Moyizə tɩan yoo
34
1 Moyizə zɩgɩ Mʋabə digə tə wa, ʋ dɩ̀ Nebo paan tə yuu wa, Pisəga paan tə yupara wa, Zweriko tɩʋ tə yáá con. Ba-Yígúrə́-Jə-Tiu pɩn ʋ na lʋʋ nii tə mama, kʋ nə zɩgɩ Galadə nagwanaa tə nə, kʋ va kʋ yí Dan nagwanaa tə, 2 də Nɛfətali nagwanaa tə mama, də Efərayimə də Manase lʋʋ nii tə, də Zwida lʋʋ nii tə mama, kʋ ja va kʋ yí yɩɩ yizwɩa con mʋʋ tə, 3 də Negɛbə nagwanaa tə, də kʋra tɩʋ tə nə wulə Zweriko vara tə wa, kʋ va kʋ yí Sʋarə. 4 Ba-Yígúrə́-Jə-Tiu swɩ̀n ʋ con, ʋ wʋ́: «Mə lʋʋ nii tə nə, à nə dùə̀, à ma swɩ̀n Abərahamə, də Yɩzakə, də Zwakɔbə con, də wá pa kʋ ba dwíí nə. À pɩn n na kʋ də n yɩ́á, yá n nə bá zʋ kʋ wa.»5 Yá Ba-Yígúrə́-Jə-Tiu tʋtʋnʋ Moyizə dàń tɩga lá nə, Mʋabə lʋʋ nii tə wa, ndə Ba-Yígúrə́-Jə-Tiu nə pɩn nii nətʋ. 6 Ba-Yígúrə́-Jə-Tiu tətə nə gùrì wá vara tə wa, Mʋabə lʋʋ nii tə wa, Bɛtə-Pewɔrə yáá con. Lìù mama wà ʋ ləbəri bwálɩ́ lwarɩ, də zə̀n mama.
7 Moyizə tɩga də ʋ jə bɩna bíí də sapʋa. Ʋ yɩ́á yà wà bwànɩ̀, yá ʋ dɩ̀àn də yà wà mun. 8 Yɩzərayɛlə lɩ̀à tə kwi Moyizə nə, Mʋabə digə tə wa, dɩan fɩtwa, ndə lúə́ kwirə nə mɛ sə kʋ dán kʋ mɛ nətʋ, kʋ dàń ga zɩgɩ lá kʋ zwɛ̀. 9 Nun bìú Zozuwe yà súə́ də wʋbʋŋa jə̀rə́, Moyizə yà nə tún ʋ jɩ̀àn ʋ yuu wa, ʋ lòrì Yɩɩ ʋ pa wá yɩrɩ. Yá Yɩzərayɛlə lɩ̀à tə dàń zìlí Zozuwe nii, yá ba twá yìə̀n tə nə, Ba-Yígúrə́-Jə-Tiu ya nə pɩn nii Moyizə nə, tə yuu wa.
10 Yɩɩ nii sʋ̀sʋ̀nʋ̀ don kʋ́ʋ̀ wà Yɩzərayɛlə wa yɩn, Ba-Yígúrə́-Jə-Tiu nə ve də wá nəpon nəpon, ndə Moyizə nə, 11 kʋ nə twá də mɩmɩnan tə də yomɩlan tə mama, Ba-Yígúrə́-Jə-Tiu nə tʋn wá, ʋ pa ʋ va ʋ tʋn Ezwipətə lʋʋ nii tə wa, ʋ zɩgɩ Farawon, də ʋ tʋ̀tʋ̀nán yun tɩ̀án tə, də ʋ lʋʋ nii tə mama nə, 12 də dɩ̀àn tʋ̀tʋ̀nán tə mama, tə nə ba kamandon jə, Moyizə nə tʋn də ʋ jɩɩn dɩ̀àn, Yɩzərayɛlə lɩ̀à tə mama yɩ́á yuu.