Yɩɩ Nii 9

Kʋ tà Yɩzərayɛlə lɩ̀à mɛ də lʋʋ nii tə, kʋ yɩ Yɩɩ pubwanʋ

1 Á cʋga, Yɩzərayɛlə lɩ̀à-ba! Á wá bɩn Zʋrədɛn mʋnaa tə zə̀n, á nan á va á jon dwíə́ nəkaran* lʋʋ nii, á tɩnɩ. Dwíə́ təntə dánɩ́ də ba dɩ̀àn dwə aba. Ba lwə̀ tɩfaran ba kɩkarɩ də biritaŋan, tə nə dɩ̀gà tə ja lanworu nə. 2 Kʋ yɩ dwíí kʋ nə jə dɩ̀àn, kʋ ga yɩ ləzwəndaran dwíí. Kʋ yɩ Anakə dwíí tə, á nə yə̀ə́ ba, á ga nì də ba swɩ̀n ba yoo, ba wʋ́: «Wàà nə wàá Anakə dwíí tə yáá nə ʋ zɩga?» 3 Á lwara zə̀n kʋ tə, də Ba-Yígúrə́-Jə-Tiu, á tíú Yɩɩ tətə wulə á yáá ʋ vəli ndə mənvwə nə, ka nə də́ kə̀lə̀kə̀lə̀. Ʋ mʋ̀ nə wá cʋ̀gʋ̀ ba, ʋ mʋ̀ nə wá fʋfʋlɩ ba á yáá con, á ga jon ba lʋʋ nii tə á tɩnɩ. Á wá cʋ̀gʋ̀ ba naa nədʋ, ndə Ba-Yígúrə́-Jə-Tiu nə swɩ̀n kʋ á con nətʋ.

4 Máŋá tə Ba-Yígúrə́-Jə-Tiu, á tíú Yɩɩ nə dɩŋɩ ba ʋ lɩ á yáá nə, á dànà ká swɩ̀n á waa con, á wʋ́: «Kʋ yɩ nə nə yɩ cɩ́gá tɩ̀án nə pɩn, Ba-Yígúrə́-Jə-Tiu pa nə jon lʋʋ nii tə nə tɩnɩ!» Cɩ́gá, kʋ yɩ dwíə́ nəkaran təntə wʋlʋŋʋ tə nə pɩn, Ba-Yígúrə́-Jə-Tiu dɩŋa ba ʋ lɩ á yáá nə. 5 Ɔn ɔn, kʋ tà á nə yɩ cɩ́gá tɩ̀án, də á bɩcan nə yɩ mənəmənə nə pɩn, á wá jon ba lʋʋ nii tə á tɩnɩ. Kʋ yɩ dwíə́ nəkaran təntə wʋlʋŋʋ tə nə pɩn Ba-Yígúrə́-Jə-Tiu, á tíú Yɩɩ wá dɩŋa ba ʋ lɩ á yáá nə, sə kʋ pa ʋ nii tə, ʋ nə kàn də á nɩbara Abərahamə, də Yɩzakə, də Zwakɔbə sú. 6 Á dàń lwara də kʋ tà á nə yɩ cɩ́gá tɩ̀án yɩrɩ, nə pɩn Ba-Yígúrə́-Jə-Tiu, á tíú Yɩɩ ma pa aba lʋʋ nii nəzəŋu kʋ tə, sə á tɩnɩ. Cɩ́gá, á yɩ lalʋʋ tə, á zɩɩn nə ba nə̀ń!

