Yɩɩ Nii 18

Nii tə nə pɩn Levi dwíí tə tori yuu wa

1 Levi dwíí lɩ̀à tə nə yɩ Yɩɩ joŋwana tə, də Levi dwíí tə mama bá ja tori Yɩzərayɛlə lʋʋ nii tə tarʋ wa. Jwəŋə tə ba nə sʋ̀rɩ́ ba pɩn Ba-Yígúrə́-Jə-Tiu nə, də Ba-Yígúrə́-Jə-Tiu tori tə wa nə, ba wá na ba nii wodiu. 2 Ba bá ja tɩa, ka nə wá ya ba tori, ba nubɩa tə titəŋi wa. Ba-Yígúrə́-Jə-Tiu nə wá ya ba tori, ndə ʋ nə swɩ̀n ba con nətʋ.

3 Nə̀ń kʋ tə Yɩɩ joŋwana tə nə jə cwəŋə kʋ yuu wa lalʋʋ tə con, də lalʋʋ tə wa lìù nə ja naʋ, nə à yə̀ə́ vanmɩna ʋ ma fwa joŋi: Ʋ wá pa vàn tə, də nipɛɛ tə, də cunu tə Yɩɩ joŋwanʋ tə nə. 4 Á wá pa ba á mɩna təntən bɩ̀á, də á divɛn nədʋn, də á nʋga nədʋn, də á vanmɩnɩ təntən bɔɔ. 5 Cɩ́gá, Levi dwíí tə nə Ba-Yígúrə́-Jə-Tiu, á tíú Yɩɩ kúrí dwíə́ tə mama wa, sə ʋ mʋ̀ də ʋ bɩ̀á tə tʋn Ba-Yígúrə́-Jə-Tiu tʋtʋŋɩ tə, máŋá mama wuuu.

6 Máŋá tə Levi dwíí lìù nə nan də ʋ tətə fɩra, á tɩʋ tə don wa, ʋ yà nə wulə lá, Yɩzərayɛlə wa, sə ʋ va bwálɩ́ tə wa, Ba-Yígúrə́-Jə-Tiu nə wá kúrí, 7 ʋ mʋ̀ Levi dwíí lìù təntə wàá Ba-Yígúrə́-Jə-Tiu, á tíú Yɩɩ tʋtʋŋɩ tə ʋ tʋŋa, ndə ʋ nubɩa Levi dwíí lɩ̀à tə duən tə mama nə, ba nə wulə lá, Ba-Yígúrə́-Jə-Tiu yáá con. 8 Ʋ jə cwəŋə sə ʋ na tori, kʋ nə yɩ ʋ nii wodiu, kʋ mɛ də ʋ nubɩa tə tori tə, kʋ dàń súrí kʋ tə nə ʋ nə wá na, də ʋ nə yoli ʋ nyɩna-ba jɩjə wiən.

Nii tə nə pɩn kʋ̀nkʋ̀n Yɩɩ nii sʋ̀sʋ̀nà, də cɩ́gá Yɩɩ nii sʋ̀sʋ̀nà yuu wa

9 Máŋá tə á nə zʋa lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba, sə á cɩ̀ á tɩ̀àn nə, á dànà ká kwè ba mʋ̀ dwíə́ nəkaran* təntə yobalwaran tə. 10 Á dànà ká pa ba na á wa lìù, də ʋ sʋ̀rɩ́ ʋ bìú, nə à yə̀ə́ ʋ bʋ̀á mən wa, sə ʋ ma fwa joŋi, nə à yə̀ə́ ʋ nə ywàŋá lanworu, sə ʋ ma lwarɩ jwɩan yìə̀n, nə à yə̀ə́ ʋ nə twarɩ mɩmɩnan, sə ʋ ma lwarɩ yìə̀n, nə à yə̀ə́ ʋ nə vwɩ, nə à yə̀ə́ ʋ nə tʋŋa cɩrɩ yìə̀n, 11 nə à yə̀ə́ ʋ nə fwa lɩ̀à, nə à yə̀ə́ ʋ nə boŋə ciciri, nə à yə̀ə́ ʋ nə mà kapan, nə à yə̀ə́ ʋ nə boŋə tɩga nii. 12 Cɩ́gá, lìù tə mama, ʋ nə tʋŋa tə mʋ̀ yìə̀n təntə, yɩ ləzwənlwan Ba-Yígúrə́-Jə-Tiu yáá con. Tə mʋ̀ yobalwaran təntə yɩrɩ nə, Ba-Yígúrə́-Jə-Tiu, á tíú Yɩɩ wá dɩŋa dwíə́ nəkaran tə ʋ lɩ á yáá nə. 13 Á mʋ̀ mɛ sə á ya lɩ̀à tə, á tʋtʋnɛɛ nə ziən, Ba-Yígúrə́-Jə-Tiu, á tíú Yɩɩ yáá con.

