Yɩɩ Nii 8

Ba-Yígúrə́-Jə-Tiu kàrɩ̀ Yɩzərayɛlə lɩ̀à tə

1 Á wá twá yìə̀n tə mama nə, Yɩɩ nə pɩn nii tə yuu wa, à nə pɩn aba zə̀n kʋ tə, sə kʋ pa á mɩɩ ya lʋʋ wa, sə á pùlì á súrí lá, á ga jon lʋʋ nii tə, Ba-Yígúrə́-Jə-Tiu nə dùə̀ də ʋ wá pa á nyɩna-ba nə, á tɩnɩ. 2 Á lìə́ á tɩ̀àn cwəŋə tə mama yoo, Ba-Yígúrə́-Jə-Tiu, á tíú Yɩɩ nə pɩn á va ka wa, kasɔɔ lanworu tə wa, bɩna sapwɩlə. Ʋ tʋn kʋ nətʋ, sə ʋ ma mun aba, ʋ ga mɩlɩ aba, ʋ na kʋ tə nə wulə á bɩcan wa. Ʋ yà pɩ̀à sə ʋ lwarɩ, də á nə wá zìlí yìə̀n tə nii, ʋ nə pɩn nii tə yuu wa, nə à yə̀ə́ á nə bá zìlí tə nii. 3 Ʋ pɩn niən ja aba, sə ʋ ma mun aba, yá kʋ kwa nə, ʋ kʋ̀nɩ̀ aba də manə*, kʋ nə yɩ wodiu, á də á nyɩna-ba mɛ yà nə yəri. Ʋ tʋn kʋ nətʋ, sə ʋ ma pa á lwarɩ, də kʋ tà wodiu cɩcɩ nə pɩn mɩɩ ləzwənə nə, kʋ yɩ sʋgʋ tə də mama, kʋ nə naŋa Ba-Yígúrə́-Jə-Tiu nii, nə pɩn mɩɩ ləzwənə nə. 4 Á yɩra gànʋ̀ wà kwɩn, yá á naa də wà ŋʋ̀nɩ̀, tə mʋ̀ bɩna sapwɩlə tə wa. 5 Á lwara kʋ á bɩcan wa, də Ba-Yígúrə́-Jə-Tiu, á tíú Yɩɩ kàrɩ̀ aba, ndə bɛɛ nə yàá kàrɩ̀ ʋ bìú nətʋ. 6 Á zìlə́ yìə̀n tə nii, Ba-Yígúrə́-Jə-Tiu, á tíú Yɩɩ nə pɩn nii tə yuu wa, sə á ma wànɩ́ á ya ʋ coŋi tə wa, á ga dəri ʋ fən.

Də́də́ŋú yiri tə nə wulə nikanɩ lʋʋ nii tə wa

7 Cɩ́gá, Ba-Yígúrə́-Jə-Tiu, á tíú Yɩɩ wá pa á zʋ lʋʋ nii nəzəŋu wa, lʋʋ nii kʋ nə jə nacoŋi, də nabuliyɩa, də tɩa də̀ń nacorən, tə nə bùlì tə naŋa, tə pàlɩ̀ varnɛɛ də pɛɛn wa. 8 Kʋ yɩ dipɛn mɩna, də dipɛn mɩna yiri don, də divɛn tɩ̀án, də kapɩra tɩ̀án, də Gərenadə tɩ̀án, də olivə* tɩ̀án, də tʋ̀ràn lʋʋ nii. 9 Kʋ yɩ lʋʋ nii, á nə wá də́ wodiu, yá á bá goŋə á pùə́ nə á zàn, kʋ nə wà aba yí yɩrɩ. Won mama bá mùrì aba. Kʋ yɩ lʋʋ nii, kʋ kapana wa nə jə lugu, á ga wá lɩ cɩnɩan kʋ pɛɛn wa. 10 Máŋá tə á nə dí wodiu á sú, á wá kə Ba-Yígúrə́-Jə-Tiu, á tíú Yɩɩ lɛ̀ɛ̀, lʋʋ nii nəzəŋu tə yɩrɩ, ʋ nə pɩn aba.

11 Á cɩa á tɩ̀àn nə, á dànà ká swɛ̀ɛ́ Ba-Yígúrə́-Jə-Tiu, á tíú Yɩɩ yoo, á dànà ká vɩ sə á zìlí yìə̀n tə nii, ʋ nə pɩn nii tə yuu wa, də yìə̀n tə ʋ nə bɩrɩ sə tə tʋn, də yìə̀n tə ʋ nə pɩn tə pʋ́pʋ́nɩ́ sə ba twá tə nə, à nə pɩn aba zə̀n kʋ tə. 12 Máŋá tə á nə dí á sú, máŋá tə á nə lwə̀ dizəŋə, á wulə tə wa, 13 máŋá tə á vanfaran də á vanmɩnɩ nə pùlì, á wárʋ́ də á sɩ́án nə pùlì tə pa aba, á jɩjə wiən tə mama nə pùlì tə pa aba. 14 Á cɩa á tɩ̀àn nə, fwìə́ dàn ká sú á bɩcan, kʋ pa á swɛ̀ɛ́ Ba-Yígúrə́-Jə-Tiu, á tíú Yɩɩ yoo, ʋ nə lɩ aba Ezwipətə lʋʋ nii wa, yongaʋ tə wa. 15 Ʋ pɩn á va kasɔɔ lanworu nəfarʋ wa, kʋ nə ba kamandon jə, kʋ nə yɩ dəŋa tə cwan nə wiri, də nɩŋa, də nanyʋnɩ lʋʋ nii, bwálɩ́ nɩ́á nə tə̀lə́ lá, yá ʋ pɩn nɩ́á pwin tə nan pɩ̀ʋ̀ wa, tə pa aba. 16 Ʋ pɩn á də́ manə, kasɔɔ lanworu tə wa, wodiu tə á nyɩna-ba yà nə yəri, sə ʋ ma mun aba, ʋ ga mɩlɩ aba, sə ʋ ma tʋn zəni á yɩra, máŋá wa ka nə bɩ̀àn. 17 Á cɩa á tɩ̀àn nə, á dànà ká swɩ̀n á bɩcan wa, də á dɩ̀àn də á vagoo nə á ma tʋn, á na jɩjə wiən təntə. 18 Á lìə́ Ba-Yígúrə́-Jə-Tiu, á tíú Yɩɩ yoo! Cɩ́gá, ʋ mʋ̀ nə pɩn aba dɩ̀àn, sə á ma tʋn, á na jɩjə wiən təntə, sə kʋ bɩrɩ də nimarʋ* tə ʋ nə dùə̀, ʋ ma tún kʋ də n nyɩna-ba nii súə́, ndə kʋ nə yɩ nətʋ zə̀n kʋ tə.

19 Də á nə swɛ̀ɛ́ Ba-Yígúrə́-Jə-Tiu, á tíú Yɩɩ yoo, á ga pìí á vwa á tɩ̀àn yɩa duən nə, á tʋŋa á pɩn tə, á ga twɩ á nadwana yuu tə yáá con, á pɩn tə dun, à mʋ̀ nə swɩ̀n kʋ á con zə̀n kʋ tə, də á wá tɩ à zwɛ̀ mɩ́ámɩ́án. 20 Cɩ́gá, á wá tɩ ndə dwíə́ nəkaran* tə nə, Ba-Yígúrə́-Jə-Tiu nə gʋa á yáá con, á nə wà Ba-Yígúrə́-Jə-Tiu, á tíú Yɩɩ nii zìlí yɩrɩ.