Galʋ 1

Galʋ

YƖZƏRAYƐLƏ DWII TƏ WULƏ SINAYI KASƆƆ LANWORU TƏ WA

1-10

Yɩzərayɛlə dwíə́ tə təntən galʋ yoo

1 Ba-Yígúrə́-Jə-Tiu swɩ̀n Moyizə con, Sinayi kasɔɔ lanworu tə wa, Yɩɩ jə́rə́ gansili tə wa. Kʋ yɩn bələ nii cànà tə təntən dɩɩn tə nə, bələ nii bɩnɩ tə wa, ba nə nan Ezwipətə lʋʋ nii tə wa kwa nə. Ʋ swɩ̀n ʋ con, ʋ wʋ́: 2 «N də Aron wá gàlà Yɩzərayɛlə lalʋʋ tə mama, kʋ twá dwíí dwíí, də sàń sàń, də dìə̀ dìə̀. Á wá bon bara tə mama yɩra nədʋ nədʋ, á ma gàlà ba. 3 N də Aron wá gàlà bara tə mama, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ, Yɩzərayɛlə kwatara púlə́ tə wa, ba lìù mama nə wulə. 4 Dwíí mama wa, dìə̀ tíú nədʋ wá ya də aba. 5 Nə̀ń bara tə yɩra ba nə wá ya də aba:

Ribɛn dwíí tə wa, kʋ yɩ Swedewurə bìú Elisurə.

6 Simeyon dwíí tə wa, kʋ yɩ Suriswadayi bìú Swelumiyɛlə.

7 Zwida dwíí tə wa, kʋ yɩ Aminadabə bìú Naswon.

8 Yɩsakarə dwíí tə wa, kʋ yɩ Swuarə bìú Netaneyɛlə.

9 Zabulon dwíí tə wa, kʋ yɩ Helon bìú Eliyabə.

10 Zʋzɛfə ʋ bìú Efərayimə dwíí tə wa, kʋ yɩn Amihudə bìú Eliswama, ʋ bìú Manase dwíí tə wa, kʋ yɩn Pedasurə bìú Gaməliyɛlə.

11 Bɛnzwamɛn dwíí tə wa, kʋ yɩ Gidoni bìú Abidan.

12 Dan dwíí tə wa, kʋ yɩ Amiswadayi bìú Ahiyezɛrə.

13 Aswɛrə dwíí tə wa, kʋ yɩ Okəran bìú Pagiyɛlə.

14 Gadə dwíí tə wa, kʋ yɩ Dewuwɛlə bìú Eliyasafə.

15 Nɛfətali dwíí tə wa, kʋ yɩ Enan bìú Ahɩra.»

16 Mə dìì tɩ̀án təntə nə, ba kúrí lalʋʋ tə wa. Ba yɩ ba nyɩna-ba tə dwíə́ tə pàbɩ̀á, ba mʋ̀ ga nə yɩ Yɩzərayɛlə kwatara tə yáá tɩ̀án. 17 Moyizə də Aron jɩn bara fugə də bələ təntə, ba nə bon ba yɩra, ba ma kúrí ba. 18 Ba kun lalʋʋ tə mama duən nə, bələ nii cànà tə təntən dɩɩn tə nə. Ba pʋ́pʋ́nɩ́ Yɩzərayɛlə lɩ̀à tə mama, ba nə jə bɩna sapʋa, də ba tə nə dwə nətʋ dwíí dəkuu, kʋ twá sàń sàń, də dìə̀ dìə̀. 19 Moyizə dàń gàlɩ̀ ba Sinayi kasɔɔ lanworu tə wa, ndə nətʋ tə nə Ba-Yígúrə́-Jə-Tiu nə pɩn wá nii, sə ʋ tʋn.

20 Ba sinti Yɩzərayɛlə bikwɩa Ribɛn dwíí tə dəkuu nə, ba pʋ́pʋ́nɩ́ bara tə mama yɩra nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. Ba gàlɩ̀ ba, kʋ twá dwíí dwíí, də sàń sàń, də dìə̀ dìə̀. 21 Lɩ̀à tə ba nə gàlɩ̀ Ribɛn dwíí tə wa yà yɩ lɩ̀à 46 500.

22 Nə̀ń Simeyon bɩ̀á tə dwíí dəkuu, kʋ twá dwíí dwíí, də sàń sàń, də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 23 Lɩ̀à tə ba nə gàlɩ̀ Simeyon dwíí tə wa yà yɩ lɩ̀à 59 300.

24 Nə̀ń Gadə bɩ̀á tə dwíí dəkuu, kʋ twá dwíí dwíí, də sàń sàń, də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 25 Lɩ̀à tə ba nə gàlɩ̀ Gadə dwíí tə wa yà yɩ lɩ̀à 45 650.

26 Nə̀ń Zwida bɩ̀á tə dwíí dəkuu, kʋ twá dwíí dwíí, də sàń sàń, də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 27 Lɩ̀à tə ba nə gàlɩ̀ Zwida dwíí tə wa yà yɩ lɩ̀à 74 600.

28 Nə̀ń Yɩsakarə bɩ̀á tə dwíí dəkuu, kʋ twá dwíí dwíí, də sàń sàń də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 29 Lɩ̀à tə ba nə gàlɩ̀ Yɩsakarə dwíí tə wa yà yɩ lɩ̀à 54 400.

