Nii tə nə pɩn kwatarɩ yuu wa
20
1 Máŋá tə á nə vəli sə á ta kʋ̀ʋ̀ á zɩgɩ á dʋŋa nə, á nə nɩ də á dʋŋa tə səsen, də ba səsen kòrə̀n, də ba kwatara dánɩ́ dwə aba, á dànà ká pa ba fən ja aba. Cɩ́gá, Ba-Yígúrə́-Jə-Tiu, á tíú Yɩɩ tə ʋ nə lɩ aba Ezwipətə lʋʋ nii tə wa, wulə də aba. 2 Máŋá tə á nə ken á sírí á zwɛ̀ sə á ta kʋ̀ʋ̀ tə, Yɩɩ joŋwanʋ tə wá dí yáá ʋ nan ʋ zɩgɩ kwatara tə yáá, ʋ swɩ̀n ba con, 3 ʋ wʋ́: «Á cʋga, Yɩzərayɛlə lɩ̀à-ba! Zə̀n kʋ tə, á nan sə á ta á dʋŋa. Á jana wʋdɩʋ! Á dànà ká pa fən ja aba, á dànà ká pa á jɩ̀àn gwarɩ, á dànà ká vɩvɩga ba yáá con. 4 Cɩ́gá, Ba-Yígúrə́-Jə-Tiu, á tíú Yɩɩ wulə də aba. Ʋ wá ta á dʋŋa tə ʋ pa aba, ʋ ga jon aba ba jɩɩn wa.»5 Kʋ kwa nə, lɩ̀à tə nə kúrí kwatara tə wá swɩ̀n kwatara tə con, ba wʋ́: «Wàà nə lwə̀ didʋn, yá ʋ tə wà ka nii súrí? Lìù nətʋ nə wulə á wa, sə kʋ tíú pìí ʋ va ʋ sàń. Ʋ dàn ká bà ʋ va ʋ tɩ kʋ̀ʋ̀ wa, sə lìù don nə súrí ʋ didʋn tə nii! 6 Wàà nə cwɛn divɛn tɩ̀án kárá, yá ʋ tə wà ka nywarɩ dí? Lìù nətʋ nə wulə á wa, sə kʋ tíú pìí ʋ va ʋ sàń. Ʋ dàn ká bà ʋ va ʋ tɩ kʋ̀ʋ̀ wa, sə lìù don nə də́ ka nywarɩ! 7 Wàà nə càrɩ̀ kan sə ʋ swe, yá ʋ tə wà wá tì ʋ ma fwa ʋ kan? Lìù nətʋ nə wulə á wa, sə kʋ tíú pìí ʋ va ʋ sàń. Ʋ dàn ká bà ʋ va ʋ tɩ kʋ̀ʋ̀ wa, ʋ yá ʋ bwàlʋ́ tə, ʋ pa lìù don tì ʋ ma fwa ʋ kan!» 8 Lɩ̀à tə nə kúrí kwatara tə, tə wá swɩ̀n ba súrí lá, ba wʋ́: «Wàà nə fən jə? Wàà nə ba wʋdɩʋ jə? Lìù nətʋ nə wulə á wa, sə kʋ tíú pìí ʋ va ʋ sàń. Ʋ dàn ká pa ʋ bayalɩ tə pwàrɩ́ ʋ nubɩa tə!» 9 Máŋá tə lɩ̀à tə nə kúrí kwatara tə nə swɩ̀n kwatara tə con ba zwɛ̀, ba wá lɩ kwatara púlə́ yáá tɩ̀án, ba kə kwatara tə yáá.
