32
1 Lanworu, guni n zɩɩn n cʋgʋ, sə à swɩ̀n!Tɩa, cʋgʋ à nii sʋ̀ràn tə!
2 À yənu, curi tɩa ndə dwà nə,
à nii sʋgʋ, pàlɩ̀ ndə nyʋ̀nʋ̀ nə,
ndə bakwan nə wòrì vʋran yuu wa,
ndə nɩ́á nə toli galɩʋ yuu wa!
3 Cɩ́gá, à wá cə̀rí Ba-yígúrə́-Jə-Tiu yɩrɩ tə, à kə yɩɩ nə.
Á sənə nə tíú Yɩɩ!
4 Ba-Yígúrə́-Jə-Tiu yɩ pɩ̀ʋ̀,
ʋ yoo mama jə fɩra.
Cɩ́gá, ʋ coŋi tə mama yɩ mənəmənə,
ʋ yɩ Yɩɩ tə ʋ nə yɩ pùə́ nədʋ tíú,
ʋ ba yogugolu tʋŋa,
ʋ yɩ cɩ́gá tíú, ʋ ga yɩ mənəmənə.
5 Á mʋ̀ tʋn gɩgɩrɩ yìə̀n Yɩɩ yáá con,
yá á kʋ́ʋ̀ tà ʋ bɩ̀á, á nə tʋn lwanɩ yɩrɩ.
Á yɩ wʋlʋnyɩna də gɩgɩrɩnyɩna dwíí.
6 Á mʋ̀ nyɩnyanan, ba wʋbʋŋa jə tɩ̀án-ba,
mə nətʋ nə á ja zɩga Ba-Yígúrə́-Jə-Tiu nə?
Kʋ tà ʋ mʋ̀ nə yɩ á nyɩna,
ʋ nə fwa aba ʋ kə lʋʋ wa naaa?
7 Á lìə́ á tɩ̀àn máŋá tə nə kɛ̀ń yoo,
á ga jələ bɩna tə,
máŋá də máŋá mama wuuu.
Á bwiə á nyɩna-ba,
yá ba wá man dí yáá, ba bɩrɩ aba.
Á bwiə á nəkwɩna,
yá ba wá swɩ̀n ka yoo ba bɩrɩ aba.
8 Máŋá tə Baan Yɩɩ nə pɩn tori lʋʋ dwíə́ tə nə,
máŋá tə ʋ nə pwɛ̀ ləzoni dwíə́ duən wa,
ʋ tún lʋʋ dwíə́ tə sɩswɩan,
kʋ mɛ də Yɩzərayɛlə lɩ̀à tə nii.
9 Cɩ́gá, Ba-Yígúrə́-Jə-Tiu lɩ̀à tə nə yɩ ʋ tara,
Zwakɔbə dwíí tə nə yɩ ʋ tori.
10 Ʋ nɩ ba kasɔɔ lanworu lʋʋ nii wa,
tɩkʋrʋ wa, cirəkuri bubwiə titəŋi wa.
Ʋ kɩkarɩ ba, ʋ ywàń ba yuu,
ʋ cɩ̀gà ba nə, ndə ʋ yicalɩbiu nə.
11 Ba-Yígúrə́-Jə-Tiu ywàń Zwakɔbə dwíí tə yuu,
ndə zənpuu nə yàá piri,
kʋ yɩyarɩ kʋ pwalʋ yuu con,
sə kʋ pa pəru fɩra ja kʋ bɩ̀á,
sə tə də zàn tə piri,
də kʋ larɩ kʋ vànà kʋ ma jəri tə kʋ janɩ,
kʋ tì kʋ túŋə́ kʋ vànà yuu wa.
12 Ba-Yígúrə́-Jə-Tiu cɩcɩ ya nə kəni ba cwəŋə nə,
yɩɩ nəkaʋ don mama ya tə̀lə́ də ba.
13 Ʋ yà pɩn ba dɩ̀ lʋʋ nii tə pɛɛn yuu wa,
yá ʋ pɩn ba də́ kárɩ́ tə wiən.
