Tɩgɩ tə ba nə yəri lìù tə nə gʋa wá
21
1 Á nə nɩ lìù lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba, sə á tɩnɩ, də ʋ tɩga ʋ tígə́ gaʋ wa, á ga yəri lìù tə nə gʋa wá, 2 á lʋʋ nii tə yáá tɩ̀án, də á lɩ̀à tə nə bʋ̀rɩ̀ bʋra tə wá va, ba man bwálɩ́ tə tɩgɩ tə nə tígə́ tə, də tɩ̀án tə nə bwələ lá danɩ. 3 Ba nə nɩ tɩʋ tə nə bwə́lə́ də tɩgɩ tə yipaa bwálɩ́, kʋ doni tɩan tə duən tə mama, tɩʋ təntə tɩʋ tɩ̀án tə wá ja nacɩɩn, kʋ tə nə wà tʋtʋŋɩ mama tʋn, ba tə nə wà nɩan bɩan dàʋ̀ kʋ bɩan nə ken. 4 Tɩʋ təntə tɩʋ tɩ̀án tə wá ja nacɩɩn tə ba cú nacoru nii nə, kʋ nɩ́á nə bá wɩ, bwálɩ́ nə ba nə wà vàrɩ̀, ba ga wà wiən lá dwì. Yá ba dàń wá pipini nacɩɩn tə bɩan ba kɛ́n nacoru tə wa.5 Levi dwíí Yɩɩ joŋwana tə dàń wá fwarɩ ba yí tɩgɩ tə yɩra. Cɩ́gá, ba mʋ̀ nə Ba-Yígúrə́-Jə-Tiu, á tíú Yɩɩ kúrí, sə ba tʋn ba pa wá, ba ga twá də Ba-Yígúrə́-Jə-Tiu yɩrɩ tə, ba lòrì sə ʋ fwa zəni lɩ̀à yɩra, yá ba mʋ̀ nə mɛ sə ba lɩ vaŋʋ yiri mama yáá, lɩ̀à pwə́rə́ wa, kʋ súrí də ba nə mà lìù ba caŋɩ. 6 Tɩʋ təntə tɩʋ tɩ̀án tə mama, ba nə yí tɩgɩ tə yɩra, wá sɩ̀n ba jɩ̀àn ba kə nacɩɩn tə yuu wa, ba nə pipini kʋ bɩan ba kɛ́n nacoru tə wa. 7 Ba wá swɩ̀n, ba wʋ́: «Nə jɩ̀àn wà jana tə tə lwɛ́, nə yɩ́á də ma wà tə nɩ də tə lwɛ́. 8 Ba-Yígúrə́-Jə-Tiu, nə lòrì mʋ́ sə n kwɛn Yɩzərayɛlə lɩ̀à tə, ba nə yɩ n mʋ̀ lɩ̀à cʋna, n lɩ ndə ba pwə́rə́ wa. N mʋ̀ nə jon ba, n pa ba tɩ ba tɩ̀àn. Dàn ká bwe lìù tə nə wà yoo cʋ̀gʋ̀ jana yoo Yɩzərayɛlə lɩ̀à tə con, ba nə yɩ n mʋ̀ lɩ̀à.» Mə nətʋ nə Yɩɩ wá kwɛn cʋna tə nə twá də jana tə nə lwá, ʋ lɩ ba yuu wa.
9 Yá á mʋ̀ dàń wá pɛ̀ lìù tə nə wà yoo cʋ̀gʋ̀ jana tə nə lwá á lʋʋ nii tə wa, á nə mɛ sə á tʋn kʋ tə nə yɩ mənəmənə Ba-Yígúrə́-Jə-Tiu yáá con yɩrɩ.
