Yɩɩ Nii 4

Moyizə dàn lalʋʋ tə jɩ̀àn, sə ba zìlí Yɩɩ nii tə

1 Sɩ́ʋ́n nə, Yɩzərayɛlə lɩ̀à-ba, á cʋga Yɩɩ nii yìə̀n tə ʋ nə pɩn tə pʋ́pʋ́nɩ́ sə ba twá tə nə, də yìə̀n tə ʋ nə bɩrɩ sə tə tʋn, à nə kàrɩ̀ aba, sə á twá tə nə. Tə wá pa á mɩɩ ya lʋʋ wa, tə ga pa á jon lʋʋ nii tə, Ba-Yígúrə́-Jə-Tiu, á nyɩna-ba Yɩɩ tə nə pɩn aba, á tɩnɩ. 2 Á bá súrí won mama sʋgʋ tə nə, à nə pɩn aba nii kʋ yuu wa, yá á bá lɩ won mama kʋ wa. Á mɛ sə á zìlí Ba-Yígúrə́-Jə-Tiu, á tíú Yɩɩ nii yìə̀n tə, ʋ nə pɩn nii tə yuu wa, ndə à nə pɩn tə aba nətʋ. 3 Á yii dìgə̀ kʋ tə Ba-Yígúrə́-Jə-Tiu nə tʋn Baalə-Pewɔrə woŋwanʋ tə yoo wa: Ba-Yígúrə́-Jə-Tiu, á tíú Yɩɩ cʋ̀gʋ̀ bara tə mama á titəŋi wa, ba yà nə tʋŋa ba pɩn Baalə-Pewɔrə woŋwanʋ tə nə. 4 Yá á mʋ̀ lɩ̀à tə nə vwə á tɩ̀àn Ba-Yígúrə́-Jə-Tiu, á tíú Yɩɩ nə, á mama tə wulə zə̀n.

5 Á ywàŋá, à kàrɩ̀ aba Yɩɩ nii yìə̀n tə, ʋ nə pɩn tə pʋ́pʋ́nɩ́ sə ba twá tə nə, də yìə̀n tə ʋ nə bɩrɩ sə tə tʋn, ndə Ba-Yígúrə́-Jə-Tiu, à tíú Yɩɩ nə pɩn nə nii nətʋ, sə á twá tə nə, lʋʋ nii tə wa, á nə vələ sə á jon á tɩnɩ. 6 Á wá zìlí tə nii, á ga twá tə nə. Cɩ́gá, kʋ mʋ̀ nə wá pa aba wʋbʋŋa də pubʋŋa, dwíə́ tə duən yáá con, ba nə wá nì də ba swɩ̀n yìə̀n təntə mama yoo, tə nə pʋ́pʋ́nɩ́ sə ba twá tə nə, yá ba wá swɩ̀n, ba wʋ́: «Dwíí nəfarʋ kʋ tə wá ya wʋbʋnyɩna də pubʋnyɩna!» 7 Cɩ́gá, lʋʋ nii nəfarʋ don kʋ́ʋ̀ wulə, kʋ nə jə yɩa, tə bwə́lə́ kʋ yɩra, ndə Ba-Yígúrə́-Jə-Tiu, nə tíú Yɩɩ nə bwə́lə́ nə yɩra nətʋ, máŋá tə mama wa nə nə bon nə kə ʋ nə naaa? 8 Yá lʋʋ nii nəfarʋ don kʋ́ʋ̀ wulə, kʋ nə jə Yɩɩ nii yìə̀n, tə nə pʋ́pʋ́nɩ́ sə ba twá tə nə, də yìə̀n Yɩɩ nə bɩrɩ sə tə tʋn, tə ga yɩ cɩ́gá, ndə Yɩɩ nii kʋ tə nə, à nə pɩn aba zə̀n kʋ tə naaa?

