Kan tə ʋ barɩ nə dʋgʋ wá yoo
24
1 Bɛɛ nə swe kan, yá ʋ bà ʋ kʋ́ʋ̀ ba wá swə, ʋ nə nɩ won kan tə yɩra, kʋ nə wà mɛ yɩrɩ, ʋ wàá sagɩ ʋ pʋ́pʋ́nɩ́ ʋ pɩn wá, ʋ ma dʋga wá. Yá ʋ nə pɩn wá sagɩ tə kwa nə, ʋ dàń wàá wá ʋ dɩŋɩ ʋ lɩ ʋ dìə̀ wa. 2 Ʋ wá nan bɛɛ tə dìə̀ wa, ʋ vìí, yá ʋ wàá bɛɛ don kan ʋ jì. 3 Bɛɛ təntə də nə twi ʋ ba wá swə, ʋ nə pʋ́pʋ́nɩ́ sagɩ ʋ pa wá, ʋ ma dʋgʋ wá, ʋ nə pɩn wá sagɩ tə kwa nə, ʋ nə dɩŋa wá ʋ lɩ ʋ dìə̀ wa, nə à yə̀ə́ bɛɛ tə nə tì wá ʋ ma fwa ʋ kan tə nə yɩ ʋ tɩga, 4 ʋ təntən barɩ tə yà nə dʋgʋ wá tə kʋ́ʋ̀ wàrɩ̀ wá ʋ pìí ʋ tì ʋ ma fwa ʋ kan, kan tə nə jìgə̀ durən lìù yɩrɩ. Cɩ́gá, kʋ yɩ yobalwarʋ Ba-Yígúrə́-Jə-Tiu yáá con. Á wà mɛ sə á kə cʋna lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba, sə kʋ ya á tori.Balandʋra tə nə yɩ kana bana
5 Bɛɛ nə swe kan dʋra, ʋ wà mɛ sə ʋ ya kwatara púlí wa, yá ba wà mɛ sə ba ja tʋtʋŋɩ mama ba ma zɩn wá. Ʋ wá tɩnɩ ʋ tɩ̀àn bɩnɩ, sə ʋ wànɩ́ ʋ ywàń ʋ dìə̀ yuu, ʋ ga poli kan tə pùə́ ʋ nə swe.
Talɩma wiən yoo
6 Kʋ wà mɛ sə ba jon lìù nʋŋʋ, nə à yə̀ə́ nʋnbəni ba tún talɩma. Cɩ́gá, kʋ yɩ ndə ba nə jon kʋ tíú mɩɩ tətə ba tún talɩma.
Ləzwənə ŋwɩʋn yoo
7 Á nə nɩ lìù də ʋ ŋʋan ʋ nubidon, Yɩzərayɛlə lɩ̀à tə wa, ʋ ma fwa yoŋu, nə à yə̀ə́ ʋ yoli, ŋwɩ̀àn təntə mɛ sə ba gʋ wá. Mə nətʋ nə á wá kwɛn kʋ tə nə lwara, á lɩ á titəŋi wa.
Dayaan yoo
8 Á cɩa à tɩ̀àn nə də dayaan yoo, sə á ga zuri á yɩra á tʋn kʋ tə mama Levi dwíí Yɩɩ joŋwana tə nə wá bɩrɩ aba, sə á tʋn. Á wá zuri á yɩra á tʋn yoo mama, kʋ twá ndə nətʋ tə nə, à nə bɩrɩ ba. 9 Á lìə́ á tɩ̀àn kʋ tə Ba-Yígúrə́-Jə-Tiu, á tíú Yɩɩ nə ma tʋn Miriyamə cwəŋə wa, máŋá tə wa á nə nan Ezwipətə lʋʋ nii wa.
Talɩma wiən duən yoo
10 Á jəndon nə jɩŋɩ won á lìù don con, jɩŋɩ tə tíú ba cwəŋə jə sə ʋ zʋ jɩjɩŋʋ tə dìə̀ wa, ʋ tì won ʋ tún talɩma, jɩŋɩ tə yɩrɩ. 11 Jɩŋɩ tə tíú wá zɩgɩ kàrá wa, yá jɩjɩŋʋ tə dàń wá ja talɩma won tə ʋ nan ʋ pa wá kàrá wa. 12 Jɩjɩŋʋ tə nə yɩ zʋrʋ, jɩŋɩ tə tíú wà mɛ sə ʋ pa talɩma won tə jʋ ʋ con. 13 Jɩŋɩ tə tíú mɛ sə ʋ pìí ʋ pa talɩma won tə jɩjɩŋʋ tə nə, yɩɩ zʋrɩ máŋá wa. Kʋ nətʋ wá pa ʋ wànɩ́ ʋ pə̀ń ʋ gansara də̀ń, ʋ ga lòrì sə Yɩɩ fwa zəni jɩŋɩ tə tíú yɩra, yá kʋ nətʋ wá ya cɩ́gá cwəŋə tʋtʋŋɩ kʋ pa jɩŋɩ tə tíú nə, Ba-Yígúrə́-Jə-Tiu, á tíú Yɩɩ yáá con.
