Galʋ 3

Levi dwíí tə tʋtʋŋɩ yoo

1 Nə̀ń Aron də Moyizə dwíí dəkuu, máŋá tə wa Ba-Yígúrə́-Jə-Tiu nə swɩ̀n Moyizə con, Sinayi paan tə yuu wa. 2 Nə̀ń Aron bɩ̀á tə yɩra: Kʋ yɩ Nadabə, ʋ nə yɩ ʋ bikwɩa, də Abihu, də Eleyazarə, də Yɩtamarə. 3 Mə Aron bɩ̀á tə yɩra nə, ba nə twɛ́n dun nʋga* ba yuu wa, ba ma tún ba vàn nə, ba pa Yɩɩ cɩcɩ nə, sə ba ya Yɩɩ joŋwana, ba tʋn Yɩɩ joŋwanɩ tʋtʋŋɩ tə. 4 Nadabə də Abihu mʋ̀ tɩga Sinayi kasɔɔ lanworu tə wa, Ba-Yígúrə́-Jə-Tiu yáá con, ba nə ja mən nəkaʋ, ba bà ʋ yáá con yɩrɩ. Ba tɩga də ba ba bɩ̀á jə. Yá Eleyazarə də Yɩtamarə cɩcɩ dàń nə yɩn ba nyɩna Aron səpuni nə, ba tʋn Yɩɩ joŋwanɩ tʋtʋŋɩ tə.

5 Ba-Yígúrə́-Jə-Tiu swɩ̀n Moyizə con, ʋ wʋ́: 6 «Pa Levi dwíí tə bà Yɩɩ joŋwanʋ Aron con, ba san wá. 7 Ba wá tʋn də wá, ba ga tʋn də lalʋʋ tə mama, Yɩɩ jə́rə́ gansili tə yáá con. Ba wá tʋn Yɩɩ wúlú gansili tə tʋ̀tʋ̀nán tə. 8 Ba wá ywàń Yɩɩ jə́rə́ gansili tə tʋtʋnzɩla tə mama yuu nə, ba ga tʋn kʋ tə, Yɩzərayɛlə lɩ̀à tə nə mɛ sə ba tʋn, Yɩɩ wúlú gansili tə wa. 9 N wá pa Levi dwíí tə Aron də ʋ bɩ̀á tə nə. Yɩzərayɛlə lɩ̀à tə wá tún ba vàn nə ndə sáŋʋ́ nə, ba pa wá. 10 N wá tún Aron də ʋ bɩ̀á tə, sə ba cɩcɩ nə tʋn Yɩɩ joŋwanɩ tʋtʋŋɩ tə. Lìù don mama, ʋ nə tà Yɩɩ joŋwanʋ nə tʋn tʋtʋŋɩ təntə, ba mɛ sə ba gʋ kʋ tíú.»

11 Ba-Yígúrə́-Jə-Tiu swɩ̀n Moyizə con, ʋ súrí lá, ʋ wʋ́: 12 «À mʋ̀ tətə nə kúrí Levi dwíí tə, Yɩzərayɛlə lɩ̀à tə mama titəŋi wa, ba bɩkwɩna tə təntən bɩ̀á tə mama yuu nə. Levi dwíí tə yɩ à mʋ̀ cɩcɩ nyiən. 13 Cɩ́gá, təntən bìú mama yɩ à mʋ̀ nə tɩ, kʋ nə zɩgɩ dɩɩn tə nə, à nə pɩn Ezwipətə tɩ̀án təntən bɩ̀á tə mama tɩ. À lɩ Yɩzərayɛlə lɩ̀à təntən bɩ̀á tə, də ba vàná təntən bɩ̀á tə, à tún vàn nə. Ba dàń yɩ à mʋ̀ cɩcɩ nə tɩ. À mʋ̀ nə yɩ Ba-Yígúrə́-Jə-Tiu.»

Levi dwíí tə təntən galʋ yoo

14 Ba-Yígúrə́-Jə-Tiu swɩ̀n Moyizə con, Sinayi kasɔɔ lanworu tə wa, ʋ wʋ́: 15 «Gàlà Levi dwíí tə kʋ twá dìə̀ dìə̀, də sàń sàń. N wá gàlà bara tə mama, ba nə jə cànà nədʋ, də ba tə nə dwə nətʋ.» 16 Moyizə gàlɩ̀ ba, ndə Ba-Yígúrə́-Jə-Tiu nə pɩn wá nii, sə ʋ tʋn nətʋ.

