Zozuwe 5

Zozuwe goŋi Yɩzərayɛlə bara tə, Giləgalə nə

1 Amɔrə dwíí pɛ̀gá tə, ba nə wulə Zʋrədɛn mʋnaa tə kwa, yɩɩ yizwɩa con, də Kanaan tɩ̀án pɛ̀gá tə mama, ba nə bwə́lə́ mʋʋ tə nii nə, nì də Ba-Yígúrə́-Jə-Tiu pɩn Zʋrədɛn mʋnaa tə nɩ́á wʋ, Yɩzərayɛlə lɩ̀à tə yáá con, Yɩzərayɛlə lɩ̀à tə ga bɩn ba nan. Máŋá tə ba nə nì kʋ nətʋ tə, ba jɩ̀àn gwàrɩ̀ mɩ́ámɩ́án, ba bɩcanɩ ga karɩ, Yɩzərayɛlə lɩ̀à tə yáá con.

2 Kʋ máŋá tə wa, Ba-Yígúrə́-Jə-Tiu swɩ̀n Zozuwe con, ʋ wʋ́: «Fwa pɩ̀ràn sɩ̀án, n ma goŋə Yɩzərayɛlə bara tə, ba nə wà təntən goŋu tə wa yɩn.» 3 Zozuwe dàń fwa pɩ̀ràn sɩ̀án, ʋ ma goŋə Yɩzərayɛlə bara tə, paan don də̀ń nə, yá ba dàń boŋə paan təntə, Pəntanan paan. 4-5 Nə̀ń yoo tə yɩrɩ, Zozuwe nə goŋi Yɩzərayɛlə bara tə. Ba yà goŋi bara tə mama, Yɩzərayɛlə lɩ̀à tə wa, ba nə nan Ezwipətə tə. Yá bara təntə mama ba nə bɩga, ba wàá kʋ̀ʋ̀ ba tɛ, tɩga kasɔɔ lanworu tə wa. Yá lalʋʋ tə mʋ̀ mama ba nə lɩrɩ cwəŋə yuu, kasɔɔ lanworu tə wa, ba Ezwipətə naŋʋ tə kwa nə, ba wa bisɩmabara mama yà wà goŋi. 6 Cɩ́gá, Yɩzərayɛlə lɩ̀à tə nə nan Ezwipətə, ba yɩn kasɔɔ lanworu tə wa, ba va wuuu, bɩna sapwɩlə. Yá kʋ máŋá təntə wa, bara tə mama ba nə bɩga, ba wàá kʋ̀ʋ̀ ba tɛ, dàń tɩga kasɔɔ lanworu tə wa, ba nə vɩga Ba-Yígúrə́-Jə-Tiu nii yɩrɩ. Cɩ́gá, Ba-Yígúrə́-Jə-Tiu yà dùə̀, də ʋ bá pa ba mʋ̀ lɩ̀à təntə na lʋʋ nii tə, ʋ nə kàn nii də ba nɩbara-ba, də ʋ wá pa kʋ nəba. Kʋ yɩ lʋʋ nii tə, nayɩla də tʋ̀ràn nə súə́ kʋ nii. 7 Yá kʋ dàń yɩ ba bɩ̀á nə, Ba-Yígúrə́-Jə-Tiu pɩn ba jon ba yuu nə. Mə bɩ̀á təntə nə Zozuwe goŋi. Cɩ́gá, ba yà tə wà ba mʋ̀ goŋi cwəŋə tə wa. 8 Máŋá tə ba nə goŋi lalʋʋ tə mama ba zwɛ̀, ba yɩn ba dəkuu bwálɩ́ tə wa wuuu, kʋ va kʋ yí máŋá tə, ba nʋran tə nə zuri.

9 Ba-Yígúrə́-Jə-Tiu swɩ̀n Zozuwe con, ʋ wʋ́: «Zə̀n kʋ tə, à pipini á cavɩra tə, á nə ja nan Ezwipətə, à lɩ á yuu wa.» Kʋ mʋ̀ nə pɩn, ba boŋə kʋ bwálɩ́ tə yɩrɩ Giləgalə, də zə̀n mama.

Yɩzərayɛlə lɩ̀à tə dí pakə cànà tə, Zweriko digə tə wa

10 Yɩzərayɛlə lɩ̀à tə ken ba dəkuu Giləgalə nə, yá ba dàń dí pakə cànà tə, cànà tə dɩan fugə də banɩa dɩɩn nə, didəni nii nə, Zweriko digə tə wa. 11 Pakə cànà tə nə dí kʋ zàn tɩa, kʋ dɩɩn təntə nə, ba dí lʋʋ nii tə lənə. Kʋ yɩn dipɛn tə nə wà sabwarɩ ken, də wobɩa ba nə wùə̀. 12 Ba nə dí lʋʋ nii tə lənə tə kwa nə, kʋ tɩpʋrɩ nə, wodiu tə ba nə boŋə manə tə kʋ́ʋ̀ wà lá yɩn. Yá kʋ bɩnɩ təntə nə, kʋ dàń yɩn Kanaan lʋʋ nii wodirən nə, Yɩzərayɛlə lɩ̀à tə dí. Manə tə kʋ́ʋ̀ wà lá yɩn mɩ́ámɩ́án.

Yɩzərayɛlə lɩ̀à tə tanɩ, sə ba ta Zweriko tɩʋ tə

13 Dɩɩn don nə, də Zozuwe tə yà wulə Zweriko tɩʋ tə nii nə, ʋ zɩ̀n ʋ yɩ́á yɩɩ nə ʋ ywàń, də nə̀ń bɛɛ don nə, ʋ zɩga ʋ yáá con, də ʋ kwatara sɩ̀ʋ́ sòlí, ʋ jɩɩn wa. Zozuwe ma va ʋ yí bɛɛ tə yɩra, ʋ bwe wá, ʋ wʋ́: «N yɩ nə mʋ̀ kwa lìù, nə à yə̀ə́ n yɩ nə dʋŋa tə kwa lìù?» 14 Bɛɛ tə le, ʋ wʋ́: «Ɔn ɔn! À yɩ Ba-Yígúrə́-Jə-Tiu kwatara Yuu-Tiu, à dàń nə bɩ̀àn.» Yá Zozuwe dàń tʋa ʋ nadwana yuu, ʋ pú ʋ yáá tɩa, ʋ pa dun* bɛɛ tə nə, ʋ ga swɩ̀n ʋ con, ʋ wʋ́: «À yɩ n tʋtʋnʋ! Bɛ̀ɛ̀ nə n pɩ̀à, sə à tʋn?» 15 Ba-Yígúrə́-Jə-Tiu kwatara Yuu-Tiu tə ma swɩ̀n Zozuwe con, ʋ wʋ́: «Lɩ n natɩra tə n nɛɛ nə. Cɩ́gá, bwálɩ́ tə, n nə zɩga kʋ wa, yɩ parɩ.» Yá Zozuwe sɛ̀, ʋ tʋn kʋ nətʋ tə.