Zozuwe 10

Yɩzərayɛlə lɩ̀à dí dɩ̀àn Amɔrə dwíí pɛ̀gá tə yuu wa

1 Zwerizalɛmə pɩ̀ʋ́ Adoni-Sedekə nì də, Zozuwe dí dɩ̀àn Ayi tɩʋ tə yuu wa, ʋ ga cʋ̀gʋ̀ kʋ mɩ́ámɩ́án*. Yá yoo tə, ʋ nə dí yáá ʋ ma tʋn Zweriko tɩ̀án, də ba pɩ̀ʋ́ tə, mə kʋ nə, ʋ ma tʋn Ayi tɩ̀án də, də ba pɩ̀ʋ́ tə. Ʋ tə nì də Gabawon tɩ̀án də tún sìə́ nimarʋ, ba də Yɩzərayɛlə lɩ̀à tə pwə́rə́ wa, yá ba dàń wulə də Yɩzərayɛlə lɩ̀à tə. 2 Ŋwɛn təntə pɩn fən zʋ Zwerizalɛmə tɩ̀án zənzən. Cɩ́gá, Gabawon yà yɩ tɩfarʋ, ndə payuu tɩʋ nə. Kʋ dánɩ́ yà dwə Ayi zənzən, kʋ wa bara tə mama ga yɩ kwatara babɩran. 3 Zwerizalɛmə pɩ̀ʋ́ Adoni-Sedekə dàń tʋn ʋ swɩ̀n Ebəron pɩ̀ʋ́ Hohamə con, də Yarəmutə pɩ̀ʋ́ Pirəyamə con, də Lakiswə pɩ̀ʋ́ Yafɩa con, də Egəlon pɩ̀ʋ́ Debirə con, ʋ wʋ́: 4 «Á bɩ̀àn á san nə, sə nə ta Gabawon tɩ̀án. Cɩ́gá, ba tún sìə́ nimarʋ də Zozuwe, də Yɩzərayɛlə lɩ̀à tə.» 5 Amɔrə dwíí pɛ̀gá bonu tə dàń ken nimarʋ, ba ja kwatara ba va ba pú Gabawon tɩ̀án ba kə, ba tɛ. Kʋ yà yɩ Zwerizalɛmə pɩ̀ʋ́, də Ebəron pɩ̀ʋ́, də Yarəmutə pɩ̀ʋ́, də Lakiswə pɩ̀ʋ́, də Egəlon pɩ̀ʋ́.

6 Gabawon tɩ̀án tə dàń tʋn, ba swɩ̀n Zozuwe con Giləgalə nə, ba wʋ́: «Dàn ká vɩ nəba n dʋgʋ, nə yɩ n tʋ̀tʋ̀nà. Bà nə con lala, n san n ta, n jon nəba. Cɩ́gá, Amɔrə dwíí pɛ̀gá tə mama, ba nə wulə pɛɛn tə wa, ken nii nədʋ, ba wulə ba tɛ nəba.» 7 Zozuwe dàń zàn Giləgalə nə, ʋ də kwatara tə mama, də kwatara babɩran tə mama.

8 Ba-Yígúrə́-Jə-Tiu swɩ̀n Zozuwe con, ʋ wʋ́: «Dàn ká pa ba fən ja mʋ́. Cɩ́gá, à ken ba n jɩɩn wa, yá ba lìù mama bá wànɩ́ n yáá nə, ʋ zɩgɩ.» 9 Zozuwe də ʋ kwatara tə nan Giləgalə, ba va tɩtɩn tə mama. Yá ba dàń twi ba ta Amɔrə dwíí tə, ba dɩ̀ ba yuu. 10 Ba-Yígúrə́-Jə-Tiu pɩn fən zʋ Amɔrə dwíí tə, ba dəri ba laga duən yáá nə, Yɩzərayɛlə lɩ̀à tə yáá con. Yɩzərayɛlə lɩ̀à tə ta ba, ba də́ Gabawon nə. Ba dɩŋɩ ba, ba ja tì cwəŋə tə ka nə vələ Bɛtə-Horon. Yá ba ta ba ba də́, ba va ba yí Azeka də Makeda. 11 Amɔrə dwíí tə dəri Yɩzərayɛlə lɩ̀à tə yáá nə, ba va ba nan Bɛtə-Horon zizinu tə bwálɩ́ nə. Yá Ba-Yígúrə́-Jə-Tiu dàń pɩn dwà kafɩna nəfaran nan yɩɩ nə tə tʋ, tə mà ba tə gʋ, tə va tə yí Azeka. Lɩ̀à tə dwà kafɩna nəfaran tə nə gʋa, doni lɩ̀à tə Yɩzərayɛlə lɩ̀à tə nə gʋa də kwatara sɩ̀án.

