Yɩɩ Nii 28

Ywánɩ́ nikanɩ yoo

1 Á nə zìlí Ba-Yígúrə́-Jə-Tiu, á tíú Yɩɩ nii zəni, á ga twá yìə̀n tə mama nə, ʋ nə pɩn nii tə yuu wa, ndə à nə tún tə à pa aba zə̀n nətʋ, Ba-Yígúrə́-Jə-Tiu, á tíú Yɩɩ wá zɩ̀n aba ʋ kə yɩɩ nə baan baan, tɩa yuu dwíə́ tə mama yuu con. 2 Nəŋə zəni tə mama Ba-Yígúrə́-Jə-Tiu, á tíú Yɩɩ nə wá tʋn á yɩra, də á nə zìlí ʋ nii:

3 Ba-Yígúrə́-Jə-Tiu wá fwa zəni á yɩra sàń nə, ʋ ga wá fwa zəni á yɩra gaʋ də wa. 4 Ʋ wá fwa zəni á dwíí yɩra, ʋ wá pa á kárɩ́ lənə kwɛn tə pa aba, ʋ ga pa á vàná ja dwíí. Ʋ wá pa á vanfaran də á vanmɩnɩ pùlì zənzən. 5 Ʋ wá fwa zəni á yɩra, ʋ pa á tìə́ də á nagwalʋ nii sú. 6 Ʋ wá fwa zəni á yɩra á sàń túrí wa, ʋ ga wá fwa zəni á yɩra á kàrá naŋʋ də wa.

7 Ba-Yígúrə́-Jə-Tiu wá pa á ta á dʋŋa tə nə wá zàn ba zɩgɩ á nə, á də́. Ba wá tì cwəŋə nədʋ, ba ma bà sə ba ta aba, yá ba wá pìí ba tì coŋi barpɛ, ba ma dəri sə ba jɛ́n á yáá nə. 8 Ba-Yígúrə́-Jə-Tiu wá pa nii, sə zəni ya á tori wiən tə mama wa, á nə wá kə á tikələ wa, də á jɩɩn tʋtʋŋɩ mama wa. Ʋ wá fwa zəni á yɩra lʋʋ nii tə wa, ʋ mʋ̀ Ba-Yígúrə́-Jə-Tiu, á tíú Yɩɩ nə wá pa aba.

9 Á nə zìlí yìə̀n tə nii Ba-Yígúrə́-Jə-Tiu, á tíú Yɩɩ nə pɩn nii tə yuu wa, á ga twá ʋ coŋi tə nə zəni, ʋ wá tún aba sə á ya lalʋʋ tə á nə yɩ ʋ mʋ̀ cɩcɩ nə tɩ, ndə ʋ nə dùə̀ ʋ ma swɩ̀n kʋ á con nətʋ. 10 Tɩa yuu dwíə́ tə mama wá na də Ba-Yígúrə́-Jə-Tiu yɩrɩ tə nə ba ma boŋə aba, yá ba wá dəri á fən. 11 Ba-Yígúrə́-Jə-Tiu wá pa jɩjə bʋ́rɩ́ aba: Ʋ wá pa á dwíí, də á vàná dwíí, də á kárɩ́ lənə pùlì zənzən, lʋʋ nii tə wa, ʋ nə dùə̀ ʋ ma swɩ̀n á nyɩna-ba con, də ʋ wá pa kʋ aba. 12 Ba-Yígúrə́-Jə-Tiu wá súrí lanworu tə nii, kʋ nə yɩ ʋ jɩjə won nəzəŋu bwálɩ́, ʋ pa aba. Ʋ wá pa dwà nà á lʋʋ nii tə wa, ka nɩŋʋ máŋá wa, sə ʋ ma fwa zəni á jɩɩn tʋtʋŋɩ mama yɩra. Dwíə́ nəkaran* kapʋpʋ wá jɩŋa wiən á con, yá á mʋ̀ bá jɩŋa won lìù con də mama. 13-14 Ba-Yígúrə́-Jə-Tiu wá pa á ya yáá, á bá ya kwa də mama. Á nə cʋgʋ yìə̀n tə zəni, Ba-Yígúrə́-Jə-Tiu, á tíú Yɩɩ nə pɩn nii tə yuu wa, à nə tún à pa aba zə̀n kʋ tə, á nə zìlí tə nii, á ga twá tə nə zəni, á nə wà yori á va jɩzən, nə à yə̀ə́ jɩgwiə, á ga yá yìə̀n tə mama à nə bɩrɩ aba zə̀n kʋ tə, á nə wà pìí á twá yɩa duən kwa, sə á pa tə dun, Ba-Yígúrə́-Jə-Tiu wá zɩ̀n aba ʋ kə yɩɩ nə máŋá mama wuuu, á bá ya tɩa də mama.

