Yɩɩ Nii 17

1 Á wà mɛ sə á ja á naʋ, nə à yə̀ə́ á piə, kʋ nə wà cé, nə à yə̀ə́ kʋ nə yɩ kwaŋʋ, á ma fwa joŋi á pa Ba-Yígúrə́-Jə-Tiu, á tíú Yɩɩ nə. Cɩ́gá, kʋ nətʋ tə yɩ yobalwarʋ kʋ pa Ba-Yígúrə́-Jə-Tiu, á tíú Yɩɩ nə.

2 Bɛɛ, nə à yə̀ə́ kan wàá ʋ ba Ba-Yígúrə́-Jə-Tiu nimarʋ tə nii zìlí, kʋ pa ʋ tʋn yoo, kʋ nə lwara Ba-Yígúrə́-Jə-Tiu yáá con, tɩan tə don wa, Ba-Yígúrə́-Jə-Tiu, á tíú Yɩɩ nə pɩn aba. 3 Kʋ wàá sə ʋ va ʋ tʋ ʋ nadwana yuu yɩa duən yáá con, ʋ pa tə dun. Kʋ wàá kʋ yanɩ yɩcaʋ tə, nə à yə̀ə́ cànà tə, nə à yə̀ə́ lanworu wiən tə mama yáá con. Yá kʋ nətʋ tə zɩga yìə̀n tə nə, à nə bɩrɩ sə tə tʋn. 4 Ba nə twi ba swɩ̀n yoo təntə yiri á con, nə à yə̀ə́ á nə nì kʋ ŋwɛn, á mɛ sə á zuri á yɩra, á bwe zəni, á na kʋ nɛɛ, á lwarɩ də kʋ nə yɩ cɩ́gá, yobalwarʋ təntə cɩ́gá tʋn Yɩzərayɛlə wa. 5 Kʋ nə yɩ cɩ́gá, á wá ja bɛɛ tə, nə à yə̀ə́ kan tə nə tʋn kʋ mʋ̀ tʋtʋnkʋkwɩʋn tə, á nan á tɩ̀ʋ́ tə mimiən nə, yá á wá dɩlɩ kʋ mʋ̀ bɛɛ tə, nə à yə̀ə́ kan tə də kapana, á gʋ.

6 Lìù təntə nə mɛ sə ba gʋ wá, kʋ mɛ sə kʋ ya lɩ̀à bələ, nə à yə̀ə́ batwa dansɩa yɩrɩ, kʋ wà mɛ sə ba gʋ lìù, ladʋa dansɩa yɩrɩ. 7 Dansɩa lɩ̀à tə nə wá təntən ba dɩlɩ cʋnʋ tə də kapana, sə ba gʋ. Kʋ kwa nə, lalʋʋ tə mama dàń wá san lá, ba dɩlɩ. Mə nətʋ nə á wá kwɛn kʋ tə nə lwara, á lɩ á titəŋi wa.

Yɩɩ wúlú bwálɩ́ tə wa bʋra yoo

8 Lagʋrɩ yoo, nə à yə̀ə́ vaŋʋ, nə à yə̀ə́ ba nə mà lìù ba caŋɩ, bʋra yiri mama nə jə bɩan nə kʋ pa aba, á tɩan tə mimien nə, á wá ja kʋ á va bwálɩ́ tə wa, Ba-Yígúrə́-Jə-Tiu, á tíú Yɩɩ nə wá kúrí. 9 Á wá va á bwe Levi dwíí lɩ̀à tə nə yɩ Yɩɩ joŋwana, də lìù tə nə bʋ̀rɩ̀ bʋra kʋ máŋá tə wa, yá ba wá bʋ̀rɩ̀ bʋra tə, ba bɩrɩ aba kʋ tə, á nə mɛ sə á fwa. 10 Á wá tʋn yoo tə, ba nə bʋ̀rɩ̀ bʋra tə ba na, bwálɩ́ tə wa Ba-Yígúrə́-Jə-Tiu nə wá kúrí, ba ga bɩrɩ aba sə á tʋn. Á wá zuri á yɩra, á twá kʋ tə mama nə, ba nə wá bɩrɩ aba, sə á tʋn. 11 Á wá twá Yɩɩ nii yìə̀n tə nə zəni, ba nə wá ma kàrɩ̀ aba, də bʋra tə nə, ba nə wá bɩrɩ aba. Á wá mɛ sə á yori á va jɩzən, nə à yə̀ə́ jɩgwiə, á yá yoo tə ba nə wá bʋ̀rɩ̀ ba na, ba ga bɩrɩ aba sə á tʋn. 12 Lìù nə tʋn yɩrʋ, ʋ nə ba Yɩɩ joŋwanʋ tə nə wulə lá, ʋ tʋŋa ʋ pɩn Ba-Yígúrə́-Jə-Tiu, á tíú Yɩɩ nə con cʋga, nə à yə̀ə́ ʋ ba lìù tə nə bʋ̀rɩ̀ bʋra tə con cʋga, lìù təntə mɛ sə ba gʋ wá. Mə nətʋ nə á wá kwɛn kʋ tə nə lwara, á lɩ Yɩzərayɛlə wa. 13 Lalʋʋ tə mama wá nì kʋ nətʋ tə, fən ga wá zʋ ba, yá lìù mama kʋ́ʋ̀ ba tʋn yɩrʋ.