12 Kʋ dɩɩn təntə nə, Ba-Yígúrə́-Jə-Tiu nə pɩn Yɩzərayɛlə lɩ̀à də́ dɩ̀àn Amɔrə dwíí tə yuu wa, Zozuwe lòrì Ba-Yígúrə́-Jə-Tiu, Yɩzərayɛlə lɩ̀à tə yáá con, ʋ wʋ́:

«Ba-Yígúrə́-Jə-Tiu, pa yɩcaʋ tə cən kʋ zɩgɩ Gabawon tɩʋ tə yuu con!

N ga pa cànà tə də cən ka zɩgɩ Ayalon vara tə yuu con!»

13 Yá yɩcaʋ tə cən kʋ zɩgɩ, cànà tə də ga cən ka zɩgɩ, kʋ va kʋ yí máŋá tə wa, Yɩzərayɛlə lɩ̀à tə nə fwi ba lɩŋa, ba dʋŋa tə yuu wa. Kʋ nətʋ tə pʋ́pʋ́nɩ́ cɩ́gá tɩ̀án sagɩ tə wa, də Yɩcaʋ tə cən kʋ zɩgɩ lanworu tə wa, kʋ wà lala zwɩ. Yá kʋ nətʋ tə dán, kʋ yí dɩɩn pə́rɩ́. 14 Kʋ dɩɩn təntə yiri wà dí yáá kʋ ya lá, kʋ yiri ma wà lá yɩn, kʋ kwa nə də, Ba-Yígúrə́-Jə-Tiu nə sɛ̀ ləzwənə nii nətʋ. Cɩ́gá, Ba-Yígúrə́-Jə-Tiu yà tɛ ʋ pɩn Yɩzərayɛlə lɩ̀à tə nə. 15 Kʋ kwa nə, Zozuwe də Yɩzərayɛlə lɩ̀à tə mama pìí ba va ba dəkuu bwálɩ́ tə nə, Giləgalə nə.

16 Amɔrə dwíí tə pɛ̀gá bonu təntə dəri ba va ba səgə paan bʋʋ wa, Makeda nə. 17 Lɩ̀à swɩ̀n Zozuwe con, də ba nɩ pɛ̀gá bonu tə, ba səgə paan bʋʋ tə wa, Makeda nə. 18 Zozuwe ma swɩ̀n ʋ kwatara tə con, ʋ wʋ́: «Á bəbələ kapana nəfaran, á ma swɩn paan bʋʋ tə nii tə, á ga zɩgɩ lɩ̀à lá, sə ba cɩ̀ kʋ nə. 19 Yá á gɩganɩ tə mʋ̀ dànà ká zɩgɩ lá. Á dɩŋa á dʋŋa tə kwa, á goŋə ba yáá nə. Á dànà ká yá ba, á pa ba zʋ ba tɩan tə wa. Cɩ́gá, Ba-Yígúrə́-Jə-Tiu, ʋ nə yɩ á Yɩɩ, ken ba á jɩɩn wa.» 20 Zozuwe də Yɩzərayɛlə lɩ̀à tə yà gʋa Amɔrə dwíí tə, ba zwɛ̀ mɩ́ámɩ́án. Yá ba wa lɩ̀à duən mʋ̀ wànɩ́, ba dəri ba va tɩan tə wa, tə nə lwə̀, tə kɩkarɩ də biritaŋʋ. 21 Yɩzərayɛlə lɩ̀à tə mama pìí ba bà Zozuwe con, ba dəkuu bwálɩ́ tə nə, Makeda nə. Yá lìù mama yà kʋ́ʋ̀ kwàrɩ̀ sə ʋ swɩ̀n yoo, ʋ zɩgɩ ba nə.

