Kanaan lʋʋ nii tə sɩswɩan yoo
34
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Pa nii kʋ tə Yɩzərayɛlə lɩ̀à tə nə. N wá swɩ̀n ba con də máŋá tə á nə zʋa Kanaan lʋʋ nii tə wa, nə̀ń lʋʋ nii tə, kʋ nə wá ya á tori sɩswɩan:3 Á lʋʋ nii tə jɩgwiə saparʋ con sɩswɩan wá zɩgɩ Sin kasɔɔ lanworu tə nə, kʋ nə daa Edomə lʋʋ nii tə yɩra. Yɩɩ yipɩan con, á sɩswɩan tə wá sinti jɩgwiə saparʋ con, Nəkuən mʋʋa tə nii nə. 4 Á sɩswɩan tə wá kɩkarɩ tə twá Akərabimə cwəŋə dədolu tə jɩgwiə saparʋ con, tə twá Sin tɩʋ tə con, tə va tə jɩrɩ Kadɛswə-Barəneya tɩʋ tə jɩgwiə saparʋ con. Tə wá zɩgɩ lá, tə twá Hasarə-Adarə tɩʋ tə con, tə va Asəmon tɩʋ tə con. 5 Kʋ nə zɩgɩ Asəmon tɩʋ tə nə, á sɩswɩan tə wá kɩkarɩ tə va Ezwipətə nacoru tə con, tə va tə jɩrɩ mʋʋ tə nə. 6 Á yɩɩ yizwɩa con sɩswɩan wá ya mʋʋ nəfarʋbtə. Mə kʋ mʋ̀ nə wá ya á sɩswɩan yɩɩ yizwɩa con. 7 Nə̀ń á sɩswɩan nə yɩ nətʋ jɩzən saparʋ con. Kʋ nə zɩgɩ mʋʋ nəfarʋ tə nə, á wá tún sɩswɩan á ja va á yí Hɔrə paan tə. 8 Kʋ nə zɩgɩ Hɔrə paan tə nə, á wá tún sɩswɩan á ja va á yí Hamatə tɩʋ nii nə, sə sɩswɩan tə jɩrɩ Sedadə tɩʋ nə. 9 Sɩswɩan tə wá twá Zifəron tɩʋ tə con, tə va tə jɩrɩ Hasarə-Enan tɩʋ tə nə. Mə á jɩzən saparʋ con sɩswɩan wá ya nətʋ. 10 Á wá tún á yɩɩ yipɩan con sɩswɩan tə, tə zɩgɩ Hasarə-Enan tɩʋ tə nə, tə va tə yí Sefamə tɩʋ tə. 11 Sɩswɩan tə wá zɩgɩ Sefamə tɩʋ tə nə, tə va Ribəla tɩʋ tə con, kʋ nə wulə Ayin tɩʋ tə yɩɩ yipɩan con, tə ga wá va tə ja Kinerɛtəc mʋʋ tə yɩra, yɩɩ yipɩan con. 12 Sɩswɩan tə kʋ́ʋ̀ wá va tə nan Zʋrədɛn mʋnaa tə nə, tə lɛ tə va tə jɩrɩ nəkuən mʋʋ tə nə. Mə á lʋʋ nii tə də kʋ sɩswɩan tə nə kɩkarɩ kʋ, wá ya nətʋ.»
13 Moyizə pɩn nii kʋ tə Yɩzərayɛlə lɩ̀à tə nə, ʋ wʋ́: «Mə lʋʋ nii tə, á nə wá twá pwárʋ́ nə á ma tara nə nətʋ. Mə lʋʋ nii təntə nə Ba-Yígúrə́-Jə-Tiu pɩn nii, sə á tara á pa dwíə́ nʋgʋ də faan tə nə. 14 Cɩ́gá, Ribɛn dwíí tə də ba dìì tə, də Gadə dwíí tə də ba dìì tə, də Manase dwíí tə faan mʋ̀ dí yáá ba na ba tori. 15 Dwíə́ bələ də faan təntə dí yáá ba na ba tori Zʋrədɛn mʋnaa tə kwa, Zweriko tɩʋ tə yáá con, yɩɩ yipɩan con.»
Lʋʋ nii tə tarʋ yáá tɩ̀án yɩra
16 Ba-Yígúrə́-Jə-Tiu swɩ̀n Moyizə con, ʋ wʋ́: 17 «Nə̀ń lɩ̀à tə yɩra, ba nə wá tara lʋʋ nii tə, ba pa aba: Kʋ yɩ Yɩɩ joŋwanʋ Eleyazarə də Nun bìú Zozuwe. 18 Á tə wá lɩ yáá tíú nədʋ dwíí mama wa, sə ba san ba tara lʋʋ nii tə. 19 Nə̀ń bara təntə yɩra:
Zwida dwíí tə wa, kʋ yɩ Yefune bìú Kalɛbə.
20 Simeyon dwíí tə wa, kʋ yɩ Amihudə bìú Samiyɛlə.
21 Bɛnzwamɛn dwíí tə wa, kʋ yɩ Kisəlon bìú Elidadə.
22 Dan dwíí tə wa, kʋ yɩ Yogəli bìú Buki, ʋ nə yɩ yáá tíú.
23 Zʋzɛfə bìú Manase dwíí tə wa, kʋ yɩ Efodə bìú Haniyɛlə, ʋ nə yɩ yáá tíú.
24 Efərayimə dwíí tə wa, kʋ yɩ Swifətan bìú Kemuwɛlə, ʋ nə yɩ yáá tíú.
25 Zabulon dwíí tə wa, kʋ yɩ Parənakə bìú Elisafan, ʋ nə yɩ yáá tíú.
26 Yɩsakarə dwíí tə wa, kʋ yɩ Azan bìú Palətiyɛlə, ʋ nə yɩ yáá tíú.
27 Azɛrə dwíí tə wa, kʋ yɩ Swelomi bìú Ahihudə, ʋ nə yɩ yáá tíú.
28 Nɛfətali dwíí tə wa, kʋ yɩ Amiyudə bìú Pedayɛlə, ʋ nə yɩ yáá tíú.»
29 Mə lɩ̀à təntə nə nə Ba-Yígúrə́-Jə-Tiu pɩn nii, sə ba tara Kanaan lʋʋ nii tə, ba pa Yɩzərayɛlə lɩ̀à tə nə.