Zozuwe 8

Zozuwe də Yɩzərayɛlə lɩ̀à tə ta Ayi tɩʋ tə, ba də́

1 Ba-Yígúrə́-Jə-Tiu swɩ̀n Zozuwe con, ʋ wʋ́: «Dàn ká pa fən ja mʋ́. Dàn ká pa n jɩ̀àn gwàrɩ̀. Zàn n kə n kwatara tə mama duən nə, n ja va n ma ta Ayi. Ywàń, à ken Ayi pɩ̀ʋ́ tə, də ʋ lalʋʋ tə, də ʋ tɩʋ tə, də ʋ nagwanaa tə, n jɩɩn wa. 2 Yoo tə n nə dí yáá, n ma tʋn Zweriko tɩ̀án, də ba pɩ̀ʋ́ tə, mə kʋ nə n wá ma tʋn Ayi tɩ̀án də, də ba pɩ̀ʋ́ tə. Yá á dàń wàá ba jɩjə wiən tə, də ba vàná tə, á nə wá ta á jon tə, á tɩnɩ. Pa kwatara tə duən səgə, ba twá tɩʋ tə kwa con ba ta kʋ, ba dɩ̀ tɩʋ tə tɩ̀án yuu.»

3 Zozuwe də ʋ kwatara tə mama dàń ken ba sírí, sə ba va ba ta Ayi. Ʋ kúrí kwatara babɩran mʋ̀rʋ̀ fɩtwa, sə ʋ tʋn Ayi nə, tɩtɩn nə. 4 Ʋ pɩn ba nii kʋ tə, ʋ wʋ́: «Á vələ á səgə Ayi tɩʋ tə kwa con. Á dànà ká ya yiŋʋnɩ zənzən də kʋ. Yá á mama kənə á sírí, sə á ta kʋ. 5 À mʋ̀ də lalʋʋ tə gɩganɩ tə mama dàń wá va, nə bólí tɩʋ tə nii. Máŋá tə wa, ba nə nan, sə ba ta nəba, nə wá pìí nə dəri ba yáá nə, ndə təntən tə nə. 6 Yá ba dàń wá bʋ́n də, nə kʋ́ʋ̀ yɩ nə dəri ba yáá nə, ndə təntən tə nə. Ba wá nan ba dɩŋa nə kwa, yá nə dàń wá ja ba, nə dəri nə va yiŋʋnɩ də tɩʋ tə. Kʋ máŋá təntə wa, 7 á dàń wá nyɩ́n á nan á yisəgə bwálɩ́ tə nə, á də́ dɩ̀àn tɩʋ tə yuu wa. Cɩ́gá, Ba-Yígúrə́-Jə-Tiu, ʋ nə yɩ á Yɩɩ, ken kʋ á jɩɩn wa. 8 Á nə dí dɩ̀àn tɩʋ tə yuu wa máŋá tə wa, á wá kə mən kʋ nə, ndə Ba-Yígúrə́-Jə-Tiu nə pɩn nii, sə kʋ tʋn nətʋ. Á zurə á yɩra, á twá à nii nə zəni.»

9 Kʋ kwa nə, Zozuwe dàń pɩn kwatara tə vìí. Ba vəli ba səgə bwálɩ́ tə nə, ba nə wá nan ba ta tɩʋ tə, ba dɩ̀ kʋ tɩ̀án yuu. Kʋ yɩn Betɛlə də Ayi pwə́rə́ wa, Ayi yɩɩ yizwɩa con. Yá Zozuwe mʋ̀ jʋa lalʋʋ tə gɩganɩ tə con, kʋ tɩtɩn tə nə.

10 Kʋ tɩpʋrɩ nə, Zozuwe zàn jɩjʋ fuən fuən, ʋ kwɛn ʋ tanɩ lalʋʋ tə. Kʋ kwa nə, ʋ də Yɩzərayɛlə nəkwɩna tə dàń jon lalʋʋ tə yáá, ba ma vələ Ayi con. 11 Kwatara tə mama, ba yà nə wulə də Zozuwe vəli ba bólí tɩʋ tə nii. Ba vəli ba kə ba dəkuu bwálɩ́, Ayi jɩzən saparʋ con. Vara yà wulə ba də Ayi tɩʋ tə pwə́rə́ wa. 12 Zozuwe lɩ bara ndə mʋ̀rʋ̀ bonu nə, ʋ pa ba səgə Betɛlə də Ayi pwə́rə́ wa, tɩʋ tə yɩɩ yizwɩa con. 13 Lalʋʋ tə ken ba dəkuu bwálɩ́ ba zwɛ̀, Ayi tɩʋ tə jɩzən saparʋ con. Yá kwatara duən də vəli ba cɩ̀ kwa, tɩʋ tə yɩɩ yizwɩa con. Kʋ tɩtɩn təntə nə, Zozuwe jʋa vara tə wa.

