Yɩzərayɛlə lɩ̀à wá pìí ba bà Ba-Yígúrə́-Jə-Tiu con
30
1 Sʋ̀ràn tə tə mama à nə swɩ̀n, tə nə bɩrɩ yìə̀n tə nə wá pa Yɩɩ fwa zəni á yɩra, də yìə̀n tə nə wá pa ʋ cʋ̀gʋ̀ aba, à nə ken á yáá con, sə á kúrí á tì, nii wá sú. Á nə bʋ́n tə yoo dwíə́ nəkaran* tə mama wa, Ba-Yígúrə́-Jə-Tiu, á tíú Yɩɩ nə wá dɩŋa aba ʋ kə, 2 á nə pìí á bà Ba-Yígúrə́-Jə-Tiu, á tíú Yɩɩ con, á də á bɩ̀á nə zìlí ʋ nii də á waa mama, də á jə̀rə́ mama, ndə à nə pɩn aba nii, sə á tʋn nətʋ zə̀n kʋ tə, 3 Ba-Yígúrə́-Jə-Tiu, á tíú Yɩɩ wá kwɛn á yoo. Ʋ wá dəri á yinəgə, ʋ ga lɩ á aba dwíə́ nəkaran tə mama wa, Ba-Yígúrə́-Jə-Tiu, á tíú Yɩɩ yà nə laga aba ʋ kə, ʋ ja pìí ʋ bà duən yáá. 4 Ba-Yígúrə́-Jə-Tiu, á tíú Yɩɩ yà nə yɩ ʋ dɩŋɩ aba, ʋ lɩ ʋ kə tɩa nii yígúrə́ wa, ʋ wá kə aba duən yáá lá nə, ʋ tì ʋ ja bà. 5 Ba-Yígúrə́-Jə-Tiu, á tíú Yɩɩ wá pìí ʋ ja aba, ʋ bà lʋʋ tə wa, á nyɩna-ba nə tɩnɩ, ʋ pa á jon kʋ á tɩnɩ. Ʋ wá fwa zəni á yɩra, ʋ pa á púlí á doni á nyɩna-ba. 6 Ba-Yígúrə́-Jə-Tiu, á tíú Yɩɩ wá kwɛn á də á dwíí tə bɩcanɩ tə, ʋ lɩ durən wa, sə kʋ pa á sóní Ba-Yígúrə́-Jə-Tiu, á tíú Yɩɩ də á bɩcan mama, də á jə̀rə́ mama, sə kʋ pa á mɩɩ ya lʋʋ wa. 7 Ba-Yígúrə́-Jə-Tiu, á tíú Yɩɩ wá pa zɩra tə tə mama tʋ á dʋŋa tə yuu wa, ba nə culi aba, yá ba fɩfɩn aba. 8 Yá á mʋ̀ wá pìí á bà Ba-Yígúrə́-Jə-Tiu con, á wá zìlí ʋ nii, yá á wá twá yìə̀n tə mama nə, ʋ nə pɩn nii tə yuu wa, ndə à nə tún tə à pa aba zə̀n nətʋ. 9 Ba-Yígúrə́-Jə-Tiu, á tíú Yɩɩ wá pa jɩjə bʋ́rɩ́ aba. Ʋ wá pa á jɩɩn tʋtʋŋɩ də á kárɩ́ wiən kwɛn tə pa aba, ʋ ga pa á kwíə́ də̀ń dwíí də á vàná dwíí pùlì zənzən. Cɩ́gá, kʋ kʋ́ʋ̀ wá ya ywánɩ́ kʋ pa Ba-Yígúrə́-Jə-Tiu nə, sə á nì á ywánɩ́, ndə kʋ yà nə ywán kʋ pa wá, sə á nyɩna-ba nì ba ywánɩ́ nətʋ, 10 də á nə zìlí Ba-Yígúrə́-Jə-Tiu, á tíú Yɩɩ nii, á ga twá yìə̀n tə nə, ʋ nə pɩn nii tə yuu wa, də yìə̀n tə ʋ nə pɩn tə pʋ́pʋ́nɩ́ tə tún Yɩɩ nii sagɩ kʋ tə wa, yá á ga pìí á bà Ba-Yígúrə́-Jə-Tiu, á tíú Yɩɩ con, də á bɩcan mama, də á jə̀rə́ mama.Yɩɩ sʋgʋ tə ba ŋʋ́ná də ləzoni
