Galʋ 2

Nətʋ dwíə́ tə nə wá jə̀ń ba yijaa bwálɩ́ wa yoo

1 Ba-Yígúrə́-Jə-Tiu swɩ̀n Moyizə, də Aron con, ʋ wʋ́: 2 «Yɩzərayɛlə lɩ̀à tə lìù mama wá jə̀ń ʋ bólí ʋ dwíí kwatara púlí, ba dɩrapo də̀ń nə. Ba wá jə̀ń ba kɩkarɩ Yɩɩ jə́rə́ gansili tə. Yá ba nə wá ja laŋa də kʋ.

3 Ba tə nə wá jə̀ń Yɩɩ yipɩan con, wá ya Zwida dwíí tə kwatara púlí dɩrapo də̀ń nə. Aminadabə bìú Naswon nə yɩ ba yáá tíú. 4 Ba nə gàlɩ̀ ʋ kwatara tə, ba yɩ bara 74 600. 5 Yɩsakarə dwíí tə wá jə̀ń ba danɩ Zwida dwíí tə nə. Swuarə bìú Netaneyɛlə nə yɩ ba yáá tíú. 6 Ba nə gàlɩ̀ ʋ kwatara tə, ba yɩ bara 54 400. 7 Kʋ kwa nə, Zabulon dwíí tə nə daa lá. Helon bìú Eliyabə nə yɩ ba yáá tíú. 8 Ba nə gàlɩ̀ ʋ kwatara tə, ba yɩ bara 57 400. 9 Ba nə gàlɩ̀ Zwida dwíí kwatara tə, ba mama yɩ bara 186 400. Ba viru máŋá nə yí, ba mʋ̀ nə wá dí yáá ba zàn.

10 Ribɛn dwíí kwatara púlí tə wá jə̀ń jɩgwiə saparʋ con, ba dɩrapo də̀ń nə. Swedewurə bìú Elisurə nə yɩ ba yáá tíú. 11 Ba nə gàlɩ̀ ʋ kwatara tə, ba yɩ bara 46 500. 12 Simeyon dwíí tə wá jə̀ń ba danɩ Ribɛn dwíí tə nə. Suriswadayi bìú Swelumiyɛlə nə yɩ ba yáá tíú. 13 Ba nə gàlɩ̀ ʋ kwatara tə, ba yɩ bara 59 300. 14 Kʋ kwa nə, Gadə dwíí tə nə daa lá. Rewuwɛlə bìú Eliyasafə nə yɩ ba yáá tíú. 15 Ba nə gàlɩ̀ ʋ kwatara tə, ba yɩ bara 45 650. 16 Bara tə mama ba nə gàlɩ̀, Ribɛn dwíí kwatara tə wa, yɩ bara 151 450. Ba mʋ̀ nə wá zàn ba vìí bələ nii nə.

17 Kʋ kwa nə, Levi dwíí tə dàn wá zàn ba vìí, də Yɩɩ jə́rə́ gansili tə, púlə́ tə mama titəŋi wa. Ba wá vìí ba danɩ duən nə, ndə nətʋ tə nə, ba nə jə̀ń ba danɩ duən nə, bɛɛ mama ʋ dwíí kwatara púlí wa, ba dɩrapo də̀ń.

18 Efərayimə dwíí kwatara púlí tə wá ya Yɩɩ yizwɩa con, ba dɩrapo də̀ń nə. Amihudə bìú Eliswama nə yɩ ba yáá tíú. 19 Ba nə gàlɩ̀ ʋ kwatara tə, ba yɩ bara 40 500. 20 Manase dwíí tə wá jə̀ń ba danɩ Efərayimə dwíí tə nə. Pedasurə bìú Gaməliyɛlə nə yɩ ba yáá tíú. 21 Ba nə gàlɩ̀ ʋ kwatara tə, ba yɩ bara 32 200. 22 Kʋ kwa nə, Bɛnzwamɛn dwíí tə nə daa lá. Gidon bìú Abidan nə yɩ ba yáá tíú. 23 Ba nə gàlɩ̀ ʋ kwatara tə, ba yɩ bara 35 400. 24 Bara tə mama ba nə gàlɩ̀ Efərayimə dwíí kwatara púlə́ tə wa, yɩ bara 108 100. Ba mʋ̀ nə wá zàn ba vìí batwa nii nə.

25 Dan dwíí kwatara púlí tə wá ya jɩzən saparʋ con, ba dɩrapo də̀ń nə. Amiswadayi bìú Ahiezɛrə nə yɩ ba yáá tíú. 26 Ba nə gàlɩ̀ ʋ kwatara tə, ba yɩ bara 62 700. 27 Aswɛrə dwíí tə wá jə̀ń ba danɩ Dan dwíí tə nə. Okəran bìú Pagiyɛlə nə yɩ ba yáá tíú. 28 Ba nə gàlɩ̀ ʋ kwatara tə, ba yɩ bara 41 500. 29 Kʋ kwa nə, Nɛfətali dwíí tə nə daa lá. Enan bìú Ahɩra nə yɩ ba yáá tíú. 30 Ba nə gàlɩ̀ ʋ kwatara tə, ba yɩ bara 53 400. 31 Bara tə mama ba nə gàlɩ̀ Dan dwíí kwatara púlí tə wa, yɩ bara 157 600. Dwíí təntə nə wá ya talɩkwa ba zàn ba vìí, də ba dɩrapo.

32 Mə Yɩzərayɛlə lɩ̀à tə nə nətʋ, ba nə gàlɩ̀, kʋ twá dìə̀ dìə̀. Lɩ̀à tə mama ba nə gàlɩ̀, də ba kwatara púlə́ yɩn lɩ̀à 603 550. 33 Yá ba wà Levi dwíí lɩ̀à tə mʋ̀ gàlɩ̀ ba kə Yɩzərayɛlə lɩ̀à tə wa, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ.

34 Yɩzərayɛlə lɩ̀à tə tʋn yoo mama kʋ twá, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ. Ba jəni ba kwatara púlə́ səpuni nə, ba ga zaŋa ba vìrí, kʋ twá sàń sàń, də dìə̀ dìə̀.