Yɩɩ Nii 1

Yɩɩ nii yìə̀n

MOYIZƏ TƏNTƏN SƲGƲ

1—4

1 Nə̀ń sʋ̀ràn tə Moyizə nə swɩ̀n Yɩzərayɛlə lɩ̀à tə mama con, Zʋrədɛn mʋnaa tə yɩɩ yipɩan con, kasɔɔ lanworu tə wa, Araba digə tə wa, Sufə tɩʋ tə yáá con, Paran, də Tofɛlə, də Laban, də Haserɔtə, də Di-Zahabə tɩan tə pwə́rə́ wa. 2 Lìù nə zɩgɩ Ɔrɛbə paan tə nə, ʋ vələ Kadɛswə-Barəneya, dɩan fugə də nədʋ nə kʋ yàá tì, də kʋ tíú nə twá Seyirə pɛɛn cwəŋə tə. 3 Bɩna sapwɩlə nii bɩnɩ tə, cànɩ̀ fugə də nədʋ nii cànà tə təntən dɩɩn tə nə, Moyizə swɩ̀n sʋ̀ràn tə mama Ba-Yígúrə́-Jə-Tiu yà nə pɩn wá nii tə yuu wa, sə ʋ swɩ̀n Yɩzərayɛlə lɩ̀à tə con. 4 Kʋ yɩn Moyizə nə ta Amɔrə dwíí pɩ̀ʋ́ Sihon, ʋ yà nə wulə Ɛswəbon nə, də Baswan pɩ̀ʋ́ Ogə, ʋ yà nə wulə Aswətarɔtə nə, də Edəreyi nə, ʋ də́ kwa nə.

5 Zʋrədɛn mʋnaa tə yɩɩ yipɩan con, Mʋabə lʋʋ nii tə wa, Moyizə sinti ʋ gwìń nii təntə də̀ń, ʋ swɩ̀n, ʋ wʋ́:

Yɩɩ pɩn nii Yɩzərayɛlə lɩ̀à nə, sə ba vìí

6 Ba-Yígúrə́-Jə-Tiu, nə tíú Yɩɩ swɩ̀n nə con Ɔrɛbə paan tə də̀ń nə, ʋ wʋ́: «Á jə̀ń paan ka tə də̀ń nə á dán zənzən. 7 Á zaŋa á vìí. Á vələ Amɔrə dwíí pɛɛn nagwana tə wa, də nagwanɛɛ tə mama wa tə nə kɩkarɩ kʋ. Tə mʋ̀ nə yɩ Araba digə nagwanaa tə, də pɛɛn nagwanaa tə, də Swefela* nagwanaa tə, də Negɛbə* nagwanaa tə, də mʋʋ nii nagwanaa tə, Kanaan lʋʋ lɩ̀à tə nə wulə tə wa, də Liban pɛɛn nagwanaa tə, kʋ va kʋ yí Əfəratə mʋnaa nəfarʋ tə. 8 Nəŋə, à pɩn aba lʋʋ nii tə. Á vələ á jon kʋ á tɩnɩ. Cɩ́gá, Ba-Yígúrə́-Jə-Tiu kàn nii, də ʋ pɩn kʋ á nɩbara Abərahamə, də Yɩzakə, də Zwakɔbə, də ba dwíí tə nə, ba nə wá ya lʋʋ wa, ba kwa nə.»

