Yɩɩ Nii 7

Yɩzərayɛlə lɩ̀à yɩ Ba-Yígúrə́-Jə-Tiu nə tɩ

1 Máŋá tə wa Ba-Yígúrə́-Jə-Tiu, á tíú Yɩɩ nə wá ja aba ʋ bà lʋʋ nii tə wa, á nə wá zʋ á jon á tɩnɩ, ʋ wá dɩŋa dwíə́ nəkaran* kapʋpʋ, ʋ lɩ á yáá nə. Dwíə́ təntə nə yɩ Ɛtə dwíí tə, də Girəgasə tɩ̀án, də Amɔrə dwíí tə, də Kanaan lʋʋ lɩ̀à tə, də Perizi dwíí tə, də Evi dwíí tə, də Yebusə tɩ̀án. Ba yɩ dwíə́ barpɛ, ba nə dáá, ba ga jə dɩ̀àn ba doni aba. 2 Máŋá tə wa Ba-Yígúrə́-Jə-Tiu, á tíú Yɩɩ nə wá kə ba á jɩɩn wa, ʋ pa á ta ba á də́, á mɛ sə á cʋ̀gʋ̀ ba mɩ́ámɩ́án*, á ma pa dun Yɩɩ nə. Á bá tún nimarʋ* də ba, á ga bá fwa pubwanʋ ba yɩra. 3 Á də dwíə́ təntə bá swe duən bwɩ̀ɩ́. Á bá pa á bʋ̀á ba bìú nə sə ʋ swe, á ga bá swe ba bʋ̀á á pa á bìú nə. 4 Cɩ́gá, á də ba nə swe duən bwɩ̀ɩ́, ba wá pwɛ̀ Ba-Yígúrə́-Jə-Tiu də á bɩ̀á tə duən nə, kʋ pa ba pa dun yɩa duən nə, yá ʋ lɩŋa wá zàn á yuu wa, kʋ pa ʋ cʋ̀gʋ̀ aba naa nədʋ. 5 Á dàń nə nəŋə nətʋ tə, á nə mɛ sə á tʋn ba yɩra: Á wá gwɛrɩ ba jwəŋə bwálá tə, á mà ba culu kapana* tə, ba nə zɩ̀n ba zɩgɩ yɩɩ nə, á kɛ́n, á goŋə ba woŋwanʋ Aswera* dacəli tə, á dɩ, á ga sʋ̀rɩ́ ba woŋwanan tə mama mən wa. 6 Cɩ́gá, á yɩ dwíí kʋ nə yɩ parɩ, á pa Ba-Yígúrə́-Jə-Tiu, á tíú Yɩɩ nə. Ba-Yígúrə́-Jə-Tiu, á tíú Yɩɩ kúrí aba, sə á ya dwíí kʋ nə yɩ ʋ mʋ̀ cɩcɩ nə tɩ, dwíə́ tə mama titəŋi wa, tə nə wulə tɩa yuu wa.

Ba-Yígúrə́-Jə-Tiu zìlí ʋ nimarʋ* tə nii

7 Kʋ tà á dánɩ́ nə dwə dwíə́ tə duən mama, nə pɩn Ba-Yígúrə́-Jə-Tiu ma vwa ʋ tɩ̀àn á nə, ʋ ga kúrí aba. Cɩ́gá, á mʋ̀ nə mun dwíə́ tə mama wa. 8 Yá kʋ dàń nə yɩ Ba-Yígúrə́-Jə-Tiu nə swə aba, ʋ ga pɩ̀à sə ʋ nikanɩ tə ʋ nə kàn də á nyɩna-ba nii sú yɩrɩ. Kʋ mʋ̀ nə pɩn Ba-Yígúrə́-Jə-Tiu lɩ aba də ʋ vàn dɩ̀àn, ʋ ga jon aba yongaʋ tə wa, Ezwipətə pɩ̀ʋ́ Farawon jɩɩn wa.

