Galʋ 4

Levi dwíí tə tʋ̀tʋ̀nán yoo

1 Ba-Yígúrə́-Jə-Tiu swɩ̀n Moyizə də Aron con, ʋ wʋ́: 2 «Gàlà Kehatə bɩ̀á tə, Levi dwíí tə wa, kʋ twá sàń sàń, də dìə̀ dìə̀. 3 Kʋ yɩ ba tə mama, ba nə jə bɩna fitwa, kʋ ja va finu, ba nə wàá Yɩɩ jə́rə́ gansili tə wa tʋ̀tʋ̀nán tə ba tʋŋa. 4 Kehatə bɩ̀á tə tʋtʋŋɩ Yɩɩ jə́rə́ gansili tə wa nə yɩ, zɩla tə nə yɩ Yɩɩ cɩcɩ nyiən yuu ywàŋʋ́. 5 Máŋá tə wa, Yɩzərayɛlə lɩ̀à tə nə wá zàn sə ba vìí, Aron də ʋ bɩ̀á tə wá bà, ba lɩ patasɩn tə nə pwɛ̀ Yɩɩ jə́rə́ gansili tə waa, ba ma pú Yɩɩ nimarʋ dansɩa daka tə yuu nə. 6 Ba wá ja mʋʋ wa won don tànʋ̀, ba ma pú patasɩn tə yuu nə, à nimarʋ dansɩa daka tə yuu con. Kʋ kwa nə, ba wá ja bɔɔ gansara nəlinu ba ma pú tə mama yuu nə, ba ga tɩrɩ dɛɛ nədaran tə, ba nə ma zɩŋa à nimarʋ culu daka tə, ka səpunə nə. 7 Ba wá larɩ bɔɔ gansara nəlinu don tabɩlʋ tə yuu, ba nə túŋə́ dipɛn lá, ba pɩn nə, ba ga tún zwɩɩn tə, də wùrú zwɩɩn tə, də kwàrɩ́ tə, də zʋbii tə ba nə wá ma twɛ́n divɛn jwəŋə, ba pa nə, kʋ yuu wa. Ba tə wá tún dipɛn tə, ba nə wá pa nə máŋá mama, tabɩlʋ təntə yuu wa. 8 Ba wá larɩ bɔɔ gansara nəsɩan zɩla təntə yuu wa, ba ga ja mʋʋ wa won don tànʋ̀ ba ma pú tə yuu nə. Yá ba ga tɩrɩ tabɩlʋ tə dɛɛ nədaran tə, ba nə ma zɩŋa kʋ, kʋ səpunə nə. 9 Ba wá tì gansara nəlinu ba ma pú canzɩlʋ tə, də kʋ tʋntʋnɩ tə, də kʋ wiən tə nə kwɛn caŋoni tə níə́, də kʋ wiən tə nə kəni tʋntʋnan tə, də kʋ nʋga kwàrɩ́ tə mama, ba nə ma tʋŋa kʋ tʋ̀tʋ̀nán tə, yuu nə. 10 Ba wá kə kʋ də kʋ tʋtʋnzɩla tə mama mʋʋ wa won don tànʋ̀ wa, ba ga tì tə ba tún dɛɛ bələ yuu, ba ma zɩn tə. 11 Ba wá larɩ gansara nəlinu Yɩɩ joŋi bwálɩ́ tə yuu wa, ba nə fwa də sɩ́án, ba ga ja mʋʋ wa won don tànʋ̀ ba ma pú kʋ yuu nə. Kʋ kwa nə, ba wá tɩrɩ kʋ dɛɛ nədaran tə, ba nə ma zɩŋa kʋ, kʋ səpunə nə. 12 Ba wá tì tʋtʋnzɩla tə mama, ba nə ma tʋŋa Yɩɩ wúlú bwálɩ́ tə wa, ba kə gansara nəlinu wa, ba ga ja mʋʋ wa won don tànʋ̀ ba ma pú tə yuu nə. Kʋ kwa nə, ba wá tì tə ba tún dɛɛ bələ yuu, ba ma zɩn tə. 13 Ba wá pɛ̀ tʋntʋnan tə Yɩɩ joŋi bwálɩ́ tə wa, ba ga ja gansara nəsɩan mwin ba ma pú kʋ yuu nə. 14 Ba wá tún zɩla tə mama ba nə ma tʋŋa, kʋ yuu wa. Tə mʋ̀ nə yɩ kʋ tʋntʋnan zwɩɩn tə, də kʋ cɩnɩan danyunzɩan tə, də kʋ pɛlə-ba tə, də kʋ nagwalan tə, də Yɩɩ joŋi bwálɩ́ tə tʋtʋnzɩla tə duən tə mama. Ba wá ja mʋʋ wa won don tànʋ̀ ba ma pú tə mama yuu nə, ba ga tɩrɩ dɛɛ nədaran tə, ba nə ma zɩŋa kʋ, kʋ səpunə nə. 15 Máŋá tə Aron də ʋ bɩ̀á tə nə wá pú Yɩɩ wúlú bwálɩ́ tə zɩla tə, də kʋ tʋtʋnzɩla tə mama yuu nə ba zwɛ̀, Kehatə bɩ̀á tə dàń wá bà, ba tì tə. Yá ba dàń nə wà mɛ, sə ba dwen wiən tə nə yɩ parɩ tə yɩra. Cɩ́gá, ba nə dwen tə yɩra, ba wá tɩ. Mə Kehatə bɩ̀á tə tʋtʋŋɩ nə, Yɩɩ jə́rə́ gansili tə wa. 16 Yɩɩ joŋwanʋ Aron bìú Eleyazarə nə wá ywàń canzɩlʋ nʋga tə, də wusinə tə, də zìlə́ won tə nə yɩ vàrʋ́ càlɩ̀, ba nə mɛ, sə ba pa à mʋ̀ Yɩɩ nə, máŋá də máŋá mama wuuu, də dun nʋga* tə yuu nə. Ʋ wá ywàń Yɩɩ wúlú gansili tə, də kʋ wa wiən tə mama yuu nə, tə nə yɩ Yɩɩ wúlú bwálɩ́ tə də kʋ tʋtʋnzɩla tə.»

