Yɩɩ sɛ̀ Yɩzərayɛlə lɩ̀à lwɩa tə
10
1 Kʋ máŋá tə wa, Ba-Yígúrə́-Jə-Tiu swɩ̀n à con, ʋ wʋ́: «Sa kapana pɩpɛɛ bələ, ndə təntən nyiən tə nə, n ja dɩ̀ à con, paan tə yuu wa. N wá fwa dàʋ̀ daka də. 2 À wá pʋ́pʋ́nɩ́ sʋ̀ràn tə yà nə wulə təntən kapana pɩpɛɛ tə yuu wa, n nə lwə, tə mʋ̀ kapana pɩpɛɛ təntə də yuu wa, yá n wá kə tə daka tə wa.» 3 À dàń fwa sɩnjʋna dàʋ̀ daka, à ga sà kapana pɩpɛɛ bələ ndə təntən nyiən tə nə, à ja à jɩɩn wa, à ja dɩ̀ paan tə yuu. 4 Yá Ba-Yígúrə́-Jə-Tiu dàń pʋ́pʋ́nɩ́ yìə̀n tə, ʋ yà nə pʋ́pʋ́nɩ́ təntən kapana pɩpɛɛ tə yuu wa, ʋ tún kapana pɩpɛɛ təntə də yuu wa. Yìə̀n təntə nə yɩ nimarʋ* sʋ̀ràn fugə tə, ʋ yà nə swɩ̀n á con, paan tə yuu wa, mənvwə titəŋi wa, dɩɩn tə nə, á nə kun duən nə, paan tə də̀ń nə. Yá Ba-Yígúrə́-Jə-Tiu pɩn tə nə. 5 À pìí à nan paan tə yuu à cú, à kə kapana pɩpɛɛ tə daka tə wa, à yà nə fwa, yá tə mɛn lá, ndə Ba-Yígúrə́-Jə-Tiu yà nə pɩn nə nii nətʋ.6 Yɩzərayɛlə lɩ̀à tə zàn Berɔtə-Bene-Yakana nə, ba va Mosera. Mə lá nə Aron tɩga, ba gùrì wá, yá ʋ bìú Eleyazarə jon ʋ yuu nə, Yɩɩ joŋwanɩ tʋtʋŋɩ tə wa. 7 Ba zàn lá ba va Gudəgoda, yá ba zàn Gudəgoda ba va Yɔtəbata, kʋ nə yɩ nacoŋi lʋʋ nii. 8 Kʋ máŋá təntə wa nə Ba-Yígúrə́-Jə-Tiu ken Levi dwíí tə vàn nə, sə ba zɩn Ba-Yígúrə́-Jə-Tiu nimarʋ culu daka* tə, sə ba ya ʋ yáá con ba tʋn ba pa wá, ba ga twá də ʋ yɩrɩ tə, ba ma fwa zəni lalʋʋ tə yɩra, ndə ba nə tʋŋa kʋ nətʋ, də zə̀n mama. 9 Mə kʋ mʋ̀ nə pɩn Levi dwíí tə ba tori, nə à yə̀ə́ tɩa jə lʋʋ nii tə tarʋ wa, ndə Yɩzərayɛlə dwíə́ tə duən tə nə. Ba-Yígúrə́-Jə-Tiu nə yɩ ba tori, ndə Ba-Yígúrə́-Jə-Tiu, á tíú Yɩɩ nə swɩ̀n kʋ ba con nətʋ.
10 À mɛn paan tə yuu wa, ndə təntən tə nə, dɩan sapwɩlə də tɩtɩan sapwɩlə. Ba-Yígúrə́-Jə-Tiu kʋ́ʋ̀ le nə, naa kʋ tə də nə, yá Ba-Yígúrə́-Jə-Tiu yá, ʋ kʋ́ʋ̀ wà sɛ̀ ʋ cʋ̀gʋ̀ aba. 11 Ba-Yígúrə́-Jə-Tiu swɩ̀n à con, ʋ wʋ́: «Zàn n va n ya lalʋʋ tə yáá, sə ba zʋ ba jon lʋʋ nii tə ba tɩnɩ, à nə dùə̀ sə à pa ba nyɩna-ba nə!»
