YƖZƏRAYƐLƏ LƖA FWA PUPWƏN NIMARƲ TƏ YƖRƖ
27—28
Kapana tə ba nə zɩ̀n ba zɩgɩ Ebalə paan tə yuu wa yoo
27
1 Yɩzərayɛlə lɩ̀à yáá tɩ̀án tə kwé Moyizə, yá ʋ dàń pɩn nii kʋ tə lalʋʋ tə nə, ʋ wʋ́: «Á zìlə́ yìə̀n tə mama à nə pɩn aba nii tə yuu wa zə̀n kʋ tə. 2 Dɩɩn tə á nə wá bɩn Zʋrədɛn mʋnaa tə, á nan á zʋ lʋʋ nii tə wa Ba-Yígúrə́-Jə-Tiu, á tíú Yɩɩ nə pɩn aba, á wá zɩ̀n kapana nəfaran, á zɩgɩ yɩɩ nə, á ga pɩ̀rɩ̀ tə yɩra də pɩra. 3 Á wá pʋ́pʋ́nɩ́ Yɩɩ nii sʋ̀ràn tə tə mama kapana təntə yuu wa, máŋá tə wa á nə wá galɩ á zʋ lʋʋ nii tə wa Ba-Yígúrə́-Jə-Tiu, á tíú Yɩɩ nə pɩn aba, kʋ nə yɩ lʋʋ nii nayɩla də tʋ̀ràn nə súə́ lá, tə pàlɩ̀, ndə Ba-Yígúrə́-Jə-Tiu, á nyɩna-ba Yɩɩ nə swɩ̀n kʋ á con nətʋ. 4 Máŋá tə á nə bɩn Zʋrədɛn mʋnaa tə, á wá zɩ̀n kapana təntə, à zə̀n nə pɩn aba nii sə á zɩ̀n, á zɩgɩ yɩɩ nə, Ebalə paan tə yuu wa, á ga pɩ̀rɩ̀ tə yɩra də pɩra. 5 Á wá ja kapana, ba nə wà lugu ma sà tə, á ma lwà Yɩɩ joŋi bwálɩ́* lá nə, á pa Ba-Yígúrə́-Jə-Tiu, á tíú Yɩɩ nə. 6 Á wá lwà Ba-Yígúrə́-Jə-Tiu, á tíú Yɩɩ joŋi bwálɩ́ tə də kapana tə nə wà sè. Á wá fwa jwəŋə tə ba nə sʋ̀rɩ́*, Yɩɩ joŋi bwálɩ́ təntə yuu wa, á pa Ba-Yígúrə́-Jə-Tiu, á tíú Yɩɩ nə. 7 Á wá fwa nimarʋ jwəŋə* də. Yá á dàń wá də́, á ga wá fwa pupwən lá nə, Ba-Yígúrə́-Jə-Tiu, á tíú Yɩɩ yáá con. 8 Á wá bɩ̀rɩ̀ Yɩɩ nii sʋ̀ràn tə tə mama, á tún kapana təntə yuu wa zəni.»9 Levi dwíí Yɩɩ joŋwana tə kwé Moyizə, yá ʋ dàń swɩ̀n Yɩzərayɛlə lɩ̀à tə mama con, ʋ wʋ́: «Á cʋga sííí! Zə̀n kʋ tə, á jìgə̀ Ba-Yígúrə́-Jə-Tiu, á tíú Yɩɩ lɩ̀à. 10 Á mɛ sə á zìlí Ba-Yígúrə́-Jə-Tiu, á tíú Yɩɩ nii, á ga twá ʋ yìə̀n tə nə, ʋ nə pɩn nii tə yuu wa, də ʋ yìə̀n tə ʋ nə pɩn tə pʋ́pʋ́nɩ́ tə tún, ndə à nə tún tə à pa aba zə̀n nətʋ.» 11 Kʋ dɩɩn tə tətə nə, Moyizə pɩn nii kʋ tə lalʋʋ tə nə, ʋ wʋ́: 12 «Máŋá tə á nə bɩn Zʋrədɛn mʋnaa tə, Simeyon, də Levi, də Juda, də Yɩsakarə, də Zʋzɛfə, də Bɛnzwamɛn dwíə́ tə wá zɩgɩ Garizimə paan tə yuu wa, ba lòrì sə Yɩɩ fwa zəni lalʋʋ tə yɩra. 13 Yá Ribɛn, də Gadə, də Aswɛrə, də Zabulon, də Dan, də Nɛfətali dwíə́ tə wá zɩgɩ Ebalə paan tə yuu wa, ba zɩrɩ zɩra.»