Zɩra yoo

15 Yá á nə wà Ba-Yígúrə́-Jə-Tiu, á tíú Yɩɩ nii zìlí, á nə wà á yɩra zuri, á twá yìə̀n tə mama nə, ʋ nə pɩn nii tə yuu wa, də yìə̀n tə mama nə, ʋ nə pɩn tə pʋ́pʋ́nɩ́ tə tún, ndə à nə tún tə à pa aba zə̀n nətʋ, nəŋə lɛɛ tə mama Ba-Yígúrə́-Jə-Tiu nə wá pa tə yí aba:

16 Lɛɛ wá yí aba sàń nə, lɛɛ ga wá yí aba gaʋ də wa. 17 Lɛɛ wá yí aba, won mama bá ya á tìə́ də á nagwalʋ wa. 18 Lɛɛ wá yí á dwíí tə, á kárɩ́ lənə wá cʋ̀gʋ̀, yá á vanfaran də á vanmɩnɩ bá ja dwíí. 19 Lɛɛ wá yí aba á sàń túrí wa, lɛɛ ga wá yí aba á kàrá naŋʋ də wa.

20 Ba-Yígúrə́-Jə-Tiu wá pa lɛɛ yí aba. Ʋ wá bɩbaga aba, ʋ pa á jwə̀rí á jɩɩn tʋtʋŋɩ mama wa, kʋ va kʋ yí máŋá tə ʋ nə wá cʋ̀gʋ̀ aba, ʋ pa á nyʋn tɩa tə yuu wa lala, á tʋtʋnkʋkwɩnan tə yɩrɩ, tə nə bɩrɩ də á vɩga wá á dʋgʋ. 21 Ba-Yígúrə́-Jə-Tiu wá dɩ tɩan yayɩpwarʋ á nə, ʋ pa kʋ gʋ aba kʋ zwɛ̀ mɩ́ámɩ́án lʋʋ nii tə wá, á nə zwɩ sə á jon á tɩnɩ. 22 Ba-Yígúrə́-Jə-Tiu wá dɩ yayɩran á nə, tə pa á bwànɩ́, á yɩra mʋ̀rɩ́, tə wiri. Ʋ wá pa dwakʋrɩ ja aba, á kárɩ́ wiən sɩan, tə jì wokunkwələ. Lɛɛ təntə mama wá yí aba, á kori á tɩ á zwɛ̀ mɩ́ámɩ́án. 23 Lanworu tə wá ya ndə cɩnɩan nə á yuu con, tɩa tə ga ya ndə lugu nə á nɛɛ də̀ń nə. 24 Ba-Yígúrə́-Jə-Tiu wá pa pùrú də kasɩlʋ nà ndə dwà nə á lʋʋ nii tə wa. Tə wá nan lanworu wa tə cú á yuu wa, tə kori tə cʋ̀gʋ̀ aba tə zwɛ̀. 25 Ba-Yígúrə́-Jə-Tiu wá pa á dʋŋa ta aba ba də́. Á wá tì cwəŋə nədʋ, á ma nan sə á ta ba, yá á wá pìí á tì coŋi barpɛ, á ma dəri sə á jɛ́n ba yáá nə. Á wá ya bɩcapuri lɩ̀à, á pa tɩa yuu payun tə mama nə. 26 Á tɩga wá ya lanworu zuŋi də ganaŋa nii wodiu, yá lìù mama bá wʋwalɩ tə.

