Á mɛ sə á sóní Ba-Yígúrə́-Jə-Tiu, á tíú Yɩɩ tə
6
1 Nə̀ń yìə̀n tə Yɩɩ nə pɩn nii tə yuu wa, də yìə̀n tə ʋ nə pɩn tə pʋ́pʋ́nɩ́ tə sə ba twá tə nə, də yìə̀n tə ʋ nə bɩrɩ sə tə tʋn, Ba-Yígúrə́-Jə-Tiu, á tíú Yɩɩ nə pɩn nii, sə à ma kàrɩ̀ aba, sə á twá tə nə lʋʋ nii tə wa, á nə wá jon á tɩnɩ. 2 Kʋ nətʋ tə wá pa á dəri Ba-Yígúrə́-Jə-Tiu, á tíú Yɩɩ fən, á mʋ̀ də á bɩ̀á, də á nɩ̀án. Yá á lʋʋ wúlú tə mama wa, á wá zìlí ʋ yìə̀n tə mama ʋ nə pɩn tə pʋ́pʋ́nɩ́ sə ba twá tə nə, də tə tə mama ʋ nə pɩn nii tə yuu wa, à nə pɩn aba, yá kʋ wá pa á mɩɩ ya danɩ. 3 Yɩzərayɛlə-lɩ̀à-ba, á dàń wá cʋgʋ tə, á zìlí tə nii, á ga twá tə nə, sə tə pa á ya pupwən lɩ̀à, tə ga pa á pùlì zənzən lʋʋ nii tə wa, nayɩla də tʋ̀ràn nə súə́ lá, tə pàlɩ̀, ndə Ba-Yígúrə́-Jə-Tiu, á nyɩna-ba Yɩɩ nə swɩ̀n kʋ á con nətʋ. 4 Á cʋga, Yɩzərayɛlə lɩ̀à-ba! Ba-Yígúrə́-Jə-Tiu, nə tíú Yɩɩ tə, Ba-Yígúrə́-Jə-Tiu yɩ nədʋ. 5 Á mɛ sə á sóní Ba-Yígúrə́-Jə-Tiu, á tíú Yɩɩ tə, də á waa mama, də á jə̀rə́ mama, də á dɩ̀àn mama. 6 Yá sʋ̀ràn tə tə, à nə swɩ̀n á con zə̀n kʋ tə, á mɛ sə á ja tə á bɩcan wa. 7 Á wá ja tə á ma kàrɩ̀ á bɩ̀á, á ga swɩ̀n tə yoo, máŋá tə á nə wulə á dìə̀ wa, də máŋá tə á nə vələ cwəŋə, máŋá tə á nə tígə́, də máŋá tə á nə zàn. 8 Á wá vwa tə á jɩɩn nə, ndə mɩmɩnʋ nə, tə ga ya mɩmɩnʋ won á tílí nə, á yɩ́á pwə́rə́ wa. 9 Á wá pʋ́pʋ́nɩ́ tə á dìə̀ mimii ywəŋə yɩra, də á tɩan mimien nə.Yɩzərayɛlə lɩ̀à wà mɛ sə ba swɛ̀ɛ́ ba Yɩɩ tə yoo
10 Ba-Yígúrə́-Jə-Tiu, dùə̀ ʋ ma swɩ̀n á nɩbara Abərahamə, də Yɩzakə, də Zwakɔbə con, də ʋ wá pa aba lʋʋ nii tə. Máŋá tə Ba-Yígúrə́-Jə-Tiu, á tíú Yɩɩ nə wá ja aba ʋ zʋ lʋʋ nii təntə wa, á wá na tɩfaran nəzəŋə, tə nə tà á mʋ̀ nə lwə̀, 11 də dìì tə nə súə́ də zɩla yiri mama, tə nə tà á mʋ̀ nə ken lá, də nɩ́á gwàlán nəfaran, tə nə tà á mʋ̀ nə kʋa, də divɛn tɩ̀án, də olivə* tɩ̀án, tə nə tà á mʋ̀ nə cwɛn. Yá máŋá tə á nə dí á sú, 12 sə á cɩ̀ á tɩ̀àn nə, á dànà ká swɛ̀ɛ́ Ba-Yígúrə́-Jə-Tiu yoo, ʋ nə lɩ aba