Zozuwe
tʋ̀tʋ̀nán yoo
Zozuwe jon Moyizə yuu nə
1
1 Ba-Yígúrə́-Jə-Tiu tʋtʋnʋ Moyizə tɩan kwa nə, Ba-Yígúrə́-Jə-Tiu swɩ̀n Nun bìú Zozuwe con, ʋ yà nə yɩ Moyizə tʋtʋnʋ, ʋ wʋ́: 2 «À tʋtʋnʋ Moyizə tɩga. Sɩ́ʋ́n nə, n dàń zàn n bɩn Zʋrədɛn mʋnaa tə, n də lalʋʋ tə mama, á va lʋʋ nii tə wa, à nə pɩn Yɩzərayɛlə dwíí tə nə. 3 Bwálɩ́ tə mama, á nə wá dɩ á naa, à pɩn kʋ aba, ndə à nə swɩ̀n kʋ Moyizə con nətʋ. 4 Á lʋʋ tə nii sɩswɩan wá zɩgɩ kasɔɔ lanworu tə, də Liban paan tə nə, tə va tə yí mʋnaa nəfarʋ tə, ba nə boŋə Əfəratə, də Ɛtə dwíí lʋʋ nii tə, tə va tə nan mʋʋ nəfarʋ tə nə, kʋ nə wulə yɩɩ yizwɩa con. 5 Lìù mama bá wànɩ́ mʋ́, ʋ ta ʋ də́, n lʋʋ wúlú tə mama wa. Cɩ́gá, à wá ya də mʋ́, ndə à nə yɩn də Moyizə nətʋ. À bá yá mʋ́ də mama. À bá vɩ mʋ́, à dʋgʋ. 6 Pa n jɩɩn dàn, n ga ja wʋdɩʋ. Cɩ́gá, kʋ wá twá də n mʋ̀, lalʋʋ kʋ tə ma wànɩ́ kʋ jon lʋʋ nii tə, à nə kàn nii ba nyɩna-ba con, də à wá pa kʋ ba. 7 N dàń yà pa n jɩɩn dàn, n ga ja wʋdɩʋ mʋ̀ʋ́. Zìlí à nii sagɩ yìə̀n* tə mama zəni, à tʋtʋnʋ Moyizə nə pʋ́pʋ́nɩ́ ʋ pa mʋ́, n ga twá kʋ nə. Dàn ká yori, n va jɩzən, nə à yə̀ə́ jɩgwiə, n ga yá kʋ. Kʋ nətʋ wá pa, won tə mama n nə fwa, jì kʋ pa mʋ́. 8 Kàrɩ̀ à nii sagɩ kʋ tə, máŋá mama, á yɩjʋnɩ wa. Zəən kʋ yìə̀n tə yuu wa zəni, yɩcaʋ də tɩtɩn, sə n zìlí tə nii, n ga twá kʋ tə mama nə, kʋ nə pʋ́pʋ́nɩ́ kʋ wa. Cɩ́gá, kʋ nətʋ dàń wá pa, n tʋtʋŋɩ mama lɩ yáá, kʋ ga jì kʋ pa mʋ́. 9 Lìí n tɩ̀àn, də à pɩn mʋ́ nii, sə n pa n jɩɩn dàn, n ga ja wʋdɩʋ. Dàn ká pa fən ja mʋ́, dàn ká pa n jɩɩn gwàrɩ̀. Cɩ́gá, à mʋ̀ Ba-Yígúrə́-Jə-Tiu, à nə yɩ n Yɩɩ, wá ya də mʋ́ bwálɩ́ tə mama, n nə wá va.»Zozuwe wulə ʋ tanɩ lalʋʋ tə, sə ba bɩn Zʋrədɛn mʋnaa tə
10 Zozuwe dàń pɩn nii lalʋʋ tə yáá tɩ̀án tə nə, 11 sə ba jírí lalʋʋ tə wa, ba swɩ̀n ba con, ba wʋ́: «Á tana wodirən, á tún á jɩɩn nə. Cɩ́gá, yəbə də dɩan batwa, á wá bɩn Zʋrədɛn mʋnaa kʋ tə, á va á jon lʋʋ nii tə, Ba-Yígúrə́-Jə-Tiu, ʋ nə yɩ á Yɩɩ nə pɩn aba, á tɩnɩ kʋ.»
12 Zozuwe swɩ̀n Ribɛn dwíí tə, də Gadə dwíí tə, də Manase dwíí faan tə con, ʋ wʋ́: 13 «Á lìə́ á tɩ̀àn, kʋ tə Ba-Yígúrə́-Jə-Tiu tʋtʋnʋ Moyizə nə swɩ̀n á con. Ʋ swɩ̀n də, Ba-Yígúrə́-Jə-Tiu, ʋ nə yɩ á Yɩɩ pɩn aba lʋʋ nii tə vàn kʋ tə, sə á ya lá də sìə́. 14 Á dàń wá yá á kana tə, də á bìsɩ́ná tə, də á vàná tə lʋʋ nii kʋ tə wa, Moyizə nə pɩn aba, Zʋrədɛn mʋnaa tə yɩɩ yipɩan con. Yá á mʋ̀ bara tə mama, á nə wàá kʋ̀ʋ̀ á tɛ, dàń wá kə kʋ̀ʋ̀ sírí, á lɛ á ya á nubɩa tə yáá, á san ba, á ta. 15 Á wá san ba, kʋ ja va kʋ yí máŋá tə, Ba-Yígúrə́-Jə-Tiu nə wá pa sìə́ ba də nə, ndə ʋ nə pɩn sìə́ á də nə nətʋ. Yá ba də dàń wá tɩnɩ lʋʋ nii tə, Ba-Yígúrə́-Jə-Tiu, ʋ nə yɩ á Yɩɩ nə pɩn ba. Kʋ kwa nə, á dàń wá pìí á bà, á tɩnɩ á lʋʋ nii tə, Ba-Yígúrə́-Jə-Tiu tʋtʋnʋ Moyizə nə tarɩ, ʋ pa aba Zʋrədɛn mʋnaa tə yɩɩ yipɩan con.»
16 Ba le Zozuwe ba wʋ́: «Nə wá fwa kʋ tə mama, n nə pɩn nəba nii, sə nə fwa, yá nə wá va bwálɩ́ tə mama, n nə wá tʋn nəba. 17 Nə wá zìlí n nii, ndə nə nə zìlí Moyizə nii yoo mama wa, nətʋ. Ba-Yígúrə́-Jə-Tiu, ʋ nə yɩ n Yɩɩ dàń yà ya də mʋ́, ndə ʋ nə yɩn də Moyizə nətʋ tə mʋ̀ʋ́. 18 Lìù tə mama ʋ nə vɩga, sə ʋ zìlí n nii, ʋ ga ba kʋ tə mama, n nə bɩrɩ wá nə twá, kʋ mɛ sə ba gʋ kʋ tíú. N dàń yà pa n jɩɩn dàn, n ga ja wʋdɩʋ mʋ̀ʋ́.»