27 Ba-Yígúrə́-Jə-Tiu wá dɩ ŋʋna á nə, ndə ʋ nə dɩga tə Ezwipətə tɩ̀án nə nətʋ. Ʋ wá dɩ bələn, də dáá, də yapʋpʋrʋ á nə, á nə bá wànɩ́ á ywarɩ, á pa tə zuri. 28 Ba-Yígúrə́-Jə-Tiu wá dɩ nyaʋ də liliri, də bibəni á nə. 29 Á wá tɩtɛ yɩcakʋrʋ wa, ndə liliu nə tɩtɛ yikunu wa nətʋ. Á pubʋŋɩ yìə̀n bá jì, ba wá fɩfɩn aba máŋá mama, ba ga vɩrɩ á wiən, yá lìù mama bá jon aba. 30 Bɛɛ wá càrà kan sə ʋ swe, yá bɛɛ don nə wá pə̀ń də kan tə. Lìù wá lwà dìə̀, yá ʋ bá pə̀ń ka wa. Lìù wá cwɛn divɛn tɩ̀án, yá ʋ bá də́ tə nywarɩ. 31 Ba wá gʋ á nɩan á yɩ́á yuu, yá á bá na tə nàŋʋ́ á də́. Ba wá jon á bɩnɛ də dɩ̀àn, á yáá con, yá ba bá pìí ba pa tə aba. Ba wá jon á vanmɩnɩ, ba pa á dʋŋa nə, yá lìù bá bà ʋ jon aba. 32 Ba wá ja á bɩ̀á də á bwɩ̀ɩ́, ba pa dwíí don nə, á wá na kʋ nətʋ tə, yá á yɩ́á wá pàlɩ̀ ba nə wuuu, tə kori tə gwàrɩ̀, á ma dànɩ̀ sə ba pìí ba bà, yá á bá wànɩ́ won mama á fwa, sə á ma pìí á jon ba. 33 Dwíí tə á nə yəri wá də́ á tɩa tə lənə, də won tə mama á nə wá tʋn á na, yá ba wá vɩrɩ á wiən, ba ga fɩfɩn aba máŋá mama. 34 Lɛɛ tə á yɩ́á nə wá na wá pa á nyàn.

35 Ba-Yígúrə́-Jə-Tiu wá pa ŋʋna tə nə lwara nan á nadwana də á ciən nə, yá á bá wànɩ́ tə á ywarɩ, á pa tə zuri. Ʋ wá pa tə zɩgɩ á napɩra nə, tə dɩ̀ tə yí á yupara wa.

36 Ba-Yígúrə́-Jə-Tiu wá pa á də á pɩ̀ʋ́ tə á nə wá tún sə ʋ də́ pàrɩ̀ á yuu wa, va lʋʋ nii wa, á də á nyɩna-ba yà nə yəri. Yá á wá pa dun yɩa duən nə lá nə, tə nə yɩ dàʋ̀ də kapan. 37 Lɛɛ tə nə wá yí aba wá gwárɩ́ lʋʋ dwíə́ tə mama, Ba-Yígúrə́-Jə-Tiu nə wá ja aba ʋ va ba con, yá á dàń wá jì mʋmʋn də cavɩra lɩ̀à, á pa ba.

38 Á wá dù wodwii á kárɩ́ wa zənzən, yá mancɩn nə á wá ca, jə̀rə̀n nə wá də́ tə yɩrɩ. 39 Á wá cwɛn divɛn tɩ̀án, á vàrà tə də̀ń nə, yá á bá nyʋn tə divɛn. Á bá pʋ̀rɩ́ tə lənə də tətə, zʋnzʋran nə wá də́ tə yɩrɩ. 40 Á wá ja olivə* tɩ̀án lʋʋ nii tə mama wa, yá á bá tùrì nʋga, á olivə tɩ̀án lənə tə nə wá wòrì tə lwá tɩa yɩrɩ. 41 Á wá lɩra bɩ̀á də bwɩ̀ɩ́, yá ba bá ya á mʋ̀ nyiən, dʋŋa nə wá ja ba ba va yongaʋ yɩrɩ. 42 Kayɩra wá də́ á tɩ̀án tə mama, də á lʋʋ nii tə lənə tə.

43 Vee tə nə twá ʋ jə̀ə́ á con wá zàn á yuu wa máŋá mama wuuu, yá á mʋ̀ ga twɩ máŋá mama wuuu. 44 Ʋ mʋ̀ wá ja wiən, á twi á jɩŋɩ ʋ con, yá á mʋ̀ bá ja won mama, sə ʋ bà ʋ jɩŋa á con. Ʋ mʋ̀ wá ya yáá, yá á mʋ̀ wá ya kwa.

45 Lɛɛ təntə mama wá yí aba. Tə wá pú á kwa tə dɩŋa wuuu, tə kori tə ja aba tə cʋ̀gʋ̀, á nə wà Ba-Yígúrə́-Jə-Tiu, á tíú Yɩɩ nii zìlí yɩrɩ. Á vɩga sə á twá ʋ yìə̀n tə nə, ʋ nə pɩn nii tə yuu wa, də tə tə nə ʋ nə pɩn tə pʋ́pʋ́nɩ́ tə tún, ndə ʋ nə tún tə ʋ pa aba nətʋ. 46 Tə wá ya ndə mɩmɩnan də yogwaran nə, tə zɩgɩ á mʋ̀ də á dwíí nə, máŋá mama wuuu.

