Yɩɩ Nii 2

1 Kʋ kwa nə, nə viviri nə tì Mɩncanɩ mʋʋ cwəŋə tə, nə va kasɔɔ lanworu tə wa, ndə Ba-Yígúrə́-Jə-Tiu yà nə swɩ̀n à con nətʋ. Nə kɩkarɩ Seyirə pɛɛn nagwanaa tə, dɩan kapʋpʋ.

Yɩzərayɛlə lɩ̀à twá Edomə, də Mʋabə, də Amon lʋʋ níə́ wa

2 Ba-Yígúrə́-Jə-Tiu swɩ̀n à con, ʋ wʋ́: 3 «Á tì máŋá zənzən, á ma kɩkarɩ paan ka tə. Á vivirə á yáá á kə jɩzən saparʋ con. 4 Pa nii kʋ tə lalʋʋ tə nə: Á wá va á twá á nubɩa tə, ba nə yɩ Ezayu dwíí lʋʋ nii sɩswɩan nə, ba nə wulə Seyirə nagwanaa tə wa, á kɛ̀ń. Ba wá dəri á fən, yá á dàń nə cɩa á tɩ̀án nə. 5 Á dànà ká ta kʋ̀ʋ̀ də ba. Cɩ́gá, à bá pa aba naa yituŋə bwálɩ́ də tətə ba lʋʋ nii tə wa. Cɩ́gá, à pɩn Seyirə pɛɛn nagwanaa tə Ezayu nə, sə kʋ ya ʋ tori. 6 Wodiu tə á nə wá də́, yɩ á wá yə̀ ba con də səbiu. Yá nɩ́á tə də tətə á nə wá nyʋn, yɩ á wá yə̀ ba con də səbiu.» 7 Cɩ́gá, Ba-Yígúrə́-Jə-Tiu, á tíú Yɩɩ fwa zəni á yɩra, á jɩɩn tʋtʋŋɩ mama wa. Ʋ ywàń á yuu, á vəli wa, kasɔɔ lanworu nəfarʋ təntə wa. Nə̀ń kʋ bɩna sapwɩlə nə, Ba-Yígúrə́-Jə-Tiu, á tíú Yɩɩ nə wulə də aba, yá won mama wà aba mùrì.

8 Nə kɩkarɩ, nə twá yiŋʋnɩ, nə ga yá nə nubɩa tə, ba nə yɩ Ezayu dwíí tə nə, ba nə wulə Seyirə nagwanaa tə wa. Nə yɩn yiŋʋnɩ də Araba digə cwəŋə tə nə naŋa Elatə, ka vəli Esion-Gebɛrə, nə ga pìí nə twá Mʋabə kasɔɔ lanworu cwəŋə tə. 9 Ba-Yígúrə́-Jə-Tiu swɩ̀n à con, ʋ wʋ́: «Á dànà ká ta Mʋabə tɩ̀án, á dànà ká zɩ̀n kʋ̀ʋ̀ də ba. Cɩ́gá, à bá pa aba tori ba lʋʋ nii tə wa. Kʋ yɩ ba mʋ̀ Lɔtə dwíí tə nə nə, à pɩn Arə lʋʋ nii tə, sə kʋ ya ba tori.» 10 Emimə dwíí tə yà nə wulə lá fuən nə. Ba yà jə dɩ̀àn, ba dáá, ba ga yɩ ləzwəndaran dwíí, ndə Anakə dwíí tə nə. 11 Ba yà jələ ba də Anakə dwíí tə mɛ, ndə Rafa dwíí lɩ̀à nə. Yá Mʋabə tɩ̀án yà ja ba ba boŋə Emimə dwíí. 12 Seyirə nagwanaa tə də yà yɩ Orimə dwíí nə wulə lá fuən nə, Ezayu dwíí tə ma cʋ̀gʋ̀ ba mɩ́ámɩ́án, ba ga jon ba bwálɩ́ tə, ba jə̀ə́ kʋ wa, ndə Yɩzərayɛlə lɩ̀à tə nə tʋn kʋ nətʋ lʋʋ nii tə wa, Ba-Yígúrə́-Jə-Tiu nə pɩn ba, sə ba tɩnɩ.

