Nətʋ tə ba nə bʋ̀rɩ̀ bʋra, kʋ twá cɩ́gá cwəŋə nə
25
1 Vaŋʋ nə wulə lɩ̀à bələ pwə́rə́ wa, yá ba ja kʋ ba bà bʋra bwálɩ́ nə, ba wá pa cɩ́gá lìù tə nə, ʋ nə jə cɩ́gá, ba ga pa kʋn lìù tə nə, ʋ nə ba cɩ́gá jə. 2 Kʋ nə mɛ sə ba mà lìù tə nə ba cɩ́gá jə tə, lìù tə nə bʋ̀rɩ̀ bʋra tə wá pa ʋ pə̀ń tɩa, ʋ ga pa ba mà wá ʋ yáá con, nɛɛ tə nii kʋ nə mɛ də yoo tə ʋ nə cʋ̀gʋ̀. 3 Ʋ bá pa ba mà wá kʋ kɛ̀ń tanpɩrɩ yíə́ sapwɩlə. Cɩ́gá, ba nə mà á nubiu tə kʋ doni nətʋ, ʋ wá kwɩ̀n ʋ dun nə, á yáá con.Naʋ yoo
4 Á wà mɛ sə á vwa naʋ nii nə, máŋá tə wa, á nə ja kʋ, á ma nɩŋɩ mɩna.
Nii tə nə pɩn kadənu ka tì yuu wa
5 Nubɩa nə wulə duən nə, ba lìù don nə tɩga də ʋ wà bìú lɩrɩ, ʋ kadənu tə wà mɛ sə ʋ nan, ʋ swe kàrá con bɛɛ nə. Ʋ barɩ tə nyánʋ́ wá tì kadənu tə, ʋ ma fwa ʋ kan. Ʋ jə cwəŋə sə ʋ tʋn kʋ nətʋ tə, ʋ nə yɩ ʋ barɩ nyánʋ́ yɩrɩ. 6 Kan tə cárɩ́ bìú tə ʋ nə wá lɩra, yɩ bɛɛ tə nə tə̀lə́ tə yɩrɩ nə ba wá dɩ ba pa wá. Kʋ nətʋ wá pa ʋ yɩrɩ bá jɛ́n Yɩzərayɛlə wa.
7 Bɛɛ təntə nə ba pɩ̀à sə ʋ tì ʋ nubiu tə kadənu tə, ʋ ma fwa ʋ kan, kan tə wá va ʋ na tɩʋ tɩ̀án tə, tɩʋ tə mimii nə, ʋ swɩ̀n ba con, ʋ wʋ́: «À barɩ nubiu vɩga sə ʋ tún dwíí ʋ pa ʋ nubiu tə nə, ʋ nə tə̀lə́, sə ba ma bon ʋ yɩrɩ Yɩzərayɛlə wa. Ʋ ba pɩ̀à sə ʋ tì nə, ʋ ma fwa ʋ kadənkan, ndə à barɩ nubiu nə.» 8 Tɩʋ tɩ̀án tə wá bon bɛɛ tə, ba swɩ̀n ʋ con. Bɛɛ tə tə nə vɩga, ʋ nə swɩ̀n, ʋ wʋ́: «À ba wá pɩ̀à sə à ma fwa à kadənkan», 9 kan tə wá fwarɩ ʋ yí ʋ barɩ nubiu tə yɩra, tɩʋ tɩ̀án tə yáá con, ʋ lɩ bɛɛ tə natɩrɩ ʋ naa nə, ʋ ga pìì mɩmɩan ʋ lwá ʋ yáá wa, ʋ ga swɩ̀n, ʋ wʋ́: «Mə nətən nə ba tʋŋa bɛɛ tə yɩra, ʋ nə vɩ sə ʋ lwà ʋ nubiu dìə̀.» 10 Yá ba dàń wá dɩ bɛɛ təntə dìə̀ yɩrɩ Yɩzərayɛlə wa, ba wʋ́: «Lìù tə ba nə lɩ ʋ natɩrɩ dìə̀.»
Mà yiri tə nə culi jara wa
11 Bara bələ nə jə duən, ba ʋ don kan nə yí lá, sə ʋ jon ʋ barɩ tə bɛɛ tə don tə jɩɩn wa, ʋ nə wulə wá ʋ mà, kan tə nə te ʋ jɩɩn ʋ ma ja ʋ barɩ jarɩdon tə bárɩ́ nə, 12 á mɛ sə á goŋə kan tə jɩɩn tə, á wà mɛ sə á dəri ʋ yinəgə.
Ka ya təgətəgə yolu wa
13 Á wà mɛ sə á ja səkəri bɩ̀á yirə bələ á lɔɔ wa, nəfarʋ də nəmaa. 14 Á wà mɛ sə á ja maŋʋ tii* yirə bələ á dìə̀ wa, nəfarʋ də nəmaa. 15 Á mɛ sə á ja səkəri bìú kʋ dun nə tʋa kʋ mɛ, də maŋʋ tiə ka dánɩ́ nə tʋa kʋ mɛ, sə kʋ pa á mɩɩ ya danɩ lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba. 16 Cɩ́gá, Ba-Yígúrə́-Jə-Tiu, á tíú Yɩɩ culi lìù tə mama, ʋ nə tʋŋa yìə̀n təntə yiri. Ʋ culi lìù tə mama, ʋ nə tʋŋa gɩgɩrɩyiən.
Amalɛkə dwíí tə yɩ Yɩzərayɛlə lɩ̀à dʋŋa máŋá mama wuuu
17 Á lìə́ á tɩ̀àn kʋ tə Amalɛkə dwíí tə nə tʋn á yɩra cwəŋə wa, máŋá tə á nə nan Ezwipətə lʋʋ nii wa. 18 Nətʋ tə ba nə jəri aba cwəŋə wa, ba ta á kwa con nəcɩra tə, ba mʋ̀ lɩ̀à tə mama yà nə gwàrɩ̀ ba wulə kwa, máŋá tə wa á nə gwàrɩ̀ mɩ́ámɩ́án. Yá ba tʋn kʋ nətʋ á yɩra, ba nə ba Yɩɩ fən dəri yɩrɩ. 19 Máŋá tə wa Ba-Yígúrə́-Jə-Tiu, á tíú Yɩɩ nə jon aba á dʋŋa tə mama jɩɩn wa, ba nə kɩkarɩ aba, ʋ ga pa aba sìə́ lʋʋ nii tə wa, ʋ nə pɩn aba sə kʋ ya á tori, á jon á tɩnɩ, á wá pa Amalɛkə dwíí tə jɛ́n tɩa yuu wa mɩ́ámɩ́án, sə lìù mama dàn ká pìí ʋ bon ba yɩrɩ: Á dànà ká swɛ̀ɛ́ kʋ nətʋ tə.