Nii tə nə pɩn ka san ka ywàń jəndon jɩjə wiən yuu wa
22
1 N nə nɩ n nubiu naʋ, nə à yə̀ə́ ʋ vanmɩna, də tə pɩ̀à tə jɛ́n, n wà mɛ sə n kɛ̀ń n ga yá tə. N mɛ sə n ja tə n pìí n bà, n pa n nubiu tə nə. 2 N nubiu tə sàń nə ba bwə́lə́ də n sàń, nə à yə̀ə́ n nə yəri wá, n wá ja vànɩ́ tə n con. Kʋ wá ya n con, kʋ va kʋ yí máŋá tə n nubiu tə nə wá bwe kʋ yoo, yá n dàń wá pa kʋ wá. 3 Mə nətʋ nə á wá tʋn, də á nə nɩ á nubiu bɩ̀nà, nə à yə̀ə́ ʋ gànʋ̀, nə à yə̀ə́ ʋ won yiri mama kʋ nə jɛ́n. Á wà mɛ sə á kɛ̀ń á ga yá tə.4 Á nə nɩ á nubiu bɩ̀nà, nə à yə̀ə́ ʋ naʋ də kʋ tʋa cwəŋə yuu, á wà mɛ sə á kɛ̀ń á yá wá. Á mɛ sə á san wá, á zɩ̀n kʋ.
Nii tə nə pɩn yìə̀n yirə yirə yuu wa
5 Kan wà mɛ sə ʋ zʋ bara gànàn, yá bɛɛ də wà mɛ sə ʋ zʋ kana gànàn. Cɩ́gá, kʋ yɩ yobalwarʋ kʋ pa Ba-Yígúrə́-Jə-Tiu, á tíú Yɩɩ nə, yá ʋ culi lìù tə mama nə tʋŋa kʋ nətʋ tə.
6 Á nə nɩ zunbiə pwalʋ tɩ̀ʋ́ yuu, cwəŋə nii nə, nə à yə̀ə́ tɩa, də ka và ka bɩ̀á, nə à yə̀ə́ ka càlà yuu, á wà mɛ sə á tì ka də ka bɩ̀á tə. 7 Á wá yá nuu tə, á pa ka piri ka vìí, á ga tì ka bɩ̀á tə cɩcɩ. Kʋ nətʋ wá pa á ja pupwən, á mɩɩ ga ya danɩ lʋʋ wa.
8 Á nə lwə̀ didʋn, á mɛ sə á lwà bəribiə, á ma kɩkarɩ dəyuu tə, sə jana yoo dàn ká ya á dìə̀ tə yuu wa, də lìù nə nan lá ʋ tʋ ʋ tɩ.
9 Á wà mɛ sə á dù wodwii yiri bələ á divɛn tɩ̀án kárá wa. Kʋ nə tà nətʋ, á wá tún won tə á nə dùə̀ lənə tə, də divɛn tɩ̀án tə lənə tə mama vàn nə, á pa Yɩɩ nə. 10 Á wà mɛ sə á kə naʋ də bɩ̀nà duən nə, á ma vàrà. 11 Á wà mɛ sə á zʋ gànʋ̀, ba nə gùlí bɔɔ də ganbʋa gaŋoni duən wa, ba ma sʋ̀.
12 Á wá kə ŋomɩnɩ á ganpəru nigwancɩan banɩa tə nə.