17 Nə̀ń Levi bɩ̀á tə yɩra: Kʋ yɩ Gɛrəswon, də Kehatə, də Merari. 18 Nə̀ń Gɛrəswon bɩ̀á tə yɩra, kʋ twá sàń sàń: Kʋ yɩ Libəni, də Swimeyi. 19 Nə̀ń Kehatə bɩ̀á tə yɩra, kʋ twá sàń sàń: Kʋ yɩ Aməramə, də Yɩsarə, də Ebəron, də Uziyɛlə. 20 Nə̀ń Merari bɩ̀á tə yɩra, kʋ twá sàń sàń: Kʋ yɩ Mali, də Muswi. Mə Levi dwíí tə sànɩ́ nə, ba nə gàlɩ̀ kʋ twá dìə̀ dìə̀.

21 Gɛrəswon nə yɩ Gɛrəswon dwíí tə nɩbɛɛ. Ʋ dwíí tə yà pwɛ̀ sànɩ́ bələ: Libəni sàń tə, də Swimeyi sàń tə. 22 Ba tə ba nə gàlɩ̀ yɩn bara 7 500, kʋ nə zɩgɩ bisɩmabarɩ tə nə jə cànà nədʋ, də ba tə dwə nətʋ. 23 Gɛrəswon sànɩ́ tə jə̀ń Yɩɩ wúlú gansili tə kwa, yɩɩ yizwɩa con. 24 Layɛlə bìú Eliyasafə yà nə yɩ Gɛrəswon dwíí tə sàń tíú. 25 Yɩɩ jə́rə́ gansili tə yoo yà yɩ Gɛrəswon bɩ̀á tə nə kʋ ywàŋá. Ba mʋ̀ yà nə ywàŋá Yɩɩ wúlú gansili tə, də kʋ tapwələ tə, də Yɩɩ jə́rə́ gansili tə mimii nii patasɩn tə yuu nə. 26 Kʋ súrí dəwoo tə tapwələ tə nə kɩkarɩ Yɩɩ wúlú gansili tə də Yɩɩ joŋi bwálɩ́ tə nə, də dəwoo tə mimii nii patasɩn tə nə, də ŋoni tə nə mɛ, sə ba ma tʋn kʋ tʋtʋŋɩ tə mama nə.

27 Kehatə nə yɩ Kehatə sànɩ́ tə nɩbɛɛ. Ba yà pwɛ̀ sànɩ́ banɩa: Kʋ yɩ Aməramə sàń tə, də Yɩsarə sàń tə, də Ebəron sàń tə, də Uziyɛlə sàń tə. 28 Bara tə mama ba nə gàlɩ̀, ba nə jə cànà nədʋ, də ba tə nə dwə nətʋ, yà yɩ bara 8 600. Ba mʋ̀ yà nə ywàŋá Yɩɩ wúlú bwálɩ́ tə yuu nə. 29 Kehatə sànɩ́ tə yà ken ba yijaa bwálɩ́, Yɩɩ wúlú gansili tə jɩgwiə saparʋ con. 30 Kehatə sànɩ́ tə sàń tíú nə yɩ Uziyɛlə bìú Elisafan. 31 Kehatə sànɩ́ tə nə ywàŋá Yɩɩ nimarʋ culu daka tə, də tabɩlʋ tə, də canzɩlʋ tə, də jwəŋə bwálá tə, də tʋtʋnzɩla tə, ba nə ma tʋŋa Yɩɩ wúlú bwálɩ́ tə wa, də patasɩn tə, də Yɩɩ wúlú bwálɩ́ tə zɩla tə mama yuu nə.

32 Yɩɩ joŋwanʋ Aron bìú Eleyazarə yà nə yɩ Levi dwíí tə yáá tíú. Ʋ mʋ̀ yà nə ywàŋá bara tə yuu nə, ba nə tʋŋa Yɩɩ wúlú bwálɩ́ tə wa.

33 Merari nə yɩ Merari sànɩ́ tə nɩbɛɛ. Ba pwɛ̀ sànɩ́ bələ: Kʋ yɩ Mali sàń tə, də Muswi sàń tə. 34 Bara tə ba nə gàlɩ̀, ba nə jə cànà nədʋ, də ba tə nə dwə nətʋ yà yɩ bara 6 200. 35 Abihayilə bìú Suriyɛlə nə yɩ ba yáá tíú. Ba jə̀ń Yɩɩ wúlú gansili tə jɩzən saparʋ con. 36 Merari dwíí tə yà nə ywàŋá Yɩɩ wúlú gansili tə dapɩparan tə, də kʋ dɛɛ tə, də kʋ ywəŋə tə, də kʋ zɩlan tə, də kʋ yɩra zɩla tə duən tə mama yuu nə. 37 Ba mʋ̀ tə nə ywàŋá dəwoo tə ywəŋə tə nə kɩkarɩ kʋ, də tə zɩlan tə, də tə párá tə, də tə ŋoni tə yuu nə.

