23
1 Lìù mama wà mɛ sə ʋ pə̀ń ʋ nyɩna kan. Lìù nə tʋn kʋ, kʋ yɩ cʋna ʋ tʋn ʋ zɩgɩ ʋ nyɩna tə nə.Lɩ̀à tə nə wàrɩ̀ Ba-Yígúrə́-Jə-Tiu púlí tə wa ba yanɩ
2 Lìù tə ʋ mancabɩa nə lwa, nə à yə̀ə́ ba nə goŋi ʋ bárɩ́ ba lɩ, wàrɩ̀ Ba-Yígúrə́-Jə-Tiu púlí tə wa ʋ yanɩ.
3 Tənpiri wàrɩ̀ Ba-Yígúrə́-Jə-Tiu púlí tə wa ʋ yanɩ. Ʋ dwíí dəkurən fugə nii nyiən də tətə wàrɩ̀ Ba-Yígúrə́-Jə-Tiu púlí tə wa ba yanɩ.
4 Amon də Mʋabə dwíə́ tə wàrɩ̀ Ba-Yígúrə́-Jə-Tiu púlí tə wa ba yanɩ. Ba dwíə́ dəkurən fugə nii nyiən də tətə wàrɩ̀ Ba-Yígúrə́-Jə-Tiu púlí tə wa ba yanɩ. Mə kʋ wá ya nətʋ máŋá mama wuuu. 5 Cɩ́gá, dwíə́ təntə wà wodiu də nɩ́á ja nan ba jəri aba cwəŋə wa, máŋá tə wa á nə nan Ezwipətə lʋʋ nii wa. Yá ba vwin Bewɔrə bìú Balaamə, ʋ nə yɩ Petɔrə tíú, kʋ nə wulə Aramə lʋʋ nii wa, sə ʋ zɩrɩ ʋ kə á nə. 6 Yá Ba-Yígúrə́-Jə-Tiu, á tíú Yɩɩ wà sɛ̀ ʋ cʋgʋ Balaamə sʋgʋ. Ba-Yígúrə́-Jə-Tiu, á tíú Yɩɩ lwàń zɩra tə ʋ pa ka jì zəni ka pa aba, Ba-Yígúrə́-Jə-Tiu, á tíú Yɩɩ yà nə swə aba yɩrɩ. 7 Á dànà ká sóní sə ba ya sìə́ wa, nə à yə̀ə́ sə ba nì ba ywánɩ́, máŋá tə mama á mɩɩ nə wá ya lʋʋ wa.
8 Á dànà ká culi Edomə tɩ̀án: Cɩ́gá, ba yɩ á nubɩa. Á dànà ká culi Ezwipətə tɩ̀án: Cɩ́gá, á yɩn vərə á twá á jə̀ń ba lʋʋ nii wa. 9 Dwíə́ təntə bɩ̀á tə ba nə wá lɩra, dwíí dəkurən batwa nii nyiən wàá Ba-Yígúrə́-Jə-Tiu púlí tə wa ba yanɩ.
Dəkuu bwálɩ́ tə wà mɛ sə kʋ ja durən
10 Máŋá tə á nə vəli sə á ta kʋ̀ʋ̀ də á dʋŋa, sə á cɩ̀ á tɩ̀àn nə də won tə mama nə lwara. 11 Bɛɛ nə wulə á wa, ʋ bafɩan nə pàlɩ̀ tɩtɩn nə, kʋ pa ʋ jì durən lìù, ʋ mɛ sə ʋ nan dəkuu bwálɩ́ tə wa, yá ʋ wà mɛ sə ʋ pìí ʋ zʋ lá, kʋ yɩtʋrɩ tə mama. 12 Didəni nii nə, ʋ wá swɛ nɩ́á, yá yɩɩ nə zʋa máŋá tə wa, ʋ dàń wàá dəkuu bwálɩ́ tə wa ʋ pìí ʋ zwɩ.
13 Á wá lɩ bwálɩ́ dəkuu bwálɩ́ tə kwa con, á vəli lá á jəni kaduə yuu, də á fɩ fɩan. 14 Á lìù mama mɛ sə ʋ ja vata ʋ yɩra. Máŋá tə á nə vəli sə á jə̀ń kaduə yuu, á wá ja ka á ma kʋ̀ gwàlʋ́, yá á nə jə̀ń kaduə yuu tə á zwɛ̀, á wá pìí á ja ka á ma sun tə yuu nə. 15 Cɩ́gá, Ba-Yígúrə́-Jə-Tiu, á tíú Yɩɩ yàá jírí á dəkuu bwálɩ́ tə wa, sə ʋ ma cɩ̀ á nə, ʋ ga pa á də́ dɩ̀àn á dʋŋa yuu wa. Kʋ mʋ̀ yɩrɩ, á dəkuu bwálɩ́ tə mɛ sə kʋ ya parɩ, sə Ba-Yígúrə́-Jə-Tiu dàn ká na won lá, kʋ nə wà mɛ, sə kʋ pa ʋ pìí ʋ yá aba.