Zɩra fugə də bələ tə yoo
14 Levi dwíí tə wá bòrì ba swɩ̀n Yɩzərayɛlə lɩ̀à tə mama con, ba wʋ́:
15 «Yɩɩ wá cʋ̀gʋ̀ lìù tə mama, ʋ nə wá nyɩan lugu, ʋ ma fwa won nyɩnyɩga, nə à yə̀ə́ woŋwanʋ, ʋ səgə bwálɩ́ nə! Cɩnayarʋ jɩɩn tʋtʋŋɩ won təntə yɩ yobalwarʋ kʋ pa Ba-Yígúrə́-Jə-Tiu nə. Yá lalʋʋ tə mama wá le, ba wʋ́: «Amɩɩna!»
16 «Yɩɩ wá cʋ̀gʋ̀ lìù tə nə fʋfʋlɩ ʋ nyɩna də ʋ nuu!» Yá lalʋʋ tə mama wá le, ba wʋ́: «Amɩna!»
17 «Yɩɩ wá cʋ̀gʋ̀ lìù tə nə fwarɩ ʋ jəndon sɩswɩan!» Yá lalʋʋ tə mama wá le, ba wʋ́: «Amɩna!»
18 «Yɩɩ wá cʋ̀gʋ̀ lìù tə nə gɩgarɩ liliu, ʋ pa ʋ dwá cwəŋə!» Yá lalʋʋ tə mama wá swɩ̀n, ba wʋ́: «Amɩna!»
19 «Yɩɩ wá cʋ̀gʋ̀ lìù tə nə lwànɩ́ cɩ́gá cwəŋə twajənu, də bitarʋ, də kadənu con!» Yá lalʋʋ tə mama wá swɩ̀n, ba wʋ́: «Amɩna!»
20 «Yɩɩ wá cʋ̀gʋ̀ lìù tə nə pə̀ń də ʋ nyɩna kan. Cɩ́gá, kʋ yɩ ʋ nyɩna tə cavɩra!» Yá lalʋʋ tə mama wá swɩ̀n, ba wʋ́: «Amɩna!»
21 «Yɩɩ wá cʋ̀gʋ̀ lìù tə nə dɩ̀gà vànɩ́ yiri mama nə!» Yá lalʋʋ tə mama wá swɩ̀n, ba wʋ́: «Amɩna!»
22 «Yɩɩ wá cʋ̀gʋ̀ lìù tə nə pə̀ń də ʋ nakʋa, ʋ nyɩna bʋ̀á, nə à yə̀ə́ ʋ nuu bʋ̀á!» Yá lalʋʋ tə mama wá swɩ̀n, ba wʋ́: «Amɩna!»
23 «Yɩɩ wá cʋ̀gʋ̀ lìù tə nə pə̀ń də ʋ tɩnkan!» Yá lalʋʋ tə mama wá swɩ̀n, ba wʋ́: «Amɩna!»
24 «Yɩɩ wá cʋ̀gʋ̀ lìù tə nə səgə ʋ mà ʋ don!» Yá lalʋʋ tə mama wá swɩ̀n, ba wʋ́: «Amɩna!»
25 «Yɩɩ wá cʋ̀gʋ̀ lìù tə nə jon vwiŋə, sə ʋ ga mà lìù tə nə wà yoo cʋ̀gʋ̀, ʋ gʋ!» Yá lalʋʋ tə mama wá swɩ̀n, ba wʋ́: «Amɩna!»
26 «Yɩɩ wá cʋ̀gʋ̀ lìù tə mama nə ba Yɩɩ nii sʋ̀ràn tə tə nii zìlí, sə ʋ twá tə nə!» Yá lalʋʋ tə mama wá swɩ̀n, ba wʋ́: «Amɩna!»