Ʋ pɩn ba də́ tʋ̀ràn tə nə pàlɩ̀ tə naŋa pɩ̀ʋ̀ wa,
də nʋga tə nə naŋa pɩ̀ʋ̀ tə wa, kʋ nə dà zənzən,
14 də nakana nayɩlɩ nʋga, də vanmɩnɩ nayɩla,
kʋ súrí pəbii tə nə nuən nàŋʋ́ nə,
də Baswan tɩ̀án pabɩran nàŋʋ́, də bʋtɩlan nàŋʋ́,
kʋ súrí dipɛn mɩna munbʋa nə,
yá ba yà nywɩn divɛn,
kʋ nə yɩ divɛn tɩ̀án bɩ̀á nəzəŋə jana.
15 Yeswurunəa nuən, yá ʋ dàń vɩ nii.
Ʋ nuən, ʋ zʋ duən, ʋ jì lələru,
yá ʋ dàń vɩga Yɩɩ tə nə dɩga wá, ʋ dʋgʋ,
ʋ fʋfʋlɩ pɩ̀ʋ̀ tə nə yɩ ʋ jonu.
16 Ba pɩn yɩa nəkaran yimən jə wá,
ba tʋn yobalwaran ba ma zɩ̀n ʋ lɩŋa.
17 Ba fwa jwəŋə ba pa zinə nə, tə nə tà Yɩɩ,
ba fwa tə ba pa yɩa nə, ba yà nə yəri tə.
Tə yɩ yɩa nədʋra, tə nə twi sɩ́ʋ́n,
yá á nyɩna-ba yà ba tə dun pɩn.
18 Á wà pɩ̀ʋ̀ tə jələ,
kʋ nə fwa aba, kʋ kə lʋʋ wa,
á swɛ̀ɛ́ Yɩɩ tə yoo, ʋ nə lɩrɩ aba!
19 Ba-Yígúrə́-Jə-Tiu nɩ nətʋ tə,
ʋ bɩ̀á tə də ʋ bwɩ̀ɩ́ tə nə fʋfʋlɩ wá,
yá ʋ lɩŋa zàn ba yuu wa.
20 Ʋ swɩ̀n, ʋ wʋ́:
«À wá viviri à yáá à kə kwa, à ga yá ba,
yá à wá na yoo tə nə wá yí ba jwɩan nə.
Cɩ́gá, ba yɩ dwíí kʋkwɩʋn,
ba yɩ bɩ̀á, à nə wàrɩ̀ ba yuu wa à jələ.
21 Ba pɩn won tə nə tà Yɩɩ yimən jə nə,
ba ga ja ba woŋwanan tə nə ba funə jə,
ba ma zɩ̀n à lɩŋa.
Yá à də dàń wá pa lɩ̀à tə,
à yà nə ba jələ ndə dwíí nə, yimən ja ba,
à ga pa ba lɩŋa zàn dwíí nəkaʋ yuu wa,
ba nə ba yənu jə.
22 Cɩ́gá, à lɩŋa kwé ndə mən,
yá tə dí tə cú tə yí ciru* də̀ń.
Tə də́ tɩa tə də ka yuu wiən tə,
tə kwé pɛɛn dəkurən wa.
23 À wá pa lɛɛ kapʋpʋ yí ba, duən də̀ń nə,
à wá ta à cɩan tə mama ba yɩra, à zwɛ̀.
24 Niən wá bwànɩ̀ ba,
yalɩŋa də yayɩpwarʋ tə nə lwara ga də́ ba.
À wá sugu wojankadirən,
də dəŋa tə cwan nə gwɩ, à kə ba nə.
25 Kwatara sɩ̀ʋ́ wá cʋ̀gʋ̀ ba bɩ̀á kàrá wa,
yá fən tə nə karɩ bɩcan wá gʋ ba dìə̀ wa.
Kʋ wá ya nətʋ kʋ pa balandʋrʋ də kacɩɩn mɛ nə,
də bisɩmaa də bazʋnʋ, ʋ yuu nə pɩrɩ mɛ nə.»
26 À swɩ̀n, à wʋ́: «À wá cʋ̀gʋ̀ ba mɩ́ámɩ́án,
à pa ba yɩrɩ jɛ́n tɩa yuu, ləzoni titəŋi wa!
