Sʋ̀ràn fugə tə, Yɩɩ nə pɩn nii tə yuu wa
5
1 Moyizə bon Yɩzərayɛlə lɩ̀à tə mama ʋ kə duən yáá, ʋ ga swɩ̀n ba con, ʋ wʋ́:«Yɩzərayɛlə lɩ̀à-ba, á cʋga á tíú Yɩɩ nii yìə̀n tə, ʋ nə pɩn tə pʋ́pʋ́nɩ́ sə ba twá tə nə, də yìə̀n tə ʋ nə bɩrɩ sə tə tʋn, à nə swɩ̀n à bɩrɩ aba zə̀n kʋ tə. Á jana tə á yuu wa, á zìlə́ tə nii, á ga twá tə nə. 2 Ba-Yígúrə́-Jə-Tiu, nə tíú Yɩɩ tún nimarʋ də nəba Ɔrɛbə nə. 3 Nimarʋ təntə tà Ba-Yígúrə́-Jə-Tiu tún kʋ də nə nyɩna-ba cɩcɩ, kʋ yɩ ʋ tún kʋ də nə mʋ̀ lɩ̀à tə də nə wulə yəbə zə̀n kʋ tə, nə mɛ mɩɩ tə nə wulə lʋʋ wa. 4 Ba-Yígúrə́-Jə-Tiu swɩ̀n á con mən titəŋi wa nəpon nəpon, paan tə yuu wa. 5 Yá kʋ máŋá tə wa, à mʋ̀ yà wulə á də Ba-Yígúrə́-Jə-Tiu pwə́rə́ wa, sə à jon Ba-Yígúrə́-Jə-Tiu sʋgʋ tə, à swɩ̀n á con. Cɩ́gá, á yà dəri mən tə fən, kʋ pa á wà paan tə yuu dɩ̀. Ʋ swɩ̀n, ʋ wʋ́:
6 “À mʋ̀ nə yɩ Ba-Yígúrə́-Jə-Tiu, n tíú Yɩɩ tə, à nə lɩ mʋ́ Ezwipətə lʋʋ nii tə wa, yongaʋ tə wa.
7 N wà mɛ sə n ja yɩa duən, n súrí à nə.
8 N wà mɛ sə n fwa woŋwanan, tə nə yɩ wiən tə nə wulə lanworu wa nyɩnyɩga, nə à yə̀ə́ wiən tə nə wulə tɩa yuu wa nyɩnyɩga, nə à yə̀ə́ wiən tə nə wulə nɩ́á wa, tɩa də̀ń, nyɩnyɩga. 9 N wà mɛ sə n tʋ n nadwana yuu tə yáá con, yá n wá mɛ sə n pa tə dun. Cɩ́gá, à mʋ̀ Ba-Yígúrə́-Jə-Tiu, n tíú Yɩɩ yɩ Yɩɩ tə à nə jə badoli. À yàá ŋwɩ́n nyɩna-ba tə nə dʋŋa nə cʋna ŋwɩ́rán ba bɩ̀á yɩra, kʋ va kʋ yí ba dwíí tə dəkurən batwa də banɩa nii nyiən. 10 Yá à yàá tʋn wʋywaŋʋ* lɩ̀à tə yɩra ba nə swə nə, ba ga twá à yìə̀n tə nə, à nə pɩn nii tə yuu wa, kʋ va kʋ yí ba dwíí tə dəkurən mʋ̀rʋ̀ nii nyiən.
11 N wà mɛ, sə n bon à mʋ̀ Ba-Yígúrə́-Jə-Tiu, n tíú Yɩɩ yɩrɩ tə vɛɛ. Cɩ́gá, à mʋ̀ Ba-Yígúrə́-Jə-Tiu wá jələ lìù tə nə boŋə à yɩrɩ tə vɛɛ, ndə cʋna lìù nə.
12 Zìlí sìə́ dɩɩn tə, sə n pa kʋ ya à cɩcɩ nyiən, ndə à mʋ̀ Ba-Yígúrə́-Jə-Tiu, n tíú Yɩɩ nə pɩn mʋ́ nii kʋ yuu wa nətʋ. 13 N jə dɩan bardʋ dapanɩ wa, sə n ma tʋn n tʋ̀tʋ̀nán mama. 14 Yá barpɛ nii dɩɩn tə yɩ Ba-Yígúrə́-Jə-Tiu, n tíú Yɩɩ sìə́ dɩɩn. N wà mɛ sə n tʋn won mama kʋ dɩɩn nə. Kʋ nə yɩ n tətə, nə à yə̀ə́ n bìú, nə à yə̀ə́ n bʋ̀á, nə à yə̀ə́ n tʋtʋnbiu, nə à yə̀ə́ n tʋtʋnbʋa, nə à yə̀ə́ n naʋ, nə à yə̀ə́ n bɩ̀nà, nə à yə̀ə́ n vànɩ́ yiri don mama, nə à yə̀ə́ vee tə nə twá ʋ jə̀ə́ n con, sə kʋ pa n tʋtʋnbiu də n tʋtʋnbʋa də wànɩ́ ba síí ndə n nə. 15 N wá lìí n tɩ̀àn də n yɩn yoŋu Ezwipətə lʋʋ nii wa, yá Ba-Yígúrə́-Jə-Tiu, n tíú Yɩɩ lɩ mʋ́ də ʋ jɩɩn dɩ̀àn, də ʋ vagoo. Kʋ mʋ̀ nə pɩn Ba-Yígúrə́-Jə-Tiu, n tíú Yɩɩ pa mʋ́ nii, sə n zìlí sìə́ dɩɩn tə nii, n ma pa wá dun.