9 Á dàń mɛ sə á lwarɩ də Ba-Yígúrə́-Jə-Tiu, á tíú Yɩɩ cɩcɩ nə yɩ cɩ́gá Yɩɩ. Ʋ mʋ̀ Yɩɩ təntə yɩ pùə́ nədʋ tíú, ʋ ga zìlí ʋ nimarʋ tə, də ʋ wʋywaŋʋ* tə nii, tə nə wulə ʋ də lɩ̀à tə nə swə wá pwə́rə́ wa, kʋ va kʋ yí ba dwíə́ dəkurən mʋ̀rʋ̀ nii nyiən, ba ga sɛ̀ ʋ yìə̀n tə, ʋ nə pɩn nii tə yuu wa. 10 Yá ʋ yàá ŋwɩ́n lɩ̀à tə nə culi wá dʋŋɩ jɩŋɩ ba yɩra, kʋ də̀ń tə yuu, ʋ pa ba nyʋn lá. Ʋ ba dánɩ́ ʋ ma ŋwɩ́n lìù tə nə culi wá dʋŋɩ jɩŋɩ ʋ yɩra, ʋ yàá ŋwɩ́n kʋ jɩŋɩ ʋ yɩra, kʋ də̀ń tə yuu. 11 Á wá zìlí yoo tə, Yɩɩ nə pɩn nii kʋ yuu wa, də yìə̀n tə ʋ nə pɩn tə pʋ́pʋ́nɩ́ sə ba twá tə nə, də yìə̀n tə ʋ nə bɩrɩ sə tə tʋn, à nə bɩrɩ aba zə̀n kʋ tə, sə á twá tə nə.

12 Á nə cʋgʋ yìə̀n təntə, ʋ nə bɩrɩ sə tə tʋn, á nə jɩn tə á bɩcan wa, á ga twá tə nə, Ba-Yígúrə́-Jə-Tiu, á tíú Yɩɩ wá zìlí nimarʋ tə də wʋywaŋʋ tə nii, á də wá pwə́rə́ wa, ʋ nə dùə̀ ʋ ma tún də á nyɩna-ba. 13 Ʋ wá sóní aba, ʋ ga wá fwa zəni á yɩra, ʋ pa á dwíí pùlì kʋ súrí lá. Ʋ wá fwa zəni á dwíí tə yɩra, á nə wá kə lʋʋ wa, də á tɩa tə lənə yɩra, ʋ pa á mɩna, də á divɛn nədʋn, də á nʋga, də á vanfaran, də á vanmɩnɩ pùlì zənzən lʋʋ nii tə wa, ʋ nə dùə̀ ʋ ma swɩ̀n á nyɩna-ba con, də ʋ wá pa kʋ aba. 14 Ʋ wá fwa zəni á yɩra, ʋ doni dwíə́ tə mama. Badɩŋʋ, nə à yə̀ə́ kadɩŋʋ bá ya á wa, vànɩ́ tə nə ba dwíí jə də ma bá ya á vàná wa. 15 Ba-Yígúrə́-Jə-Tiu wá pa yayɩgʋ yiri mama va yiŋʋnɩ kʋ yá aba. Ʋ bá pa tə mʋ̀ Ezwipətə tɩ̀án yayɩpwaran kʋkwɩnan tə, á nə yə̀ə́, nədʋ mama ja aba, yá ʋ wá pa tə ja ba tə mama, ba nə culi aba.

16 Á wá gʋ dwíə́ tə mama, Ba-Yígúrə́-Jə-Tiu, á tíú Yɩɩ nə wá kə á jɩɩn wa, á dànà ká dəri ba yinəgə, yá á dànà ká pa dun ba yɩa tə nə. Kʋ nə tà nətʋ, tə wá ya ndə nyalɩ nə, tə ja aba.

