Zozuwe tʋn mɩla lɩ̀à bələ Zweriko nə
2
1 Nun bìú Zozuwe zɩgɩ bwálɩ́ tə nə, ba nə boŋə Switimə, ʋ səgə ʋ tʋn bara bələ, sə ba ya mɩla lɩ̀à. Ʋ swɩ̀n ba con, ʋ wʋ́: «Á vələ á mɩ̀àn lʋʋ nii tə, də Zweriko tɩʋ tə, á na tə nə yɩ nətʋ.» Ba nə vəli ba yí Zweriko, ba zʋa ba jʋ kacwarʋ don dìə̀, ʋ yɩrɩ nə yɩ Rahabə. 2 Yá lɩ̀à swɩ̀n Zweriko pɩ̀ʋ́ tə con, ba wʋ́: «Nə̀ń, Yɩzərayɛlə lɩ̀à twi yəbə tɩtɩn kʋ tə nə, sə ba mɩ̀àn lʋʋ nii tə, ba na kʋ nə yɩ nətʋ.» 3 Zweriko pɩ̀ʋ́ tə ma tʋn, ʋ swɩ̀n Rahabə con, ʋ wʋ́: «Kə bara tə ba nə twi ba zʋ n dìə̀ tə, yuu poni nə. Cɩ́gá, kʋ yɩ ba twi, sə ba mɩ̀àn lʋʋ nii tə mama, ba na kʋ nə yɩ nətʋ.» 4 Yá kan tə dàń jɩn bara bələ tə ʋ səgə, ʋ ga le ʋ wʋ́: «Kʋ yɩ cɩ́gá, bara təntə twi à con, yá à dàń yà nə yəri bwálɩ́ tə, ba nə nan. 5 Ba nan à con didənbibirə tə nə, tɩʋ tə mimii tə suŋu máŋá wa. À dàń nə yəri bwálɩ́ tə, ba nə vəli. Á kənə dɩ̀àn á dɩŋɩ ba kwa, á wá ja ba.» 6 Yá Rahabə yà pɩn bara tə dɩ̀ ʋ dəyuu wa, yá ʋ dàń səgə ba pɩpadɛɛ də̀ń nə, ʋ yà nə kwɛn ʋ tún lá. 7 Pɩ̀ʋ́ tə tʋntʋna tə nan, ba dɩŋɩ Yɩzərayɛlə bara tə kwa. Ba nə nan tɩʋ tə wa kwa nə, tɩʋ tə tɩ̀án pìí ba sun mimii tə. Ba tì cwəŋə tə, ka nə vələ Zʋrədɛn mʋnaa tə con, ba va ba yí bwálɩ́ tə, ba nə yàá twá lá ba bɩn.8 Rahabə dɩ̀gà bara tə con, dəyuu tə wa, də ba tə ba tígə́. 9 Yá ʋ dàń swɩ̀n ba con, ʋ wʋ́: «À yə̀ə́ də Ba-Yígúrə́-Jə-Tiu pɩn aba lʋʋ nii kʋ tə. Á fən zʋa nəba zənzən, yá lʋʋ nii kʋ tə lɩ̀à tə mama yɩ ba vɩvaga, á yáá con. 10 Cɩ́gá, nə nì də máŋá tə á nə naŋa Ezwipətə, Ba-Yígúrə́-Jə-Tiu pɩn Mɩncanɩ mʋʋ tə nɩ́á wʋ, á yáá con. Nə nì yoo tə, á nə ma tʋn Sihon də Ogə, Amɔrə dwíí tə pɛ̀gá bələ təntə, ba yà nə wulə Zʋrədɛn mʋnaa tə yɩɩ yipɩan con. Á gʋa ba, á ga cʋ̀gʋ̀ ba wiən tə mama mɩ́ámɩ́án*. 11 Nə nə nì tə yìə̀n təntə, nə jɩ̀àn gwàrɩ̀ mɩ́ámɩ́án, nə lìù mama bɩcan ga karɩ, á yáá con. Cɩ́gá, Ba-Yígúrə́-Jə-Tiu, ʋ nə yɩ á Yɩɩ, nə yɩ Yɩɩ lanworu tə wa, də tɩa yuu wa, yəbə. 12 À tʋn wʋywaŋʋ á yɩra. Sɩ́ʋ́n nə, á dàń dwiə də Ba-Yígúrə́-Jə-Tiu, də á də wá tʋn wʋywaŋʋ à dìə̀ lɩ̀à tə yɩra. Á pɩan nə mɩmɩnʋ kʋ nə bɩrɩ də, á cɩ́gá wá sɛ̀ á tʋn kʋ nətʋ tə. 