47 Á nə vɩga sə á pa dun Ba-Yígúrə́-Jə-Tiu, á tíú Yɩɩ nə, də pupwən də bɩcan nəpon, máŋá tə wa jɩjə nə bʋ́rɩ́ aba, 48 Ba-Yígúrə́-Jə-Tiu wá sugu dʋŋa ʋ kə á nə, yá á wá jì ba ywə́ŋə́, á tʋn á pa ba də niən, də nanyʋnɩ, də zʋrɩ, yá won mama wá mùrì aba. Ba wá kə nɩan bɩan lugu á pàrà wa, ba kori ba cʋ̀gʋ̀ aba. 49 Ba-Yígúrə́-Jə-Tiu wá sugu dwíí nəkɔɔ, kʋ nə wulə yiŋʋnɩ, tɩa nii yígúrə́ wa, ʋ kə á nə. Dwíí təntə wá cú á yuu wa ndə zənpuu nə. Kʋ yɩ dwíí á nə ba kʋ nəndəli sʋgʋ nə̀ń. 50 Kʋ yɩ dwíí kʋ lɩ̀à yáá nə nyʋna, ba ba nəkwɩa zìlí, ba ma ba balandʋrʋ yinəgə dəri. 51 Ba wá də́ á vàná, də á tɩa tə lənə, ba kori ba cʋ̀gʋ̀ aba ba zwɛ̀. Ba bá yá mɩnɩ, nə à yə̀ə́ divɛn, nə à yə̀ə́ nʋga, nə à yə̀ə́ á nabiə, nə à yə̀ə́ á pəbiə, nə à yə̀ə́ bʋbiə nədʋ tətə ba pa aba, ba kori ba pa á jɛ́n lá mɩ́ámɩ́án. 52 Ba wá pú aba ba kə á tɩan tə mama wa də kʋ̀ʋ̀, biritaŋan nədaran tə tə nə jə dɩ̀àn, á nə jələ tə yuu wa, á lʋʋ nii tə mama wa, kori tə tʋ. Ba wá pú aba ba kə á tɩan tə mama wa də kʋ̀ʋ̀, lʋʋ nii tə mama wa Ba-Yígúrə́-Jə-Tiu, á tíú Yɩɩ nə pɩn aba. 53 Yá máŋá tə á dʋŋa tə nə wá kə aba jɩgwarʋ də yinəgə wa, á wá də́ á tətə kwíə́ də̀ń bɩ̀á: Á wá də́ á bɩ̀á tə də á bwɩ̀ɩ́ tə Ba-Yígúrə́-Jə-Tiu, á tíú Yɩɩ nə pɩn aba, yatanaŋʋ. 54 Á wa bɛɛ tə ʋ waa nə bwànà, ʋ ga yɩ bɩcabwanʋ tíú, wá jì gʋnyiən ʋ nubiu yuu wa, də ʋ tətə sapaa kan tə yuu wa, də ʋ bɩ̀á tə yuu wa, ʋ nə wá də́ ʋ ga. 55 Ʋ wá fwa nətʋ, ʋ nə ba pɩ̀à sə ba wa lìù don mama twá ʋ də́ ʋ bɩ̀á tə yatanaŋʋ tə yɩrɩ. Cɩ́gá, kʋ mʋ̀ cɩcɩ nə wá ya wodiu ʋ nə jə, wodiu don mama kʋ́ʋ̀ bá ga ʋ con, jɩgwarʋ tə də yinəgə tə wa, á dʋŋa tə nə wá kə aba tə wa, á tɩan tə mama wa. 56 Á wa kan tə ʋ waa nə bwànà, ʋ ga yɩ bɩcabwanʋ tíú, ʋ waa nə bwànà, ʋ ga yɩ bɩcabwanʋ tíú zənzən, kʋ pa ʋ yɩ ʋ daŋɩ, ʋ ma vəli, ʋ wá jì gʋnyiən ʋ sapaa barɩ tə yuu wa, də ʋ bìú də ʋ bʋ̀á yuu wa. 57 Ʋ nə ba wodiu don mama jə sə ʋ də́ tə wá pa, ʋ cɩcɩ səgə ʋ də́ ʋ bìsɩ̀ná tə nə nan ʋ ciən pwə́rə́ wa, də nyɩnɩ tə, jɩgwarʋ tə də yinəgə tə yɩrɩ, á dʋŋa tə nə wá kə aba tə wa, á tɩan tə wa.