Nii tə Yɩɩ nə pɩn sonu də ka zìlí nii yoo wa
12 Sɩ́ʋ́n nə, Yɩzərayɛlə lɩ̀à-ba, bɛ̀ɛ̀ nə Ba-Yígúrə́-Jə-Tiu, á tíú Yɩɩ pɩ̀à á con, də kʋ nə tà sə á dəri Ba-Yígúrə́-Jə-Tiu, á tíú Yɩɩ fən, sə á va ʋ coŋi tə mama wa, sə á sóní wá, á ga tʋn á pa Ba-Yígúrə́-Jə-Tiu, á tíú Yɩɩ nə, də á waa mama, də á jə̀rə́ mama, 13 sə á zìlí yìə̀n tə Yɩɩ nə pɩn nii tə yuu wa, də yìə̀n tə Yɩɩ nə pɩn tə pʋ́pʋ́nɩ́ sə ba twá tə nə, à nə pɩn aba zə̀n kʋ tə, sə kʋ pa á nì ywánɩ́! 14 Nə̀ń, Ba-Yígúrə́-Jə-Tiu, á tíú Yɩɩ nə tɩ lanworu tə də kʋ dánɩ́ tə mama, də tɩa tə də ka yuu wiən tə mama. 15 Yá kʋ yɩ á nyɩna-ba cɩcɩ nə nə Ba-Yígúrə́-Jə-Tiu vwə ʋ tɩ̀àn, sə ʋ sóní ba, yá ba kwa nə, kʋ yɩ ba dwíí tə, kʋ nə yɩ á mʋ̀ nə ʋ kúrí dwíə́ tə mama wa, ndə á nə na kʋ nətʋ zə̀n kʋ tə. 16 Á dàń lwàná á bɩcanɩ tə, á kʋ́ʋ̀ dànà ká ya zɩbanənyɩna. 17 Cɩ́gá, Ba-Yígúrə́-Jə-Tiu, á tíú Yɩɩ nə wulə yɩa tə mɛ yuu wa, ʋ mʋ̀ nə yɩ yuu-tɩan tə mɛ Yuu-Tiu. Ʋ yɩ Yɩɩ tə ʋ nə dáá, ʋ jə dɩ̀àn, ʋ ga ba kamandon jə. Ʋ ba lìù kúrí, ʋ ma kʋkwanɩ ʋ don, ʋ ma ba vwiŋə joŋə. 18 Ʋ mʋ̀ nə zɩga bitarʋ də kadənu jɩrɩmʋ, ʋ ga swə vee tə nə twá ʋ jə̀ə́, yá ʋ pɩn wá ʋ nii wodiu də ʋ yɩra gànʋ̀. 19 Á mɛ sə á sóní vee tə nə twá ʋ jə̀ə́, á də nə yɩn vərə, á twá á jə̀ń Ezwipətə lʋʋ nii wa yɩrɩ.
20 Á dərə Ba-Yígúrə́-Jə-Tiu, á tíú Yɩɩ fən, á pɩan wá dun, á vwiə á tɩ̀àn ʋ nə, á ga twá ʋ yɩrɩ tə nə, á ma dù durə. 21 Ʋ mʋ̀ nə yɩ á dun, ʋ mʋ̀ nə yɩ á tíú Yɩɩ. Ʋ mʋ̀ nə fwa yofaran tə nə ba kamandon jə, á nə nɩ də á yɩ́á, ʋ pa aba. 22 Á nyɩna-ba vəli Ezwipətə lʋʋ nii, də ba yɩ lɩ̀à sapwɩtwa də fugə. Yá sɩ́ʋ́n nə, Ba-Yígúrə́-Jə-Tiu, á tíú Yɩɩ pɩn á pùlì ndə lanworu kacɩlacɛɛ nə.