Yɩɩ bɩrɩ ʋ dun, Ɔrɛbə paan tə yuu wa

9 Á dàń nə cɩa á tɩ̀àn nə, á ga ywàń á tɩ̀àn yuu zəni, á lʋʋ wúlú mama wa, sə á dàn ká swɛ̀ɛ́ yìə̀n tə á yii nə də̀gə̀, sə tə dàn ká jɛ́n á bɩcan wa. Á wá ja tə á ma kàrɩ̀ á bɩ̀á də á nɩ̀án.

10 Dànà ká swɛ̀ɛ́ dɩɩn tə yoo, á nə zɩgɩ Ba-Yígúrə́-Jə-Tiu, á tíú Yɩɩ yáá con, Ɔrɛbə nə, máŋá tə wa Ba-Yígúrə́-Jə-Tiu nə swɩ̀n à con, ʋ wʋ́: «Pa lalʋʋ tə kun duən nə, à yáá con, sə à pa ba nì à nii sʋ̀ràn tə, sə kʋ pa ba kwè ka dəri à fən, máŋá tə mama ba nə wá ya tɩa yuu wa, sə ba ga ja tə ba kàrɩ̀ ba bɩ̀á.» 11 Yá á bólí lá, á zɩgɩ yɩɩ nə, paan tə də̀ń nə. Paan tə yà kwé mən, ka ja dɩ̀ ka yí lanworu titəŋi. Yikunu, də bakwan, də fun yà wulə lá. 12 Ba-Yígúrə́-Jə-Tiu swɩ̀n á con, mən tə titəŋi wa, á nì ʋ kori, yá á dàń nə wà ʋ tətə nɩ, kʋ yɩ ʋ kori cɩcɩ nə á nì. 13 Ʋ bɩrɩ aba ʋ nimarʋ tə, ʋ nə tún də aba, ʋ ga pa aba nii sə á zìlí ʋ yìə̀n fugə tə nii, ʋ nə pʋ́pʋ́nɩ́ ʋ tún kapana pɩpɛɛ bələ yuu wa. 14 Kʋ máŋá tə wa, Ba-Yígúrə́-Jə-Tiu pɩn nə nii sə à kàrɩ̀ aba yìə̀n tə, ʋ nə pɩn tə pʋ́pʋ́nɩ́ sə ba twá tə nə, də yìə̀n tə ʋ nə bɩrɩ sə tə tʋn, sə á twá tə nə lʋʋ nii tə wa, á nə vələ sə á jon á tɩnɩ.

Ka cɩ̀ tɩ̀àn nə də woŋwanan

15 Cɩ́gá, dɩɩn tə nə Ba-Yígúrə́-Jə-Tiu nə swɩ̀n á con, mən titəŋi wa, Ɔrɛbə paan tə də̀ń nə, á wà won mama nyɩnyɩga nɩ. Kʋ mʋ̀ yɩrɩ, á cɩa á tɩ̀àn nə zəni, 16 á dànà ká va á kə á tɩ̀àn durən yìə̀n wa, á ga sà woŋwanʋ, sə kʋ ya Yɩɩ nyɩnyɩga, kʋ nə nyən ndə bɛɛ nə, nə à yə̀ə́ ndə kan nə, 17 nə à yə̀ə́ kʋ nə nyən ndə vàná tə nə wulə tɩa yuu wa nə, nə à yə̀ə́ ndə zunbii tə nə piri lanworu tə wa nə, 18 nə à yə̀ə́ kʋ nə nyən ndə vàná tə nə vəli tə pùə́ baan, tɩa yuu wa nə, nə à yə̀ə́ ndə nɩ́á wa fili yiri mama nə. 19 Á dànà ká zɩ̀n á yáá á kə yɩɩ nə, á ywàń yɩcaʋ tə, də cànà tə, də kacɩlacɛɛ tə, də lanworu wa wiən* tə mama, á pa tə van aba, tə pa á tʋ á nadwana yuu tə yáá con, á pa tə dun*. Mə tə mʋ̀ lanworu wiən tə nə Ba-Yígúrə́-Jə-Tiu, á tíú Yɩɩ pɩn lʋʋ dwíə́ tə duən mama nə, ba nə wulə tɩa yuu mama wa, sə tə ya ba yɩa. 20 Yá á mʋ̀ yɩ Ba-Yígúrə́-Jə-Tiu lɩ aba lii mən wa, Ezwipətə nə, sə á ya lalʋʋ tə nə yɩ ʋ mʋ́ nə tɩ, ndə á zə̀n nə yɩ kʋ nətʋ.

