Zozuwe 6

Yɩzərayɛlə lɩ̀à tə ta Zweriko tɩʋ tə, ba də́

1 Zweriko tɩ̀án yà sun ba tɩʋ tə mimien, ba gɩra tə, Yɩzərayɛlə lɩ̀à tə yɩrɩ. Lìù mama yà wàrɩ̀ ʋ naŋa, lìù mama ga wàrɩ̀ ʋ zwɩ. 2 Yá Ba-Yígúrə́-Jə-Tiu dàń swɩ̀n Zozuwe con, ʋ wʋ́: «Ywàń, à ken Zweriko tɩʋ tə, də kʋ pɩ̀ʋ́ tə, də kʋ kwatara babɩran tə n jɩɩn wa. 3 N mʋ̀ də n kwatara tə mama wá va, á kɩkarɩ tɩʋ tə. Á wá va, á kɩkarɩ kʋ naa nədʋ, dɩɩn mama. Á wá fwa nətʋ, dɩan bardʋ. 4 Joŋwana barpɛ wá ja panyʋran nabwanan barpɛ, ba ya à nimarʋ culu daka tə yáá. Barpɛ nii dɩɩn tə nə, á wá va á kɩkarɩ tɩʋ tə, nɛɛ barpɛ, joŋwana tə ga wúrí nabwanan tə. 5 Máŋá don wa, ba wá wúrí panyʋ nabwanʋ tə, kʋ dán. Á nə nì nabwanpɩan təntə kori, lalʋʋ tə mama wá mà kʋ̀ʋ̀ cə̀rə́ nəfarʋ. Yá kʋ máŋá təntə wa, Zweriko birinaa tə wá buburi duən yuu, lalʋʋ tə ga nyɩ́n ba zʋ tɩʋ tə wa, ba lìù mama va ʋ yáá, mənəmənə.»

6 Nun bìú Zozuwe, bon Yɩɩ joŋwana tə, ʋ swɩ̀n ba con, ʋ wʋ́: «Á zɩŋa Ba-Yígúrə́-Jə-Tiu nimarʋ culu daka tə, sə á wa lɩ̀à barpɛ ga ja panyʋran nabwanan barpɛ, ba ya ka yáá.» 7 Yá Zozuwe swɩ̀n lalʋʋ tə con, ʋ wʋ́: «Kwatara tə kɛ̀ná, ba ya Ba-Yígúrə́-Jə-Tiu nimarʋ culu daka tə yáá, sə á va á kɩkarɩ tɩʋ tə.» 8 Mə kʋ yɩn ndə Zozuwe nə pɩn nii lalʋʋ tə nə, sə ba tʋn nətʋ. Yɩɩ joŋwana barpɛ tì panyʋran nabwanan barpɛ ba ja kɛ̀ń, ba wulə Ba-Yígúrə́-Jə-Tiu nimarʋ culu daka tə yáá, ba wúrí. Yá Ba-Yígúrə́-Jə-Tiu nimarʋ culu daka tə dàń ga pú ba kwa. 9 Kwatara yà wulə Yɩɩ joŋwana tə nə wúrí nabwanan tə yáá ba vəli, yá ba duən də ga pú Yɩɩ nimarʋ culu daka tə kwa. Lɩ̀à tə yà yɩ ba twá nabwanan tə kori nə, ba ma vəli. 10 Zozuwe yà pɩn nii kʋ tə lalʋʋ tə nə, ʋ wʋ́: «Á dànà ká mà kʋ̀ʋ̀ cə̀rə́. Á dànà ká pa ba nì á kori. Á dànà ká pa sʋgʋ mama nan á nii wa, kʋ ja va kʋ yí dɩɩn tə, à nə wá swɩ̀n á con, sə á mà kʋ̀ʋ̀ cə̀rə́. Yá kʋ máŋá tə wa, á dàń wá mà kʋ̀ʋ̀ cə̀rə́.» 11 Ba ja Ba-Yígúrə́-Jə-Tiu nimarʋ culu daka tə ba va, ba kɩkarɩ tɩʋ tə naa nədʋ, ba ga pìí ba va ba dəkuu bwálɩ́ tə nə, ba jʋ lá.

