Tɩan tə ba nə pɩn Levi dwíí tə nə
35
1 Ba-Yígúrə́-Jə-Tiu swɩ̀n Moyizə con, Mʋabə digə tə wa, ka nə bwə́lə́ Zʋrədɛn mʋnaa tə, Zweriko tɩʋ tə yáá con, ʋ wʋ́: 2 «Pa nii Yɩzərayɛlə lɩ̀à tə nə, sə ba lɩ tɩan ba tɩan tə wa, ba pa Levi dwíí tə nə, sə ba ya tə wa. Á tə wá pa ba kasɔɔ nii tə də, kʋ nə kɩkarɩ tɩan təntə. 3 Levi dwíí tə wá ya tɩan tə wa, yá kasɔɔ nii tə wá ya ba vàná diŋə bwálɩ́, də ba jɩjə bwálɩ́, də ba vàná tə mama, ba nə jə bwálɩ́. 4 Tɩan tə á nə wá pa Levi dwíí tə nə nii tɩa də tɩʋ biritaŋʋ tə laŋa wá ya jɩvaŋɩ yiə mʋ̀rʋ̀, kʋ ja kɩkarɩ tɩʋ tə. 5 Á wá zɩgɩ tɩʋ tə nii nə, yɩɩ yipɩan con, á man kasɔɔ nii tə jɩvaŋɩ yiə mʋ̀rʋ̀ bələ, á man jɩgwiə saparʋ con jɩvaŋɩ yiə mʋ̀rʋ̀ bələ, á man yɩɩ yizwɩa con jɩvaŋɩ yiə mʋ̀rʋ̀ bələ, á ga man jɩzən saparʋ con jɩvaŋɩ yiə mʋ̀rʋ̀ bələ. Yá tɩʋ tə dàń wá ya titəŋi wa. Mə kasɔɔ nii tə nə wá kɩkarɩ tɩan təntə wá ya nətʋ. 6 Á wá pa tɩan bardʋ Levi dwíí tə nə, tə nə yɩ yuu yikwala tɩan, lìù nə gʋa ʋ don yá kʋ tà ʋ sɩnɩ, sə ʋ wànɩ́ ʋ dəri ʋ va ʋ kwálɩ́ ʋ yuu lá. Á tə wá súrí tɩan sapwɩlə də bələ duən tə nə. 7 Tɩan tə mama á nə wá pa Levi dwíí tə nə, wá ya tɩan sapwɩlə də nana, kʋ nədʋ mama də kʋ kasɔɔ nii. 8 Yɩzərayɛlə dwíə́ tə mama wá pa tɩan Levi dwíí tə nə, kʋ twá dwíí mama tɩan dánɩ́ nə mɛ nətʋ. Ba tə ba tɩan nə dáá, wá pa tɩan zənzən, yá ba tə ba tɩan nə ba dáá, wá pa tɩan mancɩn.»Yuu yikwálɩ́ tɩan tə yoo
9 Ba-Yígúrə́-Jə-Tiu swɩ̀n Moyizə con, ʋ wʋ́: 10 «Swɩ̀n yìə̀n tə tə Yɩzərayɛlə lɩ̀à tə con, də máŋá tə wa, á nə bɩn Zʋrədɛn mʋnaa tə, á ma zwɩ Kanaan lʋʋ nii tə wa, 11 á wá kúrí tɩan, tə nə wá ya yuu yikwala tɩan, lìù nə gʋa ʋ don yá kʋ tà ʋ sɩnɩ, sə ʋ wànɩ́ ʋ dəri ʋ va ʋ kwálɩ́ ʋ yuu lá. 12 Tə tɩan təntə wá ya á yuu yikwala tɩan, sə á ma wànɩ́ á jɛ́n tɩgɩ tə nubiu tə yáá nə, ʋ nə mɛ sə ʋ fwi tɩgɩ tə lɩŋa. Yá ba kʋ́ʋ̀ bá gʋ lagʋrʋ tə, də ʋ tə wà lalʋʋ tə yáá con nan, sə ba bʋ̀rɩ̀ ʋ bʋra. 13 Tɩan bardʋ wá ya á yuu yikwala tɩan, tɩan tə wa á nə wá pa. 14 Á wá pa tɩan batwa Zʋrədɛn mʋnaa tə kwa, á ga pa tə batwa duən Kanaan lʋʋ nii tə wa. Tə mʋ̀ nə wá ya yuu yikwala tɩan.
15 Tɩan bardʋ təntə wá ya yuu yikwala tɩan tə pa Yɩzərayɛlə lɩ̀à tə nə, də vərə tə nə twá ba jə̀ə́ á con nə, də ba tə nə bá jə̀ń ba dán á titəŋi wa nə. Mə lá nə lìù nə gʋa ʋ don yá kʋ tà ʋ sɩnɩ, wá dəri ʋ va ʋ kwálɩ́ ʋ yuu.
16 Lìù nə mà ʋ don də lugu, kʋ pa ʋ tɩ, ʋ yɩ lagʋrʋ. Yá kʋ mɛ sə ba gʋ lagʋrʋ tə. 17 Kʋ nə yɩ kapan kʋ nə wàá wá kʋ gwɩ nə, ʋ ma dɩlɩ wá, kʋ pa ʋ tɩ, ʋ yɩ lagʋrʋ, yá kʋ mɛ sə ba gʋ lagʋrʋ tə. 18 Ʋ nə mà wá də won, kʋ nə yɩ dàʋ̀ kʋ nə wàá wá kʋ gwɩ, kʋ pa ʋ tɩ, ʋ yɩ lagʋrʋ, yá kʋ mɛ sə ba gʋ lagʋrʋ tə. 19 Tɩgɩ tə nubiu tə mɛ sə ʋ gʋ lagʋrʋ tə. Máŋá tə ʋ nə jɩn lagʋrʋ tə, ʋ mɛ sə ʋ gʋ wá.