Moyizə tún lɩ̀à, sə ba bʋ̀rɩ̀ bʋra

9 Kʋ máŋá təntə wa, à swɩ̀n sʋ̀ràn tə tə á con, à wʋ́: «À cɩcɩ wàrɩ̀ á yojanan tə à zɩŋa. 10 Ba-Yígúrə́-Jə-Tiu, á Yɩɩ tə pɩn á pùlì, yá sɩ́ʋ́n nə, á dàń dáá zənzən ndə lanworu kacɩlacɛɛ nə. 11 Ba-Yígúrə́-Jə-Tiu, á nyɩna-ba Yɩɩ tə wá pa á tə pùlì á súrí lá nɛɛ mʋ̀rʋ̀, ʋ ga fwa zəni á yɩra, ndə ʋ nə swɩ̀n kʋ á con nətʋ! 12 Nətə nə à cɩcɩ wá zɩn á yojanan tə, də á tʋ́tʋ̀ná tə? 13 Á lɩa bara á dwíə́ tə wa, ba nə jə wʋbʋŋa də pubʋŋa, á dwíə́ tə lɩ̀à ga yə̀ə́ də ba twá cɩ́gá nə ndə kʋ nə mɛ nətʋ. Yá à dàń wá tún ba, sə ba ya á yáá tɩ̀án.» 14 Yá á le nə, á wʋ́: «Kʋ tə n nə bɩrɩ sə nə tʋn tə yɩ yozəŋu.» 15 À dàń lɩ á dwíə́ yáá tɩ̀án tə, ba nə yɩ bara tə nə jə wʋbʋŋa, ba ga twá cɩ́gá nə ndə kʋ nə mɛ nətʋ, à tún sə ba ya lɩ̀à mʋ̀rʋ̀ yáá tɩ̀án, də lɩ̀à bíí yáá tɩ̀án, də lɩ̀à finu yáá tɩ̀án, də lɩ̀à fugə yáá tɩ̀án, sə ba ga ya tʋ̀tʋ̀nà yáá tɩ̀án, á dwíə́ tə wa. 16 Kʋ máŋá təntə wa, à pɩn nii kʋ tə, á lɩ̀à tə nə, ba nə bʋ̀rɩ̀ bʋra, à wʋ́: «Á cʋga á nubɩa tə yìə̀n, á ga bʋ̀rɩ̀ ba lìù mama bʋra, kʋ twá cɩ́gá cwəŋə nə, ʋ də ʋ nubiu yìə̀n wa, nə à yə̀ə́ ʋ də vee tə nə twá ʋ jə̀ə́ á con yìə̀n wa. 17 Á bá dəri lìù yii, á bʋra tə wa. Á wá cʋgʋ labwanʋ də ləzwənfarʋ mɛ. Á bá dəri ləzwənə fən. Cɩ́gá, bʋra yɩ Yɩɩ nə tɩ. Yá máŋá tə yoo nə dwə á jɩɩn, á wá ja kʋ á bà à yáá con, sə à cʋgʋ.» 18 Mə nətʋ nə à bɩrɩ aba kʋ tə mama á nə mɛ sə á tʋn, kʋ máŋá təntə wa.

Yɩzərayɛlə lɩ̀à vɩga nii Kadɛswə-Barəneya nə

19 Nə zàn Ɔrɛbə paan tə də̀ń nə, nə vìí, yá nə jírí kʋ mʋ̀ kasɔɔ lanworu təntə mama, á tətə nə nɩ də kʋ dáá, kʋ ga jə fən. Nə tì Amɔrə dwíí pɛɛn nagwanaa cwəŋə tə, ndə Ba-Yígúrə́-Jə-Tiu, nə tíú Yɩɩ yà nə pɩn nəba nii nətʋ. Yá nə vəli nə yí Kadɛswə-Barəneya. 20 À swɩ̀n á con à, wʋ́: «Á yí Amɔrə dwíí paan tə, Ba-Yígúrə́-Jə-Tiu, nə tíú Yɩɩ nə pɩn nəba. 21 Ywàŋá, Ba-Yígúrə́-Jə-Tiu, á tíú Yɩɩ pɩn aba lʋʋ nii tə. Vələ á jon kʋ á tɩnɩ, ndə Ba-Yígúrə́-Jə-Tiu, á nyɩna-ba Yɩɩ nə swɩ̀n kʋ á con nətʋ. Dànà ká pa fən ja aba, dànà ká pa á jɩ̀àn gwàrɩ̀!»