Yonkan ba nə jɩn kʋ̀ʋ̀ wa kasweri
10 Máŋá tə á nə vəli á ta kʋ̀ʋ̀ də á dʋŋa, Ba-Yígúrə́-Jə-Tiu nə ken ba á jɩ̀àn wa, yá á ja ba duən á ma fwa ywə́ŋə́, 11 á wa lìù nə nɩ kabwaŋʋ ywə́ŋə́ tə wa, ʋ nə swə wá, yá ʋ pɩ̀à wá, sə ʋ swe, 12 ʋ wàá wá ʋ ja twi ʋ dìə̀ wa. Kan tə wá fɩna ʋ yuu, ʋ dɛrɩ ʋ jɩfʋnpʋran, 13 ʋ lɩ ʋ yoŋu gànʋ̀ tə, ʋ ga ya bɛɛ tə dìə̀ wa, ʋ kwi ʋ nyɩna də ʋ nuu nə cànà nədʋ. Kʋ kwa nə, bɛɛ tə dàń wàá sara ʋ zwɩ də kan tə, ʋ tì wá, ʋ ma fwa ʋ kan. 14 Máŋá don wa, bɛɛ tə waa nə nan kan tə, ʋ wàá wá ʋ yá, sə ʋ va bwálɩ́ tə ʋ nə swə. Bɛɛ tə wà mɛ sə ʋ yoli kan təntə ʋ jon səbiu, nə à yə̀ə́ ʋ pìí ʋ pa ʋ jí yoŋu, ʋ nə yəni wá ndə ʋ kan nə yɩrɩ.
Nii tə nə pɩn bikwɩa tori yuu wa
15 Bɛɛ nə jə kana bələ, ʋ nə swə kan tə don ʋ doni ʋ don, yá ʋ də kana bələ tə mɛ jə bibara, ʋ bikwɩa tə nə yɩ kan tə ʋ nə bá swə tə nə lɩrɩ, 16 dɩɩn tə ʋ nə pɩ̀à ʋ tara ʋ jɩjə wiən ʋ pa ʋ bɩ̀á tə nə, ʋ wà mɛ sə ʋ pa bikwɩa tori tə ʋ kaswənə tə bìú nə, ʋ ga yá ʋ bikwɩa tə, ʋ nə yɩ kan tə ʋ nə bá swə nə lɩrɩ yɩrɩ. 17 Ʋ mɛ sə ʋ sɛ̀ də kan tə ʋ nə bá swə bìú tə nə yɩ ʋ bikwɩa, ʋ ga pa wá tori dəkurən bələ, ʋ jɩjə wiən tə mama wa. Cɩ́gá, bìú təntə nə yɩ ʋ zandʋan təntən bìú, yá bikwɩa tori tə yɩ ʋ mʋ̀ nə tɩ.
Nii tə nə pɩn zɩbanənyiən yuu wa
18 Lìù nə jə bìú, ʋ nə yɩ zɩbanənyiən, ʋ nə pɛ́ wá ʋ kəni cwəŋə wa ʋ gɛ, ʋ nə ba ʋ nyɩna, nə à yə̀ə́ ʋ nuu nii zìlí, də ba nə swə ba vàn ʋ zɩɩn nə, 19 ʋ nyɩna də ʋ nuu wá ja wá ba va tɩʋ tɩ̀án con, ba tɩʋ tə mimii nə. 20 Ba wá swɩ̀n tɩʋ tɩ̀án tə con, ba wʋ́: «Nəŋə nə bìú nə, ʋ yɩ zɩbanənyiən, nə pɛ́ wá nə kəni cwəŋə wa nə gɛ, ʋ ba nə nii zìlí. Ʋ yuu cʋ̀gʋ̀, yá ʋ nywɩn sana ʋ bʋbʋnɩ.» 21 Yá tɩʋ tə wa bara tə mama wá dɩlɩ bìú tə də kapana, ba gʋ. Mə nətʋ nə á wá kwɛn kʋ tə nə lwara, á lɩ á titəŋi wa. Yɩzərayɛlə lɩ̀à mama wá nì kʋ, yá fən wá zʋ ba.
Nii tə nə pɩn lìù tə ba nə goli ʋ tɩgɩ tɩ̀ʋ́ nə yuu wa
22 Lìù nə tʋn cʋna tə nə mɛ sə ba gʋ wá tə yɩrɩ, ba nə gʋa wá, á ga tì ʋ tɩgɩ tə á goli tɩ̀ʋ́ nə, 23 ʋ tɩgɩ tə wà mɛ sə kʋ pʋrɩ tɩa tɩ̀ʋ́ tə yuu wa. Á mɛ sə á gùrì wá, kʋ dɩɩn tə mama. Cɩ́gá, Yɩɩ zɩra wulə tɩgɩ tə yuu wa, ba nə goli tɩ̀ʋ́ nə. Á wà mɛ sə á kə durən lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba, sə kʋ ya á tori.