21 Ba-Yígúrə́-Jə-Tiu lɩŋa zàn à yuu wa, á mʋ̀ yɩrɩ, ʋ ga dù də à ba bɩn Zʋrədɛn mʋnaa tə, yá à bá zʋ lʋʋ nii nəzəŋu tə wa, Ba-Yígúrə́-Jə-Tiu, á tíú Yɩɩ nə pɩn aba, sə kʋ ya á tori. 22 Yá à mʋ̀ wá tɩ lʋʋ nii kʋ tə wa, à bá bɩn Zʋrədɛn mʋnaa tə. Yá á mʋ̀ wá bɩn ka, á nan á va á jon lʋʋ nii nəzəŋu tə á tɩnɩ. 23 Á cɩa á tɩ̀àn nə, á dànà ká swɛ̀ɛ́ nimarʋ tə Ba-Yígúrə́-Jə-Tiu, á tíú Yɩɩ nə tún də aba. Á dànà ká sà woŋwanʋ, kʋ nə yɩ won yiri don mama nyɩnyɩga, kʋ nə zɩga kʋ tə nə Ba-Yígúrə́-Jə-Tiu, á tíú Yɩɩ nə pɩn nii kʋ yuu wa. 24 Cɩ́gá, Ba-Yígúrə́-Jə-Tiu, á tíú Yɩɩ yɩ ndə mənvwə nə, ka nə də́ kə̀lə̀kə̀lə̀, ʋ yɩ Yɩɩ tə ʋ nə jə badoli.

25 Máŋá tə á nə jə̀ń lʋʋ nii tə wa á dán, á ga lɩra bɩ̀á də nɩ̀án, á nə tʋn cʋna, á nə fwa woŋwanʋ, kʋ nə yɩ won yiri don mama nyɩnyɩga, sə kʋ pa á tʋn kʋ tə nə lwara Ba-Yígúrə́-Jə-Tiu, á tíú Yɩɩ yáá con, sə kʋ zɩ̀n ʋ lɩŋa, 26 à tì lanworu də tɩa à ma fwa dansɩa, à zɩgɩ á nə zə̀n kʋ tə, á wá nyʋn lʋʋ nii tə wa lala, á nə wá bɩn Zʋrədɛn mʋnaa tə, á nan á jon á tɩnɩ. Á dɩan bá súrí. Cɩ́gá, á wá tɩ á zwɛ̀ mɩ́ámɩ́án. 27 Ba-Yígúrə́-Jə-Tiu wá laga aba, ʋ kə dwíə́ nəkaran* tə wa, yá á dàń wá ga lɩ̀à mancɩn dwíə́ nəkaran tə titəŋi wa, Ba-Yígúrə́-Jə-Tiu nə wá ja aba ʋ va. 28 Yá lá nə, á wá pa dun yɩa nə, tə nə yɩ dàʋ̀ də kapan, ləzoni nə sə̀ də ba jɩ̀àn. Tə yɩ́á ba na, tə zɩan ba nə̀ń, tə nii ba də́, tə mɩɩ ma ba lwán nə̀ń. 29 Yá mə lá nə á wá zɩgɩ, á pɩ̀à Ba-Yígúrə́-Jə-Tiu, á tíú Yɩɩ, á ga wá na wá, də á nə pɩ̀à wá də á bɩcan mama, də á jə̀rə́ mama. 30 Á jɩgwarʋ tə wa, yìə̀n təntə mama wá yí aba. Yá máŋá wa ka nə bɩ̀àn, á wá pìí á bà Ba-Yígúrə́-Jə-Tiu, á tíú Yɩɩ con, á ga wá cʋgʋ ʋ sʋgʋ. 31 Cɩ́gá, Ba-Yígúrə́-Jə-Tiu, á tíú Yɩɩ dəri lɩ̀à yinəgə, ʋ bá vɩ aba ʋ dʋgʋ, ʋ bá cʋ̀gʋ̀ aba, ʋ bá swɛ̀ɛ́ nimarʋ tə yoo, ʋ nə dùə̀ ʋ ma tún də á nyɩna-ba.

