Yɩɩ Nii 3

Yɩzərayɛlə lɩ̀à jon Baswan pɩ̀ʋ́ Ogə payuu tə

1 Nə viviri nə tì Baswan cwəŋə, nə dɩ̀. Yá Baswan pɩ̀ʋ́ Ogə nan ʋ jəri nəba, ʋ mʋ̀ də ʋ kwatara mama, sə ba ta nəba Edəreyi nə. 2 Yá Ba-Yígúrə́-Jə-Tiu swɩ̀n à con, ʋ wʋ́: «Dàn ká pa ʋ fən ja mʋ́! Cɩ́gá, à wá kə wá n jɩɩn wa, ʋ mʋ̀ də ʋ lɩ̀à tə, də ʋ lʋʋ nii tə mama. Yoo tə n nə ma tʋn Amɔrə dwíí pɩ̀ʋ́ Sihon, ʋ yà nə wulə Ɛswəbon nə, mə kʋ nə n wá ma tʋn Ogə də.» 3 Yá Ba-Yígúrə́-Jə-Tiu, nə tíú Yɩɩ ken Baswan pɩ̀ʋ́ Ogə, də ʋ lʋʋ lɩ̀à tə mama nə jɩɩn wa. Nə ta wá nə də́, yá nə wà yá nə pa ʋ lɩ̀à tə ladʋa tətə jɛ́n. 4 Kʋ máŋá tə wa, nə ta ʋ tɩan tə mama nə də́, tɩʋ nədʋ tətə wà lá yɩn, nə nə wà tɛ nə də́. Tə mama yà yɩ tɩan sapwɩtwa, tə nə wulə Arəgɔbə nagwanaa tə wa, Baswan pɩ̀ʋ́ Ogə payuu tə wa. 5 Tɩan təntə mama yà lwə̀ tə kɩkarɩ də biritaŋan tə nə dara yɩɩ nə, ba ga kə bwə̀rə̀n də boruswaran tə nii nə. Tɩan kapʋpʋ duən də yà wulə lá, tə nə wà lwə̀ tə kɩkarɩ də biritaŋan. 6 Nə cʋ̀gʋ̀ tɩan təntə mama mɩ́ámɩ́án*, nə ma pa dun Yɩɩ nə, ndə nə nə tʋn kʋ Ɛswəbon pɩ̀ʋ́ Sihon yɩra nətʋ. Nə gʋa bara tə, də kana tə, də bìsɩ́ná tə mama mɩ́ámɩ́án tɩʋ mama wa, nə ga cʋ̀gʋ̀ kʋ mɩ́ámɩ́án. 7 Yá nə jɩn vàná tə mama, nə ga pɛ̀ tɩan tə nə nə ta nə də́ jɩjə wiən tə mʋ̀, nə tɩnɩ.

Galadə lʋʋ nii tə tarʋ yoo

8 Mə kʋ zɩgɩ nətʋ, nə ma jon lʋʋ nii tə nə wulə Zʋrədɛn mʋnaa tə yɩɩ yipɩan con, Amɔrə dwíí pɛ̀gá bələ tə jɩɩn wa, kʋ máŋá təntə wa. Kʋ yɩ lʋʋ nii, kʋ nə zɩgɩ Arnon nacoru tə nə, kʋ va kʋ yí Ɛrəmon paan tə. 9 Sidon tɩ̀án yà boŋə Ɛrəmon paan tə Siriyon, yá Amɔrə dwíí tə boŋə ka Senirə. 10 Nə dí dɩ̀àn tɩan təntə mama yuu wa, tə yà nə wulə digə tə wa, də Galadə nagwanaa tə mama, də Baswan nagwanaa tə mama, kʋ ja va kʋ nan Saləka də Edəreyi nə, tə nə yɩ Baswan pɩ̀ʋ́ Ogə payuu tə tɩan. 11 Baswan pɩ̀ʋ́ Ogə cɩcɩ yà nə ga Rafa dwíí tə wa. Ʋ yà jə lugu gədo, kʋ wulə Raba nə, Amon dwíí tə patɩʋ tə wa, də zə̀n mama. Kʋ danɩ yɩ bɛɛ jɩvaŋɩ yiə nʋgʋ, kʋ wanɩ ga yɩ bɛɛ jɩvaŋɩ yiə banɩa.