17 Ba-Yígúrə́-Jə-Tiu kʋ́ʋ̀ swɩ̀n Moyizə də Aron con, ʋ wʋ́: 18 «Á dànà ká lɩ Kehatə sànɩ́ tə Levi dwíí tə wa. 19 Nə̀ń kʋ tə á nə mɛ sə á fwa á pa ba, sə ba dàń ká tɩ, də ba nə dwen zɩla tə nə yɩ Yɩɩ cɩcɩ nyiən tə yɩra: N mʋ̀ Aron, də n bɩ̀á tə wá ja ba lìù mama, á ja va zɩlɩ tə yáá con, ʋ nə mɛ sə ʋ zɩn, á ga swɩ̀n kʋ tə ʋ nə mɛ sə ʋ fwa, á bɩrɩ wá. 20 Kʋ nətʋ wá pa ba bá zʋ ba ywàń zɩla tə nə yɩ Yɩɩ nyiən tə, máŋá mancɩn də tətə. Cɩ́gá, ba nə tʋn kʋ nətʋ tə, ba wá tɩ.»

Gɛrəswon bɩ̀á tə yoo

21 Ba-Yígúrə́-Jə-Tiu swɩ̀n Moyizə con, ʋ wʋ́: 22 «Gàlà Gɛrəswon bɩ̀á tə, kʋ twá sàń sàń, də dìə̀ dìə̀. 23 N wá gàlà bara tə nə jə bɩna fɩtwa, kʋ ja va fɩnu, ba mama nə wàá Yɩɩ jə́rə́ gansili tə wa tʋ̀tʋ̀nán tə ba tʋŋa. 24 Nə̀ń tʋ̀tʋ̀nán tə Gɛrəswon sànɩ́ tə nə wá tʋn, tə nə yɩ ba yuu zɩlɩ. 25 Ba wá zɩn Yɩɩ wúlú gansili tə tapwələ tə, də Yɩɩ jə́rə́ gansili tə tapwələ tə, də kʋ gansara tə, də mʋʋ wa won don tànʋ̀ tə nə yàá pú tə mama yuu nə, də Yɩɩ jə́rə́ gansili tə mimii nii patasɩn tə. 26 Kʋ súrí dəwoo tə tapwələ tə nə kɩkarɩ Yɩɩ wúlú gansili tə də Yɩɩ joŋi bwálɩ́ tə nə, də dəwoo tə mimii nii patasɩn tə nə, də ŋoni tə, də tʋtʋnzɩla tə mama nə. Gɛrəswon bɩ̀á tə nə wá tʋn tʋ̀tʋ̀nán təntə. 27 Aron də ʋ bɩ̀á tə nə wá bɩrɩ wiən tə, Gɛrəswon bɩ̀á tə nə mɛ sə ba zɩn, də tʋ̀tʋ̀nán tə, ba nə mɛ sə ba tʋn. 28 Mə Gɛrəswon bɩ̀á tə tʋ̀tʋ̀nán nə, ba nə mɛ sə ba tʋn, Yɩɩ jə́rə́ gansili tə wa. Yɩɩ joŋwanʋ Aron bìú Yɩtamarə nə wá ywàń ba tʋ̀tʋ̀nán tə yuu nə.»

