Kárá təntən wobɩa ka pa Yɩɩ nə yoo
26
1 Máŋá tə á nə zʋa lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba, sə kʋ ya á tori, máŋá tə á nə jon kʋ á tɩnɩ, á wulə kʋ wa, 2 á lìù mama wá lɩ tɩa tə wiən mama təntən lənə, ʋ nə wá tʋn ʋ na lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba. Ʋ wá kə tə fɩyaa wa, ʋ ja va bwálɩ́ tə wa Ba-Yígúrə́-Jə-Tiu, á tíú Yɩɩ nə wá kúrí, sə ʋ pa ʋ yɩrɩ tə ya lá. 3 Ʋ wá va ʋ swɩ̀n Yɩɩ joŋwanʋ tə con, ʋ nə wulə tʋ̀tʋ̀nán wa kʋ máŋá tə wa, ʋ wʋ́: «Zə̀n kʋ tə, à swɩ̀n Ba-Yígúrə́-Jə-Tiu, n tíú Yɩɩ con, də à zʋa lʋʋ nii tə wa, Ba-Yígúrə́-Jə-Tiu nə dùə̀ ʋ ma swɩ̀n nə nyɩna ba con, də ʋ wá pa kʋ nəba.» 4 Yɩɩ joŋwanʋ tə wá jon fɩyaa tə ʋ jɩɩn wa, ʋ tún Ba-Yígúrə́-Jə-Tiu, á tíú Yɩɩ joŋi bwálɩ́ tə yáá con. 5 Kʋ tíú kʋ́ʋ̀ wá swɩ̀n sʋ̀ràn tə tə Ba-Yígúrə́-Jə-Tiu, á tíú Yɩɩ yáá con, ʋ wʋ́:«À nyɩna yà yɩ Aramə tíú, ʋ twá lá ʋ ywaŋa. Ʋ vəli Ezwipətə lʋʋ nii wa də ʋ kwa lɩ̀à mancɩn, ʋ twá ʋ jə̀ə́ lá. Yá lá nə, ʋ jìgə̀ dwíí nəfarʋ, kʋ nə jə dɩ̀àn, kʋ ga dáá. 6 Ezwipətə tɩ̀án fɩfɩn nəba, ba fʋfʋlɩ nəba, ba ga kalɩ nəba ba kə yontʋtʋnan wa. 7 Nə bubwi nə kə Ba-Yígúrə́-Jə-Tiu nə, ʋ nə yɩ nə nyɩna-ba Yɩɩ. Ba-Yígúrə́-Jə-Tiu nì nə kori, ʋ ga na nə yinəgə tə, də nə càn tə, də fɩfɩan tə ba nə fɩfɩn nəba. 8 Yá Ba-Yígúrə́-Jə-Tiu lɩ nəba Ezwipətə lʋʋ nii tə wa də ʋ jɩɩn dɩ̀àn, də ʋ vagoo, kʋ twá də yofaran tə nə jə fən, də dɩ̀àn mɩmɩnan, də yogwaran. 9 Ʋ ja nəba ʋ bà bwálɩ́ kʋ tə wa, yá ʋ pɩn nəba lʋʋ nii kʋ tə, kʋ nə yɩ lʋʋ nii nayɩla də tʋ̀ràn nə súə́ lá, tə pàlɩ̀. 10 Sɩ́ʋ́n nə, Ba-Yígúrə́-Jə-Tiu, nə̀ń à ja tɩa tə n nə pɩn nə, təntən lənə à bà, sə à pa mʋ́!»
Lìù təntə wá tún tə Ba-Yígúrə́-Jə-Tiu, á tíú Yɩɩ yáá con, ʋ ga tʋ ʋ nadwana yuu Ba-Yígúrə́-Jə-Tiu, á tíú Yɩɩ yáá con, ʋ pa wá dun. 11 Kʋ kwa nə, á dàń wá fwa pupwən, á mʋ̀ də Levi dwíí lìù tə, də vee tə nə twá ʋ jə̀ə́ á con, ba nə wulə á titəŋi wa, jɩjə wiən tə mama yɩrɩ Ba-Yígúrə́-Jə-Tiu, á tíú Yɩɩ nə pɩn á də á dìə̀ lɩ̀à nə.