12 Máŋá təntə wa nə, nə ta lʋʋ nii təntə, nə jon nə tɩnɩ. À pɩn lʋʋ nii tə nə zɩgɩ Arɔwɛrə tɩʋ tə nə, Arənon nacoru tə nii nə, kʋ va kʋ yí Galadə pɛɛn nagwanaa tə faan, Ribɛn də Gadə dwíə́ tə nə. 13 À pɩn Galadə nagwanaa gɩganɩ tə, də Baswan pɩ̀ʋ́ Ogə payuu tə mama, Manase dwíí faan tə nə. Arəgɔbə nagwanaa tə mama, də Baswan nagwanaa tə mama yà yɩ ba boŋə Rafa dwíí lʋʋ nii. 14 Manase bìú Yayirə ta Arəgɔbə nagwanaa tə mama, kʋ ja va kʋ yí Geswurə də Maaka tɩan tə sɩswɩan, ʋ jon ʋ tɩnɩ. Ʋ pɩn ʋ yɩrɩ Baswan nagwanaa tə nə, yá ba boŋə ka Yayirə sàń. 15 À pɩn Galadə nagwanaa tə Makirə dwíí tə nə. 16 À pɩn Galadə nagwanaa tə vàn don Ribɛn də Gadə dwíə́ tə nə, kʋ va kʋ yí Arənon nacoru tə. Nacoru tə dàń yà nə yɩ kʋ sɩswɩan, kʋ ja va kʋ yí Yabɔkə nacoru tə, kʋ nə yɩ ba də Amon dwíí lʋʋ nii tə sɩswɩan. 17 Kʋ súrí Araba varɩnaa tə nə, kʋ sɩswɩan nə yɩ Zʋrədɛn mʋnaa tə, kʋ nə zɩgɩ Kinerɛtə mʋʋ tə nə, kʋ va kʋ yí Araba mʋʋ tə, ba nə boŋə Nəkuən mʋʋ, Pisəga paan tə də̀ń nə, yɩɩ yipɩan con.

18 Kʋ máŋá tə wa, à pɩn aba nii kʋ tə, à wʋ́: «Ba-Yígúrə́-Jə-Tiu, á tíú Yɩɩ ken lʋʋ nii kʋ tə á jɩɩn wa, sə á jon kʋ á tɩnɩ. Á mʋ̀ kwatara babɩran tə mama wá tì á kwatarɩ zɩla, á ja ya á nubɩa Yɩzərayɛlə lɩ̀à tə yáá. 19 Á kana, də á bɩ̀á, də á vàná cɩcɩ nə wá mɛn tɩan tə tə wa, à nə pɩn aba. Cɩ́gá, à yə̀ə́ də á jə vàná kapʋpʋ. 20 Á wá san á nubɩa tə nə, kʋ va kʋ yí máŋá tə ba də nə wá jon lʋʋ nii tə, Ba-Yígúrə́-Jə-Tiu, á tíú Yɩɩ nə pɩn ba, Zʋrədɛn mʋnaa tə vàn tə don nə, yɩɩ yizʋa con, ba tɩnɩ, Ba-Yígúrə́-Jə-Tiu ga pa ba sìə́ ndə á də nə. Yá á lìù mama dàń wá pìí ʋ bà ʋ dwíí tɩa wa, à nə pɩn aba.»

21 Kʋ máŋá tə wa, à pɩn nii kʋ tə Zozuwe nə, à wʋ́: «N yii dìgə̀ kʋ tə mama Ba-Yígúrə́-Jə-Tiu, á tíú Yɩɩ nə tʋn pɛ̀gá bələ təntə yɩra. Mə nətʋ nə Ba-Yígúrə́-Jə-Tiu wá tʋn payun tə mama yɩra, n nə wá twá tə wa n kɛ̀ń. 22 Á dànà ká dəri ba fən. Cɩ́gá, Ba-Yígúrə́-Jə-Tiu, á tíú Yɩɩ tətə nə tɛ, ʋ pɩn aba.»

Moyizə bá zʋ kanan lʋʋ nii tə wa

23 Kʋ máŋá tə wa, à lòrì Ba-Yígúrə́-Jə-Tiu pwəpwə, à wʋ́: 24 «Yuu-Tiu Ba-Yígúrə́-Jə-Tiu, n sinti n bɩrɩ n dánɩ́, də n vàn dɩ̀àn n tʋtʋnʋ tə nə. Cɩ́gá, yɩɩ don wulə lanworu wa, də tɩa yuu wa, ʋ nə wàá ʋ də́də́ŋə́ sə ʋ tʋn tʋ̀tʋ̀nán tə, də dɩ̀àn ndə n nə naaa? 25 À lòrì mʋ́ sə n yá sə à bɩn à nan, à na lʋʋ nii nəzəŋu tə nə wulə Zʋrədɛn mʋnaa tə kwa con, də pɛɛn nəzəŋə tə, də Liban paan tə.» 26 Yá Ba-Yígúrə́-Jə-Tiu lɩŋa zàn à yuu wa, á mʋ̀ yɩrɩ, kʋ pa ʋ wà à con tan. Ba-Yígúrə́-Jə-Tiu swɩ̀n à con, ʋ wʋ́: «Kʋ mɛ nətʋ, kʋ́ʋ̀ dàn ká pìí n swɩ̀n yoo təntə à con. 27 Dɩ̀ Pisəga paan tə yupara wa, n zɩ̀n n yáá, n ywàń yɩɩ yizwɩa con, də jɩzən saparʋ, də jɩgwiə saparʋ con, də yɩɩ yipɩan con, n ga balɩ lʋʋ nii tə də n yɩ́á. Cɩ́gá, n bà galɩ Zʋrədɛn mʋnaa ka tə. 28 Pa nii Zozuwe nə, dán ʋ jɩɩn, sə kʋ pa ʋ ja wʋdɩʋ. Cɩ́gá, ʋ mʋ̀ nə wá jon lalʋʋ kʋ tə yáá, ʋ ja ba ʋ zʋ lʋʋ nii tə wa, n nə wá na, sə ba jon kʋ ba tɩnɩ.» 29 Nə mɛn vara tə wa, ka nə wulə Bɛtə-Pewɔrə yáá con.