10 Máŋá tə á nə vəli á yí tɩʋ, sə á ta kʋ, á wá dí yáá á bòrì á kə kʋ lɩ̀à tə nə, sə ba sɛ̀ bwànɩ̀, sə sìə́ ya á də ba pwə́rə́ wa. 11 Ba nə sɛ̀ bwànɩ̀, sə sìə́ ya á də ba pwə́rə́ wa, ba ga súrí ba tɩʋ tə mimiən ba pa aba, tɩʋ tə wa lɩ̀à tə mama wá jì á ywə́ŋə́, ba sɛ̀ ba tʋn ba pa aba. 12 Ba nə wà bwànɩ̀ sɛ̀, sə sìə́ ya á də ba pwə́rə́ wa, ba nə ta kʋ̀ʋ̀ ba zɩgɩ á nə, á dàń wá pú tɩʋ tə nə də kʋ̀ʋ̀. 13 Ba-Yígúrə́-Jə-Tiu, á tíú Yɩɩ wá kə tɩʋ tə á jɩɩn wa, yá á wá gʋ kʋ wa bara tə mama mɩ́ámɩ́án də kwatara sɩ̀ʋ́. 14 Yá á wá ja kana tə, də bìsɩ́ná tə, də vàná tə, də jɩjə wiən tə mʋ̀ mama, á nə wá na tɩʋ tə wa. Á wá də́ jɩjə wiən tə, á nə ta á jon á dʋŋa con, Ba-Yígúrə́-Jə-Tiu, á tíú Yɩɩ nə ken á jɩɩn wa. 15 Mə nətʋ nə á wá tʋn tɩan tə mama yɩra, tə nə ŋʋ́ná zənzən də aba, yá tə twá tə tə̀lə́ dwíə́ nəkaran* tə tə tɩan tə wa. 16 Yá dwíə́ nəkaran tə tə tɩan tə mʋ̀ wa, Ba-Yígúrə́-Jə-Tiu, á tíú Yɩɩ nə pɩn aba, sə tə ya á tori, á wà mɛ sə á yá won mama kʋ mɩɩ nə siŋə, á pa kʋ ya lʋʋ wa. 17 Á mɛ sə á gʋ Ɛtə* dwíí tə mama mɩ́ámɩ́án*, də Amɔrə* dwíí tə mama mɩ́ámɩ́án, də Kanaan* dwíí tə mama mɩ́ámɩ́án, də Perizi* dwíí tə mama mɩ́ámɩ́án, də Evi* dwíí tə mama mɩ́ámɩ́án, də Yebusə* tɩ̀án mama mɩ́ámɩ́án, ndə Ba-Yígúrə́-Jə-Tiu, á tíú Yɩɩ nə pɩn aba nii sə á tʋn nətʋ. 18 Kʋ nətʋ wá pa, ba bá wànɩ́ ba ja ba yobalwaran tə mama, ba nə tʋŋa ba ma pɩn dun ba yɩa tə nə, ba ma kwè aba, sə kʋ pa á tʋn cʋna á zɩgɩ Ba-Yígúrə́-Jə-Tiu, á tíú Yɩɩ nə.
19 Á nə púə́ tɩʋ nə də kʋ̀ʋ̀ sə á ta, kʋ nə dán, á dàń ga zɩgɩ lá á ta tɩʋ tə á də́, á wà mɛ sə á goŋə tɩ̀án tə nə zɩŋa lənə, á cʋ̀gʋ̀, tɩʋ tə biritaŋʋ tə kwa con. Á wàá tə lənə tə á də́, á dàń nə dànà ká goŋə tə. Cɩ́gá, gaʋ tɩ̀ʋ́ tà ləzwənə, sə á ma tɛ kʋ̀ʋ̀ də kʋ! 20 Yá á wàá tɩ̀án tə mʋ̀ ba nə ba tə lənə də́, á goŋi á cʋ̀gà, á ga ja tə daran á ma fwa kʋ tə nə wá sán aba, sə á pú tɩ̀ʋ́ tə nə tɛ aba á kə də kʋ̀ʋ̀, kʋ va kʋ yí máŋá tə kʋ nə wá tʋ á jɩɩn wa.