Zozuwe
tʋ̀tʋ̀nán yoo
Zozuwe tʋ̀tʋ̀nán sagɩ tə yuu wa sʋgʋ
Zozuwe tʋ̀tʋ̀nán sagɩ tə bɩrɩ nətʋ, Yɩzərayɛlə lɩ̀à nə ta Kanaan lʋʋ lɩ̀à ba də́, ba ga jon ba lʋʋ nii tə, ba jə̀ń kʋ wa. Kʋ máŋá tə wa, də Zozuwe jon Moyizə yuu nə, ʋ wulə ba yáá, ʋ ja ba ʋ vəli. Sagɩ tə swapitərə 1, kʋ va kʋ yí swapitərə 12 wa, kʋ bɩrɩ Yɩzərayɛlə lɩ̀à nə ta Kanaan lʋʋ lɩ̀à nətʋ. Swapitərə 13, kʋ va kʋ yí swapitərə 21 wa, kʋ bɩrɩ ba nə tarɩ Kanaan lʋʋ tə nətʋ. Swapitərə 22, kʋ va kʋ yí swapitərə 24, kʋ swɩ̀n Zozuwe tɩan yoo.
Yɩɩ pɩn lʋʋ nii ʋ lɩ̀à tə nə, sə ʋ nikanɩ tə, ʋ nə kàn də ba nɩbara-ba nii sú. Ʋ yà pìí ʋ lìí nikanɩ təntə də Moyizə də. Yɩzərayɛlə lɩ̀à də Kanaan tɩ̀án kʋ̀ʋ̀ tə yɩ ndə nətʋ tə nə, ba nə nan Ezwipətə lʋʋ nii tə wa. Máŋá mama, Yɩɩ pɩn ba tɛ ba də́ dɩ̀àn.
Yɩzərayɛlə lɩ̀à tarɩ lʋʋ nii tə, ba nə ta ba jon, də kʋ tə nə ga, sə ba ta ba jon. Kʋ nətʋ bɩrɩ də Yɩɩ swə, sə ba lìù mama na bwálɩ́ ʋ ya kʋ wa. Swapitərə 13, də swapitərə 15, də swapitərə 16 wa, sagɩ tə bɩrɩ nətʋ, ba nə tarɩ Kanaan lʋʋ nii tə.
Kʋ nə zɩgɩ máŋá tə mama, ba nə tɛ Kanaan lʋʋ nii tə, ba joŋə ba tarɩ, Zozuwe sagɩ tə lìí Yɩzərayɛlə lɩ̀à tə, də Yɩɩ pɩn ʋ nikana tə nii sú, yá ʋ dàń pɩ̀à, sə ba kúrí ba tì, sə ba twá ʋ nə. Yɩzərayɛlə lɩ̀à tə wá jə̀ń dwíə́ nɩkaran titəŋi wa, ba nə yəri Yɩɩ. Yá dwíə́ nɩkaran təntə wàá pa Yɩzərayɛlə lɩ̀à ba Yɩɩ nii zìlí. Kʋ mʋ̀ nə pɩn, swapitərə 24 tə wa, Zozuwe pìí ʋ lìí ba, ba də Yɩɩ nimarʋ tə yoo, máŋá tə wa, ba nə kun duən nə Siswɛmə nə. Yá ba dàń kúrí ba tì, sə ba tʋn ba pa Yɩɩ nə.