Pakə* cànà tə diŋə yoo
16
1 Á lìə́ á tɩ̀àn Pakə cànà tə yoo, sə á də́ ka mɩna bɩʋ cànà tə wa, ba nə boŋə Abibə cànà, á ma pa dun Ba-Yígúrə́-Jə-Tiu, á tíú Yɩɩ nə. Cɩ́gá, mɩna bɩʋ cànà wa nə Ba-Yígúrə́-Jə-Tiu, á tíú Yɩɩ lɩ aba Ezwipətə lʋʋ nii wa, tɩtɩn nə. 2 Á wá gʋ Pakə cànà tə vanmɩnɩ də vanfaran, á ma fwa jwəŋə á pa Ba-Yígúrə́-Jə-Tiu, á tíú Yɩɩ nə, bwálɩ́ tə wa Ba-Yígúrə́-Jə-Tiu nə kúrí, sə ʋ pa ʋ yɩrɩ tə ya lá. 3 Cànà tə diŋə máŋá wa, á wà mɛ sə á də́ won mama kʋ nə jə sabwarɩ. Á wá də́ dipɛn, kʋ nə wà sabwarɩ ken, dɩan barpɛ. Kʋ yɩ yinəgə dipɛn. Cɩ́gá, kʋ yɩ bɩbarʋ nə á ja nan Ezwipətə lʋʋ nii tə wa. Yá á dàń wá twá kʋ nətʋ tə nə, á ma lìí á tɩ̀àn á lʋʋ wúlú mama wa, dɩɩn tə á nə nan Ezwipətə lʋʋ nii tə wa. 4 Dɩan barpɛ təntə wa, kʋ wà mɛ sə ba na sabwarɩ á dìì wa, á lʋʋ nii tə mama wa. Á wà mɛ sə á yá, á pa tɩa pʋrɩ, ka dà Pakə cànà joŋi vàná tə nàŋʋ́ tə nə, á nə wá gʋ təntən dɩɩn tə didəni nii nə. 5 Á wàrɩ̀ Pakə cànà joŋi vànɩ́ tə á gwɩ, á tɩan tə mama wa, Ba-Yígúrə́-Jə-Tiu, á tíú Yɩɩ nə pɩn aba, sə á yá lá. 6 Kʋ dàń nə yɩ bwálɩ́ tə wa, Ba-Yígúrə́-Jə-Tiu, á tíú Yɩɩ nə kúrí, sə ʋ pa ʋ yɩrɩ tə ya lá, nə á wá gʋ Pakə cànà joŋi vànɩ́ tə, didəni nii nə, yɩɩ zʋrɩ máŋá wa, ndə máŋá tə wa á nə nan Ezwipətə lʋʋ nii tə wa. 7 Á wá sàn vànɩ́ tə nàŋʋ́ tə á də́ bwálɩ́ tə wa, Ba-Yígúrə́-Jə-Tiu, á tíú Yɩɩ nə wá kúrí. Yá jɩjʋ nə, á dàń wàá pìí á va á gansilə wa. 8 Á wá də́ dipɛn, kʋ nə wà sabwarɩ ken, dɩan bardʋ. Yá barpɛ nii dɩɩn tə nə, lalʋʋ tə mama wá kun duən nə, á pa dun Ba-Yígúrə́-Jə-Tiu, á tíú Yɩɩ tə nə. Kʋ dɩɩn tə nə, á bá tʋn tʋtʋŋɩ mama.Woceri* cànà diŋə yoo
9 Á wá zɩgɩ dɩɩn tə nə, ba nə sinti ba za mɩna, á gàlà dapana barpɛ. 10 Yá á wá də́ woceri cànà tə, á ma pa dun Ba-Yígúrə́-Jə-Tiu, á tíú Yɩɩ nə. Zìlə́ won tə, á nə wá pa Ba-Yígúrə́-Jə-Tiu nə, mɛ sə kʋ mɛ də zəni tə, Ba-Yígúrə́-Jə-Tiu, á tíú Yɩɩ nə fwa á yɩra. 11 Á wá fwa pupwən Ba-Yígúrə́-Jə-Tiu, á tíú Yɩɩ yáá con, bwálɩ́ tə wa Ba-Yígúrə́-Jə-Tiu, á tíú Yɩɩ nə wá kúrí, sə ʋ pa ʋ yɩrɩ tə ya lá. Á wá tʋn kʋ nətʋ tə, á mʋ̀ də á bɩ̀á də á bwɩ̀ɩ́, də á tʋtʋnbɩa də á tʋtʋnbwɩɩ, də Levi dwíí lɩ̀à tə nə wulə á tɩan tə wa, kʋ súrí vərə tə, də bitara tə, də kadənə tə nə, ba nə wulə á titəŋi wa. 12 Á mɛ sə á lìí á tɩ̀àn, də á yɩn ywə́ŋə́ Ezwipətə lʋʋ nii wa, yá á dàń mɛ sə á zìlí yìə̀n tə tə nii, Yɩɩ nə pɩn tə pʋ́pʋ́nɩ́ tə tún, á ga twá tə nə.