11 Cɩ́gá, Yɩɩ nii yìə̀n tə, à nə pɩn aba nii tə yuu wa zə̀n kʋ tə, ba á jɩɩn dwə, tə ga tà won tə á dɩ̀àn nə wà yí. 12 Tə tà won kʋ nə wulə lanworu wa, sə á swɩ̀n, á wʋ́: «Wàà nə wá dɩ̀ lanworu wa, ʋ ja kʋ ʋ cú, ʋ swɩ̀n ʋ pa nə nì, sə nə wànɩ́ nə twá kʋ nə?» 13 Tə ma tà won kʋ nə wulə mʋʋ kwa con, sə á swɩ̀n, á wʋ́: «Wàà nə wá bɩn mʋʋ tə vàn tə don nə, ʋ ja kʋ ʋ bà ʋ swɩ̀n ʋ pa nə nì, sə nə wànɩ́ nə twá kʋ nə?» 14 Cɩ́gá, sʋgʋ təntə bwə́lə́ á yɩra zənzən: Kʋ wulə á nii wa, kʋ ma wulə á bɩcan də wa, sə kʋ pa á wànɩ́ á twá kʋ nə.
Mɩɩ də tɩan yoo
15 Yɩzərayɛlə lɩ̀à-ba, á nəŋə, à tún mɩɩ də ywánɩ́, də tɩan də lɛɛ á yáá con zə̀n kʋ tə. 16 Kʋ tə à nə pɩn aba nii sə á tʋn zə̀n kʋ tə, kʋ yɩ sə á sóní Ba-Yígúrə́-Jə-Tiu, á tíú Yɩɩ, sə á va ʋ coŋi tə wa, á ga twá yìə̀n tə nə, ʋ nə pɩn nii tə yuu wa, də yìə̀n tə ʋ nə pɩn tə pʋ́pʋ́nɩ́ tə tún, də yìə̀n tə ʋ nə bɩrɩ sə tə tʋn, sə kʋ pa á mɩɩ ya lʋʋ wa, sə á púlí zənzən, sə Ba-Yígúrə́-Jə-Tiu, á tíú Yɩɩ ga fwa zəni á yɩra lʋʋ nii tə wa, á nə vələ sə á zʋ á jon á tɩnɩ. 17 Yá á bɩcan nə viviri kʋ yá Ba-Yígúrə́-Jə-Tiu, á nə ba ʋ nii zìlí, á ga yá á pa á bɩcan van aba kʋ pa á tʋ á nadwana yuu yɩa duən yáá con, á pa tə dun, 18 à mʋ̀ nə swɩ̀n kʋ á con zə̀n kʋ tə, á wá jɛ́n mɩ́ámɩ́án, á dɩan bá pùlì lʋʋ nii tə wa, á nə wá bɩn Zʋrədɛn mʋnaa tə, á nan á jon á tɩnɩ.
19 À ja lanworu də tɩa à ma fwa dansɩa, à zɩgɩ á nə zə̀n kʋ tə: À tún mɩɩ də tɩan, də zəni də zɩra á yáá nə. Á kúrə́ mɩɩ á tì, sə á mʋ̀ də á dwíí mɩɩ ya lʋʋ wa. 20 Á swə́nə́ Ba-Yígúrə́-Jə-Tiu, á tíú Yɩɩ, á zìlə́ ʋ nii, á ga vwa á tɩ̀àn ʋ nə. Ʋ mʋ̀ nə yɩ á mɩɩ, yá ʋ mʋ̀ nə pɩn aba mɩdarɩ, sə á ja ya lʋʋ nii tə wa, ʋ nə dùə̀ sə ʋ pa á nɩbara Abərahamə, də Yɩzakə, də Zwakɔbə nə.