Kana tə nə jə tori kasweri yoo
36
1 Galadə yɩ Makirə bìú, ʋ ga yɩ Zʋzɛfə bìú Manase nàʋ́. Galadə sànɩ́ tə dìì tɩ̀án tə twi ba swɩ̀n Moyizə də Yɩzərayɛlə lalʋʋ tə yáá tɩ̀án tə nə yɩ pàbɩ̀á tə con, 2 ba wʋ́: «Ba-Yígúrə́-Jə-Tiu pɩn nii n mʋ̀ nə yuu-tiu tə nə, sə n pwárɩ́ n ma tara lʋʋ nii tə, n pa Yɩzərayɛlə lɩ̀à tə nə. Yá Ba-Yígúrə́-Jə-Tiu pɩn nii n mʋ̀ nə yuu-tiu nə, sə n pa nə nubiu Selofadə tori tə ʋ bwɩ̀ɩ́ nə. 3 Yá bwɩ̀ɩ́ tə nə swe bɛɛ nə, Yɩzərayɛlə dwíí tə don wa, ba tori tə wá fʋ kʋ nan nə nyɩna-ba tori tə wa, kʋ súrí dwíí tə nə wá tɩnɩ ba, tori tə nə. Kʋ nətʋ dàń wá mun tori tə, ba nə pwárɩ́ ba ma pa nəba. 4 Yá máŋá tə Yɩzərayɛlə lɩ̀à pupoli bɩnɩ tə nə yí, bwɩ̀ɩ́ təntə tori tə ba nə pɩn ba wá súrí dwíí tə nə wá tɩnɩ ba, tori tə nə, yá ba tori tə wá fʋ kʋ nan nə nyɩna-ba tori tə wa.»5 Moyizə twá nii tə nə, Ba-Yígúrə́-Jə-Tiu nə pɩn wá, yá ʋ swɩ̀n Yɩzərayɛlə lɩ̀à tə con, ʋ wʋ́: «Zʋzɛfə dwíí tə jə cɩ́gá. 6 Nəŋə nii tə Ba-Yígúrə́-Jə-Tiu nə pɩn Selofadə bwɩ̀ɩ́ tə nə: Ba wá swe ba fɩra bara nə, ba dàń nə mɛ sə ba swe ba nyɩna dwíí tə wa. 7 Kʋ nətʋ wá pa, Yɩzərayɛlə lɩ̀à tə pwə́rə́ wa, dwíí don tori bá fʋ kʋ zʋ kʋ don tori wa. Yɩzərayɛlə lìù mama wá vwa ʋ tɩ̀àn ʋ dwíí tori nə. 8 Bʋ̀á tə mama ʋ nə jə tori Yɩzərayɛlə lɩ̀à dwíə́ tə wa, ʋ mɛ sə swe ʋ dwíí tə wa bɛɛ nə, sə kʋ pa Yɩzərayɛlə lɩ̀à tə lìù mama wànɩ́ ʋ na tori ʋ nyɩna-ba tori wa. 9 Dwíí don tori bá fʋ kʋ zʋ dwíí don tori wa. Yɩzərayɛlə dwíə́ tə dwíí mama wá vwa ba tɩ̀àn ba tori nə.»
10 Selofadə bwɩ̀ɩ́ tə tʋn kʋ tə Ba-Yígúrə́-Jə-Tiu nə pɩn nii Moyizə nə, sə ba tʋn. 11 Mala, də Tirəsa, də Hogəla, də Miləka, də Noa, ba nə yɩ Selofadə bwɩ̀ɩ́ swe ba nyɩna Selofadə nubiduən bɩ̀á nə. 12 Ba swe Zʋzɛfə bìú Manase dìə̀ tə wa bara nə, yá ba tori tə nə yɩ ba nyɩna nyiən dàń mɛn ba nyɩna dwíí tə wa.
13 Mə nii təntə də cwəŋi təntə nə Ba-Yígúrə́-Jə-Tiu twá də Moyizə ʋ pa Yɩzərayɛlə lɩ̀à tə nə, Mʋabə digə tə wa, ka nə bwə́lə́ Zʋrədɛn mʋnaa tə, ka nə wulə Zweriko tɩʋ tə yáá con.