Zozuwe 11

Zozuwe ta Kanaan tɩ̀án pɛ̀gá tə Meromə buu tə nii nə

1 Hasɔrə pɩ̀ʋ́ Yabɩn nì də Zozuwe dí dɩ̀àn. Ʋ dàń tʋn lɩ̀à Madon pɩ̀ʋ́ Yobabə con, də Swiməron pɩ̀ʋ́ con, də Akəswafə pɩ̀ʋ́ con. 2 Ʋ tʋn lɩ̀à pɛ̀gá tə də con, ba yà nə wulə jɩzən saparʋ con pɛɛn nagwanaa tə wa, də Araba* tə wa, Kinerɛtə mʋʋ tə jɩgwiə saparʋ con, də Swefela* tə wa, də Dɔrə digə tə wa, yɩɩ yizwɩa con. 3 Ʋ tə tʋn lɩ̀à Kanaan tɩ̀án tə con, ba nə wulə yɩɩ yipɩan də yɩɩ yizwɩa con. Ʋ tʋn lɩ̀à Amɔrə dwíí tə də con, də Ɛtə dwíí tə con, də Perizi dwíí tə con, də Yebusə tɩ̀án con, ba nə wulə pɛɛn tə wa, də Evi dwíí tə con, ba nə wulə Ɛrəmon paan tə də̀ń nə, Misəpa nagwanaa tə wa. 4 Yá pɛ̀gá təntə də ba kwatara mama dàń nan. Ba yà dáá zənzən, ndə mʋʋ nii kasɩlʋ bɩ̀á nə. Ba yà jə səsen, də səsen kòrə̀n kapʋpʋ. 5 Ba mʋ̀ pɛ̀gá təntə mama ken nii nədʋ, ba ga bà ba kə ba dəkuu bwálɩ́ Meromə buu tə nii nə, sə ba ma ta kʋ̀ʋ̀ də Yɩzərayɛlə lɩ̀à tə. 6 Yá Ba-Yígúrə́-Jə-Tiu swɩ̀n Zozuwe con, ʋ wʋ́: «Dàn ká pa ba fən ja mʋ́. Cɩ́gá, jwɩan nə, máŋá ka tə wa, à wá gʋ ba mama, à pa Yɩzərayɛlə lɩ̀à nə. N wá goŋə ba səsen tə naŋʋnan n karɩ, n ga sʋ̀rɩ́ ba səsen kòrə̀n tə.»

7 Zozuwe də ʋ kwatara tə mama dàń vəli ba ta ba dʋŋa tə, ba dɩ̀ ba yuu, Meromə buu tə nii nə. 8 Ba-Yígúrə́-Jə-Tiu ken ba, Yɩzərayɛlə lɩ̀à jɩɩn wa, yá ba dàń ta ba, ba də́. Yɩzərayɛlə lɩ̀à tə duən púə́ dʋŋa tə kwa, ba dɩŋɩ. Ba duən dɩŋɩ dʋŋa tə, ba va ba yí Sidon tɩfarʋ tə, də Misərefotə-Mayimə. Ba duən də dɩŋɩ ba, ba va ba nan Misəpa vara tə wa, yɩɩ yipɩan con. Ba gʋa ba, ba wà ba ladʋa tətə yá. 9 Yá Zozuwe dàń tʋn yoo tə, Ba-Yígúrə́-Jə-Tiu nə pɩn wá nii, sə ʋ tʋn ba yɩra. Ʋ goŋi ba səsen tə naŋʋnan ʋ karɩ, ʋ ga sʋ̀rɩ́ ba səsen kòrə̀n tə.