58 Á nə wà lá ywàń, sə á twá Yɩɩ nii sʋ̀ràn tə tə mama nə, tə nə pʋ́pʋ́nɩ́ sagɩ kʋ tə wa, á nə ba Ba-Yígúrə́-Jə-Tiu, á tíú Yɩɩ yɩrɩ tə nə jə dun, kʋ ga ba kamandon jə fən dəri, 59 Ba-Yígúrə́-Jə-Tiu wá kə càn nəfaran, tə nə ba zwɛ̀, də yayɩran tə nə dà, tə ga ba zwɛ̀ á mʋ̀ də á dwíí tə nə, kʋ ga gwárɩ́ aba. 60 Ʋ wá pa Ezwipətə tɩ̀án yayɩpwaran tə mama, á yà nə dəri tə fən, bà á nə, yá tə wá ja aba. 61 Kʋ tə nə súrí lá, Ba-Yígúrə́-Jə-Tiu wá pa yayɩran də càn yiri mama yí aba, ba nə wà tə yoo swɩ̀n Yɩɩ nii sagɩ kʋ tə wa, tə kori tə cʋ̀gʋ̀ aba tə zwɛ̀. 62 Á yɩn lɩ̀à kapʋpʋ ndə lanworu kacɩlacɛɛ nə, yá á wá mun, á ga lɩ̀à mancɩn, á nə wà Ba-Yígúrə́-Jə-Tiu, á tíú Yɩɩ nii zìlí yɩrɩ. 63 Nətʋ tə kʋ yà nə ywán də Ba-Yígúrə́-Jə-Tiu, sə ʋ fwa zəni á yɩra, ʋ ga pa á pùlì zənzən, mə nətʋ nə kʋ wá ya ywánɩ́ də wá, sə ʋ cʋ̀gʋ̀ aba, ʋ pa á jɛ́n mɩ́ámɩ́án. Mə nətʋ nə ʋ wá mùrí aba tɩa tə wa, á nə wá jon á tɩnɩ. 64 Ba-Yígúrə́-Jə-Tiu wá laga aba ʋ kə lʋʋ dwíə́ tə mama wa, kʋ nə zɩgɩ tɩa tə nii don nə, kʋ va kʋ nan ka nii don nə. Yá á wá pa dun yɩa duən nə lá nə, á mʋ̀ də á nyɩna-ba nə wà yəni, tə nə yɩ dàʋ̀ də kapan. 65 Á bá ja sìə́ dwíə́ nəkaran* təntə wa, yá á bá na yazurə bwálɩ́, á nɩŋa á nɛɛ lá. Ba-Yígúrə́-Jə-Tiu wá kə twárá á bɩcan wa, á yɩ́á wá bwànɩ̀, á jə̀rə́ ga gwàrɩ̀. 66 Á mɩɩ tə wá ya ndə won nə, kʋ nə gwə lá, á yáá con, fən wá ja aba tɩtɩn də yɩcaʋ, yá á bá wànɩ́ á mɩɩ tə yuu wa á jələ. 67 Yìə̀n tə á nə wá na də tə tʋŋa á yɩ́á yuu wá pa á bɩcan gən də fən, yá jɩjʋ nə, á wá swɩ̀n, á wʋ́: «Tɩa yà nə yì, kʋ kʋ́kwà!» Yá tɩtɩn nə, á wá swɩ̀n, á wʋ́: «Tɩa yà nə pʋrɩ, kʋ kʋ́kwà!» 68 Ba-Yígúrə́-Jə-Tiu wá ja aba ʋ pìí ʋ va Ezwipətə lʋʋ də nɩ́á yuu bwərə, yá á dàń wá pìí á tì lʋʋ nii təntə cwəŋə tə, à yà nə swɩ̀n á con, də á kʋ́ʋ̀ bá pìí á na kʋ cwəŋə. Á wá sóní sə á yoli á tɩ̀án á dʋŋa tə yuu wa lá nə, ndə ywə́ŋə́ də tʋtʋnkanɩ nə, yá lìù mama ba aba pɩ̀à sə ʋ yə̀.

MOYIZƏ TALƖKWA SƲRAN

69 Mə nimarʋ tə sʋ̀ràn tə nə, Ba-Yígúrə́-Jə-Tiu nə pɩn nii Moyizə nə, sə ʋ tún də Yɩzərayɛlə lɩ̀à tə, Mʋabə lʋʋ nii wa, kʋ dàń súrí nimarʋ tə nə, ʋ nə dí yáá ʋ tún də ba, Ɔrɛbə paan tə də̀ń nə.