Moyizə lòrì sə Yɩɩ fwa zəni Yɩzərayɛlə lɩ̀à yɩra
33
1 Nə̀ń nətʋ tə Moyizə, ʋ nə yɩ Yɩɩ tʋtʋnʋ nə lòrì, sə Yɩɩ fwa zəni Yɩzərayɛlə lɩ̀à yɩra, də ʋ tə wà tɩ. 2 Ʋ swɩ̀n, ʋ wʋ́:«Ba-Yígúrə́-Jə-Tiu nan Sinayi paan tə yuu ʋ bà,
ʋ zàn Seyirə pɛɛn tə wa,
ʋ wulə ba yuu con, ndə yɩcɔɔ nə.
Ʋ zɩgɩ Paran pɛɛn tə wa,
ʋ pɩ̀rɩ̀ ʋ lalʋʋ tə də poni.
Ʋ twi ʋ lalʋʋ tə con,
malɩkɛ mʋ̀rʋ̀ dəkurən mʋ̀rʋ̀ kapʋpʋ* titəŋi wa.
Yɩɩ nii sagɩ tə nə yɩ ndə mən nə,
yà wulə ʋ jɩzən wa, ʋ ja bà sə ʋ pa ba.
3 Cɩ́gá, ʋ swə Yɩzərayɛlə dwíə́ tə.
Ʋ lɩ̀à tə mama nə yɩ parɩ, wulə ʋ jɩɩn wa.
Ba kun duən nə, n nɛɛ də̀ń nə,
sə ba jon n nii sʋ̀ràn tə.
4 Yɩɩ nii tə Moyizə nə pɩn nəba,
yɩ Zwakɔbə dwíí tə tori.
5 Ʋ yà yɩ pɩ̀ʋ́ Yeswurunə nə,
máŋá tə wa lalʋʋ tə yáá tɩ̀án,
də Yɩzərayɛlə dwíə́ tə nə kun duən nə.
6 Yɩɩ wá pa Ribɛn dwíí tə mɩɩ ya lʋʋ wa,
ba dàn ká tɩ, də ba ba dáá tə mɛ!»
7 Nə̀ń kʋ tə Moyizə nə swɩ̀n, Zwida dwíí tə yuu wa:
«Ba-Yígúrə́-Jə-Tiu, cʋgʋ Zwida dwíí tə kori,
n ga pìí n ja ba n bà ba lalʋʋ tə con.
Dan ba jɩ̀àn, sə ba ma ta ba jon ba tɩ̀àn,
n ga ya ba sáŋʋ́ ba dʋŋa yáá con!»
8 Levi dwíí tə yuu wa, ʋ swɩ̀n, ʋ wʋ́:
«Ba-Yígúrə́-Jə-Tiu, n ken n pwárʋ́ bɩ̀á tə,
ba nə boŋə Tumimə də Urimə,
dwíí jɩɩn wa, ba nə yɩ pùə́ nədʋ tɩ̀án də mʋ́.
N mɩlɩ ba Masa nə,
n ga dɩ tʋ́tʋ̀ná də ba, Meriba nɩ́á tə yoo wa.
9 Dwíí təntə bɩrɩ də ba swə mʋ́,
ba doni ba nyɩna də ba nuu!
Ba ba ba nubɩa kúrí, ba ma kʋkwanɩ lɩ̀à duən,
ba ma ba ba tətə bɩ̀á swə, ba doni dwíə́ duən bɩ̀á.
Cɩ́gá, ba zìlí n sʋgʋ tə nii,
ba ga twá n nimarʋ tə nə.
10 Ba ja n yìə̀n tə, n nə bɩrɩ sə tə tʋn,
ba ma kàrɩ̀ Zwakɔbə dwíí tə,
yá ba ja n nii yìə̀n tə,
ba ma kàrɩ̀ Yɩzərayɛlə lɩ̀à tə.
