Akan cʋna tə yoo
7
1 Ba-Yígúrə́-Jə-Tiu yà pɩn nii Yɩzərayɛlə lɩ̀à tə nə, sə ba cʋ̀gʋ̀ Zweriko tɩʋ tə, də kʋ wa wiən tə mɛ mɩ́ámɩ́án*. Yá Zwida dwíí tə wa bɛɛ don, ʋ yɩrɩ nə yɩ Akan, tì wiən duən culu wiən təntə wa. Yá kʋ nətʋ tə dàń pɩn Ba-Yígúrə́-Jə-Tiu lɩŋa zàn Yɩzərayɛlə lɩ̀à tə yuu wa. Akan yà yɩ Karəmi bìú. Ʋ yà yɩ Zabədi nàʋ́, ʋ ga yɩ Zera nanagɩ.2 Zozuwe zɩgɩ Zweriko nə, ʋ tʋn bara Ayi nə. Ʋ swɩ̀n ba con, ʋ wʋ́: «Á vələ á mɩ̀àn lʋʋ nii tə, á na kʋ nə yɩ nətʋ.» Yá bara təntə dàń vəli sə ba mɩ̀àn Ayi, ba na kʋ nə yɩ nətʋ. Ayi tɩʋ tə yɩ kʋ wulə Betɛlə yɩɩ yipɩan con, kʋ ga bwə́lə́ də Bɛtə-Avɛnə tɩʋ tə. 3 Bara tə pìí ba bà, ba swɩ̀n Zozuwe con, ba wʋ́: «Dàn ká man tɩa, n pa kwatara tə mama va, ba ta Ayi tɩʋ tə. Kwatara mʋ̀rʋ̀ bələ, nə à yə̀ə́ mʋ̀rʋ̀ batwa tətə wàá Ayi ba tɛ ba də́. Dàn ká pa kwatara tə mama gwàrɩ̀ ba tɩ̀àn. Cɩ́gá, dʋŋa tə ba dáá.» 4 Kwatara ba nə yí ndə mʋ̀rʋ̀ batwa nə, dàń nan lalʋʋ tə wa ba va, sə ba ta Ayi tɩʋ tə. Yá ba pìí ba dəri Ayi tɩ̀án yáá nə. 5 Ayi tɩ̀án zɩgɩ ba tɩʋ tə mimii nə, ba dɩŋa Yɩzərayɛlə kwatara tə, ba ja zìə́n paan tə, ba va ba yí Swebarimə. Yá paan tə zizinu tə wa, Ayi tɩ̀án gʋa lɩ̀à Yɩzərayɛlə kwatara tə wa, ba yí ndə lɩ̀à fɩtwa də bardʋ nə. Kʋ pɩn Yɩzərayɛlə lɩ̀à tə jɩ̀àn gwàrɩ̀ mɩ́ámɩ́án, ba ga kʋ́ʋ̀ ba wʋdɩʋ jə. 6 Zozuwe də Yɩzərayɛlə lɩ̀à nəkwɩna tə dàń kàrɩ́ ba gànàn, ba ga pɛ̀ pùrú ba lwá ba yuu wa. Ba tʋa ba pú ba yáá tɩa, Ba-Yígúrə́-Jə-Tiu nimarʋ culu daka tə yáá con, didəni kori kʋ yí. 7 Zozuwe swɩ̀n ʋ wʋ́: «Aaa! Yuu-Tiu, Ba-Yígúrə́-Jə-Tiu, kʋ yɩ n jɩn nəba n bɩn Zʋrədɛn mʋnaa tə, sə n kə nəba Amɔrə dwíí tə jɩɩn wa, sə ba gʋ nəba naaa? Də kʋ nə yɩ nətʋ, nə yà nə mɛn Zʋrədɛn mʋnaa tə kwa con, kʋ yà kʋkwa! 8 Sɩ́ʋ́n nə, Yɩzərayɛlə lɩ̀à dàń nə pɩn kwa ba dʋŋa nə, bɛ̀ɛ̀ nə à kʋ́ʋ̀ wá swɩ̀n Yuu-Tiu? 9 Kanaan tɩ̀án tə, də lɩ̀à tə mama, ba nə wulə lʋʋ nii tə wa, wá nì kʋ. Yá ba dàń wá kɩkarɩ nəba, ba gʋ nə mama mɩ́ámɩ́án, ba pa nə dwíí jɛ́n lʋʋ nii tə wa. Yá kʋ máŋá təntə wa, bɛ̀ɛ̀ nə n dàń wá fwa, sə n yɩrɩ ma na dun?»
