Zozuwe 9

Gabawon tɩ̀án tʋn swɩan Yɩzərayɛlə lɩ̀à tə yɩra

1 Pɛ̀gá tə duən tə mama, ba nə wulə Zʋrədɛn mʋnaa tə kwa con nagwanɛɛ tə wa, nì də Yɩzərayɛlə lɩ̀à tə dí dɩ̀àn ba dʋŋa yuu wa. Nagwanɛɛ təntə nə yɩ pɛɛn nagwanaa tə, də Swefela* nagwanaa tə, də mʋʋ nəfarʋ tə vàn con nagwanaa tə mama, kʋ ja va kʋ yɩ Liban lʋʋ nii. Ɛtə dwíí tə, də Amɔrə dwíí tə, də Kanaan tɩ̀án, də Perizi dwíí tə, də Evi dwíí tə, də Yebusə tɩ̀án yà nə wulə nagwanɛɛ təntə wa. 2 Yá pɛ̀gá təntə dàń ken nimarʋ, sə ba ta Zozuwe də Yɩzərayɛlə lɩ̀à tə.

3 Gabawon tɩ̀án də nì yoo tə, Zozuwe nə ma tʋn Zweriko də Ayi tɩan tə. 4 Yá ba mʋ̀ dàń tʋn swɩan, Yɩzərayɛlə lɩ̀à tə yɩra. Ba lɩ lɩ̀à, ba pa ba tì ganlwagwɩran, ba kə ba bɩnɛ yun wa, də divɛn púrə́ nədwara, tə nə cɩrɩ ba nyan nyan. 5 Ba tì natɩrɩgwɩran, ba nyan ba zʋ, ba ga zʋ gangwɩran. Ba yà tì dipɛn ba ja ba yɩra, yá kʋ mama yà kʋa kʋ jì mumunə. 6 Yá lɩ̀à təntə dàń vəli ba yí Zozuwe, Giləgalə nə, ba swɩ̀n ʋ də Yɩzərayɛlə lɩ̀à tə con, ba wʋ́: «Nə yɩ nə nan lʋʋ nii, kʋ nə ŋʋ́ná. Yá nə yɩ nə twi sə nə lòrì aba, sə á tún nimarʋ də nəba.» 7 Yɩzərayɛlə lɩ̀à tə ma le, ba wʋ́: «Kʋ wàá də á yɩ á wulə nə nii nə, tɩa lá bwə́lə́ bwə́lə́! Də kʋ nə yɩ nətʋ, nə wàrɩ̀ nimarʋ nə túŋə́ də aba.» 8 Ba swɩ̀n Zozuwe con, ba wʋ́: «Nə yɩ n tʋ̀tʋ̀nà.» Zozuwe ma bwe ba, ʋ wʋ́: «Á mʋ̀ nə yɩ bə̀rə́ tətə mʋ̀? Yə̀n nə á nan?» 9 Ba le Zozuwe, ba wʋ́: «Nə mʋ̀ n tʋ̀tʋ̀nà tə yɩ nə nan lʋʋ nii, kʋ nə ŋʋ́ná. Nə nì Ba-Yígúrə́-Jə-Tiu yoo, ʋ nə yɩ n Yɩɩ. Nə nì yomɩlan tə mama yoo, ʋ nə tʋn Ezwipətə nə. 10 Nə nì yoo tə də mama, ʋ nə ma tʋn Amɔrə dwíí tə pɛ̀gá bələ tə, ba yà nə wulə Zʋrədɛn mʋnaa tə kwa con. Ba mʋ̀ nə yɩ Sihon, ʋ yà nə yɩ Ɛswəbon pɩ̀ʋ́, də Ogə, ʋ yà nə yɩ Baswan pɩ̀ʋ́, ʋ yà ga wulə Aswətarɔtə nə.

11 Kʋ mʋ̀ nə pɩn, nə nəkwɩna tə, də nə lʋʋ lɩ̀à tə mama ma swɩ̀n nə con, sə nə tì wodirən nə nə wá də́ cwəŋə wa, nə ja nə yɩra, nə ga bà nə jəri aba, nə swɩ̀n á con də, nə yɩ á tʋ̀tʋ̀nà. Sɩ́ʋ́n nə, á dàń túŋə́ nimarʋ də nəba. 12 Á ywàŋá nə dipɛn tə, nə nə jɩn nə yɩra nə ja nan, sə nə də́ cwəŋə wa! Dɩɩn tə, nə nə ja kʋ nə nan sàń nə bɩ̀àn á con, də kʋ lɩŋa. Yá sɩ́ʋ́n nə, á nəŋə kʋ nə, kʋ kʋa mɩ́ámɩ́án, kʋ jì mumunə! 13 Púrə́ tə tə yà yɩ wadʋra, máŋá tə wa, nə nə ken divɛn tə, tə wa! Yá sɩ́ʋ́n nə, á nəŋə tə nə, tə mama cɩrɩ! Á ywàŋá nə gànàn də nə natɩra! Tə mama kwɩn, cwəŋə tə nə dara zənzən tə yɩrɩ!» 14 Yɩzərayɛlə lɩ̀à tə dàń sɛ̀ ba jon Gabawon tɩ̀án tə wodirən tə duən, ba də́. Yá ba wà bon ba kə Ba-Yígúrə́-Jə-Tiu nə. 15 Zozuwe sɛ̀ sə sìə́ ya Gabawon tɩ̀án də Yɩzərayɛlə lɩ̀à pwə́rə́ wa, ʋ ga tún nimarʋ də ba. Kʋ nimarʋ tə bɩrɩ də, Yɩzərayɛlə lɩ̀à dùə̀ də ba ba gʋ Gabawon tɩ̀án. Yá lalʋʋ tə yáá tɩ̀án tə dàń dùə̀ ba bɩrɩ Gabawon tɩ̀án tə nə, də kʋ cɩ́gá wá ya nətʋ.