14 Cɩ́gá, dwíə́ nəkaran təntə, á nə wá jon ba lʋʋ nii tə á tɩnɩ, cʋga lɩ̀à tə nə twarɩ mɩmɩnan, ba ma lwarɩ yìə̀n, də vʋra. Yá Ba-Yígúrə́-Jə-Tiu, á tíú Yɩɩ wà cwəŋə á mʋ̀ nə pɩn, sə á tʋn yìə̀n təntə. 15 Ba-Yígúrə́-Jə-Tiu, á tíú Yɩɩ wá kúrí lìù á wa, ʋ nə wá ya á nubɩa tə wa lìù don, sə ʋ yà ʋ nii sʋ̀sʋ̀nʋ̀ ndə à nə: Á mɛ sə á cʋgʋ ʋ sʋgʋ! 16 Mə yoo təntə nə á lòrì Ba-Yígúrə́-Jə-Tiu, á tíú Yɩɩ con, dɩɩn tə nə, á nə kun duən nə, Ɔrɛbə paan tə də̀ń nə. Kʋ dɩɩn tə nə, á swɩ̀n, á wʋ́: «Nə kʋ́ʋ̀ ba pɩ̀à sə nə nì Ba-Yígúrə́-Jə-Tiu, nə tíú Yɩɩ kori, nə ga ba pɩ̀à sə nə na ʋ mən nəfarʋ tə. Cɩ́gá, nə ba pɩ̀à sə nə tɩ!» 17 Yá Ba-Yígúrə́-Jə-Tiu swɩ̀n à con, ʋ wʋ́: «Kʋ tə ba nə swɩ̀n tə ziən! 18 À wá kúrí à nii sʋ̀sʋ̀nʋ̀ ba nubɩa tə wa, à pa ba, ʋ nə wá ya ndə n nə. À wá kə à sʋ̀ràn tə ʋ nii wa, yá ʋ wá swɩ̀n kʋ tə mama, à nə wá pa wá nii kʋ yuu wa, sə ʋ swɩ̀n ba con. 19 Yá lìù nə vɩga, sə ʋ cʋgʋ à sʋ̀ràn tə, ʋ nə wá swɩ̀n à yuu yɩrɩ, à mʋ̀ nə wá bwe kʋ tíú, sə ʋ tún ʋ nii. 20 Yá Yɩɩ nii sʋ̀sʋ̀nʋ̀ tə ʋ nə ja yɩrʋ, ʋ swɩ̀n sʋ̀ràn à yuu yɩrɩ, à nə wà wá nii pɩn sə ʋ swɩ̀n, nə à yə̀ə́ ʋ nə swɩ̀n yɩa duən yuu yɩrɩ, ʋ mʋ̀ Yɩɩ nii sʋ̀sʋ̀nʋ̀ təntə mɛ sə ba gʋ wá.»

21 Kʋ wàá də á wá bwe á tɩ̀àn sə á jə́n: «Nətə nə nə wá twá nə mà lwarɩ sʋgʋ tə, Ba-Yígúrə́-Jə-Tiu nə wà swɩ̀n?» 22 Yɩɩ nii sʋ̀sʋ̀nʋ̀ tə nə swɩ̀n Ba-Yígúrə́-Jə-Tiu yuu yɩrɩ, yá sʋgʋ tə nii wà swí, sʋgʋ tə nə wà jì, sʋgʋ təntə tà Ba-Yígúrə́-Jə-Tiu nə swɩ̀n. Kʋ yɩ yɩrʋ nə Yɩɩ nii sʋ̀sʋ̀nʋ̀ tə ma swɩ̀n, yá á wà mɛ sə á pa ʋ fən ja aba.