Kapana fugə bələ tə nə lìí Zʋrədɛn mʋnaa tə bɩʋn yoo
4
1 Lalʋʋ tə mama nə bɩn Zʋrədɛn mʋnaa tə, ba zwɛ̀ máŋá tə wa, Ba-Yígúrə́-Jə-Tiu swɩ̀n Zozuwe con, ʋ wʋ́: 2 «Á lɩa bara fugə də bələ, Yɩzərayɛlə lɩ̀à dwíə́ tə wa. Á lɩa bɛɛ nədʋ, dwíí mama wa. 3 Á pɩan ba nii, sə ba zʋ Zʋrədɛn mʋnaa tə titəŋi wa, bwálɩ́ tə nə, joŋwana tə nə zɩgɩ, ba lɩ kapana fugə də bələ, ba ja nan. Á wá ja tə, á kə lá á va á tún bwálɩ́ tə nə, á nə wá jʋ zə̀n tɩtɩn kʋ tə nə.»4 Zozuwe dàń bon bara fugə də bələ tə, ʋ nə pɩn ba kúrí Yɩzərayɛlə lɩ̀à tə wa, bɛɛ nədʋ, dwíí mama wa. 5 Ʋ swɩ̀n ba con, ʋ wʋ́: «Á yana Ba-Yígúrə́-Jə-Tiu, ʋ nə yɩ á Yɩɩ, nimarʋ culu daka tə yáá, á zʋ Zʋrədɛn mʋnaa tə titəŋi wa. Á lìù mama wá zɩn kapan ʋ pàrà wa, ʋ ja nan. Yɩzərayɛlə dwíə́ tə nii, mə kapana tə də nii nə, ba nə wá lɩ. 6 Kapana təntə wá ya mɩmɩnʋ, á titəŋi wa. Yá máŋá don wá, á bɩ̀á nə bwe aba, sə ba jə́n kapana tə tə də̀ń nə yɩ bɛ̀, 7 á wá man á bɩrɩ ba, də Ba-Yígúrə́-Jə-Tiu nimarʋ culu daka tə nə twi, sə ka bɩn Zʋrədɛn mʋnaa tə, mʋnaa tə nɩ́á tə goŋi duən wa, daka tə yáá con. Yá kapana təntə dàń wá ya mɩmɩnʋ, tə lìí Yɩzərayɛlə lɩ̀à tə kʋ yoo təntə, máŋá mama wuuu.»
8 Yɩzərayɛlə lɩ̀à tə tʋn kʋ tə, Zozuwe nə pɩn nii sə ba tʋn. Ba lɩ kapana fugə də bələ Zʋrədɛn mʋnaa tə titəŋi wa, ndə Ba-Yígúrə́-Jə-Tiu nə swɩ̀n nətʋ, Zozuwe con. Yɩzərayɛlə dwíə́ tə nii, mə kapana tə də nii nə, ba nə lɩ. Ba ja tə ba va ba tún ba yijwɩa bwálɩ́ tə nə. 9 Zozuwe tə pɩn ba zɩ̀n kapana fugə də bələ duən, ba zɩgɩ yɩɩ nə Zʋrədɛn mʋnaa tə titəŋi wa, bwálɩ́ tə nə, Yɩɩ joŋwana tə yà nə zɩŋa Yɩɩ nimarʋ culu daka tə, nə zɩgɩ. Yá tə kapana təntə tə wulə lá, də zə̀n mama.
10 Yɩɩ joŋwana tə yà nə zɩŋa Yɩɩ nimarʋ culu daka tə zɩgɩ Zʋrədɛn mʋnaa tə titəŋi wa, lalʋʋ tə kori ba tʋn kʋ tə mama, Ba-Yígúrə́-Jə-Tiu nə pɩn nii Zozuwe nə, sə ba tʋn ba pa kʋ nii sú mɩ́ámɩ́án. Ba tʋn yoo mama, kʋ twá Moyizə nii tə nə, ʋ nə dí yáá ʋ pa Zozuwe nə. Yá lalʋʋ tə dàń ken cɩ́gá, ba kɛ̀ń lala. 11 Máŋá tə lalʋʋ tə mama nə kɛ̀ń ba zwɛ̀, Ba-Yígúrə́-Jə-Tiu nimarʋ culu daka tə, də Yɩɩ joŋwana tə dàń kɛ̀ń lalʋʋ tə yáá. 12 Ribɛn dwíí tə, də Gadə dwíí tə, də Manase dwíí tə faan dàń ken kʋ̀ʋ̀ sírí, ba lɛ ba wulə Yɩzərayɛlə lɩ̀à tə yáá, ndə Moyizə nə dí yáá ʋ swɩ̀n ba con nətʋ. 13 Ba yà yí ndə kwatara mʋ̀rʋ̀ sapwɩlə nə, ba nə ken ba sírí, sə ba ta kʋ̀ʋ̀. Ba kɛ̀ń ba va Zweriko digə tə con, yá Ba-Yígúrə́-Jə-Tiu yà wulə də ba.