38 Moyizə, də Aron də ʋ bɩ̀á tə yà jə̀ə́ Yɩɩ wúlú gansili tə yáá con, yɩɩ yipɩan con. Ba yà jə̀ə́ Yɩɩ jə́rə́ gansili tə yáá con, yɩɩ yipɩan con. Ba mʋ̀ nə tʋŋa Yɩɩ wúlú bwálɩ́ tə tʋtʋŋɩ tə, Yɩzərayɛlə lɩ̀à tə yuu yɩrɩ. Lìù don mama ʋ nə tà Yɩɩ joŋwanʋ nə bólí lá, kʋ mɛ sə ba gʋ kʋ tíú.

39 Levi dwíí tə mama Moyizə də Aron nə gàlɩ̀, kʋ nə zɩgɩ bara tə mama nə jə cànà nədʋ, də ba tə nə dwə nətʋ, yà yɩ bara 22 000. Ba gàlɩ̀ ba, kʋ twá sànɩ́ sànɩ́, ndə Ba-Yígúrə́-Jə-Tiu nə pɩn nii, sə kʋ tʋn nətʋ.

Təntən bɩ̀á tə ka yə̀ ka jon yoo

40 Ba-Yígúrə́-Jə-Tiu swɩ̀n Moyizə con, ʋ wʋ́: «Gàlà Yɩzərayɛlə lɩ̀à təntən bibara tə mama, ba nə jə cànà nədʋ, də ba tə nə dwə nətʋ, n ga pʋ́pʋ́nɩ́ ba yɩra. 41 Kʋ kwa nə, n wá kə Levi dwíí tə vàn nə, sə ba yà à mʋ̀ Ba-Yígúrə́-Jə-Tiu cɩcɩ nyiən, Yɩzərayələ lɩ̀à təntən bɩ̀á tə mama yuu nə. N wá kə Levi dwíí tə vàná tə vàn nə, n pa nə, Yɩzərayɛlə lɩ̀à vàná təntən bɩ̀á tə mama yuu nə.» 42 Moyizə gàlɩ̀ Yɩzərayɛlə lɩ̀à təntən bɩ̀á tə mama, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ. 43 Təntən bibara tə mama ba nə gàlɩ̀, ba ga pʋ́pʋ́nɩ́ ba yɩra, kʋ nə zɩgɩ ba tə nə jə cànà nədʋ, də ba tə nə dwə nətʋ, yà yɩ bara 22 273.

44 Ba-Yígúrə́-Jə-Tiu swɩ̀n Moyizə con, ʋ wʋ́: 45 «Kə Levi dwíí tə vàn nə, sə ba yà à mʋ̀ Ba-Yígúrə́-Jə-Tiu cɩcɩ nyiən, Yɩzərayələ lɩ̀à təntən bɩ̀á tə mama yuu nə. N wá kə Levi dwíí vàná tə vàn nə, n pa nə, Yɩzərayɛlə lɩ̀à vàná təntən bɩ̀á tə yuu nə. Levi dwíí tə yɩ à mʋ̀ cɩcɩ nyiən. À mʋ̀ nə yɩ Ba-Yígúrə́-Jə-Tiu. 46 Yá Yɩzərayɛlə lɩ̀à təntən bɩ̀á 273 tə nə pɩn ba dánɩ́ dwə Levi dwíí tə, yɩ ba wá yə̀ ba, ba jon. 47 N wá jon səbilurən* bonu ba lìù mama yuu nə, kʋ twá ndə Yɩɩ wúlú bwálɩ́ tə səkəri bìú* tə nə bɩrɩ nətʋ. Kʋ dun yí sibipwənə bələ. 48 N wá pa səbiu tə Aron, də ʋ bɩ̀á tə nə, sə kʋ ya təntən bɩ̀á tə nə dáá ba doni Levi dwíí tə mɩɩ kwənə.» 49 Moyizə jon Yɩzərayɛlə lɩ̀à təntən bɩ̀á tə nə pɩn ba dánɩ́ dwə Levi dwíí tə, mɩɩ kwənə səbiu tə. 50 Yɩzərayɛlə lɩ̀à təntən bɩ̀á tə mɩɩ kwənə səbiu tə mama yɩn səbilurən 1365, ndə Yɩɩ wúlú bwálɩ́ tə səkəri bìú tə nə bɩrɩ nətʋ. 51 Moyizə pɩn mɩɩ kwənə səbiu tə Aron də ʋ bɩ̀á tə nə, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.