10 Ba-Yígúrə́-Jə-Tiu ma swɩ̀n Zozuwe con, ʋ wʋ́: «Zàn yɩɩ nə! Bɛ̀ɛ̀ nə pɩn n ma tʋ, n pú n yáá tɩa? 11 Yɩzərayɛlə lɩ̀à tʋn lwanɩ. Ba wà nimarʋ tə à nə tún də ba tə, nii zìlí. Ba kʋ̀nɩ̀ kʋ̀nkʋ̀n. Ba tí wiən duən culu wiən tə wa. Ba ŋwan tə, ba səgə ba zɩla wa. 12 Kʋ mʋ̀ nə pɩn, Yɩzərayɛlə lɩ̀à tə kʋ́ʋ̀ bá wànɩ́ ba zɩgɩ, ba ta ba dʋŋa. Ba wá pa kwa ba dʋŋa nə, ba də tətə dàń nə jìgə̀ lɩ̀à, ba nə mɛ sə ba cʋ̀gʋ̀ ba, tə yɩrɩ. À kʋ́ʋ̀ bá yà də aba, də á nə wà culu wiən tə lɩ, á titəŋi wa. 13 Sɩ́ʋ́n nə, n dàń zàn yɩɩ nə, n tanɩ lalʋʋ tə, n lɩ durən yìə̀n wa. Pa ba nii, sə ba tanɩ ba tɩ̀àn, ba lɩ durən yìə̀n wa, də tɩa pʋrɩ. Cɩ́gá, nə̀ń kʋ tə, à mʋ̀ Ba-Yígúrə́-Jə-Tiu, à nə yɩ Yɩzərayɛlə lɩ̀à Yɩɩ, nə swɩ̀n á con. Culu wiən wulə á titəŋi wa, à nə pɩn aba nii, sə á dàn ká tì. Kʋ mʋ̀ yɩrɩ, á kʋ́ʋ̀ bá wànɩ́ á zɩgɩ, á ta á dʋŋa, də á nə wà culu wiən təntə lɩ, á titəŋi wa. 14 Jwɩan jɩjʋ nə, á wá bà à yáá con, dwíí dwíí. Yá dwíí tə, à mʋ̀ Ba-Yígúrə́-Jə-Tiu nə wá pa pwárʋ́ tə ja tə, wá bà, sàń sàń. Yá sàń tə, à nə wá pa pwárʋ́ tə ja tə, wá bà, dìə̀ dìə̀. Yá dìə̀ tə, à nə wá pa pwárʋ́ tə ja tə, ka wa bara tə wá bà nədʋ nədʋ. 15 Yá à dàń wá pa pwárʋ́ tə ja lìù tə, ʋ nə tì culu wiən tə. Ba wá ja kʋ tíú, də ʋ dìə̀ lɩ̀à, də won tə mama, kʋ nə yɩ ʋ mʋ̀ nyiən, ba dɩ mən wa. Cɩ́gá, kʋ tíú cʋ̀gʋ̀ culu nəfarʋ Yɩzərayɛlə wa, ʋ nə wà à mʋ̀ Ba-Yígúrə́-Jə-Tiu nimarʋ tə nii zìlí yɩrɩ. 16 Kʋ tɩpʋrɩ nə, Zozuwe zàn jɩjʋ fuən fuən, ʋ pa Yɩzərayɛlə lɩ̀à tə bà Ba-Yígúrə́-Jə-Tiu yáá con, dwíí dwíí. Yá Zwida dwíí tə nə pwárʋ́ tə jɩn. 17 Ʋ pɩn Zwida dwíí tə bà, sàń sàń. Yá Zera sàń tə nə pwárʋ́ tə jɩn. Ʋ pɩn Zera sàń tə bà, dìə̀ tíú dìə̀ tíú. Yá Zabədi dìə̀ tə nə pwárʋ́ tə jɩn. 18 Ʋ pɩn Zabədi dìə̀ bara tə bà nədʋ nədʋ. Yá