22 Yá á mama twi á yí à yɩra, á swɩ̀n à con, á wʋ́: «Nə tʋŋa lɩ̀à sə ba də́ yáá ba va ba mɩ̀àn lʋʋ nii tə, ba ga bà ba tún nii, ba bɩrɩ nəba cwəŋə tə nə nə wá tì nə ma yí lá, də tɩan tə nə nə wá va nə zən tə nə.» 23 Pubʋŋa təntə yɩn zəni ka pa nə. Yá à lɩ bara fugə də bələ á wa, bɛɛ nədʋ dwíí mama wa. 24 Ba twá paan tə vàn con, ba dɩ̀ ba yí Ɛswəkɔlə vara tə, yá ba mɩ̀àn ka. 25 Ba lɩ lʋʋ nii tə wiən lənə, ba ja bà ba bɩrɩ nəba, ba ga tún ba nii ba bɩrɩ nəba, ba wʋ́: «Kʋ yɩ lʋʋ nii nəzəŋu Ba-Yígúrə́-Jə-Tiu, nə tíú Yɩɩ pɩn nəba.» 26 Yá á vɩga sə á va lá. Á vɩga sə á sɛ̀ Ba-Yígúrə́-Jə-Tiu, á tíú Yɩɩ nii. 27 Á ŋʋŋwɩn á gansilə wa, á wʋ́: «Ba-Yígúrə́-Jə-Tiu culi nəba, kʋ mʋ̀ nə pɩn ʋ ma lɩ nəba Ezwipətə lʋʋ nii tə wa, sə ʋ kə nəba Amɔrə dwíí tə jɩɩn wa, sə ba cʋ̀gʋ̀ nəba mɩ́ámɩ́án! 28 Nə nubɩa tə pɩn jɩgwarʋ zʋ nəba. Cɩ́gá, ba swɩ̀n, ba wʋ́: “Kʋ yɩ lalʋʋ kʋ nə dáá, kʋ ləzwənbɩa tə danɩ də ga dwə nəba, nə wulə lá. Kʋ jə tɩfaran, tə nə lwə̀ tə kɩkarɩ də biritaŋan, tə dɩ̀ tə ja yɩɩ nə. Nə nɩ Anakə dwíí də tətə lá!” Nə kʋ́ʋ̀ wàá lá nə vələ naaa?»

29 Yá à swɩ̀n á con, à wʋ́: «Á dànà ká vɩvaga, á dànà ká pa ba fən ja aba! 30 Ba-Yígúrə́-Jə-Tiu, á tíú Yɩɩ tə nə wulə á yáá ʋ vəli, nə wá ta ʋ pa aba, ndə ʋ nə tʋn kʋ á yɩ́á yuu, ʋ pa aba Ezwipətə nə nətʋ. 31 Yá kasɔɔ lanworu tə wa, á nɩ də Ba-Yígúrə́-Jə-Tiu, á tíú Yɩɩ tì aba ʋ calɩ, ndə bɛɛ nə yàá calɩ ʋ bìú nətʋ, cwəŋə tə mama wa á nə vəli, á kori á bà á yí bwálɩ́ kʋ tə wa.» 32 Yá kʋ mʋ̀ yoo təntə wa, á wà cɩ́gá Ba-Yígúrə́-Jə-Tiu, á tíú Yɩɩ nə pɩn, 33 ʋ nə yàá wulə á yáá ʋ vəli cwəŋə tə wa, sə ʋ pɩ̀à bwálɩ́ ʋ pa aba, sə á kə á dəkuu lá. Tɩtɩn nə, ʋ yàá wulə mənvwə wa, sə ʋ ma pɩ̀rɩ̀ cwəŋə tə á nə wá tì, yá tɩa nə pʋrɩ, ʋ yàá wulə bakwan kùlì wa.