27 Yá à bʋ́n ba dʋŋa nə wá ja kʋ ba ma fʋfʋlɩ nə yoo.
Cɩ́gá, à yà ba pɩ̀à sə ba jarɩduən bʋ́n də,
ba mʋ̀ jɩɩn dɩ̀àn nə tʋn kʋ nətʋ tə,
kʋ tà Ba-Yígúrə́-Jə-Tiu nə tʋn yìə̀n təntə mama!»
28 Cɩ́gá, ba yɩ dwíí,
ba pubʋŋa yìə̀n nə ba jì,
ba ba pubʋŋa mancɩn tətə jə.
29 Ba yà nə yɩ wʋbʋnyɩna,
ba yà wá nì yoo təntə də̀ń,
ba ga bʋ́n ba jwɩan yoo.
30 Nətə nə ladʋa wá wànɩ́ ʋ pú lɩ̀à mʋ̀rʋ̀ kwa, ʋ dɩŋa,
yá lɩ̀à bələ pa lɩ̀à mʋ̀rʋ̀ fugə dəri ba yáá nə,
də kʋ nə tà Yɩɩ tə nə yɩ ndə ba pɩ̀ʋ̀ nə tə
nə yoli ba, ba dʋŋa yuu wa?
Də kʋ nə tà Ba-Yígúrə́-Jə-Tiu nə jɩn ba,
ʋ kə ba dʋŋa jɩɩn wa?
31 Cɩ́gá, ba pɩ̀ʋ̀ tə tà ndə nə pɩ̀ʋ̀ tə nə,
yá nə dʋŋa tə də tətə yə̀ə́ kʋ nətʋ tə.
32 Ba divɛn tɩ̀án yɩ Sodɔmə tɩ̀án divɛn tɩ̀án dwíí,
tə yɩ tə nan Gomɔrə tɩ̀án divɛn tɩ̀án kárɩ́ wa.
Tə lənə tə yɩ ndə fwanan nə,
tə bɩ̀á zirən tə cà kwalʋkwalʋ.
33 Tə divɛn yɩ ndə tɩdən cwan nə,
tə gwɩ ndə dəkwaa cwan nə.
34 Kʋ nətʋ tà à mʋ̀ nə tanɩ kʋ, à tún zəni,
ndə jɩjə won nə, sə à ma zɩgɩ ba nə naaa?
35 À mʋ̀ nə wá fwi à lɩŋa ba yuu wa,
à ga ŋwɩ́n ba tʋtʋŋɩ ŋwɩ́rán à pa ba,
máŋá tə wa, ba nə wá mà ba naa!
Cɩ́gá, ba lɛɛ dɩɩn tə bwə́lə́,
yá yoo tə nə wá yí ba, kʋ́ʋ̀ ba dán.
36 Cɩ́gá, Ba-Yígúrə́-Jə-Tiu wá bʋ̀rɩ̀ ʋ lalʋʋ tə bʋra,
yá ʋ wá dəri ʋ tʋ̀tʋ̀nà tə yinəgə,
máŋá tə wa, ʋ nə nɩ də ba dɩ̀àn zwɛ̀,
yá lìù kʋ́ʋ̀ wà gɛ, ʋ nə yɩ yoŋu,
nə à yə̀ə́ ʋ nə tɩ ʋ tɩ̀àn.
37 Ʋ wá bwe ba, ʋ wʋ́: «Ba yɩa tə wulə yə̀n nə?
Ba yuu yikwala bwálɩ́ pɩ̀ʋ̀ tə wulə yə̀n nə?
38 Tə mʋ̀ yɩa tə yà nə də́ ba jwəŋə nanʋga,
tə ga nywɩn divɛn tə, ba nə ma fwa joŋi,
wulə yə̀n nə?
Tə zaŋa tə jon aba,
tə ga pú á yuu nə!
39 Sɩ́ʋ́n nə, á dàń yənə də kʋ yɩ à mʋ̀,
à mʋ̀ cɩcɩ nə yɩ Yɩɩ,
yá yɩɩ don tə̀lə́ kʋ ma dà nə!
À mʋ̀ nə pɩn lìù tɩ,
à mʋ̀ ma nə pɩn lìù mɩɩ yanɩ lʋʋ wa,
à mʋ̀ nə caŋɩ, à mʋ̀ ma nə pɩn yazurə,
yá lìù tə̀lə́ ʋ joŋə ʋ don à jɩɩn wa.