Merari bɩ̀á tə yoo

29 Ba-Yígúrə́-Jə-Tiu swɩ̀n Moyizə con, ʋ wʋ́: «N wá gàlà Merari bɩ̀á tə, kʋ twá sàń sàń, də dìə̀ dìə̀. 30 N wá gàlà bara tə nə jə bɩna fitwa, kʋ ja va finu, ba mama nə wàá Yɩɩ jə́rə́ gansili tə wa tʋ̀tʋ̀nán tə ba tʋŋa. 31 Nə̀ń tʋ̀tʋ̀nán tə ba nə wá tʋn, Yɩɩ jə́rə́ gansili tə wa: Ba wá zɩn Yɩɩ jə́rə́ gansili tə dapɩparan tə, də kʋ dɛɛ nədaran tə, də kʋ ywəŋə tə, də kʋ zɩlan tə. 32 Kʋ súrí ywəŋə tə nə kɩkarɩ dəwoo tə, də tə zɩlan tə, də tə párá tə, də tə ŋoni tə, də tʋtʋnzɩla tə mama nə. Á wá bon ba lìù mama, á bɩrɩ wá zɩla tə, ʋ nə mɛ sə ʋ ywàń tə yuu. 33 Mə Merari bɩ̀á tə tʋ̀tʋ̀nán wá ya nətʋ, Yɩɩ jə́rə́ gansili tə wa. Yɩɩ joŋwanʋ Aron bìú Yɩtamarə nə wá ywàń ba tʋ̀tʋ̀nán tə yuu nə.»

Levi dwíí lɩ̀à tə ba nə tʋŋa, galʋ yoo

34 Moyizə də Aron, də Yɩzərayɛlə lɩ̀à yáá tɩ̀án tə dàń gàlɩ̀ Kehatə bɩ̀á tə, kʋ twá sàń sàń, də dìə̀ dìə̀. 35 Ba gàlɩ̀ ba tə mama nə jə bɩna fitwa, kʋ ja va finu, ba nə wàá Yɩɩ jə́rə́ gansili tə wa tʋ̀tʋ̀nán tə ba tʋŋa. 36 Lɩ̀à tə ba nə gàlɩ̀, kʋ twá ba sànɩ́ tə nə, yɩ lɩ̀à 2 750. 37 Mə Kehatə sànɩ́ tə lɩ̀à nii nə, ba nə gàlɩ̀ ba sànɩ́ tə wa, ba mama nə tʋŋa Yɩɩ jə́rə́ gansili tə wa. Moyizə də Aron gàlɩ̀ ba, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ. 38 Nə̀ń Gɛrəswon bɩ̀á tə nii, ba nə gàlɩ̀ kʋ twá sàń sàń, də dìə̀ dìə̀, 39 kʋ nə zɩgɩ ba tə nə jə bɩna fitwa, kʋ ja va finu, ba mama nə wàá Yɩɩ jə́rə́ gansili tə wa tʋ̀tʋ̀nán tə ba tʋŋa: 40 Ba tə ba nə gàlɩ̀ kʋ twá sàń sàń, də dìə̀ dìə̀, yà yɩ bara 2 630. 41 Mə Gɛrəswon sànɩ́ tə lɩ̀à nii nə, ba nə gàlɩ̀, ba mama nə tʋŋa Yɩɩ jə́rə́ gansili tə wa. Moyizə də Aron gàlɩ̀ ba, ndə Ba-Yígúrə́-Jə-Tiu yà nə twá də Moyizə, ʋ pa nii sə kʋ tʋn nətʋ. 42 Nə̀ń Merari sànɩ́ tə lɩ̀à, ba nə gàlɩ̀ kʋ twá sàń sàń, də dìə̀ dìə̀, 43 kʋ nə zɩgɩ ba tə nə jə bɩna fitwa, kʋ ja va finu, ba mama nə wàá Yɩɩ jə́rə́ gansili tə wa tʋ̀tʋ̀nán tə ba tʋŋa: 44 Ba tə ba nə gàlɩ̀ kʋ twá sàń sàń, də dìə̀ dìə̀, yà yɩ bara 3 200. 45 Mə Merari sànɩ́ tə lɩ̀à nii nə, ba nə gàlɩ̀, ba mama nə tʋŋa Yɩɩ jə́rə́ gansili tə wa. Moyizə də Aron gàlɩ̀ ba, ndə Ba-Yígúrə́-Jə-Tiu yà nə twá də Moyizə, ʋ pa nii sə kʋ tʋn nətʋ. 46 Nə̀ń Levi dwíí tə, Moyizə də Aron, də Yɩzərayɛlə yáá tɩ̀án tə, nə gàlɩ̀ kʋ twá sàń sàń, də dìə̀ dìə̀, 47 kʋ nə zɩgɩ ba tə nə jə bɩna fitwa, kʋ ja va finu, ba mama nə wàá Yɩɩ jə́rə́ gansili tə wa tʋ̀tʋ̀nán tə ba tʋŋa, ba ga zɩŋa Yɩɩ jə́rə́ gansili tə. 48 Ba tə mama ba nə gàlɩ̀ yɩn bara 8 580. 49 Ba gàlɩ̀ ba, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ, ba ga bɩrɩ ba lìù mama tʋtʋŋɩ, də kʋ tə ʋ nə mɛ sə ʋ zɩn. Ba gàlɩ̀ ba, ndə Ba-Yígúrə́-Jə-Tiu yà nə twá də Moyizə, ʋ pa nii sə kʋ tʋn nətʋ. .