12 Kʋ tɩpʋrɩ nə, Zozuwe zàn jɩjʋ fuən fuən, yá Yɩɩ joŋwana tə də ga kʋ́ʋ̀ tì Ba-Yígúrə́-Jə-Tiu nimarʋ culu daka tə, ba zɩŋa. 13 Yɩɩ joŋwana barpɛ tə nə ja panyʋran nabwanan tə, ba wulə Ba-Yígúrə́-Jə-Tiu nimarʋ culu daka tə yáá tə, kʋ́ʋ̀ zàn ba vəli, ba ga wúrí nabwanan tə. Kwatara duən yà wulə ba yáá ba vəli, ba duən də ga pú Ba-Yígúrə́-Jə-Tiu nimarʋ culu daka tə kwa. Lɩ̀à tə yà yɩ ba twá nabwanan tə kori nə, ba ma vəli. 14 Bələ nii dɩɩn təntə nə, ba kʋ́ʋ̀ vəli ba kɩkarɩ tɩʋ tə naa nədʋ, ba ga pìí ba va ba dəkuu bwálɩ́ nə. Ba fwa nətʋ wuuu, dɩan bardʋ. 15 Dɩan barpɛ nii dɩɩn tə nə, ba zàn tɩbɩlakʋnʋ wa, ba va ba kɩkarɩ tɩʋ tə, ndə ba dɩan mɛ nə yàá fwa nətʋ, nɛɛ barpɛ. Kʋ dɩɩn təntə cɩcɩ nə nə, ba vəli ba kɩkarɩ tɩʋ tə nɛɛ barpɛ. 16 Yá nɛɛ barpɛ tə nii nə, Yɩɩ joŋwana tə wúrí nabwanan tə, Zozuwe ga swɩ̀n lalʋʋ tə con, ʋ wʋ́: «Á maga kʋ̀ʋ̀ cə̀rə́. Cɩ́gá, Ba-Yígúrə́-Jə-Tiu ken tɩʋ tə, á jɩɩn wa. 17 Tɩʋ tə yɩ á wá cʋ̀gʋ̀ kʋ də kʋ wa wiən tə mama mɩ́ámɩ́án*. Cɩ́gá, kʋ yɩ Ba-Yígúrə́-Jə-Tiu tori. Kacwarʋ Rahabə də lɩ̀à tə mama, ba nə wulə də wá, ʋ dìə̀ tə wa cɩcɩ mɩɩ nə wá ya lʋʋ wa. Cɩ́gá, ʋ mʋ̀ dɩɩn nə səgə nə tʋntʋna tə. 18 Á mʋ̀ dàń nə cɩa á tɩ̀àn nə! Á dànà ká tì won mama wiən tə wa, á nə mɛ sə á cʋ̀gʋ̀. Kʋ nə tà nətʋ, á wá van cʋna, á kə Yɩzərayɛlə lɩ̀à tə mama yuu wa, yá kʋ nətʋ tə wá ja pucʋnɩ kʋ ja bà. 19 Yá wárʋ́ tə də sɩ́án tə mama, də cɩnɩan zɩla tə də lurən zɩla tə mama, yɩ á wá tún vàn nə, á pa Ba-Yígúrə́-Jə-Tiu nə. Tə yɩ á wá kə Ba-Yígúrə́-Jə-Tiu dìə̀ zɩla tə con.»

20 Yɩɩ joŋwana tə dàń wúrí nabwanan tə, lalʋʋ tə ga mà cə̀rí. Lalʋʋ tə nə nì nabwanan tə kori, ba mà kʋ̀ʋ̀ cə̀rə́ nəfarʋ, yá tɩʋ tə birinaa tə buburi duən yuu. Lalʋʋ tə dàń nyɩ́n ba zʋ tɩʋ tə wa, ba lìù mama va ʋ yáá mənəmənə. Yá ba dí dɩ̀àn tɩʋ tə yuu wa. 21 Ba gʋa tɩʋ tə wa lɩ̀à tə də vàná tə mama mɩ́ámɩ́án. Ba gʋa bara tə də kana tə mama, də bìsɩ́ná tə də bazʋnan tə mama, də nɩan tə, də pee tə, də bɩnɛ tə mama.

22 Zozuwe yà dí yáá, ʋ swɩ̀n bara bələ tə con, ba nə vəli ba mɩ̀àn tɩʋ tə, ʋ wʋ́: «Á vələ Rahabə dìə̀, á lɩ ʋ də ʋ dìə̀ lɩ̀à tə mama, ndə á nə dùə̀, á swɩ̀n ʋ con, də á wá tʋn kʋ nətʋ.» 23 Balandʋra bələ tə dàń vəli, ba lɩ Rahabə, də ʋ nyɩna, də ʋ nuu, də ʋ nábwáná, də won tə mama, kʋ nə yɩ ʋ mʋ̀ nyiən. Ba lɩ ʋ də ʋ dìə̀ lɩ̀à tə mama, ba ja nan ba kə Yɩzərayɛlə lɩ̀à dəkuu bwálɩ́ tə kwa con. 24 Kʋ kwa nə, ba dàń sʋ̀rɩ́ tɩʋ tə də kʋ wa wiən tə mama. Wárʋ́ tə, də sɩ́án tə, də cɩnɩan zɩla tə, də lurən zɩla tə cɩcɩ nə, ba wà cʋ̀gʋ̀. Ba ken wiən təntə mʋ̀ Ba-Yígúrə́-Jə-Tiu dìə̀ zɩla tə con. 25 Zozuwe dàń jon Rahabə, də ʋ dìə̀ lɩ̀à tə mama mɩɩ, də won tə mama, kʋ nə yɩ ʋ mʋ̀ nyiən, ʋ kə lʋʋ wa. Ʋ tʋn kʋ nətʋ tə, Rahabə nə səgə tʋntʋna tə Zozuwe nə tʋn, sə ba mɩ̀àn Zweriko tɩʋ tə yɩrɩ. Rahabə yɩn Yɩzərayɛlə lɩ̀à tə titəŋi wa, yá ʋ dwíí tə wulə ba wa, də zə̀n mama. 26 Kʋ máŋá tə wa, Zozuwe dùə̀ durə ka tə, Ba-Yígúrə́-Jə-Tiu yáá con, ʋ wʋ́: «Lìù tə mama, ʋ nə dídə́n sə ʋ pìí ʋ lwà Zweriko tɩʋ kʋ tə, sə Ba-Yígúrə́-Jə-Tiu yàlà kʋ tíú. Kʋ tíú bikwɩa nə wá tɩ, sə ʋ ma wànɩ́ ʋ tún kʋ də̀ń. Yá ʋ talɩkwa bìú nə wá tɩ, sə ʋ ma wànɩ́ ʋ kə kʋ borən.» 27 Ba-Yígúrə́-Jə-Tiu yà wulə də Zozuwe, yá ʋ yɩrɩ dàń yà súə́ lʋʋ nii tə mama.