Sɩ́án nabiə tə də Yɩzərayɛlə lalʋʋ tə yolwan yoo

7 Á lìə́ á tɩ̀àn, á dànà ká swɛ̀ɛ́ nətʋ tə á nə zɩ̀n Ba-Yígúrə́-Jə-Tiu, á tíú Yɩɩ lɩŋa, kasɔɔ lanworu tə wa. Kʋ nə zɩgɩ dɩɩn tə á nə nan Ezwipətə lʋʋ nii wa, á bà á yí bwálɩ́ kʋ tə wa, á yɩn lɩ̀à tə, á nə vɩga Ba-Yígúrə́-Jə-Tiu nii. 8 Ɔrɛbə paan tə də̀ń nə, á zɩ̀n Ba-Yígúrə́-Jə-Tiu lɩŋa, yá Ba-Yígúrə́-Jə-Tiu lɩŋa zàn á yuu wa zənzən, kʋ pa ʋ yà pɩ̀à sə ʋ cʋ̀gʋ̀ aba. 9 Máŋá tə à nə dɩga paan tə yuu wa, sə à jon kapana pɩpɛɛ tə, Ba-Yígúrə́-Jə-Tiu nimarʋ* tə ʋ nə tún də aba, nə pʋ́pʋ́nɩ́ tə yuu wa, à yɩn paan tə yuu wa dɩan sapwɩlə, də tɩtɩan sapwɩlə, à wà wodiu dí, à wà nɩ́á nywɩn. 10 Yá Ba-Yígúrə́-Jə-Tiu pɩn nə kapana pɩpɛɛ bələ tə, ʋ tətə jɩfʋa nə pʋ́pʋ́nɩ́ ʋ nii yìə̀n tə mama tə yuu wa, ndə ʋ yà nə twá mənvwə titəŋi wa, ʋ swɩ̀n tə á con nətʋ, paan tə yuu wa, dɩɩn tə nə, á nə kun duən nə, paan tə də̀ń nə.

11 Kʋ yɩ dɩan sapwɩlə də tɩtɩan sapwɩlə nii nə nə, Ba-Yígúrə́-Jə-Tiu pɩn nə kapana pɩpɛɛ bələ tə, ʋ nimarʋ tə nə pʋ́pʋ́nɩ́ tə yuu wa. 12 Ba-Yígúrə́-Jə-Tiu dàń swɩ̀n à con, ʋ wʋ́: «Zàn yəbə, n cú lala! Cɩ́gá, n lalʋʋ tə n nə lɩ Ezwipətə lʋʋ nii wa, ken ba tɩ̀àn durən wa. Ba manwarɩ ba viviri ba kwa ba ma sà cwəŋə tə, à nə tún à pa ba. Ba nyɩan lugu, ba ma fwa woŋwanʋ.» 13 Ba-Yígúrə́-Jə-Tiu swɩ̀n à con, ʋ wʋ́: «À zəən lalʋʋ kʋ tə, yá à nɩ də kʋ yɩ lalʋʋ kʋ zɩɩn nə ba nə̀ń! 14 Yá sə à cʋ̀gʋ̀ ba, à pa ba yɩrɩ jɛ́n tɩa yuu wa, yá à dàń wá pa n mʋ̀ jí dwíí kʋ nə jə dɩ̀àn, kʋ ga dáá kʋ doni dwíí kʋ tə.» 15 À pìí à nan paan tə yuu à cú, də nimarʋ kapana pɩpɛɛ bələ tə à jɩ̀àn wa, yá paan tə mama yà yɩ mən. 16 Yá à nɩ də á cɩ́gá tʋn cʋna, á zɩgɩ Ba-Yígúrə́-Jə-Tiu, á tíú Yɩɩ nə. Á nyɩan lugu, á ma fwa nabiə, yá á manwarɩ á viviri á kwa, á ma sà cwəŋə tə, Ba-Yígúrə́-Jə-Tiu yà nə tún ʋ pa aba. 17 Kʋ nətʋ pɩn, à farɩ kapana pɩpɛɛ bələ tə yà nə wulə à jɩ̀àn wa tɩa, à lwa á yɩ́á yuu.