Kan yuu wa vaŋʋ
13 Bɛɛ nə swe kan, ʋ nə yəni wá, yá kʋ kwa nə, ʋ kʋ́ʋ̀ ba wá swə, 14 bɛɛ tə nə swɩ̀n ʋ bɩrɩ də kan tə yʋa ba ziən, sə ʋ ma cʋ̀gʋ̀ kan tə yɩrɩ nə, ʋ nə swɩ̀n, ʋ wʋ́: «À swe kan wá tə, à yəni wá, yá à wà mɩmɩnan nɩ ʋ con, tə nə bɩrɩ də ʋ yà yəri bɛɛ», 15 bʋ̀á tə nyɩna də ʋ nuu wá tì mɩmɩnan tə nə bɩrɩ də bʋ̀á tə yà yəri bɛɛ, ba ja bà ba bɩrɩ tɩʋ tɩ̀án tə nə, tɩ̀ʋ́ tə mimii nə. 16 Bʋ̀á tə nyɩna wá swɩ̀n tɩʋ tɩ̀án tə con, ʋ wʋ́: «À pɩn à bʋ̀á tə bɛɛ wá tə nə, sə ʋ ma fwa ʋ kan, yá ʋ kʋ́ʋ̀ ba wá swə. 17 Ʋ bɩrɩ də à bʋ̀á tə yʋa ba ziən, ʋ ga swɩ̀n də ʋ wà mɩmɩnan nɩ ʋ con, tə nə bɩrɩ də ʋ yà yəri bɛɛ! Yá á dàń nəŋə mɩmɩnan tə nə bɩrɩ də à bʋ̀á tə yà yəri bɛɛ.» Yá ba dàń wá larɩ bʋ̀á tə də bɛɛ tə kasweri təntən sapaa gansara tə də ka yɩra jana tə, tɩʋ tɩ̀án tə yáá con. 18 Tɩʋ təntə tɩʋ tɩ̀án tə dàń wá ja bɛɛ təntə, ba van ʋ zɩɩn nə. 19 Ʋ cʋ̀gʋ̀ Yɩzərayɛlə bʋ̀á yɩrɩ nə, ʋ yà nə yəri bɛɛ. Kʋ mʋ̀ yɩrɩ, ba tə wá dɩ bwaan ʋ yuu, ba pa ʋ ŋwɩ́n wárʋ́ səbilurən bii, ʋ pa bʋ̀á tə nyɩna nə. Bʋ̀á tə wá ya ʋ kan, yá ʋ ba cwəŋə jə ʋ dʋga wá, máŋá tə mama bɛɛ tə mɩɩ nə wá ya lʋʋ wa.
20 Yá də kʋ nə yɩ cɩ́gá, ba nə wà mɩmɩnan nɩ bʋ̀á tə con, tə nə bɩrɩ də ʋ yà yəri bɛɛ, 21 ba wá lɩ bʋ̀á tə ba zɩgɩ ʋ nyɩna dìə̀ mimii nə, ba pa ʋ tɩʋ lɩ̀à dɩlɩ wá də kapana ba gʋ. Ʋ mɛ sə ba gʋ wá, ʋ nə yɩn ʋ nyɩna dìə̀ wa ʋ cwarɩ, ʋ ma cʋ̀gʋ̀ culu nəfarʋ Yɩzərayɛlə wa yɩrɩ. Mə nətʋ nə á wá kwɛn kʋ tə nə lwara, á lɩ á titəŋi wa.
22 Ba nə nɩ bɛɛ də ʋ tígə́ də kan tíú, kʋ mɛ sə ba gʋ ba mɛ bələ, bɛɛ tə ʋ nə pə̀ń də kan tə, kʋ súrí də kan tə tətə. Mə nətʋ nə á wá kwɛn kʋ tə nə lwara, á lɩ Yɩzərayɛlə wa.
23 Balandʋrʋ nə càrɩ̀ kacɩɩn ʋ tə nə yəri bɛɛ sə ʋ swe, yá bɛɛ don na wá tɩʋ tə wa, ʋ pə̀ń, 24 á wá ja ba mɛ bələ á nan tɩʋ tə mimii nə, á dɩlɩ də kapana á gʋ. Á wá gʋ bʋ̀á tə, ʋ nə wà bubwi ʋ kə tɩʋ tə lɩ̀à nə, sə ba jon wá yɩrɩ. Yá á wá gʋ bɛɛ tə, ʋ nə pə̀ń ʋ jəndon kan yɩrɩ. Mə nətʋ nə á wá kwɛn kʋ tə nə lwara, á lɩ á titəŋi wa. 25 Yá kʋ dàń nə yɩ gaʋ con nə bɛɛ təntə nɩ kacɩɩn tə ʋ nə jə bwàlʋ́, yá ʋ ja wá ʋ pə̀ń, bɛɛ tə cɩcɩ nə ba wá gʋ. 26 Á wà mɛ sə á fwa kacɩɩn tə won mama. Cɩ́gá, ʋ wà yoo cʋ̀gʋ̀, kʋ nə mɛ sə ba gʋ wá kʋ yɩrɩ. Kʋ yoo təntə yɩ ndə lìù nə zàn ʋ zɩgɩ ʋ don nə, ʋ ma gʋ wá. 27 Cɩ́gá, kʋ yɩ gaʋ con nə bɛɛ tə nɩ kacɩɩn təntə. Kʋ wàá də kacɩɩn təntə ʋ nə jə bwàlʋ́ bubwi, yá lìù wà lá yɩn sə ʋ jon wá.