34 Ba-Yígúrə́-Jə-Tiu nì á sʋ̀ràn tə. Ʋ lɩŋa zàn zənzən, ʋ ga dù durə ka tə, ʋ wʋ́: 35 «Wʋlʋnyɩna dwíí kʋ tə bara tə ladʋa tətə bá zʋ lʋʋ nii nəzəŋu kʋ tə wa, à nə dùə̀ də à wá pa á nyɩna-ba nə, 36 də kʋ nə tà Yefune bìú Kalɛbə cɩcɩ. Ʋ mʋ́ nə wá zʋ kʋ wa, yá à wá pa lʋʋ nii tə ʋ nə vəli kʋ wa, ʋ mʋ̀ də ʋ bɩ̀á nə, ʋ nə twá à mʋ̀ Ba-Yígúrə́-Jə-Tiu nə, də ʋ waa mama yɩrɩ.»

37 Ba-Yígúrə́-Jə-Tiu lɩŋa zàn à də yuu wa, á mʋ̀ yɩrɩ, yá ʋ swɩ̀n, ʋ wʋ́: «N də bá zʋ lʋʋ nii tə wa. 38 Nun bìú Zozuwe, ʋ nə saŋa mʋ́, nə wá zʋ lá. Dàn ʋ jɩɩn. Cɩ́gá, ʋ mʋ̀ nə wá ja Yɩzərayɛlə lɩ̀à tə ʋ va, ʋ pa ba tɩnɩ kʋ lʋʋ nii tə.» 39 Yá á bisɩmabii tə, á nə swɩ̀n də dʋŋa wá ja ba, də á bɩ̀á tə, ba zə̀n nə yəri yozəŋu də yolwan swɩ́án duən wa, mə ba mʋ̀ nə wá zʋ lʋʋ nii tə wa. Mə ba mʋ̀ nə nə à wá pa kʋ, yá ba mʋ̀ nə wá jon kʋ ba tɩnɩ. 40 Yá á mʋ̀, pìrə́ á va kasɔɔ lanworu tə wa, kʋ nə daa Mɩncanɩ mʋʋ tə con.»

41 Yá á dàń le nə, á wʋ́: «Nə tʋn cʋna nə zɩgɩ Ba-Yígúrə́-Jə-Tiu nə. Nə wá va nə ta kʋ̀ʋ̀ tə, ndə Ba-Yígúrə́-Jə-Tiu, nə tíú Yɩɩ nə pɩn nəba nii sə nə tʋn nətʋ.» Yá á lìù mama tì ʋ kwatarɩ zɩla ʋ vwa ʋ tàŋá nə, á ga bʋŋa də á wàá pɛɛn nagwanaa tə á vəli á tɛ á joŋə mwálɩ́ mwálɩ́. 42 Ba-Yígúrə́-Jə-Tiu dàń swɩ̀n à con, ʋ wʋ́: «Swɩ̀n ba con, ba dànà ká va ba ta kʋ̀ʋ̀ tə. Cɩ́gá, à tə̀lə́ də ba, yá kʋ nətʋ wá pa ba dʋŋa pa ba pìí ba dəri!» 43 À swɩ̀n kʋ á con, yá á wà à con tan. Á vɩga Ba-Yígúrə́-Jə-Tiu nii tə, á ga zʋ pɛɛn nagwanaa tə wa də yɩrʋ. 44 Amɔrə dwíí tə nə wulə pɛɛn nagwanaa tə wa, dàń nan ba jəri aba, yá ba púə́ á kwa ba dɩŋa ndə twɩɩn nə. Ba zɩgɩ Seyirə nə, ba tɩtaga aba, ba ja va ba yí Ɔrəma. 45 Á nə pìí á bà, á kwi Ba-Yígúrə́-Jə-Tiu yáá con, yá ʋ wà á kori cʋgʋ, ʋ wà ʋ zɩɩn guni ʋ kə á con. 46 Yá á tə yɩn Kadɛswə nə, á dán zənzən.