14 Kʋ dɩɩn tə nə, Ba-Yígúrə́-Jə-Tiu pɩn Zozuwe na dun, Yɩzərayɛlə lɩ̀à tə mama yáá con. Yá ba zìlí wá, máŋá tə mama ʋ nə yɩn lʋʋ wa, ndə ba nə zìlí Moyizə nətʋ.
15 Ba-Yígúrə́-Jə-Tiu swɩ̀n Zozuwe con, ʋ wʋ́: 16 «Pa nii joŋwana tə nə, ba nə zɩŋa à nimarʋ culu daka tə, sə ba nan Zʋrədɛn mʋnaa tə wa.» 17 Yá Zozuwe dàń pɩn ba nii təntə, ʋ wʋ́: «Á naŋa Zʋrədɛn mʋnaa tə wa.» 18 Yɩɩ joŋwana tə yà nə zɩŋa Ba-Yígúrə́-Jə-Tiu nimarʋ culu daka tə, dàń gʋa ba nɛɛ nə, ba naŋa Zʋrədɛn mʋnaa tə titəŋi wa, ba bɩ̀àn ka bibiru nə. Yá máŋá tə ba nə zə́n ba nyɩ́n ba nan bibiru yuu ba zwɛ̀, də nɩ́á tə pìí tə bà tə bwálɩ́ nə. Tə súə́ mʋnaa tə nii tə pàlɩ̀, ndə fuən nə.
19 Təntən cànà dɩan fugə dɩɩn nə nə, Yɩzərayɛlə lɩ̀à tə bɩn Zʋrədɛn mʋnaa tə. Ba vəli ba kə ba dəkuu Giləgalə nə, Zweriko yɩɩ yipɩan con. 20 Yá kapana fugə də bələ tə, ba nə lɩ Zʋrədɛn mʋnaa tə wa, Zozuwe dàń zɩ̀n tə ʋ zɩgɩ yɩɩ nə, Giləgalə nə. 21 Zozuwe swɩ̀n Yɩzərayɛlə lɩ̀à tə con, ʋ wʋ́: «Máŋá don wa, á bɩ̀á nə bwe ba nyɩna-ba, sə ba jə́n kapana tə tə də̀ń nə yɩ bɛ̀ɛ̀, 22 á wá man á bɩrɩ á bɩ̀á tə nə, də Yɩzərayɛlə lɩ̀à tə twá Zʋrədɛn mʋnaa ka tə wa, tɩkʋrʋ yuu ba nan. 23 Cɩ́gá, Ba-Yígúrə́-Jə-Tiu, ʋ nə yɩ á Yɩɩ, pɩn Zʋrədɛn mʋnaa tə nɩ́á wʋ á yáá con, á kori á bɩn á nan á zwɛ̀. Ba-Yígúrə́-Jə-Tiu, ʋ nə yɩ á Yɩɩ, dí yáá ʋ tʋn kʋ, Mɩncanɩ mʋʋ tə də yɩra nətʋ. Ʋ pɩn kʋ nɩ́á wʋ nə yáá con, nə kori nə bɩn nə nan nə zwɛ̀. 24 Ʋ tʋn kʋ nətʋ tə, sə dwíə́ tə mama tɩa yuu wa, yəni də Ba-Yígúrə́-Jə-Tiu jə dɩ̀àn, sə á ga dəri Ba-Yígúrə́-Jə-Tiu, ʋ nə yɩ á Yɩɩ fən, máŋá mama wuuu.»