Ka ja zìlə́ ka pa zʋra nə yoo
14 Á dànà ká fɩfɩn tʋtʋnʋ tə nə tʋŋa sə ʋ jon ŋwɩ́rán, ʋ nə swə ʋ yɩ zʋrʋ nə à yə̀ə́ lalaŋʋ, ʋ nə yɩ á nubɩa tə wa lìù, nə à yə̀ə́ ʋ nə yɩ vərə tə nə twá ba jə̀ə́ á lʋʋ nii tə tɩan tə wa lìù don. 15 Á mɛ sə á ŋwɩ́n ʋ yɩtʋrɩ tʋtʋŋɩ ŋwɩ́rán á pa wá, də yɩɩ tə wà zwɩ. Cɩ́gá, ʋ yɩ zʋrʋ, yá ʋ pɩ̀à ʋ ŋwɩ́rán tə lala. Kʋ nə tà kʋ mʋ̀, ʋ nə bon ʋ kə Ba-Yígúrə́-Jə-Tiu nə kʋ yɩrɩ, kʋ wá ya lwanɩ á yuu wa.
Lìù mama tɩ ʋ tətə cʋna yɩrɩ
16 Kʋ wà mɛ sə ba gʋ nyɩna, ba bɩ̀á cʋna yɩrɩ, kʋ ga wà mɛ sə ba gʋ bɩ̀á də, ba nyɩna-ba cʋna yɩrɩ. Yá kʋ dàń nə mɛ sə ba gʋ lìù mama, ʋ tətə cʋna yɩrɩ.
Kʋ tə ba nə mɛ sə ba tʋn ba pa zʋra nə
17 Á wà mɛ sə á viviri cɩ́gá á jon vee con, nə à yə̀ə́ bitarʋ con, bʋra bwálɩ́ nə, yá á wà mɛ sə á jon kadənu gansara á tʋn talɩma. 18 Á lìə́ á tɩ̀àn də á yɩn ywə́ŋə́ Ezwipətə lʋʋ nii wa, yá Ba-Yígúrə́-Jə-Tiu, á tíú Yɩɩ jon aba, ʋ pa á tɩ á tɩ̀àn. Kʋ mʋ̀ nə pɩn à pɩn aba nii sə á tʋn nətʋ.
19 Máŋá tə á nə cə á kárɩ́ wiən, á nə swɛ̀ɛ́ mɩguguni nə kárá tə wa, á wà mɛ sə á pìí á va á tì kʋ. Á wá yá kʋ á pa vee tə nə, ʋ nə twá ʋ jə̀ə́ á con, də bitarʋ də kadənu nə. Kʋ nətʋ wá pa Ba-Yígúrə́-Jə-Tiu, á tíú Yɩɩ fwa zəni á yɩra, á jɩɩn tʋtʋŋɩ mama wa. 20 Máŋá tə á nə pʋ̀rɩ́ á olivə tɩ̀án lənə, á wà mɛ sə á pìí á va á gun tə tə nə wá ga tɩ̀án tə yuu wa. Á wá yá tə á pa vee tə nə, ʋ nə twá ʋ jə̀ə́ á con, də bitarʋ də kadənu nə. 21 Máŋá tə á nə pʋ̀rɩ́ á divɛn tɩ̀án lənə, á wà mɛ sə á pìí á va á gun tə tə nə ga tɩ̀án tə yuu wa. Á wá yá tə á pa vee tə nə, ʋ nə twá ʋ jə̀ə́ á con, də bitarʋ də kadənu nə. 22 Á lìə́ á tɩ̀àn də á yɩn ywə́ŋə́ Ezwipətə lʋʋ nii wa, kʋ mʋ̀ nə pɩn à pɩn aba nii sə á tʋn nətʋ.