Batwa nii bɩnɩ fugə nii nyiən lɩʋ yoo
12 Batwa nii bɩnɩ mama yɩ fugə nii nyiən lɩʋ bɩnɩ. Máŋá tə á nə lɩ á wiən mama fugə nii nyiən, á wá pa tə Levi dwíí tə nə, də vee tə nə, ʋ nə twá ʋ jə̀ə́, də bitarʋ nə, də kadənu nə, yá ba wá də́ tə ba sú, á tɩan tə wa. 13 Á wá swɩ̀n Ba-Yígúrə́-Jə-Tiu, á tíú Yɩɩ yáá con, á wʋ́: «À lɩ kʋ tə nə yɩ n tori à dìə̀ wa, yá à pɩn kʋ Levi dwíí tə nə, də vee tə nə, ʋ nə twá ʋ jə̀ə́, də bitarʋ nə, də kadənu nə, kʋ twá n yìə̀n tə mama nə, n nə pɩn nii tə yuu wa*, n nə tún n pa nə, sə à twá nə. À wà n yìə̀n tə n nə pɩn nii tə yuu wa, nədʋ tə tə nə dwɛ́, à wà tə nədʋ mama nə swɛ̀ɛ́. 14 À wà won mama dí tə wa, máŋá tə wa à nə wulə lúə́ pucʋnɩ wa, à wà won mama yɩra jɩn tə wa, máŋá tə wa à nə zʋa durən yìə̀n wa, yá à wà won mama lɩ tə wa, à pa tɩgɩ nə. À zìlí Ba-Yígúrə́-Jə-Tiu, à tíú Yɩɩ nii, à twá yìə̀n tə mama nii nə, n nə bɩrɩ nə sə à tʋn. 15 N dàń jə̀ń lanworu tə wa, n wúlú bwálɩ́ tə wa, kʋ nə yɩ parɩ, n guni n ywàń, n ga fwa zəni Yɩzərayɛlə lɩ̀à tə yɩra, ba nə yɩ n mʋ̀ lalʋʋ, də tɩa tə yɩra n nə pɩn nəba, ndə n nə dùə̀ n ma swɩ̀n kʋ nə nyɩna-ba con, də kʋ yɩ lʋʋ nii nayɩla də tʋ̀ràn nə súə́ lá, tə pàlɩ̀.»
Yɩzərayɛlə lɩ̀à yɩ Ba-Yígúrə́-Jə-Tiu lalʋʋ
16 Zə̀n kʋ tə, Ba-Yígúrə́-Jə-Tiu, á tíú Yɩɩ pɩn aba nii, sə á tʋn yoo mama, kʋ twá yìə̀n tə tə nə, ʋ nə pɩn tə pʋ́pʋ́nɩ́ tə tún, də coŋi tə tə nə. Á mɛ sə zìlí tə nii, á ga tʋn yoo mama, kʋ twá tə nə, də á bɩcan mama, də á jə̀rə́ mama. 17 Zə̀n kʋ tə, á pɩn Ba-Yígúrə́-Jə-Tiu kàn nii, də ʋ wá ya á Yɩɩ, yá á sɛ̀ sə á twá ʋ coŋi tə nə, sə á zìlí ʋ yìə̀n tə nii, ʋ nə pɩn tə pʋ́pʋ́nɩ́ tə tún, də tə tə ʋ nə pɩn nii tə yuu wa, də tə tə ʋ nə bɩrɩ sə tə tʋn, sə á ga cʋgʋ ʋ sʋgʋ. 18 Zə̀n kʋ tə, Ba-Yígúrə́-Jə-Tiu, á tíú Yɩɩ pɩn á kàn nii, də á wá ya ʋ lalʋʋ, ʋ mʋ̀ cɩcɩ nə tɩ aba, ndə ʋ nə swɩ̀n kʋ á con nətʋ, yá á sɛ̀ sə á zìlí ʋ yìə̀n tə mama nii, ʋ nə pɩn nii tə yuu wa, 19 sə kʋ pa ʋ zɩ̀n aba ʋ kə dun bwálɩ́ nə, baan baan, ʋ ga pa á yɩrɩ nan, yá á ja fɩra á doni dwíə́ nəkaran* tə mama, ʋ nə fwa, sə á ga ya lalʋʋ kʋ nə yɩ parɩ, á pa Ba-Yígúrə́-Jə-Tiu, á tíú Yɩɩ nə, ndə ʋ nə swɩ̀n kʋ á con nətʋ.