Ba sʋ̀rɩ́ wusinə, tə lwán nə ywán, ba pɩn mʋ́,
ba ga fwa joŋi tə ba nə sʋ̀rɩ́*, n joŋi bwálɩ́* tə yuu.
11 Dan ba jɩɩn, Ba-Yígúrə́-Jə-Tiu!
Fwa zəni ba yɩra, ba jɩɩn tʋtʋŋɩ tə yɩrɩ!
Cʋgʋ ba jarɩduən dɩ̀àn,
dàn ká yá n pa
lɩ̀à tə nə culi ba, pìí ba zàn!»
12 Bɛnzwamɛn dwíí tə yuu wa, ʋ swɩ̀n, ʋ wʋ́:
«Bɛnzwamɛn dwíí tə yɩ dwíí,
Ba-Yígúrə́-Jə-Tiu nə swə zənzən,
yá ba wá ya ʋ səpuni nə də yazurə.
Ba-Yígúrə́-Jə-Tiu wá pú ba yuu nə, máŋá mama,
yá ba wá ya ʋ para wa.»
13 Zʋzɛfə dwíí tə yuu wa, ʋ swɩ̀n, ʋ wʋ́:
«Ba-Yígúrə́-Jə-Tiu wá fwa zəni ba lʋʋ nii tə yɩra:
Ʋ wá pa ba dwà nɩ́á, tə nə ziən tə doni,
də nyʋ̀nʋ̀, də tɩa də̀ń nɩ́á, tə nə ziən tə doni,
14 də lənə, tə nə ziən tə doni, yɩcaʋ nə pɩn tə bɩ,
də cànà mama lənə nədʋra, tə nə ziən tə doni,
15 də dí yáá pɛɛn tə lənə, tə ziən tə doni,
də fuən dədwələn tə lənə, tə nə ziən tə doni,
16 də tɩa tə də ka yuu wiən lənə, tə nə ziən tə doni.
Yɩɩ tə ʋ nə bɩrɩ ʋ tɩ̀àn tuni tə wa,
pubwanʋ tə wá ya Zʋzɛfə dwíí tə yuu wa,
kʋ wá ya ʋ mʋ̀ lìù tə yupara wa,
ʋ nə yɩ ʋ nubɩa tə yuu tíú!
17 Zʋzɛfə dwíí tə jə dun.
Ba dà ndə nabɩa zandʋan bìú nə!
Ba jə dɩ̀àn ndə ganaʋ nyʋran nə.
Ba wá ja tə ba mà lʋʋ dwíə́ tə mama,
kʋ va kʋ yí tɩa nii yígúrə́:
Ba dɩ̀àn tə nə yɩ Efərayimə dwíí lɩ̀à
mʋ̀rʋ̀ dəkurən kapʋpʋ tə,
tə mʋ̀ nə yɩ Manase dwíí lɩ̀à mʋ̀rʋ̀ kapʋpʋ tə.»
18 Zabulon də Yɩsakarə dwíə́ tə yuu wa, ʋ swɩ̀n, ʋ wʋ́:
«Zabulon dwíí lɩ̀à-ba,
á fwaŋa pupwən də á yolu tʋ̀tʋ̀nán tə,
yá á mʋ̀ Yɩsakarə dwíí lɩ̀à-ba,
á fwaŋa pupwən á gansilə də̀ń!
19 Ba wá bon dwíə́ duən paan tə yuu wa,
yá ba wá fwa cɩ́gá cwəŋə jwəŋə lá nə.
Cɩ́gá, ba wá də́ mʋʋ jɩjə wiən kapʋpʋ nywarɩ,
də jɩjə wiən tə nə səgə kasɩlʋ wa nywarɩ.»
20 Gadə dwíí tə yuu wa, ʋ swɩ̀n, ʋ wʋ́:
«À bwɩ Ba-Yígúrə́-Jə-Tiu nə,
ʋ nə pɩn tɩa ka dáá, Gadə dwíí tə nə!