Ezwipətə lʋʋ nii wa, yongaʋ tə wa. 13 Á wá dəri Ba-Yígúrə́-Jə-Tiu, á tíú Yɩɩ fən, ʋ mʋ̀ nə nə á mɛ sə á pa dun, yá ʋ yɩrɩ tə nə á wá ma dù durə. 14 Á bá twá yɩa duən nə, dwíə́ tə nə kɩkarɩ aba yɩa tə wa. 15 Cɩ́gá, Ba-Yígúrə́-Jə-Tiu, á tíú Yɩɩ tə nə wulə á titəŋi wa, jə badoli*. Ba-Yígúrə́-Jə-Tiu, á tíú Yɩɩ lɩŋa wá zàn á yuu wa, ʋ ga wá cʋ̀gʋ̀ á mama mɩ́ámɩ́án, tɩa tə yuu wa. 16 Á bá dídə́n Ba-Yígúrə́-Jə-Tiu, á tíú Yɩɩ, ndə á nə dídə́n wá Masa nə nətʋ. 17 Yá á wá zìlí Ba-Yígúrə́-Jə-Tiu, á tíú Yɩɩ yìə̀n tə, ʋ nə pɩn nii tə yuu wa, də sʋ̀ràn tə ʋ nə swɩ̀n, də yìə̀n tə ʋ nə pɩn tə pʋ́pʋ́nɩ́ sə ba twá tə nə, ʋ nə pɩn aba nii tə yuu wa. 18 Á wá tʋn kʋ tə nə yɩ mənəmənə, də kʋ tə nə ziən Ba-Yígúrə́-Jə-Tiu yáá con, sə kʋ pa á ya pupwən lɩ̀à lʋʋ nii nəzəŋu tə wa, Ba-Yígúrə́-Jə-Tiu nə dùə̀ də ʋ wá pa á nyɩna-ba nə. 19 Ba-Yígúrə́-Jə-Tiu wá dɩŋa á dʋŋa tə mama, ʋ lɩ á yáá con, ndə ʋ nə swɩ̀n kʋ nətʋ.
20 Yá máŋá don wa, á bɩ̀á nə bwe aba, ba wʋ́: «Bɛ̀ɛ̀ nə pɩn Ba-Yígúrə́-Jə-Tiu, nə tíú Yɩɩ ma swɩ̀n sʋ̀ràn tə tə á con, ʋ ga pa aba yìə̀n tə tə, ʋ nə pɩn tə pʋ́pʋ́nɩ́ sə ba twá tə nə, də yìə̀n tə tə, ʋ nə bɩrɩ sə tə tʋn?» 21 Á wá le ba, á wʋ́: «Nə yà yɩ Farawon ywə́ŋə́ Ezwipətə lʋʋ nii wa, yá Ba-Yígúrə́-Jə-Tiu lɩ nəba Ezwipətə lʋʋ nii wa, də ʋ jɩɩn dɩ̀àn. 22 Ba-Yígúrə́-Jə-Tiu tʋn mɩmɩnan də yogwaran nəfaran nə yɩ́á yuu, ʋ ma kə lɛɛ Ezwipətə lʋʋ nii tə, də Farawon də ʋ dìə̀ tə mama nə. 23 Yá ʋ lɩ nəba lá nə, ʋ ja va lʋʋ nii tə wa, ʋ nə dùə̀ ʋ ma swɩ̀n nə nyɩna-ba con, də ʋ wá pa kʋ nəba. 24 Ba-Yígúrə́-Jə-Tiu pɩn nəba nii, sə nə twá yìə̀n tə mama nə, ʋ nə pɩn tə pʋ́pʋ́nɩ́ sə ba twá tə nə, nə ga dəri Ba-Yígúrə́-Jə-Tiu, nə tíú Yɩɩ fən, sə kʋ pa nə ya pupwən lɩ̀à, máŋá mama wuuu, ʋ ga ywàń nə mɩɩ tə yuu, ndə ʋ nə tʋŋa kʋ zə̀n nətʋ. 25 Yá nə dàń wá ya cɩ́gá cwəŋə wa, Ba-Yígúrə́-Jə-Tiu, nə tíú Yɩɩ yáá con, də nə nə zìlí, nə ga twá yìə̀n təntə mama nə, ʋ pɩn nii tə yuu wa, ndə ʋ nə pɩn nəba nii nətʋ.»