16 Zìlí n nyɩna də n nuu, ndə Ba-Yígúrə́-Jə-Tiu, n tíú Yɩɩ nə pɩn mʋ́ nii nətʋ, sə kʋ pa n mɩɩ ya danɩ, n ga nì n ywánɩ́ lʋʋ nii tə wa, Ba-Yígúrə́-Jə-Tiu, n tíú Yɩɩ nə pɩn mʋ́.
17 N wà mɛ sə n gʋ lìù.
18 N wà mɛ sə n cwàrɩ̀.
19 N wà mɛ sə n ŋʋ.
20 N wà mɛ sə n kʋna kʋ̀nkʋ̀n, n kə n don nii nə.
21 N wà mɛ sə n pa n yii zʋ n jəndon kan. N wà mɛ sə n pa n jəndon dìə̀ fɩra ja mʋ́, nə à yə̀ə́ n pa n yii zʋ ʋ kárá, nə à yə̀ə́ ʋ tʋtʋnbiu, nə à yə̀ə́ ʋ tʋtʋnbʋa, nə à yə̀ə́ ʋ naʋ, nə à yə̀ə́ ʋ bɩ̀nà, nə à yə̀ə́ won tə mama, kʋ nə yɩ n jəndon tə nə tɩ.”»
22 Mə sʋ̀ràn təntə nə Ba-Yígúrə́-Jə-Tiu baa ʋ kə yɩɩ nə, paan tə yuu wa, mən titəŋi wa, də bakwan də fun wa, ʋ ma swɩ̀n á púlí tə mama con, ʋ wà won don lá súrí. Ʋ pʋ́pʋ́nɩ́ tə kapana pɩpɛɛ bələ yuu wa, ʋ pa nə.
Moyizə jìgə̀ lwɛnʋ, Yɩɩ də ləzoni pwə́rə́ wa
23 Á nə nì kori tə nə nan yikunu tə titəŋi wa kwa nə, yá paan tə ga kwé mən, á də á dwíə́ yáá tɩ̀án tə, də á sànɩ́ tɩ̀án tə mama twi á yí à yɩra. 24 Yá á swɩ̀n, á wʋ́: «Ba-Yígúrə́-Jə-Tiu, nə tíú Yɩɩ bɩrɩ nəba ʋ dun* tə, də ʋ dánɩ́ tə, nə ga nì ʋ kori mən titəŋi wa. Zə̀n kʋ tə, nə nɩ də Yɩɩ wàá ʋ swɩ̀n də ləzwənə, yá kʋ tíú mɩɩ tə yanɩ lʋʋ. 25 Sɩ́ʋ́n nə, bɛ̀ɛ̀ nə pɩn nə mɛ sə nə tɩ? Cɩ́gá, mən nəfarʋ tə tə wá də́ nəba tə gʋ, də nə tə nə cʋga Ba-Yígúrə́-Jə-Tiu, nə tíú Yɩɩ kori. 26 Wàà nə dí yáá ʋ nì Yɩɩ tə nə nəŋə kori, ndə nə nə, də kʋ swɩ̀n mən titəŋi wa, yá kʋ tíú mɩɩ ga tə wulə lʋʋ wa? 27 N tətə dàń bólí lá, n cʋgʋ kʋ tə mama Ba-Yígúrə́-Jə-Tiu, nə tíú Yɩɩ nə wá swɩ̀n, yá n dàń wá pìí n swɩ̀n kʋ tə mama Ba-Yígúrə́-Jə-Tiu, nə tíú Yɩɩ nə swɩ̀n n con, n bɩrɩ nəba, yá nə wá cʋgʋ kʋ, nə ga twá kʋ nə.» 28 Ba-Yígúrə́-Jə-Tiu nì á sʋ̀ràn tə, máŋá tə wá á yà nə wulə tə á swɩ̀n à con, yá ʋ swɩ̀n à con, ʋ wʋ́: «À nì sʋ̀ràn tə, lalʋʋ kʋ tə nə swɩ̀n n con. Kʋ tə mama ba nə swɩ̀n n con ziən. 29 Ba yà nə jɩn bɩcan təntə, sə ba ma dəri à fən, ba ga twá à yìə̀n tə nə, à nə pɩn nii tə yuu wa, ba də ba bɩ̀á yà wá ya pupwən lɩ̀à, máŋá mama wuuu! 30 Vəli n swɩ̀n ba con, sə ba pìí ba va ba gansilə wa. 31 Yá n mʋ̀ dàń zɩgɩ à con yəbə, yá à wá swɩ̀n yìə̀n tə mama, à nə pɩn nii tə yuu wa, də yìə̀n tə à nə pɩn tə pʋ́pʋ́nɩ́ sə ba twá tə nə, də yìə̀n tə à nə bɩrɩ sə tə tʋn, à bɩrɩ mʋ́, sə n ja tə n ma kàrɩ̀ ba, sə ba ga twá tə nə, lʋʋ nii tə wa à nə pɩn ba, sə ba tɩnɩ.»
32 Á zìlə́ yìə̀n tə nii Ba-Yígúrə́-Jə-Tiu, á tíú Yɩɩ nə pɩn aba nii tə yuu wa, á ga twá tə nə. Á dànà ká yori á kə jɩzən, nə à yə̀ə́ jɩgwiə, á ga yá tə. 33 Á wá twá cwəŋə tə mama, Ba-Yígúrə́-Jə-Tiu, á tíú Yɩɩ nə pɩn aba nii ka yuu wa, sə kʋ pa á mɩɩ ya lʋʋ wa, sə á ya pupwən lɩ̀à, á mɩɩ ga ya danɩ lʋʋ nii tə wa, á nə wá jon á tɩnɩ.