22 Kʋ kwa nə, Zozuwe swɩ̀n, ʋ wʋ́: «Á surə paan bʋʋ tə nii, á lɩ pɛ̀gá bonu təntə, á pa nə.» 23 Ba twá Zozuwe nii nə, ba lɩ pɛ̀gá bonu təntə, ba ja bà ʋ con. Kʋ yà yɩ Zwerizalɛmə pɩ̀ʋ́, də Ebəron pɩ̀ʋ́, də Yarəmutə pɩ̀ʋ́, də Lakiswə pɩ̀ʋ́, də Egəlon pɩ̀ʋ́. 24 Máŋá tə wa, ba nə lɩ pɛ̀gá təntə, ba ja bà Zozuwe con, ʋ bon Yɩzərayɛlə lɩ̀à tə mama ʋ kə duən nə. Yá ʋ dàń swɩ̀n kwatara yáá tɩ̀án tə con, ʋ də ba nə vəli kʋ̀ʋ̀ tə, ʋ wʋ́: «Á bɩ̀án á yí lá, á nɩŋa á nɛɛ pɛ̀gá ba tə bɩan nə.» Ba ma yí lá, ba nɩŋa ba nɛɛ pɛ̀gá tə bɩan nə.» 25 Yá Zozuwe swɩ̀n ba con, ʋ wʋ́: «Á dànà ká pa fən ja aba. Á dànà ká pa á jɩ̀àn gwàrɩ̀. Á pɩan á jɩ̀àn dàn, á ga ja wʋdɩʋ. Cɩ́gá, mə nətən nə, Ba-Yígúrə́-Jə-Tiu wá tʋn á dʋŋa tə mama yɩra, á nə tɛ.» 26 Kʋ kwa nə, Zozuwe gʋa pɛ̀gá tə, ʋ ga pa, ba goli ba tɩga tə, tɩ̀án bonu nə. Ba goli lá wuuu, didəni va kʋ yí. 27 Yá yɩɩ zwɩʋ máŋá wa, Zozuwe pɩn ba sori tɩga tə tɩ̀án tə yuu wa, ba dɩ paan bʋʋ tə wa, ba yà nə səgə lá. Ba jɩn kapana nəfaran, ba ma sun paan bʋʋ tə nii, yá kapana təntə tə wulə lá də zə̀n mama. 28 Kʋ dɩɩn təntə tətə nə, Zozuwe ta Makeda tɩʋ tə ʋ də́. Ʋ gʋa Makeda tɩ̀án də ba pɩ̀ʋ́ tə mama, də kwatara sɩ̀ʋ́. Ʋ gʋa ba mama mɩ́ámɩ́án*, ʋ wà ba ladʋa tətə yá. Yá yoo tə, Zozuwe nə ma tʋn Zweriko pɩ̀ʋ́ tə, mə kʋ nə, ʋ ma tʋn Makeda pɩ̀ʋ́ tə də. 29 Kʋ kwa nə, Zozuwe də Yɩzərayɛlə lɩ̀à tə mama nan Makeda, ba va ba ta Libəna. 30 Ba-Yígúrə́-Jə-Tiu ken Libəna də də kʋ pɩ̀ʋ́ tə, Yɩzərayɛlə lɩ̀à tə jɩɩn wa. Ba gʋa Libəna tɩ̀án mama, də kwatara sɩ̀án, ba wà ba ladʋa tətə yá. Yá yoo tə Zozuwe nə ma tʋn Zweriko pɩ̀ʋ́ tə, mə kʋ nə, ʋ ma tʋn Libəna pɩ̀ʋ́ tə də.

31 Kʋ kwa nə, Zozuwe də Yɩzərayɛlə lɩ̀à tə mama kʋ́ʋ̀ nan Libəna, ba va Lakiswə. Ba vəli ba kə ba dəkuu tɩʋ tə nii nə, ba ma ta kʋ. 32 Yá kʋ̀ʋ̀ tə dɩan bələ nii dɩɩn tə nə, Ba-Yígúrə́-Jə-Tiu ken Lakiswə tɩʋ tə, Yɩzərayɛlə lɩ̀à tə jɩɩn wa. Ba gʋa Lakiswə tɩ̀án mama, də kwatara sɩ̀án, ndə ba nə gʋa Libəna tɩ̀án nətʋ. 33 Gezɛrə pɩ̀ʋ́ Horamə yà twi, sə ʋ san Lakiswə tɩ̀án tə nə ʋ ta. Yá Zozuwe gʋa Horamə də ʋ kwatara tə mama, ʋ wà ba ladʋa tətə yá.