30 Nə̀ń Zabulon bɩ̀á tə dwíí dəkuu, kʋ twá dwíí dwíí, də sàń sàń, də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 31 Lɩ̀à tə ba nə gàlɩ̀ Zabulon dwíí tə wa yà yɩ lɩ̀à 57 400.

32 Nə̀ń Zʋzɛfə bìú Efərayimə bɩ̀á tə dwíí dəkuu, kʋ twá dwíí dwíí, də sàń sàń, də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 33 Lɩ̀à tə ba nə gàlɩ̀ Efərayimə dwíí tə wa yà yɩ lɩ̀à 40 500.

34 Nə̀ń Zʋzɛfə bìú Manase bɩ̀á tə dwíí dəkuu, kʋ twá dwíí dwíí, də sàń sàń, də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 35 Lɩ̀à tə ba nə gàlɩ̀ Manase dwíí tə wa yà yɩ lɩ̀à 32 200.

36 Nə̀ń Bɛnzwamɛn bɩ̀á tə dwíí dəkuu, kʋ twá dwíí dwíí, də sàń sàń, də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 37 Lɩ̀à tə ba nə gàlɩ̀ Bɛnzwamɛn dwíí tə wa yà yɩ lɩ̀à 35 400.

38 Nə̀ń Dan bɩ̀á tə dwíí dəkuu, kʋ twá dwíí dwíí, də sàń sàń, də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 39 Lɩ̀à tə ba nə gàlɩ̀ Dan dwíí tə wa yà yɩ lɩ̀à 62 700.

40 Nə̀ń Aswɛrə bɩ̀á tə dwíí dəkuu, kʋ twá dwíí dwíí, də sàń sàń, də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 41 Lɩ̀à tə ba nə gàlɩ̀ Aswɛrə dwíí tə wa yà yɩ lɩ̀à 41 500.

42 Nə̀ń Nɛfətali bɩ̀á tə dwíí dəkuu, kʋ twá dwíí dwíí, də sàń sàń, də dìə̀ dìə̀: Ba gàlɩ̀ bara tə mama nədʋ nədʋ, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ. 43 Lɩ̀à tə ba nə gàlɩ̀ Nɛfətali dwíí tə wa yà yɩ lɩ̀à 53 400.

44 Mə lɩ̀à tə nii nə, Moyizə də Aron, də bara fugə bələ tə nə yɩ Yɩzərayɛlə pàbɩ̀á tə nə gàlɩ̀. Dìə̀ mama wa, ba yà kúrí bɛɛ nədʋ. 45 Lɩ̀à tə mama ba nə gàlɩ̀ Yɩzərayɛlə dìì tə wa, ba nə jə bɩna sapʋa, də ba tə nə dwə nətʋ, ba ga wàá kʋ̀ʋ̀ ba tɛ, 46 yà yɩ lɩ̀à 603 550.

Levi dwíí tə tʋtʋŋɩ yoo

47 Ba wà Levi dwíí lɩ̀à tə mʋ̀ gàlɩ̀, máŋá tə wa ba nə gàlɩ̀ dwíə́ tə duən tə lɩ̀à tə.

48 Ba-Yígúrə́-Jə-Tiu swɩ̀n Moyizə con, ʋ wʋ́: 49 «Dàn ká gàlà Levi dwíí lɩ̀à tə, máŋá tə wa n nə wá gàlà Yɩzərayɛlə dwíə́ tə duən tə. 50 N wá pa Yɩɩ wúlú dansɩa gansili tə, də kʋ wa tʋtʋnzɩla tə mama, də kʋ tə mama nə yɩ kʋ mʋ̀ nə tɩ, yuu ywàŋʋ́ Levi dwíí tə nə. Ba wá zɩn Yɩɩ wúlú gansili tə, də kʋ tʋtʋnzɩla tə mama, ba wá tʋn kʋ tʋ̀tʋ̀nán tə, ba ga wá jə̀ń ba kɩkarɩ kʋ. 51 Máŋá tə á nə zàn á yijaa bwálɩ́ tə wa, ba mʋ́ nə wá lɩ Yɩɩ wúlú gansili tə. Á nə kʋ́ʋ̀ ken á yijaa bwálɩ́, ba mʋ́ nə wá pú kʋ ba zɩgɩ. Vee nə yí kʋ yɩra, ba mɛ sə ba gʋ wá.

52 Yɩzərayɛlə lɩ̀à tə lìù mama wá kə ʋ dəkuu, ʋ dwíí tə kwatara púlí wa, ba dɩrapo də̀ń nə. 53 Levi dwíí tə cɩcɩ nə wá jə̀ń ba kɩkarɩ Yɩɩ wúlú dansɩa gansili tə. Kʋ nətʋ wá pa à lɩŋa bá zàn Yɩzərayɛlə lɩ̀à tə yuu wa. Levi dwíí tə dàń wá tʋn Yɩɩ wúlú dansɩa gansili tə tʋ̀tʋ̀nán tə. 54 Yɩzərayɛlə lɩ̀à tə tʋn won mama, ndə Ba-Yígúrə́-Jə-Tiu nə pɩn nii Moyizə nə, sə ʋ tʋn nətʋ.