Yɩzərayɛlə lɩ̀à tə bɩn Zʋrədɛn mʋnaa tə
3
1 Kʋ tɩpʋrɩ nə, Zozuwe zàn jɩjʋ fuən fuən. Ʋ də Yɩzərayɛlə lɩ̀à tə nan Switimə, ba va ba jʋ Zʋrədɛn mʋnaa tə nii nə, ba ma dànɩ̀ sə ba bɩn ka. 2 Dɩan batwa kwa nə, lalʋʋ tə yáá tɩ̀án tə jírí lalʋʋ tə wa, 3 ba pa ba nii kʋ tə, ba wʋ́: «Máŋá tə, á nə nɩ Ba-Yígúrə́-Jə-Tiu, ʋ nə yɩ á Yɩɩ, nimarʋ culu daka tə, də Levi dwíí lɩ̀à tə, ba nə yɩ Yɩɩ joŋwana zɩŋa, sə á zàn bwálɩ́ kʋ tə wa á nə wulə, á pú ka kwa. 4 Kʋ nətʋ wá pa á lwarɩ cwəŋə tə, á nə mɛ sə á tì, á nə wà dí yáá, á twá kʋ cwəŋə təntə yɩrɩ.» Á nə dànà ká bólí ka yɩra. Laŋa mɛ sə kʋ ya á də ka pwə́rə́ wa, kʋ yí ndə jɩvaŋɩ yiə mʋ̀rʋ̀ bələ.» 5 Zozuwe swɩ̀n lalʋʋ tə con, ʋ wʋ́: «Á kwɩan á tɩ̀àn á lɩ durən yìə̀n wa*. Cɩ́gá, jwɩan nə, Ba-Yígúrə́-Jə-Tiu wá tʋn yomɩlan á titəŋi wa.» 6 Zozuwe swɩ̀n Yɩɩ joŋwana tə con, ʋ wʋ́: «Á zɩŋa Ba-Yígúrə́-Jə-Tiu nimarʋ culu daka tə, á ja ya lalʋʋ tə yáá.» Yá ba dàń zɩn ka, ba ja wulə lalʋʋ tə yáá, ba vəli.7 Ba-Yígúrə́-Jə-Tiu swɩ̀n Zozuwe con, ʋ wʋ́: «Zə̀n kʋ tə, à sinti sə à pa n na dun, Yɩzərayɛlə lɩ̀à tə mama yáá con, sə ba lwarɩ də à wulə də mʋ́, ndə à nə yɩn də Moyizə nətʋ. 8 N dàń pa nii kʋ tə joŋwana tə nə, ba nə zɩŋa à nimarʋ culu daka tə, ba nə yí Zʋrədɛn mʋnaa tə, sə ba zʋ ba zɩgɩ nɩ́á tə wa.» 9 Zozuwe dàń swɩ̀n Yɩzərayɛlə lɩ̀à tə con, ʋ wʋ́: «Á bɩ̀àn á yí yəbə, á cʋgʋ Ba-Yígúrə́-Jə-Tiu, ʋ nə yɩ á Yɩɩ, sʋgʋ.» 10 Zozuwe swɩ̀n, ʋ wʋ́: «Kʋ wá twá yoo kʋ tə nə, á ma lwarɩ də Yɩɩ tə, ʋ nə nəŋə*, wulə á titəŋi wa. Yá ʋ cɩ́gá wá dɩŋa Kanaan tɩ̀án tə, də Ɛtə dwíí tə, də Perizi dwíí tə, də Girəgasə tɩ̀án tə, də Amɔrə dwíí tə, də Yebusə tɩ̀án tə, á yáá con. 11 Á nəŋə, tɩa tə mama Yuu-Tiu nimarʋ culu daka tə wá kɛ̀ń, ka ya á yáá, ka zʋ Zʋrədɛn mʋnaa tə wa. 12 Sɩ́ʋ́n nə, á dàń lɩa bara fugə də bələ, Yɩzərayɛlə dwíə́ tə wa. Á lɩa bɛɛ nədʋ, dwíí mama wa. 13 Yá máŋá tə wa, Yɩɩ joŋwana tə nə zɩŋa Ba-Yígúrə́-Jə-Tiu, ʋ nə yɩ tɩa tə mama Yuu-Tiu, nimarʋ culu daka tə, nə wá dɩ ba nɛɛ Zʋrədɛn mʋnaa tə nɩ́á tə wa, nɩ́á tə wá pwɛ̀ duən wa. Yá nɩ́á tə nə naŋa mʋnaa tə yuu con, tə bɩ̀àn, wá cən tə zɩgɩ bwálɩ́ nədʋ.»
14 Máŋá tə lalʋʋ tə nə tanɩ, ba nan ba gansilə wa, sə ba bɩn Zʋrədɛn mʋnaa tə, Yɩɩ joŋwana tə nə zɩŋa Yɩɩ nimarʋ culu daka tə, yà wulə lalʋʋ tə yáá, ba vəli. 15 Kʋ yɩn woceri máŋá wa. Kʋ máŋá təntə wa, Zʋrədɛn mʋnaa tə yàá sú, ka pàlɩ̀. Yá Yɩɩ joŋwana tə nə zɩŋa Yɩɩ nimarʋ culu daka tə, nə yí Zʋrədɛn mʋnaa tə nii nə, máŋá tə ba nə dɩga ba nɛɛ nɩ́á tə nii nə, 16 naa nədʋ də nɩ́á tə yà nə naŋa mʋnaa tə yuu con tə bɩ̀àn, cən tə zɩgɩ bwálɩ́ nədʋ, yiŋʋnɩ, Adamə tɩʋ tə máŋá nə. Adamə yà bwə́lə́ də Sarətan tɩʋ tə. Yá nɩ́á tə nə cwí Araba mʋʋ tə con, ba nə boŋə nəkuən mʋʋ, dàń kwə tə dəri tə kɛ̀ń mɩ́ámɩ́án. Yá lalʋʋ tə dàń wànɩ́ ba bɩn ba nan Zweriko yáá con. 17 Yɩɩ joŋwana tə nə zɩŋa Ba-Yígúrə́-Jə-Tiu nimarʋ culu daka tə dàń zɩgɩ tɩkʋrʋ yuu, Zʋrədɛn mʋnaa tə wa. Yá Yɩzərayɛlə lɩ̀à tə mama dàń twá mʋnaa tə wa tɩkʋrʋ tə yuu, ba kɛ̀ń ba nan, lalʋʋ tə mama kori ba bɩn ba nan, ba zwɛ̀.