10 Yá máŋá tə wa, Zozuwe nə pìí ʋ vìrí, ʋ ta Hasɔrə tɩʋ tə ʋ də́, ʋ ga gʋ kʋ pɩ̀ʋ́ tə, də kwatara sɩ̀ʋ́. Cɩ́gá, fuən nə, Hasɔrə yà nə yɩ payun təntə mama patɩʋ. 11 Ba gʋa lɩ̀à tə mama mɩ́ámɩ́án*, ba yà nə wulə tɩʋ tə wa, də kwatara sɩ̀án. Won mama wà lá gɛ, kʋ mɩɩ nə siŋə. Yá ba dàń sʋ̀rɩ́ Hasɔrə tɩʋ tə. 12 Zozuwe ta ba mʋ̀ pɛ̀gá təntə, də ba tɩan tə mama ʋ də́. Ʋ gʋa ba mama mɩ́ámɩ́án, də kwatara sɩ̀ʋ́, ndə Ba-Yígúrə́-Jə-Tiu tʋtʋnʋ Moyizə yà nə pɩn nii, sə ba tʋn nətʋ. 13 Yá pɛɛn yuu tɩan tə mʋ̀ mama, Yɩzərayɛlə lɩ̀à wà kʋ nədʋ tətə sʋ̀rɩ́, də kʋ nə tà Hasɔrə cɩcɩ, Zozuwe nə sʋ̀rɩ́. 14 Yɩzərayɛlə lɩ̀à tə pɛ̀ tɩan təntə jɩjə wiən tə mama, də vàná tə, ba nə ta ba jon. Yá ba gʋa ləzoni tə mʋ̀ mama, ba zwɛ̀ mɩ́ámɩ́án. Ba wà won mama yá, kʋ mɩɩ nə siŋə. 15 Yoo tə Ba-Yígúrə́-Jə-Tiu yà nə pɩn nii ʋ tʋtʋnʋ Moyizə nə, kʋ yuu wa, Moyizə yà pɩn nii Zozuwe nə, kʋ yoo təntə yuu wa, yá Zozuwe dàń tʋn kʋ, ʋ pa kʋ nii sú. Zozuwe wà yoo nədʋ tətə dʋgʋ vàn nə, kʋ tə mama wa, Ba-Yígúrə́-Jə-Tiu yà nə pɩn nii Moyizə nə, kʋ yuu wa. 16 Zozuwe dàń jon lʋʋ nii təntə mama. Kʋ mʋ̀ nə yɩ pɛɛn nagwanaa tə, də Negɛbə* nagwanaa tə mama, də Goswɛn* nagwanaa tə mama, də Swefela nagwanaa tə mama, də Araba tə mama, də Yɩzərayɛlə jɩzən saparʋ yuu pɛɛn nagwanaa tə, də ka mʋʋ nii tə. 17 Kʋ nə zɩgɩ Halakə paan tə nə, ka nə wulə Seyirə con, kʋ va kʋ yí Baalə-Gadə, Liban vara tə wa, Ɛrəmon paan tə də̀ń con, Zozuwe cɩ̀gà tə mʋ̀ bwálá təntə pɛ̀gá tə mama, ʋ ja ʋ gʋ. 18 Zozuwe ta kʋ̀ʋ̀ də ba mʋ̀ pɛ̀gá təntə mama, kʋ dán zənzən. 19 Evi dwíí tə cɩcɩ, ba nə wulə Gabawon nə, nə wànɩ́ ba na sìə́ nimarʋ də Yɩzərayɛlə lɩ̀à tə. Tɩan tə duən tə mʋ̀ mama yɩ Yɩzərayɛlə lɩ̀à ta, ba də́. 20 Cɩ́gá, Ba-Yígúrə́-Jə-Tiu yà nə pɩn tɩan təntə tɩ̀án waa dàn, sə ba ta kʋ̀ʋ̀ də Yɩzərayɛlə lɩ̀à tə. Ʋ fwa kʋ nətʋ, sə Yɩzərayɛlə lɩ̀à tə wànɩ́ ba cʋ̀gʋ̀ tɩan təntə mama mɩ́ámɩ́án, ba ga gʋ tə wa lɩ̀à tə də mama mɩ́ámɩ́án, ba dàn ká dəri ba yinəgə, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ.

21 Kʋ máŋá təntə tətə wa, Zozuwe vəli ʋ ta Anakə dwíí tə ʋ lɩ, Ebəron, də Debirə, də Anabə pɛɛn tə wa. Ʋ ta ba ʋ lɩ Zwida lʋʋ nii pɛɛn tə mama wa, də Yɩzərayɛlə lʋʋ nii pɛɛn tə mama wa. Zozuwe gʋa ba mama mɩ́ámɩ́án, ʋ ga cʋ̀gʋ̀ ba tɩan tə mama mɩ́ámɩ́án. 22 Anakə dwíí tə yà kʋ́ʋ̀ tə̀lə́ Yɩzərayɛlə lʋʋ nii tə wa. Gaza, də Gatə, də Aswədɔdə tɩan tə cɩcɩ wa nə, ba dàń yà wulə. 23 Zozuwe ta lʋʋ nii tə mama, ʋ də́, ndə Ba-Yígúrə́-Jə-Tiu nə swɩ̀n Moyizə con, sə ʋ tʋn nətʋ. Yá Zozuwe dàń tarɩ lʋʋ nii tə, ʋ pa Yɩzərayɛlə dwíə́ tə nə, ndə nətʋ tə nə, dwíí mama yà nə mɛ sə kʋ na. Yá lʋʋ nii tə dàń yɩn sìə́ wa, kʋ̀ʋ̀ tə jɩɩn wa.