16 Yɩzərayɛlə lɩ̀à tə nə tún nimarʋ tə də Gabawon tɩ̀án tə, dɩan batwa kwa nə, ba nì də ba də Gabawon tɩ̀án tə mɛ yɩ ba wulə lʋʋ nii tə wa lá. 17 Yá Yɩzərayɛlə lɩ̀à tə dàń zàn ba zʋ cwəŋə. Yá batwa nii dɩɩn tə nə, ba yí Gabawon tɩ̀án tɩan tə. Tə mʋ̀ nə yɩ Gabawon, də Kefira, də Beerɔtə, də Kiriyatə-Yarimə. Ba dàń lwarɩ də, Gabawon tɩ̀án tə yɩ lɩ̀à, ba yà nə wulə ba nii nə, tɩa lá bwə́lə́ bwə́lə́. 18 Yá ba yà kʋ́ʋ̀ wàrɩ̀ Gabawon tɩ̀án tə ba gwɩ. Cɩ́gá, lalʋʋ tə yáá tɩ̀án tə yà dùə̀ də Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, də ba bá gʋ Gabawon tɩ̀àn tə. Yá lalʋʋ tə mama dàń ŋʋŋwɩn kʋ yoo tə, ba zɩgɩ ba yáá tɩ̀án tə nə. 19 Lalʋʋ tə yáá tɩ̀án tə də ma swɩ̀n lalʋʋ tə con, ba wʋ́: «Nə mʋ̀ nə dùə̀ də Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, də nə bá gʋ ba. Kʋ mʋ̀ yɩrɩ, nə kʋ́ʋ̀ wàrɩ̀ yolwan mama, nə tʋŋa ba yɩra. 20 Durə tə yɩrɩ nə nə dùə̀, nə wá yá ba, nə bá gʋ ba. Kʋ nə tà nətʋ, nə wá pa Ba-Yígúrə́-Jə-Tiu lɩŋa zàn nə yuu wa. Á nəŋə nətʋ tə, nə nə wá fwa. 21 Nə wá yá ba, sə ba ya lá, ba də ba taŋa nɩ́á, də ba goŋi dɛɛ, ba pɩn lalʋʋ tə mama nə.» Mə nətʋ nə, lalʋʋ tə yáá tɩ̀án tə pɩn nii, sə ba tʋn. 22 Zozuwe dàń bon Gabawon tɩ̀án tə, ʋ bwe ba, ʋ wʋ́: «Bɛ̀ɛ̀ nə pɩn, á ma kʋna kʋ̀nkʋ̀n nə con? Á swɩ̀n də bwálɩ́ tə á nə nan, ŋʋ́ná də nəba! Yá á ga yɩ á wulə nə nii nə, tɩa lá bwə́lə́ bwə́lə́! 23 Sɩ́ʋ́n nə, zɩra wulə á yuu wa Yɩɩ yáá con! Á wá ya ywəŋə máŋá mama, á goŋi dɛɛ, də á taŋa nɩ́á, á pɩn à tíú Yɩɩ dìə̀ tə nə.» 24 Ba le Zozuwe, ba wʋ́: «Nə mʋ̀ n tʋ̀tʋ̀nà tə yɩ nə nì də Ba-Yígúrə́-Jə-Tiu, ʋ nə yɩ n Yɩɩ, kàn nii də ʋ tʋtʋnʋ Moyizə, sə ʋ pa aba lʋʋ nii kʋ tə. Nə nì də Ba-Yígúrə́-Jə-Tiu pɩn aba nii, sə á gʋ dwíə́ tə duən tə mama mɩ́ámɩ́án, ba nə wulə lʋʋ nii tə wa. Yá á fən dàń jɩn nəba zənzən, nə mɩɩ tə yɩrɩ. Kʋ mʋ̀ nə pɩn, nə ma tʋn kʋ yoo təntə. 25 Sɩ́ʋ́n nə, nə wulə n jɩɩn wa! Ja nəba, n ma fwa kʋ tə nə ywán də mʋ́, kʋ ga mɛ də mʋ́.» 26 Mə nətʋ nə, Zozuwe tʋn Gabawon tɩ̀án tə yɩra, ʋ ma jon ba Yɩzərayɛlə lɩ̀à tə jɩɩn wa, ba wà ba gwɩ. 27 Kʋ nə zɩgɩ kʋ dɩɩn tə nə, Zozuwe pɩn ba goŋi dɛɛ, də ba taŋa nɩ́á, ba pɩn Yɩzərayɛlə lalʋʋ tə nə, də bwálɩ́ tə nə, Yɩɩ nə wá kúrí, sə kʋ ya ʋ joŋi bwálɩ́. Yá Gabawon tɩ̀án tə tʋŋa kʋ nətʋ, də zə̀n mama.