13 «Sɩ́ʋ́n nə, á zaŋa á bɩn Zerɛdə nacoru tə.» Yá nə dàń bɩn Zerɛdə nacoru tə. 14 Máŋá tə nə nə tì nə ma zɩgɩ Kadɛswə-Barəneya nə, nə va nə bɩn Zerɛdə nacoru tə, yɩn bɩna fɩtwa də nana. Yá bara tə mama yà nə wàá kʋ̀ʋ̀ ba tɛ kʋ máŋá təntə wa, dàń tɩga ba zwɛ̀ lalʋʋ tə titəŋi wa, ndə Ba-Yígúrə́-Jə-Tiu yà nə dùə̀, ʋ ma swɩ̀n kʋ ba con nətʋ. 15 Ba-Yígúrə́-Jə-Tiu də jɩɩn zɩgɩ ba nə, ʋ pa ba tɩ ba zwɛ̀ mɩ́ámɩ́án, lalʋʋ tə titəŋi wa.

16 Máŋá tə ba mʋ̀ bara təntə mama nə tɛ kʋ̀ʋ̀ nə tɩga ba zwɛ̀ lalʋʋ tə titəŋi wa, 17 Ba-Yígúrə́-Jə-Tiu swɩ̀n à con, ʋ wʋ́: 18 «Zə̀n kʋ tə, á wá galɩ Mʋabə lʋʋ nii sɩswɩan tə, á twá Arə lʋʋ nii tə wa á kɛ̀ń. 19 Yá á wá jəri Amon dwíí tə, á nə dànà ká ta ba, á dànà ká zɩ̀n kʋ̀ʋ̀ də ba. Cɩ́gá, à bá pa aba tori Amon dwíí lʋʋ nii tə wa. Kʋ yɩ Lɔtə dwíí tə nə nə à pɩn kʋ, sə ba tɩnɩ.» 20 Ba yà jələ kʋ mʋ̀ nagwanaa tə də, ndə Rafa dwíí lʋʋ nii nə. Rafa dwíí yà nə wulə lá fuən nə, yá Amon dwíí tə yà boŋə ba Zaməzumimə-ba. 21 Ba yà jə dɩ̀àn, ba dáá, ba ga yɩ ləzwəndaran dwíí, ndə Anakə dwíí tə nə. Ba-Yígúrə́-Jə-Tiu cʋ̀gʋ̀ ba mɩ́ámɩ́án Amon dwíí tə yáá con, yá Amon dwíí tə dàń jon ba lʋʋ nii tə, ba jə̀ə́ kʋ wa. 22 Mə nətʋ nə Ba-Yígúrə́-Jə-Tiu tʋn ʋ pa Ezayu dwíí tə də nə, ba nə wulə Seyirə nagwanaa tə wa, máŋá tə wa ʋ nə cʋ̀gʋ̀ Orimə dwíí tə ba yáá con mɩ́ámɩ́án, ʋ ga pa Ezayu dwíí tə jon ba lʋʋ nii tə, ba jə̀ə́ kʋ wa, də zə̀n mama. 23 Avi dwíí tə mʋ̀, ba yà nə wulə tɩbii tə wa, kʋ va kʋ yí Gaza, yɩ Kafətɔrə tɩ̀án tə nə nan Kafətɔrə nə gʋa ba mama, ba ga jon ba tɩan tə, ba jə̀ə́ kʋ wa.

24 «Á zaŋa á va á galɩ Arnon nacoru tə. Ywàń, à ken Ɛswəbon pɩ̀ʋ́ Sihon, ʋ nə yɩ Amɔrə dwíí, də ʋ lʋʋ nii tə á jɩɩn wa. Kʋ nə zɩgɩ sɩ́ʋ́n nə, á zɩan kʋ̀ʋ̀ də wá, á tɛga wá, á jon ʋ lʋʋ nii tə, á tɩnɩ. 25 Kʋ nə zɩgɩ zə̀n, à wá pa á fən ja lʋʋ níə́ tə mama nə wulə tɩa yuu wa, ba ga dəri aba. Ba wá nì á ŋwɛn, fən nəfarʋ ga zʋ ba, kʋ pa ba vɩvaga á yáá nə.»