20 Lìù nə yigu ʋ don, ʋ nə culi wá yɩrɩ, nə à yə̀ə́ ʋ dɩlɩ wá də won, sə ʋ ma fwa wá lwanɩ, kʋ pa ʋ tɩ, 21 nə à yə̀ə́ ʋ nə mà wá də ʋ jɩɩn, wʋlʋŋʋ mà, kʋ pa ʋ tɩ, lìù tə nə mà wá tə mɛ sə ba gʋ wá. Ʋ yɩ lagʋrʋ. Máŋá tə tɩgɩ tə nubiu tə nə mɛ sə ʋ fwi tɩgɩ tə lɩŋa nə jɩn lagʋrʋ tə, ʋ mɛ sə ʋ gʋ wá.
22 Yá lìù nə yigu ʋ don, yá kʋ tà ʋ sɩnɩ ʋ yigu wá, kʋ ga tà wʋlʋŋʋ ʋ pɩ̀à sə ʋ tʋn ʋ yɩra, nə à yə̀ə́ lìù nə dɩga won ʋ don yuu wa, yá kʋ tà lwanɩ ʋ pɩ̀à sə ʋ tʋn ʋ yɩra, 23 nə à yə̀ə́ lìù nə dɩga kapan ʋ don yuu wa, kʋ nə wàá wá kʋ gwɩ, yá kʋ tà ʋ sɩnɩ, kʋ ga pa ʋ don tə tɩ, yá lìù tə nə tɩga tə yà tà ʋ dʋŋʋ, kʋ ga tà wʋlʋŋʋ ʋ pɩ̀à sə ʋ tʋn ʋ yɩra, 24 lalʋʋ tə wá bʋ̀rɩ̀ lagʋrʋ tə, də tɩgɩ tə nubiu tə nə mɛ sə ʋ fwi tɩgɩ tə lɩŋa tə bʋra, ndə kʋ nə mɛ nətʋ. 25 Lalʋʋ tə wá jon lagʋrʋ tə tɩgɩ tə nubiu tə jɩɩn wa. Lalʋʋ tə wá pa ʋ pìí ʋ va yuu yikwala tɩʋ tə wa, ʋ yà nə dəri ʋ va ʋ kwálɩ́ ʋ yuu là. Ʋ mɛ sə ʋ ya lá, kʋ va kʋ yí Yɩɩ joŋwana yun tɩ̀án nəkwɩa* tə, ba nə twɛ́n dun nʋga* ʋ yuu wa tɩan. 26 Lagʋrʋ tə nə nan yuu yikwala tɩʋ tə wa, ʋ nə dəri ʋ va ʋ kwálɩ́ ʋ yuu lá, 27 tɩgɩ tə nubiu tə nə jəri wá, də kʋ tà yuu yikwala tɩʋ tə wa, ʋ nə gʋa lagʋrʋ tə, lagʋrɩ yoo tə̀lə́ ʋ yuu wa. 28 Cɩ́gá, lagʋrʋ tə mɛ sə ʋ ya yuu yikwala tɩʋ tə wa, kʋ va kʋ yí Yɩɩ joŋwana yun tɩ̀án nəkwɩa tə tɩan. Yɩɩ joŋwana yun tɩ̀án nəkwɩa tə tɩan kwa nə, lagʋrʋ tə dàń wàá ʋ pìí ʋ twi ʋ sàń.
29 Mə nii nə, kʋ nə pʋ́pʋ́nɩ́ kʋ tún á də á dwíə́ tə mama yɩrɩ, á nə wá kə lʋʋ wa, bwálɩ́ mama wa, á nə wá ya. 30 Lìù nə gʋa ʋ don, kʋ wá twá də dansɩa lɩ̀à kapʋpʋ nii sʋgʋ nə, ba ma gʋ lagʋrʋ tə. Dansɩa lìù nədʋ nii sʋgʋ wàrɩ̀ kʋ pɩn ba gwɩ lìù.
31 Á dànà ká sɛ̀ sə lagʋrʋ tə nə mɛ sə ba gʋ yoli bwaan ʋ mɩɩ tə yuu yɩrɩ. Cɩ́gá, á mɛ sə á gʋ wá. 32 Á dànà ká sɛ̀ á pa lagʋrʋ yoli bwaan ʋ mɩɩ tə yuu yɩrɩ, kʋ nə wá pa ʋ dəri ʋ va ʋ kwálɩ́ ʋ yuu, yuu yikwala tɩʋ tə wa, ʋ ga pìí ʋ bà ʋ ya ʋ lʋʋ nii tə wa, də Yɩɩ joŋwana yun tɩ̀án nəkwɩa tə tə wà tɩ. 33 Á wà mɛ sə á kə durən lʋʋ nii tə wa, á nə wá ya kʋ wa. Cɩ́gá, ləzwənə jana nə kəni durən lʋʋ nii wa, yá jana durən wàrɩ̀ tə sɩ̀n tə lɩ, də kʋ nə tà lìù tə nə lwá jana tə, jana nə lwá. 34 Á dànà ká kə durən lʋʋ nii tə wa, á nə wá ya kʋ wa, à də ga wulə kʋ wa. Cɩ́gá, à mʋ̀ nə yɩ Ba-Yígúrə́-Jə-Tiu, yá à wulə Yɩzərayɛlə lɩ̀à tə titəŋi wa.»