Karəmi bìú Akan nə pwárʋ́ tə jɩn. Akan yà yɩ Zabədi nàʋ́, ʋ ga yɩ Zera nanagɩ. Ba yɩ Zwida dwíí tə wa lɩ̀à. 19 Yá Zozuwe dàń swɩ̀n Akan con, ʋ wʋ́: «À bìú, pa cɩ́gá Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ, n ga pa wá dun. Swɩ̀n yoo tə n nə tʋn, n bɩrɩ nə. Swɩ̀n cɩ́gá, dàn ká kʋna kʋ̀nkʋ̀n.» 20 Yá Akan le Zozuwe ʋ wʋ́: «Kʋ yɩ cɩ́gá! À mʋ̀ nə tʋn lwanɩ tə, à zɩgɩ Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. Nə̀ń yoo tə à nə tʋn. 21 À nɩ wiən tɩʋ tə wiən tə wa, nə nə ta nə jon. Kʋ yɩ Swineyarə tɩ̀án ganzwɩfarʋ nəzəŋu nədʋ, də wárʋ́ səbilurən* biələ, də sɩ́án dàlɩ́ nədʋ, kʋ dun nə yí kilogəramə faan. Tə fɩra nə zʋa nə zənzən, à ma tì tə. À kʋa tə à səgə tɩa, à gansili tə wa. Wárʋ́ tə wulə də̀ń.» 22 Zozuwe dàń tʋn lɩ̀à, ʋ pa ba dəri ba va Akan gansili tə wa, yá ba cɩ́gá nɩ zɩla tə, ʋ nə kʋa ʋ səgə lá. Wárʋ́ tə yà wulə də̀ń. 23 Ba lɩ tə mama gansili tə wa, ba ja bà, ba pa Zozuwe də Yɩzərayɛlə lɩ̀à tə mama nə. Yá ba jon tə, ba tún Ba-Yígúrə́-Jə-Tiu yáá con. 24 Zozuwe də Yɩzərayɛlə lɩ̀à tə mama dàń jɩn Akan, ba tì wárʋ́ tə, də ganzwɩfarʋ tə, də sɩ́án dàlɩ́ tə, ba súrí lá, ba ja ʋ bɩ̀á, də ʋ bwɩ̀ɩ́, də ʋ nɩan, də ʋ bɩnɛ, də ʋ vanmɩnɩ, ba tì ʋ gansili, də won tə mama, kʋ nə yɩ ʋ mʋ̀ Akan nyiən, ba súrí lá, ba ja va Akɔrə vara tə wa. 25 Yá Zozuwe dàń swɩ̀n Akan con, ʋ wʋ́: «N ken nəba pucʋnɩ wa! Kʋ mʋ̀ yɩrɩ, Ba-Yígúrə́-Jə-Tiu wá kə mʋ́ pucʋnɩ wa, zə̀n kʋ tə. Yɩzərayɛlə lɩ̀à tə mama dàń dɩlɩ Akan də ʋ dìə̀ lɩ̀à tə, ba gʋ də kapana, ba ga sʋ̀rɩ́ ba də ʋ jɩjə wiən tə mama. 26 Ba zɩ̀n kapana púlí nəfarʋ, ba pú ʋ yuu nə. Kʋ kapana púlí təntə tə wulə, də zə̀n mama. Kʋ kwa nə, Ba-Yígúrə́-Jə-Tiu lɩŋa tə dàń tʋa. Kʋ mʋ̀ nə pɩn, ba boŋə kʋ bwálɩ́ təntə, Akɔrəa vara, də zə̀n mama.