Yɩzərayɛlə lɩ̀à yuywaŋʋ tə yoo

32 À lòrì aba sə á bwiə á na yoo tə nə tʋn máŋá wa ka nə kɛ̀ń, də ba tə wà aba lɩrɩ, kʋ nə zɩgɩ dɩɩn tə Yɩɩ nə fwa ləzwənə, ʋ kə tɩa yuu wa. Á zɩga lanworu tə nii don nə, á bwe á va á yí kʋ don, á jə́n yoo nəfarʋ nətən yiri dí yáá kʋ tʋn naaa? Lìù tə nì də ba maŋa yoo nətən yiri naaa? 33 Dwíí don dí yáá kʋ nì yɩɩ kori, də kʋ swɩ̀n mən titəŋi wa, yá ba mɩɩ ga tə wulə lʋʋ wa, ndə á mʋ̀ nə nì á Yɩɩ tə kori nətʋ naaa? 34 Nə à yə̀ə́ yɩɩ don tə dí yáá, ʋ dídə́n sə ʋ twá də də́də́ŋú yiri yiri, də mɩmɩnan, də yogwaran, də kʋ̀ʋ̀, də ʋ jɩɩn dɩ̀àn, də ʋ vagoo, ʋ ga tʋn dɩ̀àn tʋ̀tʋ̀nán tə nə ba kamandon jə, ʋ ma bà jon dwíí don kʋ don jɩɩn wa ʋ tɩnɩ, ndə tə tə mama nə Ba-Yígúrə́-Jə-Tiu, á tíú Yɩɩ nə tʋn ʋ pa aba, á yɩ́á yuu, Ezwipətə nə naaa? 35 Yɩɩ pɩn á mʋ̀ na yìə̀n təntə mama, sə kʋ pa á lwarɩ də Ba-Yígúrə́-Jə-Tiu cɩcɩ nə yɩ Yɩɩ, Yɩɩ don tə̀lə́, də kʋ nə tà ʋ mʋ̀. 36 Ʋ zɩgɩ lanworu wa, ʋ pa á nì ʋ kori, sə ʋ ma kàrɩ̀ aba, yá tɩa yuu wa, ʋ pɩn á na ʋ mən nəfarʋ tə, á ga nì ʋ sʋ̀ràn tə mən təntə titəŋi wa. 37 Ʋ sóní á nyɩna-ba, ʋ ga kúrí ba bɩ̀á tə, ba kwa nə, kʋ mʋ̀ nə pɩn ʋ ma lɩ aba Ezwipətə wa, də ʋ dɩ̀àn nəfarʋ tə. 38 Ʋ dɩŋɩ dwíə́ nəkaran ʋ lɩ á yáá nə, ba dánɩ́ də ba dɩ̀àn nə dwə aba, sə ʋ ga pa á zʋ ba lʋʋ nii tə wa. Ʋ pɩn kʋ aba, sə kʋ ya á tori, ndə kʋ nə yɩ nətʋ zə̀n. 39 Á dàń mɛ sə á lwarɩ zə̀n kʋ tə, á ga ja kʋ á bɩcan wa, də Ba-Yígúrə́-Jə-Tiu nə yɩ Yɩɩ lanworu wa, də tɩa yuu wa yəbə, yá ʋ don tə̀lə́. 40 Yá á dàń wá twá yìə̀n tə nə, Yɩɩ nə pɩn tə pʋ́pʋ́nɩ́ sə ba twá tə nə, də yìə̀n tə ʋ nə pɩn nii tə yuu wa, à nə pɩn aba zə̀n kʋ tə, sə tə pa á ya pupwən lɩ̀à, á mʋ̀ də á bɩ̀á tə nə wá ya lʋʋ wa, á kwa nə, sə tə pa á mɩɩ ya danɩ lʋʋ nii tə wa, Ba-Yígúrə́-Jə-Tiu, á tíú Yɩɩ nə pɩn aba, máŋá mama wuuu.