Gadə dwíí tə tígə́, ndə gəru nə tígə́,
kʋ vaŋa kʋ nàŋʋ́ nandaran də kʋ yuu, kʋ cɩrɩ.
21 Gadə dwíí tə kúrí lʋʋ nii tə bwálɩ́ tə nə ziən.
Cɩ́gá, ba tì bwálɩ́ tə nə yɩ yáá tíú tori.
Ba yɩn lalʋʋ tə yáá, ba tʋn yoo mama,
kʋ twá Ba-Yígúrə́-Jə-Tiu cɩ́gá cwəŋə tə,
də ʋ yìə̀n tə nə, ʋ nə bɩrɩ Yɩzərayɛlə lɩ̀à nə, sə ba tʋn.»
22 Dan dwíí tə yuu wa, ʋ swɩ̀n, ʋ wʋ́:
«Dan dwíí tə yɩ ndə gəbala nə,
kʋ nə nyɩ́n kʋ nan Baswan nagwanaa con.»
23 Nɛfətali dwíí tə yuu wa, ʋ swɩ̀n, ʋ wʋ́:
«Nɛfətali dwíí lɩ̀à-ba,
á súə́ də Yɩɩ pubwanʋ!
Ba-Yígúrə́-Jə-Tiu fwa zəni kapʋpʋ á yɩra.
Á joŋə lʋʋ nii tə yɩɩ yizwɩa con tə,
də kʋ jɩgwiə saparʋ con tə, á tɩnɩ!»
24 Aswɛrə dwíí tə yuu wa, ʋ swɩ̀n, ʋ wʋ́:
«Yɩɩ wá fwa zəni Aswɛrə dwíí tə yɩra,
Zwakɔbə bɩ̀á tə wa!
Yɩɩ wá pa ba nubɩa tə fwa pubwanʋ ba yɩra,
kʋ pa ba li ba nɛɛ nʋga wa!
25 Yɩɩ wá pa á boruswaran ya lugu də cɩnɩan,
sə á ga ja dɩ̀àn máŋá tə mama, á nə wá ya lʋʋ wa!»
26 Yá Moyizə kʋ́ʋ̀ swɩ̀n, ʋ wʋ́:
«Lìù tə̀lə́ ʋ nə yɩ ndə Yɩɩ nə, Yeswurunə tɩ̀án-ba!
Ʋ dɩ̀gà lanworu tə ndə səsən nə,
yá ʋ jə̀ə́ bakwan tə yuu wa də dun,
ʋ ja bɩ̀àn sə ʋ san aba!
27 Yɩɩ tə nə ba yígúrə́ jə yɩ yisəgə bwálɩ́,
yá sìə́ wulə ʋ vànà tə nə ba gwàrɩ̀ də̀ń nə.
Ʋ dɩŋɩ dʋŋa ʋ lɩ á yáá nə,
ʋ ga pa aba nii, sə á cʋ̀gʋ̀ ba mɩ́ámɩ́án.
28 Yɩzərayɛlə lɩ̀à wulə ba sànɩ́ wa də yazurə.
Zwakɔbə nabuliyii tə wulə vàn nə, kʋ pàlɩ̀,
mɩna də divɛn nədʋn lʋʋ nii wa,
yá ba lanworu tə pɩn nyʋ̀nʋ̀ pàlɩ̀ tɩa.
29 Á yɩ pupwən lɩ̀à tamʋ, Yɩzərayɛlə lɩ̀à-ba!
Wàà nə yɩ ndə á nə,
á mʋ̀ lalʋʋ tə Ba-Yígúrə́-Jə-Tiu nə jon?
Ba-Yígúrə́-Jə-Tiu yɩ natana, ʋ cɩ̀ á nə,
ʋ yɩ kwatara sɩ̀ʋ́, ʋ pɩn á də́ dɩ̀àn.
Á dʋŋa wá bà, ba gɩgarɩ aba,
yá á mʋ̀ wá də́ dɩ̀àn ba yuu wa.»