Yɩɩ Nii 29

Kʋ tə Yɩɩ nə tʋn ʋ pa Yɩzərayɛlə lɩ̀à nə

1 Moyizə bon Yɩzərayɛlə lɩ̀à tə mama, ʋ swɩ̀n ba con, ʋ wʋ́:

Á nɩ kʋ tə mama Ba-Yígúrə́-Jə-Tiu nə tʋn á yɩ́á yuu, Ezwipətə lʋʋ nii tə wa, Farawon də ʋ tʋ̀tʋ̀nà tə mama yɩra, də ʋ lʋʋ nii tə mama yɩra. 2 Á yɩ́á dìgə̀ də́də́ŋə́n nəfaran, də dɩ̀àn mɩmɩnan, də yomɩlan nəfaran. 3 Yá də zə̀n mama, Ba-Yígúrə́-Jə-Tiu tə wà aba pubʋŋa pɩn, sə á ma yəni yoo də̀ń, də yɩ́á, sə á ma na, də zɩan, sə á ma nì. 4 À yɩn á yáá, à kə aba cwəŋə nə, kasɔɔ lanworu tə wa, bɩna sapwɩlə. Á gànʋ̀ wà á yɩra nə kwɩn, á natɩrɩ də ma wà á naa nə kwɩn. 5 Dipɛn, də divɛn, nə à yə̀ə́ sana tə nə dà wà á con yɩn, sə kʋ pa á lwarɩ də à mʋ̀ Ba-Yígúrə́-Jə-Tiu nə yɩ á tíú Yɩɩ. 6 Á twi á yí bwálɩ́ kʋ tə wa, yá Ɛswəbon pɩ̀ʋ́ Sihon, də Baswan pɩ̀ʋ́ Ogə nan ba jəri nəba, sə ba ta nəba, yá nə ta ba nə də́. 7 Nə jon ba lʋʋ nii tə, yá nə pɩn kʋ Ribɛn dwíí tə nə, də Gadə dwíí tə nə, də Manase dwíí faan tə nə, sə kʋ ya ba tori. 8 Kʋ mʋ̀ yɩrɩ, á dàń mɛ sə á zìlí nimarʋ kʋ tə sʋ̀ràn tə nii, á ga twá tə nə, sə kʋ pa won tə mama á nə wá fwa, jì kʋ pa aba.

Yɩzərayɛlə lɩ̀à mɛ sə ba ja Yɩɩ nimarʋ tə zəni

9 Á dwíə́ tə mama zə̀n zɩga Ba-Yígúrə́-Jə-Tiu, á tíú Yɩɩ yáá con, də á dwíə́ yáá tɩ̀án, də á sànɩ́ tɩ̀án, də á tʋ̀tʋ̀nán yun tɩ̀án, də Yɩzərayɛlə lɩ̀à bara tə mama, 10 də á bɩ̀á, də á kana, də vərə tə nə wulə á titəŋi wa, ba goŋi dɛ̀ɛ̀, də ba taŋa nɩ́á ba pɩn aba. 11 Á zɩga yəbə, sə á dù, á ma bɩrɩ də á sɛ̀, sə á zʋ Ba-Yígúrə́-Jə-Tiu, á tíú Yɩɩ nimarʋ tə wa, ʋ nə túŋə́ də aba zə̀n kʋ tə, 12 sə kʋ pa ʋ ja aba ʋ ma fwa ʋ lɩ̀à zə̀n kʋ tə, sə ʋ tətə ga ya á tíú Yɩɩ, ndə ʋ nə swɩ̀n kʋ á con nətʋ, ndə ʋ nə dùə̀, ʋ ma swɩ̀n kʋ, á nɩbara Abərahamə, də Yɩzakə, də Zwakɔbə con nətʋ. 13 Nimarʋ təntə, à nə twá də durə, à ma túŋə́, tà à túŋə́ də á mʋ̀ cɩcɩ. 14 Kʋ dàń nə yɩ à túŋə́ kʋ, də lɩ̀à tə nə wulə nə titəŋi wa yəbə, Ba-Yígúrə́-Jə-Tiu, nə tíú Yɩɩ yáá con, zə̀n kʋ tə, də ba tə nə tə̀lə́ nə titəŋi wa yəbə, zə̀n kʋ tə.