Vunən* cànà diŋə yoo
13 Máŋá tə á nə ken á kárɩ́ wiən, də á divɛn tɩ̀án lənə dìə̀ wa á zwɛ̀, á wá də́ vunən cànà, dɩan barpɛ. 14 Á wá fwa pupwən cànà təntə diŋə máŋá wa, á mʋ̀ də á bɩ̀á, də á bwɩ̀ɩ́, də á tʋtʋnbɩa də á tʋtʋnbwɩɩ, də Levi dwíí lɩ̀à tə nə wulə á tɩan tə wa, kʋ súrí vərə tə, də bitara tə, də kadənə tə nə, ba nə wulə á titəŋi wa. 15 Á wá də́ cànà tə dɩan barpɛ, á ma pa dun Ba-Yígúrə́-Jə-Tiu, á tíú Yɩɩ nə, bwálɩ́ tə wa Ba-Yígúrə́-Jə-Tiu nə wá kúrí. Cɩ́gá, Ba-Yígúrə́-Jə-Tiu á tíú Yɩɩ wá fwa zəni á yɩra, á kárɩ́ wiən mama wa, də á jɩɩn tʋtʋŋɩ mama wa, ʋ ga pa á jwɛ də pupwən nəfarʋ.
16 Bɩnɩ mama, á lalʋʋ tə wa bara tə mama wá bà Ba-Yígúrə́-Jə-Tiu, á tíú Yɩɩ yáá con, nɛɛ batwa, bwálɩ́ tə wa, ʋ nə wá kúrí: Kʋ yɩ dipɛn tə nə wà sabwarɩ ken cànà tə diŋə máŋá wa, də woceri* cànà tə diŋə máŋá wa, də vunən cànà tə diŋə máŋá wa. Yá lìù mama wà mɛ sə ʋ va Ba-Yígúrə́-Jə-Tiu yáá con, də jɩkʋrɩkɛ. 17 Lìù mama wá pa zìlə́ won tə ʋ nə wàá ʋ pɩn Ba-Yígúrə́-Jə-Tiu nə, kʋ mɛ də zəni tə, Ba-Yígúrə́-Jə-Tiu, á tíú Yɩɩ nə tʋn ʋ yɩra.
Lɩ̀à tə nə bʋ̀rɩ̀ bʋra túŋú yoo
18 Á wá tún lɩ̀à tə nə bʋ̀rɩ̀ bʋra, də tʋ̀tʋ̀nà yáá tɩ̀án dwíí mama wa, á tɩan tə mama mimien nə, Ba-Yígúrə́-Jə-Tiu, á tíú Yɩɩ nə pɩn aba. Ba wá bʋ̀rɩ̀ lalʋʋ tə bʋra, kʋ twá cɩ́gá cwəŋə nə. 19 Á wà mɛ sə á cɩ̀ yoo tə yáá nə, kʋ nə yɩ mənəmənə, á wà mɛ sə á bʋ̀rɩ̀ cɩ́gá á pa lɩ̀à nə, á nə swə ba yɩrɩ, yá á wà mɛ sə á jon vwiŋə. Cɩ́gá, vwiŋə yàá pa wʋbʋnyɩna tətə jì lilirən, kʋ pa ba bʋ̀rɩ̀ kʋ̀nkʋ̀n, ba pɩn lɩ̀à tə nə, ba nə jə cɩ́gá. 20 Á mɛ sə á bʋ̀rɩ̀ bʋra, á pa ka tì cɩ́gá cwəŋə, sə kʋ pa á mɩɩ ya lʋʋ, á ga jon lʋʋ nii tə, Ba-Yígúrə́-Jə-Tiu, á tíú Yɩɩ nə pɩn aba, á tɩnɩ.
Yìə̀n tə ba nə dùə̀ suu tə yuu wa