14 Yá tɩa nə pʋrɩ jɩjʋ nə, máŋá tə Ayi pɩ̀ʋ́ tə nə nɩ Yɩzərayɛlə lɩ̀à tə, ʋ də ʋ tɩʋ lɩ̀à tə mama tanɩ ba tɩ̀àn lala, ba nan sə ba də Yɩzərayɛlə lɩ̀à tə jəri duən, Araba tə yáá con, ba ta kʋ̀ʋ̀. Ayi pɩ̀ʋ́ tə yà yəri də Yɩzərayɛlə kwatara tə duən səgə, tɩʋ tə kwa con sə ba ta wá, ba dɩ̀ ʋ yuu. 15 Zozuwe də Yɩzərayɛlə lɩ̀à tə mama dàń dəri Ayi tɩ̀án tə yáá nə, ba tì cwəŋə tə ka nə vələ kasɔɔ lanworu tə con. 16 Ayi pɩ̀ʋ́ tə dàń bon ʋ kə tɩʋ tə wa lalʋʋ tə mama nə, sə ba nan ba dɩŋa Yɩzərayɛlə lɩ̀à tə kwa. Ba dɩŋɩ Zozuwe ba kwa, ba va yiŋʋnɩ ba yá tɩʋ tə. 17 Lìù mama yà wà Ayi də Betɛlə wa gɛ, kʋ tíú nə wà nan ʋ dɩŋa Yɩzərayɛlə lɩ̀à tə kwa. Ba mama yà nan, ba ga yá tɩʋ tə nə. Lìù mama yà wà lá gɛ, sə ʋ cɩ̀ kʋ nə.

18 Ba-Yígúrə́-Jə-Tiu swɩ̀n Zozuwe con, ʋ wʋ́: «Te n cwiin tə, n nə jə n jɩɩn wa, Ayi tɩʋ tə con. Cɩ́gá, à ken kʋ n jɩɩn wa.» Zozuwe ma te ʋ cwiin tə, kʋ yà nə wulə ʋ jɩɩn wa, tɩʋ tə con. 19 Máŋá tə wa Zozuwe nə te ʋ jɩɩn tə, Yɩzərayɛlə kwatara tə yà nə səgə tə, dàń nyɩ́n ba nan ba yisəgə bwálɩ́ tə nə lala, ba dəri ba zʋ ba də́ dɩ̀àn tɩʋ tə yuu wa, ba ga kə mən kʋ nə. 20 Ayi tɩ̀án tə pìí ba vəvəri, ba ywàń ba kwa, də nə̀ń tɩʋ tə ŋwɩn nə, tə dɩ̀ yɩɩ. Ba yà kʋ́ʋ̀ ba bwálɩ́ jə, ba dəri ba vəli. Yɩzərayɛlə lɩ̀à tə yà nə dəri ba va kasɔɔ lanworu tə con, dàń pìí ba kə Ayi tɩ̀án tə ba yáá, ba dɩŋɩ. 21 Zozuwe də Yɩzərayɛlə lɩ̀à tə mama nɩ tɩʋ tə ŋwɩn tə, yá ba dàń lwarɩ də, kwatara tə yà nə səgə tɩʋ tə kwa con tə, dí dɩ̀àn kʋ yuu wa. Yá ba dàń vəvəri ba tɛ Ayi tɩ̀án tə. 22 Yɩzərayɛlə kwatara tə duən tə də dàń nan tɩʋ tə wa, ba jəri Ayi tɩ̀án tə. Yɩzərayɛlə kwatara dàń yà wulə Ayi tɩ̀án tə yáá con, ba duən də ga wulə ba kwa con. Ayi tɩ̀án tə dàń yà wulə Yɩzərayɛlə lɩ̀à tə titəŋi wa. Yá ba dàń gʋa Ayi tɩ̀án tə mama, ba lìù mama wà gɛ. Ba ladʋa tətə wà wànɩ́, ʋ dəri ʋ jɛ́n. 23 Ba wà Ayi pɩ̀ʋ́ tə mʋ̀ gwɩ. Ʋ yɩ ba jɩn wá, ba ja bà Zozuwe con. 24 Yɩzərayɛlə lɩ̀à tə gʋa Ayi tɩ̀án tə mama ba zwɛ̀, kasɔɔ lanworu tə wa, bwálɩ́ tə nə, Ayi tɩ̀án tə yà nə dɩŋɩ ba, ba ja va. Ba gʋa ba mama, ba ladʋa tətə wà gɛ. Kʋ kwa nə, Yɩzərayɛlə lɩ̀à tə mama pìí ba va Ayi. Yá ba dàń gʋa tɩʋ tə wa lɩ̀à tə gɩganɩ tə mama, də kwatara sɩ̀ʋ́. 25 Bara tə də kana tə mama, ba nə gʋa tɩʋ tə wa kʋ dɩɩn tə nə, yɩn lɩ̀à mʋ̀rʋ̀ fugə də bələ. Ba mama yà yɩ Ayi tɩ̀án. 26 Zozuwe nə te ʋ cwiin tə Ayi tɩʋ tə con, ʋ wà ʋ jɩɩn tə pìí ʋ kʋ̀rɩ́ ʋ kə ʋ con, kʋ va kʋ yí máŋá tə, ba nə gʋa Ayi tɩ̀án tə mama mɩ́ámɩ́án*, ba zwɛ̀. 27 Tɩʋ tə vàná tə, də kʋ jɩjə wiən tə cɩcɩ, Yɩzərayɛlə lɩ̀à tə nə ta ba jon nə, ba tì ba ma fwa ba nyiən, ndə Ba-Yígúrə́-Jə-Tiu yà nə pɩn nii Zozuwe nə, sə ba tʋn nətʋ.

