzərayɛlə lɩ̀à tə bɩ̀àn.

41 Yɩzərayɛlə tə zàn Hɔrə paan tə yuu wa, ba va ba kə ba yijaa bwálɩ́ Saləmona nə. 42 Ba nə zàn Saləmona nə, ba vəli ba kə ba yijaa bwálɩ́ Punon nə. 43 Ba nə zàn Punon nə, ba vəli ba kə ba yijaa bwálɩ́ Obɔtə nə. 44 Ba nə zàn Obɔtə nə, ba vəli ba kə ba yijaa bwálɩ́ Yiye-Abarimə nə, Mʋabə lʋʋ nii sɩswɩan tə wa.

45 Ba nə zàn Yiye-Abarimə nə, ba vəli ba kə ba yijaa bwálɩ́ Dibon-Gadə nə. 46 Ba nə zàn Dibon-Gadə nə, ba vəli ba kə ba yijaa bwálɩ́ Aləmon-Dibəlatayimə nə. 47 Ba nə zàn Aləmon-Dibəlatayimə nə, ba vəli ba kə ba yijaa bwálɩ́ Abarimə paan tə yuu wa, Nebo yáá con. 48 Ba nə zàn Abarimə paan tə yuu wa, ba vəli ba kə ba yijaa bwálɩ́ Mʋabə tɩ̀án digə tə wa, Zʋrədɛn mʋnaa tə nii nə, Zweriko tɩʋ tə yáá con. 49 Ba ken ba yijaa bwálɩ́ Zʋrədɛn mʋnaa tə nii nə, kʋ nə zɩgɩ Bɛtə-Yeswimɔtə nə, kʋ va kʋ yí Abɛlə-Switimə, kʋ nə wulə Mʋabə tɩ̀án digə tə wa.

Kanaan lʋʋ nii tə tarʋ yoo

50 Ba-Yígúrə́-Jə-Tiu swɩ̀n Moyizə con, Mʋabə tɩ̀án digə tə wa, Zʋrədɛn mʋnaa tə nii nə, Zweriko tɩʋ tə yáá con, ʋ wʋ́: 51 «Swɩ̀n Yɩzərayɛlə lɩ̀à tə con, də máŋá tə á nə bɩn Zʋrədɛn mʋnaa tə, sə á ma zʋ Kanaan lʋʋ nii tə wa, 52 á wá dɩŋa lʋʋ nii tə lɩ̀à tə mama á lɩ á yáá con. Á wá pa ba kapana woŋwanan tə mama, də ba woŋwanan tə mama ba nə nyɩan lugu ba ma fwa nyʋn lá, á ga cʋ̀gʋ̀ ba jwəŋə dədwələn* tə mama. 53 Á wá jon lʋʋ nii tə, á ya kʋ wa. Cɩ́gá, à pɩn aba lʋʋ nii təntə, sə á tɩnɩ kʋ. 54 Á wá pwárɩ́, á ma tara lʋʋ nii tə, á pa á dwíə́ tə nə. Á wá pa tori tə nə dáá dwíí tə nə kʋ nə dáá, á ga pa tori tə nə mun dwíí tə nə kʋ nə mun. Dwíí mama wá na kʋ tori, kʋ twá pwárʋ́ nə. Á mɛ sə á twá á nɩbara-ba dwíə́ tə nə, á ma tara kʋ. 55 Yá á nə wà lʋʋ nii tə lɩ̀à tə dɩŋɩ á lɩ, sə á tɩnɩ kʋ, ba mʋ̀ lɩ̀à təntə á nə wá yá lá, wá pa á də́ càn, ndə casʋran nə zwe á yɩ́á wa, nə à yə̀ə́ ndə líú nə zwe á səpunə wa. Ba wá ta ba zɩgɩ á nə, lʋʋ nii tə wa, á nə wá ya. 56 Yá kʋ tə à yà nə bʋ́n sə à tʋn ba yɩra tə, dàń yɩ á mʋ̀ yɩra nə à wá tʋn kʋ.»