Moyizə lòrì Yɩɩ Yɩzərayɛlə lɩ̀à tə yɩrɩ

18 À tʋa tɩa Ba-Yígúrə́-Jə-Tiu yáá con, ndə fuən tə nə, dɩan sapwɩlə də tɩtɩan sapwɩlə. À wà wodiu dí, à wà nɩ́á nywɩn, cʋna tə mama yɩrɩ á nə tʋn, á ma fwa kʋ tə nə lwara Ba-Yígúrə́-Jə-Tiu yáá con, á ma zɩ̀n ʋ lɩŋa. 19 Cɩ́gá, fən yà jə nə, à nə nɩ də Ba-Yígúrə́-Jə-Tiu lɩŋa tə zàn á yuu wa zənzən, tə pupwin, kʋ pa ʋ yà pɩ̀à sə ʋ cʋ̀gʋ̀ aba yɩrɩ. Yá Ba-Yígúrə́-Jə-Tiu kʋ́ʋ̀ sɛ̀ à lòrí tə, naa kʋ tə də nə. 20 Ba-Yígúrə́-Jə-Tiu lɩŋa zàn Aron də yuu wa zənzən, kʋ pa ʋ yà pɩ̀à sə ʋ cʋ̀gʋ̀ wá, yá à lòrì Yɩɩ Aron də yɩrɩ, kʋ máŋá təntə wa. 21 À tì nabiə tə nə yɩ á cʋna won tə, à sʋ̀rɩ́ mən wa, à gà ka, à pa ka jì ndə pùrú nə, yá à lwá pùrú təntə nacoru tə wa, kʋ nə pàlɩ̀ kʋ naŋa paan tə yuu kʋ cwí.

22 Tabera nə, də Masa nə, də Kibərɔtə-Tava nə, á zɩ̀n Ba-Yígúrə́-Jə-Tiu lɩŋa. 23 Yá Ba-Yígúrə́-Jə-Tiu nə zɩgɩ Kadɛswə-Barəneya nə, ʋ tʋn aba, ʋ ga swɩ̀n, ʋ wʋ́: «Á vələ á jon lʋʋ nii tə à nə pɩn aba, á tɩnɩ», á vɩga Ba-Yígúrə́-Jə-Tiu, á tíú Yɩɩ nii, á wà cɩ́gá ʋ sʋ̀ràn tə nə pɩn, yá á wà tə cʋgʋ. 24 Á yɩn lɩ̀à tə á nə vɩ Ba-Yígúrə́-Jə-Tiu nii, kʋ nə zɩgɩ máŋá tə mama, à nə lwarɩ aba.

25 À tʋa tɩa Ba-Yígúrə́-Jə-Tiu yáá con, dɩan sapwɩlə də tɩtɩan sapwɩlə, Ba-Yígúrə́-Jə-Tiu yà nə swɩ̀n də ʋ pɩ̀à sə ʋ cʋ̀gʋ̀ aba yɩrɩ. 26 À lòrì Ba-Yígúrə́-Jə-Tiu, à wʋ́: «Yuu-tiu Ba-Yígúrə́-Jə-Tiu, dàn ká cʋ̀gʋ̀ n lalʋʋ tə, kʋ nə yɩ n tori, n nə jon n ma bɩrɩ n dun nə mɛ nətʋ. N mʋ̀ nə lɩ ba Ezwipətə lʋʋ nii tə wa, də n jɩɩn dɩ̀àn. 27 Lìí n tʋ̀tʋ̀nà Abərahamə, də Yɩzakə, də Zwakɔbə yoo. Dàn ká lwɩ̀án lalʋʋ kʋ tə zɩbaniu tə, də ba wʋlʋŋʋ tə, də ba cʋna tə nə. 28 Kʋ nə tà nətʋ, lʋʋ nii tə n nə lɩ nəba kʋ wa lɩ̀à wá swɩ̀n, ba wʋ́: “Ba-Yígúrə́-Jə-Tiu ba dɩ̀àn jə, sə ʋ pa ba zʋ lʋʋ nii tə wa, ʋ yà nə kàn nii sə ʋ pa ba! Yá ʋ culi ba, kʋ mʋ̀ nə pɩn ʋ lɩ ba, sə ʋ pa ba tɩ kasɔɔ lanworu tə wa!” 29 Ba mʋ̀ ga nə yɩ n lalʋʋ, n tori tə n nə lɩ də n dɩ̀àn nəfarʋ, də n vagoo.»