13 Á kaŋa nii á pa nə, də á wá jon à nyɩna, də à nuu, də à nábwáná, də à nubwɩɩ, də kʋ tə mama ba nə tɩ mɩɩ, á kə lʋʋ wa. Yá á bá yá á pa ba gʋ nəba.» 14 Bara tə le Rahabə ba wʋ́: «Nə sɛ̀ sə nə tɩ á yɩrɩ, də á nə wà nəba lwɛ́ á dʋgʋ. Yá máŋá tə Ba-Yígúrə́-Jə-Tiu nə pɩn nəba lʋʋ nii tə, nə wá tʋn wʋywaŋʋ n yɩra, kʋ twá cɩ́gá nə, ndə kʋ nə mɛ nətʋ.» 15 Rahabə dìə̀ tə yà yɩ ba lwə̀ ba kə tɩʋ tə birinaa tə wa. Kʋ nətʋ tə pɩn, ʋ yà yɩ ʋ wulə bírə́ tə wa. Yá kʋ nətʋ tə dàń pɩn, ʋ pa ba twá təkurə ba cú bírə́ tə kwa, də ŋwənə. 16 Də bara tə, tə yà wà vìí, ʋ yà dí yáá, ʋ swɩ̀n ba con, ʋ wʋ́: «Á vələ á səgə pɛɛn tə wa. Kʋ nə tà nətʋ, lɩ̀à tə nə twarɩ aba sə ba ja tə, jɩɩn wá zʋ aba. Á səgə lá, kʋ ja vələ dɩan batwa, də lɩ̀à tə nə twarɩ aba sə ba ja tə ma pìí ba bɩ̀àn. Kʋ kwa nə, á dàń wá pìí á nan, á tì á cwəŋə.» 17 Yá bara tə də swɩ̀n Rahabə con ba wʋ́: «Nə̀ń kʋ nə wá twá nətʋ, nə ma lɩ durə tə, n nə pɩn nə dù, nə yuu wa. 18 Máŋá tə, nə nə zʋa sə nə ta lʋʋ nii tə, n wá vwa ŋwənə nəsɩan kʋ tə, təkurə tə nə, n nə pɩn nə twá lá, nə cú kàrá wa. N dàń wá pa n nyɩna, də n nuu, də n nábwáná, də n nyɩna dìə̀ lɩ̀à tə mama bà n con, dìə̀ tə wa. 19 Yá á wa lìù dàń nə zàn n dìə̀ tə wa, ʋ galɩ mimii tə ʋ nan kàrá, kʋ mʋ̀ dàń yɩ ʋ mʋ̀ nə gʋa ʋ tɩ̀àn, kʋ kʋ́ʋ̀ tà nə mʋ̀ yoo. Yá ba nə gʋa lìù n con, dìə̀ tə wa, kʋ tíú tɩan tə yoo yɩ nə mʋ̀ yuu wa nə, kʋ zɩŋa. 20 Yá n nə lwá nəba n dʋgʋ, durə tə n nə pɩn nə dù, kʋ́ʋ̀ ba ya nə yuu zɩlɩ.» 21 Rahabə ma le ba, ʋ wʋ́: «À sɛ̀ sə kʋ ya ndə á nə swɩ̀n nətʋ.» Kʋ kwa nə, ʋ yá ba, ʋ pa ba vìí, ʋ ga tì ŋwənə nəsɩan tə, ʋ vwa təkurə tə nə.
22 Bara bələ tə vəli, ba zʋ pɛɛn tə wa. Ba səgə lá dɩan batwa, lɩ̀à tə nə twarɩ ba sə ba ja tə, kori ba pìí ba bà Zweriko. Lɩ̀à tə nə twarɩ ba, sə ba ja tə, pɩ̀à ba cwəŋə tə mama wa, ba ga. 23 Kʋ kwa nə, bara bələ tə dàń nan pɛɛn tə yuu, ba cú. Ba bɩn Zʋrədɛn mʋnaa tə, ba bà Nun bìú Zozuwe con. Yá ba dàń man kʋ tə mama, kʋ nə yí ba, ba bɩrɩ wá. 24 Ba swɩ̀n ʋ con, ba wʋ́: «Cɩ́gá mama, Ba-Yígúrə́-Jə-Tiu ken lʋʋ nii tə mama nə jɩɩn wa. Lʋʋ nii tə lɩ̀à tə tətə mama yɩ ba vɩvaga nə yáá con.»