Yuu yikwala tɩan
19
1 Máŋá tə Ba-Yígúrə́-Jə-Tiu, á tíú Yɩɩ nə wá dɩŋa dwíə́ nəkaran* tə ʋ lɩ, dwíə́ nəkaran təntə Ba-Yígúrə́-Jə-Tiu, á tíú Yɩɩ nə pɩn aba ba lʋʋ nii tə, máŋá tə á nə jon ba tɩan tə, də ba dìì tə, á wulə tə wa, 2 á wá lɩ tɩan batwa, á tún vàn nə, lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba, sə á jon á tɩnɩ. 3 Á wá pwɛ̀ lʋʋ nii tə, Ba-Yígúrə́-Jə-Tiu, á tíú Yɩɩ nə wá pa aba, sə kʋ ya á tori, nagwanɛɛ batwa. Yá á wá tún coŋi, tə nə vəli tɩan təntə wa. Kʋ wá ya nətʋ, sə lagʋrʋ mama wànɩ́ ʋ dəri ʋ va ʋ kwálɩ́ ʋ yuu tɩan təntə wa.4 Nə̀ń nətʋ tə kʋ nə wá twá, sə lagʋrʋ dəri ʋ va ʋ kwálɩ́ ʋ yuu tɩan təntə wa, sə ʋ mà jon ʋ mɩɩ: Kʋ yɩ ʋ nə gʋa lìù də kʋ tà ʋ sɩnɩ, yá ʋ yà ba wá culi fuən nə. 5 Lìù də ʋ twadon wàá pún wa ba vəli, sə ba goŋə tɩ̀án. Ʋ nə zɩ̀n dèrí tə, sə ʋ ma za tɩ̀ʋ́ tə, deriloŋi tə nə fwèə́ gonə tə nə, kʋ ja ʋ twadon tə, yá ʋ tɩ, lagʋrʋ tə wàá ʋ dəri ʋ vəli tɩan təntə don wa, sə ʋ ma jon ʋ mɩɩ, 6 sə lìù tə nə mɛ sə ʋ fwi tɩgɩ tə lɩŋa dàn ká pú lagʋrʋ tə kwa də lɩŋa, ʋ dɩŋa wá ʋ ja, də ʋ tə wà yuu yikwala tɩʋ tə yí, cwəŋə tə nə ŋʋ́ná zənzən yɩrɩ, yá ʋ mà wá ʋ gʋ, yá lagʋrʋ tə yà wà mɛ sə ʋ tɩ, ʋ yà nə ba ʋ twadon tə culi fuən nə yɩrɩ. 7 Kʋ mʋ̀ nə pɩn, à ma pa aba nii, sə á lɩ tɩan batwa á tún vàn nə, sə tə ya yuu yikwala tɩan.
8 Ba-Yígúrə́-Jə-Tiu, á tíú Yɩɩ nə wàlɩ̀ á lʋʋ nii tə, ndə ʋ nə dùə̀ ʋ ma swɩ̀n kʋ á nyɩna-ba con nətʋ, ʋ nə pɩn aba lʋʋ nii tə mama, ʋ nə kàn nii sə ʋ pa á nyɩna-ba nə, 9 á nə zìlí yoo kʋ tə mama nii, à nə pɩn aba nii kʋ yuu wa zə̀n kʋ tə, á ga twá kʋ nə, á nə swə Ba-Yígúrə́-Jə-Tiu, á tíú Yɩɩ, á ga twá ʋ coŋi tə nə, máŋá mama wuuu, á tə wá súrí tɩan batwa duən tɩan batwa tə tə nə. 10 Kʋ nətʋ wá pa, ba bá lwá lìù tə nə wà yoo cʋ̀gʋ̀ jana tʋtʋ, lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba, sə kʋ ya á tori, yá lìù jana yoo bá zɩn aba.
11 Yá lìù nə culi ʋ twadon, kʋ pa ʋ panɩ ʋ nə, yá ʋ səgə ʋ mà wá ʋ gʋ, ʋ ga dəri ʋ va ʋ kwálɩ́ ʋ yuu tɩan təntə don wa, 12 ʋ tɩʋ tə yáá tɩ̀án tə wá tʋn lɩ̀à, ba pa ba va ba ja lagʋrʋ tə ba bà, ba kə lìù tə jɩɩn wa, ʋ nə mɛ sə ʋ fwi tɩgɩ tə lɩŋa, sə ʋ gʋ wá ʋ kə tɩgɩ tə bʋʋ wa. 13 Á dànà ká pa ʋ yinəgə ja aba. Mə nətʋ nə á wá pɛ̀ lìù tə nə wà yoo cʋ̀gʋ̀ jana tə nə lwá Yɩzərayɛlə wa, yá á wá nì ywánɩ́.
Nii tə nə pɩn tɩa sɩswɩan yuu wa
14 Máŋá tə á nə zʋa lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba, sə á jon á tɩnɩ, á wà mɛ sə á fwarɩ á jəndon sɩswɩan tə, tɩʋ tɩ̀án nə tún.
Nii tə nə pɩn dansɩa lɩ̀à yuu wa
15 Dansɩa lìù nədʋ cɩcɩ sʋgʋ wàrɩ̀ lìù nə kʋ zɩga, sə kʋ ma bɩrɩ də ʋ tʋn yolwan, nə à yə̀ə́ ʋ tʋn cʋna yiri don mama, lìù nə wàá ʋ tʋŋa. Kʋ yɩ kʋ wá twá də dansɩa lɩ̀à bələ, nə à yə̀ə́ batwa nii sʋgʋ, ba ma swɩ̀n ba lɩ yoo yáá.
16 Kʋ̀nkʋ̀n dansɩa lìù nə zàn ʋ zɩga lìù nə, sə ʋ swɩ̀n də kʋ tíú cʋ̀gʋ̀ yoo, 17 lɩ̀à bələ tə nə tʋ́tʋ̀nɩ́ duən tə wá bà ba zɩgɩ Ba-Yígúrə́-Jə-Tiu yáá con, Yɩɩ joŋwana tə də lɩ̀à tə nə bʋ̀rɩ̀ bʋra tə yáá con, ba nə wulə tʋ̀tʋ̀nán wa, kʋ máŋá tə wa. 18 Lɩ̀à tə nə bʋ̀rɩ̀ bʋra tə wá zuri ba yɩra, ba bwe ba na yoo tə nɛɛ. Ba nə nɩ də dansɩa lìù tə yɩ kʋ̀nkʋ̀n dansɩa lìù, kʋ nə yɩ kʋ̀nkʋ̀n nə ʋ kʋ̀nɩ̀ ʋ kə ʋ nubiu tə nii nə, 19 yoo tə ʋ yà nə pɩ̀à sə ba tʋn ʋ nubiu tə yɩra nə, á dàń wá pìí á tʋn ʋ tətə yɩra. Mə nətʋ nə á wá kwɛn kʋ tə nə lwara, á lɩ á titəŋi wa. 20 Lɩ̀à tə duən tə wá nì kʋ, yá fən wá ja ba, ba kʋ́ʋ̀ bá tʋn yolwan nətʋ yiri á titəŋi wa. 21 Á dànà ká pa ʋ yinəgə ja aba. Cɩ́gá, mɩɩ nə ŋwɩ́n mɩɩ, yii nə ŋwɩ́n yii, yeli nə ŋwɩ́n yeli, jɩɩn nə ŋwɩ́n jɩɩn, naa nə ŋwɩ́n naa!