34 Kʋ kwa nə, Zozuwe də Yɩzərayɛlə lɩ̀à tə mama kʋ́ʋ̀ nan Lakiswə, ba va Egəlon. Ba vəli ba kə ba dəkuu tɩʋ tə nii nə, ba ma ta kʋ. 35 Yá ba ta kʋ ba də́, kʋ dɩɩn tə tətə nə. Ba gʋa Egəlon tɩ̀án mama, də kwatara sɩ̀án. Zozuwe cʋ̀gʋ̀ tɩʋ tə mama mɩ́ámɩ́án, kʋ dɩɩn tə tətə nə, ndə ʋ nə cʋ̀gʋ̀ Lakiswə nətʋ.

36 Kʋ kwa nə, Zozuwe də Yɩzərayɛlə lɩ̀à tə mama kʋ́ʋ̀ nan Egəlon, ba va ba ta Ebəron. 37 Ba ta kʋ də kʋ nii tɩan tə mama, ba də́. Ba cʋ̀gʋ̀ Ebəron tɩʋ tə mama mɩ́ámɩ́án, ba ga gʋ kʋ pɩ̀ʋ́ tə, də kʋ wa lɩ̀à tə mama mɩ́ámɩ́án, də lɩ̀à tə mama, ba yà nə wulə kʋ nii tɩan tə wa, də kwatara sɩ̀án. Zozuwe wà ba ladʋa tətə yá, ndə ʋ nə wà Egəlon tɩ̀án ladʋa tətə yá nətʋ.

38 Kʋ kwa nə, Zozuwe də Yɩzərayɛlə lɩ̀à tə mama kʋ́ʋ̀ viviri, ba va ba ta Debirə. 39 Ba ta kʋ də kʋ nii tɩan tə mama, ba də́. Ba cʋ̀gʋ̀ Debirə tɩʋ tə mama mɩ́ámɩ́án, ba ga gʋ kʋ pɩ̀ʋ́ tə, də kʋ wa lɩ̀à tə mama mɩ́ámɩ́án, də lɩ̀à tə mama, ba yà nə wulə kʋ nii tɩan tə wa, də kwatara sɩ̀án. Zozuwe wà ba ladʋa tətə yá. Yá yoo tə, ʋ nə dí yáá ʋ ma tʋn Ebəron tɩ̀án, də Libəna tɩ̀án, də ba pɩ̀ʋ́ tə, mə kʋ nə, ʋ ma tʋn Debirə tɩ̀án də, də ba pɩ̀ʋ́ tə.

40 Zozuwe ta lʋʋ nii tə mama ʋ də́. Ʋ ta pɛɛn nagwanaa tə, də Negɛbə nagwanaa tə, də Swefela* nagwanaa tə, də mʋʋ nii nagwanaa tə, də tə pɛ̀gá mama, ʋ də́. Zozuwe gʋa lɩ̀à tə mama mɩ́ámɩ́án, ʋ wà ladʋa tətə yá. Ʋ gʋa wiən tə mama mɩ́ámɩ́án, tə mɩɩ nə siŋə, ndə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, nə pɩn wá nii, sə ʋ tʋn kʋ nətʋ. 41 Zozuwe zɩgɩ Kadɛswə-Barəneya nə, ʋ ta lʋʋ nii tə lɩ̀à tə ʋ də́, ʋ bà ʋ nan Gaza nə, də lʋʋ nii tə mama, kʋ nə zɩgɩ Goswɛn* nə, kʋ bà kʋ yí Gabawon. 42 Zozuwe ta pɛ̀gá təntə, də ba tɩan tə mama, ʋ də́ naa nədʋ. Cɩ́gá, Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, yà nə tɛ ʋ pɩn Yɩzərayɛlə lɩ̀à nə. 43 Kʋ kwa nə, Zozuwe də Yɩzərayɛlə lɩ̀à tə mama dàń pìí, ba va ba dəkuu bwálɩ́ tə nə, Giləgalə nə.