Yɩzərayɛlə lɩ̀à jon pɩ̀ʋ́ Sihon payuu tə

26 À zɩgɩ Kedemɔtə kasɔɔ lanworu tə wa, à tʋn tʋntʋna Ɛswəbon pɩ̀ʋ́ Sihon con, də sìə́ sʋ̀ràn. À pɩn ba swɩ̀n ʋ con, ba wʋ́: 27 «Nə pɩ̀à sə nə twá n lʋʋ nii tə wa nə kɛ̀ń. Nə wá zə́n nə tì cwəŋə mənəmənə, nə kɛ̀ń, nə bá yori nə va jɩzən, nə à yə̀ə́ jɩgwiə. 28 Nə wá ŋwɩ́n wodiu tə nə nə wá də́, də nɩ́á tə nə nə wá nyʋn n lʋʋ nii tə wa, səbiu nə pa mʋ́. Nə yɩ nə lòrì mʋ́, sə nə zə́n nə twá n lʋʋ nii tə wa, nə kɛ̀ń cɩcɩ. 29 Mə nətʋ nə Ezayu dwíí tə nə wulə Seyirə nagwanaa tə wa, də Mʋabə dwíí tə nə wulə Arə lʋʋ nii wa, pɩn nəba cwəŋə. N də dàń pa nəba cwəŋə, sə nə twá n lʋʋ nii tə wa, nə va nə bɩn Zʋrədɛn mʋnaa tə, nə va nə zʋ lʋʋ nii tə wa, Ba-Yígúrə́-Jə-Tiu, nə tíú Yɩɩ nə pɩn nəba.» 30 Yá Ɛswəbon pɩ̀ʋ́ Sihon wà sɛ̀, sə nə twá ʋ con nə kɛ̀ń. Cɩ́gá, Ba-Yígúrə́-Jə-Tiu, á tíú Yɩɩ yà pɩn Sihon jì pubʋnlwan də bɩcakʋrʋ tíú, sə ʋ ma kə wá á jɩɩn wa, ndə á zə̀n nə na kʋ nətʋ. 31 Ba-Yígúrə́-Jə-Tiu swɩ̀n à con, ʋ wʋ́: «Ywàń, à sinti à kəni Sihon də ʋ lʋʋ nii tə á jɩɩn wa. Kʋ nə zɩgɩ sɩ́ʋ́n nə, á dàń joŋə ʋ lʋʋ nii tə, á tɩnɩ.» 32 Sihon nan ʋ jəri nəba, ʋ mʋ̀ də ʋ kwatara tə mama, sə ba ta nəba Yahasə nə. 33 Ba-Yígúrə́-Jə-Tiu, nə tíú Yɩɩ ken wá nə jɩɩn wa, yá nə ta ʋ mʋ̀ də ʋ bɩ̀á tə, də ʋ lʋʋ lɩ̀à tə mama, nə də́. 34 Kʋ máŋá təntə wa, nə jon ʋ tɩan tə mama, yá nə cʋ̀gʋ̀ tə mama mɩ́ámɩ́án*, nə ma pa dun Yɩɩ nə. Nə gʋa bara tə, də kana tə, də bìsɩ́ná tə mama mɩ́ámɩ́án, nə wà yá nə pa ba ladʋa tətə jɛ́n. 35 Yá nə jɩn vàná tə, nə ga pɛ̀ tɩan tə nə nə ta nə də́ jɩjə wiən tə mʋ̀, nə tɩnɩ. 36 Kʋ nə zɩgɩ Arɔwɛrə tɩʋ tə nə, kʋ nə wulə Arnon nacoru tə bibiru nə, də tɩʋ tə nə, kʋ nə wulə varɩnaa tə wa, kʋ va kʋ yí Galadə lʋʋ nii wa, tɩʋ wà lá yɩn kʋ dɩ̀àn nə doni nə jɩɩn. Ba-Yígúrə́-Jə-Tiu, nə tíú Yɩɩ ken tə mama nə jɩɩn wa. 37 Yá á wà Amon dwíí lʋʋ nii tə mʋ̀ yɩra yí. Kʋ mʋ̀ nə yɩ Yabɔkə nacoru tə nii tɩan tə mama, də pɛɛn nagwanaa tɩan tə, də tɩan tə mama Ba-Yígúrə́-Jə-Tiu, nə tíú Yɩɩ yà nə pɩn nəba nii tə yuu wa, sə nə yá tə.