15 Á tətə yə̀ə́ nətʋ tə, nə nə yɩn Ezwipətə lʋʋ nii wa, də nətʋ tə, nə nə twá dwíə́ nəkaran* tə wa, á nə twá ba lʋʋ níə́ wa, á kɛ̀ń. 16 Á nɩ ba wolwana tə də ba woŋwanan tə, ba nə bwɩ tə nə, nə yɩ nətʋ: Tə yɩ dàʋ̀, də kapan, də wárʋ́, də sɩ́án nə, ba ma fwa tə. 17 Á cɩa, bɛɛ nə à yə̀ə́ kan, nə à yə̀ə́ sanii lɩ̀à, nə à yə̀ə́ dwíí dàń ká ya á wa, ba nə wá pa ba bɩcan viviri, kʋ yá Ba-Yígúrə́-Jə-Tiu, nə tíú Yɩɩ zə̀n kʋ tə, ba ga va ba pa dun dwíə́ nəkaran təntə yɩa tə nə. Á cɩa, lìù dàn ká ya á wa, ʋ nə yɩ ndə tɩ̀ʋ́ ŋʋnʋ nə, kʋ nə cà kwalʋkwalʋ, ndə vàá nə. 18 Lìù tə mama ʋ nə nì durə ka tə sʋ̀ràn tə tə kwa nə, dàn ká gɩgarɩ ʋ tɩ̀àn ʋ waa con, yá ʋ swɩ̀n, ʋ wʋ́: «Yoo mama bá wʋwalɩ nə, də à nə swə à twá à pùə́ fɩra nə!» Kʋ nətʋ wá pa Yɩɩ cʋ̀gʋ̀ cʋnʋ də lìù tə nə wà yoo cʋ̀gʋ̀ mɛ, ʋ kə duən wa. 19 Ba-Yígúrə́-Jə-Tiu bá yá kʋ tíú yolwan tə, ʋ pa kʋ kɛ̀ń. Ba-Yígúrə́-Jə-Tiu lɩŋa wá kwé kʋ tíú yuu wa, ndə mən nə, ʋ nə yɩ Yɩɩ tə ʋ nə jə badoli zənzən yɩrɩ. Zɩra tə mama nə pʋ́pʋ́nɩ́ sagɩ kʋ tə wa, wá ja kʋ tíú, yá Ba-Yígúrə́-Jə-Tiu wá pa kʋ tíú yɩrɩ jɛ́n, tɩa yuu wa. 20 Ba-Yígúrə́-Jə-Tiu wá lɩ kʋ tíú Yɩzərayɛlə dwíə́ tə mama wa, ʋ kə vàn nə, sə lɛɛ yí wá, ndə nimarʋ tə zɩra tə mama nə pʋ́pʋ́nɩ́ Yɩɩ nii sagɩ kʋ tə wa, nə bɩrɩ nətʋ.

Ba-Yígúrə́-Jə-Tiu wá tʋn yìə̀n tə ʋ nə dùə̀ sú tə yɩrɩ

21 Á dwíə́ tə á nə wá kə lʋʋ wa, ba nə yɩ á bɩ̀á tə nə wá ya lʋʋ wa, á kwa nə, də vee tə nə wá nan lʋʋ nii kʋ nə ŋʋ́ná ʋ bà, nə nɩ lʋʋ nii kʋ tə càn tə, də yayɩran tə Ba-Yígúrə́-Jə-Tiu nə dɩga kʋ nə, ba wá swɩ̀n, ba wʋ́: 22 «Lʋʋ nii kʋ tə mama dí mən, kʋ jì jiribu də nəkuən. Won mama wàrɩ̀ lá kʋ dwì, won mama ba lá pɛ́n, tɩ̀ʋ́ mama ba lá naŋa, ndə Sodɔmə, də Gomɔrə, də Adəma, də Seboyimə tɩan nə, Ba-Yígúrə́-Jə-Tiu nə cʋ̀gʋ̀, máŋá tə wa, ʋ lɩŋa nə zàn tə yuu wa, tə fʋrɩ.» 23 Lʋʋ dwíə́ tə mama wá swɩ̀n, ba wʋ́: «Bɛ̀ɛ̀ nə pɩn Ba-Yígúrə́-Jə-Tiu ma tʋn yoo kʋ tə, lʋʋ nii kʋ tə yɩra? Bɛ̀ɛ̀ nə pɩn ʋ lɩŋa ma zàn kʋ yuu wa zənzən, tə pupwin nətən?» 24 Yá lɩ̀à wá le, ba wʋ́: «Kʋ yɩ ba nə vɩga nimarʋ tə, Ba-Yígúrə́-Jə-Tiu, ba nyɩna-ba Yɩɩ nə tún də ba, máŋá tə wá, ʋ nə pɩn ba nan Ezwipətə lʋʋ nii wa, 25 ba ga pìí ba va, ba tʋ ba nadwana yuu yɩa duən yáá con, ba pa tə dun, yá tə yɩ yɩa ba yà nə yəri tə, Ba-Yígúrə́-Jə-Tiu yà nə wà tə ba pɩn, sə tə ya ba tori yɩrɩ. 26 Kʋ mʋ̀ nə pɩn Ba-Yígúrə́-Jə-Tiu lɩŋa zàn lʋʋ nii kʋ tə yuu wa, yá ʋ pa zɩra tə mama nə pʋ́pʋ́nɩ́ sagɩ kʋ tə wa, tʋ lʋʋ nii tə yuu wa. 27 Ba-Yígúrə́-Jə-Tiu gùrì ba, ʋ lɩ ba lʋʋ nii tə wa, də lɩŋa nəfarʋ, tə nə pupwin, tə fʋrɩ, yá ʋ dɩlɩ ba lʋʋ nii don wa. Kʋ mʋ̀ nə pɩn kʋ ma yɩ nətʋ zə̀n.»

28 Yìə̀n tə nə səgə yɩ Ba-Yígúrə́-Jə-Tiu, nə tíú Yɩɩ nə tɩ, yá yìə̀n tə nə gwìń tə kə poni nə, yɩ nə mʋ̀ də nə bɩ̀á nyiən, máŋá mama wuuu, sə kʋ pa nə twá Yɩɩ nii sagɩ kʋ tə sʋ̀ràn tə mama nə.