Ba-Yígúrə́-Jə-Tiu yɩ ʋ lalʋʋ tə cɩ̀rʋ́

17 Kʋ wàá də á wá swɩ̀n á waa con, á wʋ́: «Dwíə́ nəkaran* tə tə dáá tə doni nəba, nətə nə nə wá fwa, nə ma jon lʋʋ nii tə ba con?» 18 Á dànà ká dəri ba fən! Á lìə́ á tɩ̀àn kʋ tə Ba-Yígúrə́-Jə-Tiu, á tíú Yɩɩ nə tʋn Farawon, də Ezwipətə lʋʋ nii tə mama yɩra: 19 Á tətə yii dìgə̀ càn nəfaran tə, də mɩmɩnan tə, də yogwaran tə, də jɩɩn dɩ̀àn tə, də vagoo tə Ba-Yígúrə́-Jə-Tiu, á tíú Yɩɩ nə tʋn, ʋ ma lɩ aba! Mə nətʋ nə Ba-Yígúrə́-Jə-Tiu, á tíú Yɩɩ wá tʋn dwíə́ nəkaran tə mama yɩra, á nə dəri ba fən! 20 Ba-Yígúrə́-Jə-Tiu, á tíú Yɩɩ wá tʋn kələnlwəzwənən də tə tə, ʋ pa tə dɩŋa ba, kʋ va kʋ yí máŋá tə ba gɩganɩ tə nə səgə á yáá nə, nə wá tɩ ba zwɛ̀ mɩ́ámɩ́án. 21 Á dànà ká pa ba fən ja aba. Cɩ́gá, Ba-Yígúrə́-Jə-Tiu, á tíú Yɩɩ tə nə wulə á titəŋi wa, yɩ Yɩɩ tə ʋ nə dáá, ʋ ga ba kamandon jə. 22 Ba-Yígúrə́-Jə-Tiu, á tíú Yɩɩ wá dɩŋa dwíə́ nəkaran təntə, ʋ lɩ á yáá nə, mancɩn mancɩn. Á ba wànɩ́ ba á gʋ á zwɛ̀ mɩ́ámɩ́án, naa nədʋ. Kʋ nə yɩn nətʋ, gaʋ wojankadirən wá pùlì, tə zɩgɩ á nə. 23 Ba-Yígúrə́-Jə-Tiu, á tíú Yɩɩ wá kə dwíə́ nəkaran tə á jɩɩn wa. Ʋ wá pa fən zʋ ba zənzən, kʋ va kʋ yí máŋá tə, á nə wá cʋ̀gʋ̀ ba á zwɛ̀ mɩ́ámɩ́án. 24 Ʋ wá kə ba pɛ̀gá tə á jɩɩn wa, yá á wá pa ba yɩra jɛ́n tɩa yuu wa. Ba lìù mama bá wànɩ́ ʋ ta ʋ zɩgɩ á nə, kʋ va kʋ yí máŋá tə, á nə wá cʋ̀gʋ̀ ba á zwɛ̀ mɩ́ámɩ́án. 25 Á wá sʋ̀rɩ́ ba woŋwanan ciciri tə mən wa. Á dànà ká pa wárʋ́ tə, nə à yə̀ə́ sɩ́án tə nə wulə tə yɩra fɩra ja aba, á dànà ká tì tə á ja. Kʋ nə tà nətʋ, tə wá jí ndə nyalɩ nə, tə ja aba. Cɩ́gá, tə yɩ wolwana tə pa Ba-Yígúrə́-Jə-Tiu, á tíú Yɩɩ nə. 26 Á dànà ká ja wolwan á zʋ á dìə̀ wa, kʋ nə tà nətʋ, ba wá cʋ̀gʋ̀ á də kʋ mɛ mɩ́ámɩ́án*, ba ma pa dun Yɩɩ nə. Á wá jələ kʋ ndə wolwan nə, kʋ nə yɩ yobalwarʋ. Cɩ́gá, kʋ mɛ sə ba cʋ̀gʋ̀ kʋ mɩ́ámɩ́án.