Nii tə nə pɩn pɩ̀ʋ́ yɩrɩ

14 Máŋá tə á nə zʋa lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba, máŋá tə á nə jon kʋ á tɩnɩ, á jə̀ə́ kʋ wa, kʋ wàá də á wá swɩ̀n, á wʋ́: «Nə pɩ̀à sə nə tún pɩ̀ʋ́, sə ʋ də́ pàrɩ̀ nə yuu wa, ndə lʋʋ dwíə́ tə duən tə mama nə, ba nə kɩkarɩ nəba!» 15 Á wàá pɩ̀ʋ́ á túŋə́, sə ʋ də́ pàrɩ̀ á yuu wa, kʋ dàń nə wá ya pɩ̀ʋ́, Ba-Yígúrə́-Jə-Tiu, á tíú Yɩɩ nə wá kúrí. Pɩ̀ʋ́ təntə á nə wá tún, mɛ sə ʋ ya á nubɩa tə wa lìù. Á wà mɛ sə á tún vee, ʋ nə tà á nubiu, sə ʋ də́ pàrɩ̀ á yuu wa. 16 Á pɩ̀ʋ́ wà mɛ sə ʋ ja səsen kapʋpʋ, ʋ wà mɛ sə ʋ pa lalʋʋ tə pìí ba va Ezwipətə lʋʋ nii wa, ba yə̀ səsen kapʋpʋ ba ja bà ba pa wá. Cɩ́gá, Ba-Yígúrə́-Jə-Tiu swɩ̀n á con, ʋ wʋ́: «Á kʋ́ʋ̀ dànà ká pìí á tì lʋʋ nii təntə cwəŋə.» 17 Ʋ wà mɛ sə ja kana kapʋpʋ, sə kʋ dàn ká pa ʋ bɩcan va yiŋʋnɩ, kʋ yá Yɩɩ. Ʋ wà mɛ sə ʋ ja wárʋ́ də sɩ́án zənzən.

18 Máŋá tə pɩ̀ʋ́ tə nə jə̀ə́ ʋ padaʋ tə yuu, ʋ wá jon Yɩɩ nii yìə̀n tə tə Levi dwíí lɩ̀à tə con, ba nə yɩ Yɩɩ joŋwana, ʋ pa ba ywàń tə ba pʋ́pʋ́nɩ́ ba kə sagɩ wa, ba pa wá. 19 Ʋ mɛ sə ʋ ja tə ʋ con, ʋ ga kàrɩ̀ tə dɩɩn mama, ʋ lʋʋ wúlú tə wa, sə kʋ pa ʋ kwè ka dəri Ba-Yígúrə́-Jə-Tiu, ʋ tíú Yɩɩ fən, ʋ ga zìlí Yɩɩ nii kʋ tə yìə̀n tə mama, də yìə̀n tə mama Yɩɩ nə pɩn tə pʋ́pʋ́nɩ́ sə ba twá tə nə, ʋ ga twá tə nə. 20 Ʋ nə tʋn kʋ nətʋ, ʋ bɩcan bá sú də fwìə́, kʋ pa ʋ zɩ̀n ʋ tɩ̀àn ʋ kə yɩɩ nə, ʋ nubɩa tə yáá con, yá ʋ bá yori ʋ va jɩzən nə à yə̀ə́ jɩgwiə, ʋ yá yìə̀n təntə, Yɩɩ nə pɩn nii tə yuu wa, yá ʋ mɩɩ wá ya dànɩ̀ ʋ payuu tə wa, ʋ mʋ̀ də ʋ bɩ̀á, Yɩzərayɛlə lɩ̀à tə titəŋi wa.