Yuu yikwala tɩan tə yoo, Zʋrədɛn mʋnaa tə yɩɩ yipɩan con

41 Moyizə kúrí tɩan batwa, Zʋrədɛn mʋnaa tə vàn tə don nə, yɩɩ yipɩan con, 42 sə tə ya yuu yikwala bwálɩ́. Yá lìù nə gʋa ʋ don də kʋ tà sɩnɩ, kʋ ga tà ʋ yà culi wá fuən, lagʋrʋ tə wàá ʋ dəri ʋ vəli tɩan təntə don wa, ʋ ma joŋə ʋ mɩɩ. 43 Tɩan təntə yà nə yɩ Besɛrə, kʋ nə wulə kasɔɔ lanworu digə tə wa, Ribɛn dwíí tə yɩrɩ, də Ramɔtə, kʋ nə wulə Galadə nagwanaa wa, Gadə dwíí tə yɩrɩ, də Golan, kʋ nə wulə Baswan nagwanaa wa, Manase dwíí tə yɩrɩ.

MOYIZƏ BƏLƏ NII SƲGƲ

4.44—11.32

44 Nə̀ń Yɩɩ nii tə Moyizə nə pɩn Yɩzərayɛlə lɩ̀à tə nə. 45 Tə mʋ̀ nə yɩ sʋ̀ràn tə, də yìə̀n tə Yɩɩ nə pɩn tə pʋ́pʋ́nɩ́ sə ba twá tə nə, də yìə̀n tə Yɩɩ nə bɩrɩ sə tə tʋn, Moyizə nə pɩn Yɩzərayɛlə lɩ̀à tə nə, ba nə nan Ezwipətə wa kwa nə. 46 Kʋ yɩn Zʋrədɛn mʋnaa tə kwa con, varɩnaa tə wa, Bɛtə-Pewɔrə yáá con, Amɔrə dwíí pɩ̀ʋ́ Sihon lʋʋ nii tə wa, ʋ yà nə wulə Ɛswəbon nə, Moyizə də Yɩzərayɛlə lɩ̀à tə nə ta wá ba də́, ba nə nan Ezwipətə wa kwa nə. 47 Ba jon ʋ lʋʋ nii tə, də Baswan pɩ̀ʋ́ Ogə lʋʋ nii tə, ba tɩnɩ. Amɔrə dwíí pɛ̀gá bələ təntə yà yɩ ba wulə Zʋrədɛn mʋnaa tə kwa con, yɩɩ yipɩan con. 48 Yɩzərayɛlə lɩ̀à tə jon lʋʋ nii tə mama, kʋ nə zɩgɩ Arɔwɛrə tɩʋ nə, Arənon nacoru tə nii nə, kʋ va kʋ yí Siyon paan tə, ba nə boŋə Ɛrəmon, 49 də Araba nagwanaa tə mama, Zʋrədɛn mʋnaa tə kwa con, yɩɩ yipɩan con, kʋ va kʋ yí Araba mʋʋ tə, Pisəga paan tə də̀ń nə.