Yoŋu tə nə dəri yoo
16 Yoŋu nə dəri ʋ nan ʋ yuu-tiu con, ʋ bà ʋ kwálɩ́ ʋ yuu á con, á wà mɛ sə á ja wá á pìí á va á pa ʋ yuu-tiu tə nə. 17 Ʋ wá ya á con, á lalʋʋ tə titəŋi wa, bwálɩ́ tə wa ʋ nə wá kúrí, á tɩan tə don wa, kʋ twá də ʋ fɩra nə. Á wà mɛ sə á fɩfɩn wá.
Ka cwàrɩ̀ də woŋwanan yoo
18 Kacwarʋ wà mɛ sə ʋ ya Yɩzərayɛlə bwɩ̀ɩ́ tə wa, ʋ nə cwàrɩ̀ ʋ ma pɩn dun woŋwanan nə, yá bacwarʋ də wà mɛ sə ʋ ya Yɩzərayɛlə bɩ̀á tə wa, ʋ nə cwàrɩ̀ ʋ ma pɩn dun woŋwanan nə. 19 Á dànà ká ja zìlə́ won tə nə yɩ kacwarʋ cwàrʋ̀ kwənə, nə à yə̀ə́ bacwarʋ ŋwɩ́rán á bà Ba-Yígúrə́-Jə-Tiu, á tíú Yɩɩ dìə̀ tə wa, á ma fwa nipoli yiri mama joŋi. Cɩ́gá, tʋtʋnɛɛ təntə yɩ yobalwarlʋ Ba-Yígúrə́-Jə-Tiu, á tíú Yɩɩ yáá.
Jɩŋɩ də kʋ yuu nywarɩ yoo
20 Á nubiu nə jɩŋɩ səbiu á con, nə à yə̀ə́ wodiu, nə à yə̀ə́ won yiri tə mama lìù nə wàá ʋ jɩŋɩ, á wà mɛ sə á pa ʋ ŋwɩ́n kʋ də kʋ yuu nywarɩ. 21 Á wàá jɩŋɩ yuu nywarɩ á joŋə vee con, yá á wà mɛ sə á jon kʋ á nubiu mʋ̀ con, sə kʋ pa Ba-Yígúrə́-Jə-Tiu, á tíú Yɩɩ fwa zəni á yɩra, á tʋ̀tʋ̀nán mama wa, lʋʋ nii tə wa, á nə zwɩ sə á jon á tɩnɩ.
Nipoli yoo
22 Á nə poli nii Ba-Yígúrə́-Jə-Tiu, á tíú Yɩɩ con, á dànà ká pa kʋ dán, sə á ma tʋn kʋ, á pa kʋ nii sú. Cɩ́gá, Ba-Yígúrə́-Jə-Tiu, á tíú Yɩɩ wá bwe aba kʋ yoo, yá kʋ wá ya cʋna, á yuu wa. 23 Á nə cɩ̀gà á tɩ̀àn nə də nipoli, cʋna bá ya á yuu wa. 24 Yá á mɛ sə á twá yoo tə nii nə, kʋ nə nan á nii wa, á tʋn kʋ á pa kʋ nii sú, ndə á nə poli nii Ba-Yígúrə́-Jə-Tiu, á tíú Yɩɩ con, kʋ twá də á tətə fɩra, á ma swɩ̀n kʋ á nii wa nətʋ.
Nii tə nə pɩn jəndon tɩ̀án lənə kwiu yuu wa
25 Á nə zʋa á jəndon divɛn tɩ̀án kárá wa, á wàá divɛn tɩ̀án lənə tə á kwe á də́ á swí, ndə á nə pɩ̀à nətʋ. Yá á dàń nə ba cwəŋə jə, sə á kwa tə á kə á fɩyaa wa, á ja vìí. 26 Á nə zʋa á jəndon mɩna kárá wa, á wàá á jɩɩn á ma kɛ́n mɩndala, yá á dàń nə wà mɛ sə á ja sɩkwara á ma gan á jəndon kárá mɩna.