40 À zɩ̀n à jɩɩn, à te yɩɩ nə,
yá à swɩ̀n, à wʋ́: “À wulə máŋá mama wuuu!
41 À deri à kwatara sɩ̀ʋ́ nii kʋ nan fʋ́láfʋ́lá,
yá à jɩɩn nə zʋa bʋra,
à wá fwi à lɩŋa à jarɩduən yuu wa,
à ga ŋwɩ́n ba tə nə culi nə wʋlʋŋʋ jɩŋɩ ba yɩra.
42 À cɩan wá nyʋn jana, tə bʋbʋnɩ,
à kwatara sɩ̀ʋ́ wá də́ yatanaŋʋ kʋ sú!
À cɩan wá nyʋn ba tə à nə gʋa,
də ba tə à nə jɩn kʋ̀ʋ̀ wa jana,
à kwatara sɩ̀ʋ́ ga goŋə dʋŋa tə kwatara yáá tɩ̀án yun!”»
43 Lʋʋ dwíə́-ba, á maga pupwən cə̀rí
Ba-Yígúrə́-Jə-Tiu lalʋʋ tə yuu nə!
Cɩ́gá, ʋ fwi ʋ lɩŋa ʋ jarɩduən yuu wa,
ʋ tʋ̀tʋ̀nà tə jana tə yɩrɩ,
yá ʋ kwɛn cʋna ʋ lɩ ʋ lʋʋ nii tə, də ʋ lalʋʋ tə yuu wa.»
44 Moyizə twi ʋ swɩ̀n nuŋə ka tə sʋ̀ràn tə mama, lalʋʋ tə yáá con. Nun bìú Zozuwe yà wulə də wá.
45 Máŋá tə Moyizə nə swɩ̀n sʋ̀ràn təntə mama ʋ zwɛ̀, Yɩzərayɛlə lɩ̀à tə mama yáá con, 46 ʋ swɩ̀n ba con, ʋ wʋ́: «Á jana sʋ̀ràn tə mama, à nə swɩ̀n á con zə̀n kʋ tə, á bɩcanɩ wa zəni, ndə dansɩa won. Á jana tə á ma kàrɩ̀ á bɩ̀á, sə ba zìlí sʋ̀ràn tə mama nii, tə nə wulə Yɩɩ nii sagɩ kʋ tə wa, ba ga twá tə nə. 47 Cɩ́gá, tə tà sʋ̀ràn, tə nə ba də̀ń jə tə pa aba. Tə yɩ á mɩɩ, yá tə mʋ̀ nə wá pa á ja mɩdarɩ, lʋʋ nii tə wa, á nə wá bɩn Zʋrədɛn mʋnaa tə á nan, á jon á tɩnɩ.»
Ba-Yígúrə́-Jə-Tiu swɩ̀n Moyizə tɩan yoo
48 Kʋ dɩɩn tə tətə nə, Ba-Yígúrə́-Jə-Tiu swɩ̀n Moyizə con, ʋ wʋ́: 49 «Dɩ̀ Abarimə pɛɛn tə yuu, n zɩgɩ Nebo paan tə yuu wa, ka nə wulə Mʋabə lʋʋ nii wa, Zweriko tɩʋ tə yáá con, n ywàń Kanaan lʋʋ nii tə, à nə pɩn Yɩzərayɛlə lɩ̀à nə, sə kʋ ya ba nyiən. 50 Kʋ kwa nə, n wá tɩ paan tə yuu wa, n nə wá dɩ̀, yá n wá va n nyɩna-ba con, ba nə dí yáá ba tɩ, ndə n nubiu Aron nə, ʋ nə tɩga Hɔrə paan tə yuu wa, ʋ va ʋ nyɩna-ba con, ba nə dí yáá ba tɩ. 51 Cɩ́gá, n də Aron tʋn cʋna á zɩgɩ à nə, Yɩzərayɛlə lɩ̀à tə titəŋi wa, Meriba nɩ́á tə nii nə, Kadɛswə nə, Sin kasɔɔ lanworu tə wa. Kʋ máŋá tə wa, á wà nə dun pɩn Yɩzərayɛlə lɩ̀à tə titəŋi wa. 52 N wá na lʋʋ nii tə, à nə pɩn Yɩzərayɛlə lɩ̀à nə, n yáá con, yá n bá zʋ kʋ wa.»