28 Zozuwe sʋ̀rɩ́ Ayi tɩʋ tə, ʋ pa kʋ buburi duən yuu. Kʋ jìgə̀ kasɔɔ lanworu, də zə̀n mama. 29 Zozuwe pɩn ba kùrí Ayi pɩ̀ʋ́ tə tɩ̀ʋ́ nə. Ʋ goli tɩ̀ʋ́ tə nə, kʋ va kʋ yí didəni nii. Yá yɩɩ zwɩʋ máŋá wa, Zozuwe pɩn ba sori tɩgɩ tə, tɩ̀ʋ́ tə yuu wa. Ba dʋgʋ wá tɩʋ tə mimii nə, ba ga zɩ̀n kapana púlí nəfarʋ, ba pú ʋ yuu nə. Kapana púlí təntə tə wulə, də zə̀n mama.

Zozuwe lìí Yɩzərayɛlə lɩ̀à tə, Yɩɩ nimarʋ tə yoo

30 Zozuwe pɩn ba lwà Yɩɩ joŋi bwálɩ́, Ebalə paan tə yuu wa, ba pa Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. 31 Ba lwə̀ kʋ, ndə Ba-Yígúrə́-Jə-Tiu tʋtʋnʋ Moyizə nə pɩn nii Yɩzərayɛlə lɩ̀à tə nə, sə ba tʋn nətʋ. Kʋ pʋ́pʋ́nɩ́ Yɩɩ nii* sagɩ tə wa ʋ nə pɩn Moyizə nə, kʋ wʋ́: «Yɩɩ joŋi bwálɩ́ tə yɩ ba wá lwà də kapakʋla, tə nə wà sè də dèrí.» Yá ba dàń fwa jwəŋə kʋ yuu wa, ba pa Ba-Yígúrə́-Jə-Tiu nə. Jwəŋə tə duən yɩ ba fwa ba sʋ̀rɩ́*, tə duən ga ya nimarʋ jwəŋə*. 32 Kʋ bwálɩ́ təntə wa, Zozuwe pìí ʋ pʋ́pʋ́nɩ́ Yɩɩ nii tə, Moyizə yà nə dí yáá ʋ pʋ́pʋ́nɩ́, nyɩnyɩga, kapana yuu wa, Yɩzərayɛlə lɩ̀à tə yáá con. 33 Yɩzərayɛlə lɩ̀à tə mama, ba wa vərə, də ba tətə bɩ̀á, ba nəkwɩna, də ba yun tɩ̀án, də ba lɩ̀à tə, ba nə bʋ̀rɩ̀ bʋra, yà pwɛ̀ ba zɩga púlə́ bələ, ba yáá zwə duən, Yɩɩ nimarʋ culu daka tə ga wulə ba pwə́rə́ wa. Ba yà zɩga Levi dwíí lɩ̀à tə yáá con, ba nə yɩ Yɩɩ joŋwana, ba zɩŋa Yɩɩ nimarʋ culu daka tə. Púlí don yà zɩga, kʋ kwa te Garizimə paan tə con, kʋ don də ga zɩga, kʋ kwa te Ebalə paan tə con. Mə nətʋ nə, Ba-Yígúrə́-Jə-Tiu tʋtʋnʋ Moyizə yà pɩn nii, sə ba dí yáá ba lòrì, sə Yɩɩ fwa zəni Yɩzərayɛlə lɩ̀à tə yɩra. 34 Kʋ kwa nə, Zozuwe kàrɩ̀ Yɩɩ nii sʋ̀ràn tə mama, ʋ kə yɩɩ nə. Tə tə nə ja zəni tə twi, də tə tə nə ja cʋna tə twi, ʋ kàrɩ̀ tə kʋ twá kʋ tə mama nii nə, kʋ nə pʋ́pʋ́nɩ́ Yɩɩ nii sagɩ tə wa. 35 Sʋ̀ràn tə mama wa, Moyizə nə dí yáá ʋ pʋ́pʋ́nɩ́, sʋgʋ nədʋ tətə wà gɛ, Zozuwe nə wà kàrɩ̀ ʋ kə yɩɩ nə, Yɩzərayɛlə lalʋʋ tə mama yáá con. Kana tə, də bìsɩ́ná tə, də vərə tə mama, ba yà nə wulə Yɩzərayɛlə lɩ̀à tə titəŋi wa, nì sʋ̀ràn təntə.